12 Iuni

E Faapefea ona Ou Lagona le Siufofoga o Ieova?

Ruta; 1 Samuelu 1–3

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai ua faamalosia ai a tatou molimau?

• Tausia o i latou e lē tagolima. O ai e manaomia la tatou fesoasoani ma tatalo? O le a se mea ua musuia i tatou e faia e fesoasoani atu ai?

• Valaaulia tagata uma ia talia le talalelei. E mafai faapefea ona avea i tatou ma se malamalama i tagata o le aiga po o uo o e le tutusa o tatou talitonuga?

• Tuufaatasia o aiga mo le faavavau. E faapefea ona tatou faaali atu le alofa sili atu ma le lagolago mo tatou aiga ma faia se eseesega lelei i o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe LavaFaaleagaga

Atonu e mafai ona fesootai le toatele o tagata o lau vasega po o le korama i le tama o Samuelu. Ina ua fetalai Ieova ia te ia, sa lei lava se poto masani o Samuelu e iloa ai le siufofoga o Ieova. O le faiaoga a Samuelu, o Eli, sa mafai ona fesoasoani ia Samuelu e aoao ia iloa lenei siufofoga. E pei o Eli, e te maua le avanoa e te molimau atu ai ia i latou e te aoao e finagalo Ieova e talanoa atu ia i latou. E mafai ona e fesoasoani ia i latou e aoao ia iloa le siufofoga o Ieova, e tusa lava pe o loo e aoao foi e faalogo ia te Ia. E mafai ona outou suesue faatasi, mea na aoao mai e Ana perofeta e uiga i faaaliga faaletagata lava ia. Ma e mafai ona e aoao e fai atu i le Alii, e pei ona sa faia e Samuelu, “Fetalai mai ia, auā o loo faalogologo atu lau auauna” (1 Samuelu 3:10).

I le faaopoopo atu i le faitauina o le 1 Samuelu 3 i lenei vaiaso, e mafai ona e sauni e aoao atu e ala i le faitauina o le savali a Peresitene Russell M. Nelson “Faalogo ia te Ia” (Liahona Me 2020 88–92).

Ua saunoa mai Peresitene Nelson ia i tatou ina ia “faateleina [o tatou] gafatia faaleagaga e maua ai faaaliga.”

Aoao Faatasi

Ina ia saunia i latou o loo e aoaoina mo le talanoaga i le asō, mafaufau e fai atu ia i latou e iloilo le 1 Samuelu 3: 1-14. Valaaulia i latou e faasoa mai se mea ua latou aoaoina mai lenei tala e uiga i le lagonaina o le siufofoga o Ieova. O a nisi auala faaopoopo e fesootai mai ai le Alii ia i tatou? O gaoioiga o mulimuli mai e mafai ona fesoasoani i le autalavou e faaloloto ai lo latou malamalama i faaaliga faaletagata lava ia.

• O se tasi nei o auala e fesoasoani ai ia i latou o loo e aoaoina ia malamalama atili i le auala e maua ai faaaliga. E mafai ona e tusia i le laupapa mau faasino o loo fautuaina mai i “Punaoa Faaopoopo” (po o nisi o loo e iloa). Valaaulia le autalavou e faitau mau taitasi. Ona mafai lea ona latou tusia i luga o le laupapa i tafatafa o mau faasino taitasi mea o loo aoao mai e lena mau e uiga i le mauaina o faaaliga faaletagata lava ia. Valaaulia i latou e faasoa mai aafiaga na latou oo i ai i le sailia ma le mauaina o faaaliga. Pe a talafeagai ai, faasoa atu a oe lava aafiaga.

• Tatou te maua faamanuiaga sili pe a tatou aoao ia lagona le siufofoga o le Alii. E mafai ona e amataina se talanoaga e uiga i lenei mea e ala i le fai atu i le autalavou e faasoa mai ni mafuaaga atonu latou te manaomia ai faaaliga. Ona fai atu lea ia i latou e iloilo le savali a Peresitene Russell M. Nelson “Faalogo ia te Ia.” Valaaulia i latou e vaavaai mo fautuaga e fesoasoani ia latou malamalama ai i le ala e lagona ai le siufofoga o le Alii. E mafai foi ona e faaali atu se tasi pe sili atu o vitio mai le tuufaatasiga o le “Hear Him” (ChurchofJesusChrist.org/media). Aisea e taua ai mo i tatou le aoao e lagona le siufofoga o le Alii? Uunai le autalavou e tusifaamaumau mea ua latou aoaoina i a latou apitalaaga po o luga o fasipepa e faapipii i totonu o latou fale.

• Atonu e manatunatu le autalavou o loo e aoaoina pe faapefea ona iloa le taimi e fetalai mai ai le Agaga Paia ia i latou. Mafaufau e faaali atu vitio “How Can I Tell the Difference between the Holy Ghost and My Emotions?” ma le “How Can I Feel the Holy Ghost More Often?” mai le “Face to Face with President Eyring and Elder Holland” (ChurchofJesusChrist.org). O le a se mea ua tatou aoao mai i nei vitio e uiga i le iloa tino i le va o musumusuga a le Agaga ma o tatou mafaufauga? E mafai ona faasoa mai tagata o le vasega po o le korama i auala e mafai ona latou tali atu ai i se uo ua i ai ni fesili talitutusa ma fesili na talanoaina i nei vitio.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• 1 Tupu 19:9–12; Helamana 5:29-31; Mataupu Faavae ma Feagaiga 6:14–16, 21-23; 8:2–3; 11:12–14 (O auala e fetalai mai ai le Alii ia i tatou)

• Mataupu Faavae ma Feagaiga 9:7-9 (E manaomia e faaaliga o tatou lava mafaufauga ma suesuega)

• Ronald A. Rasband, “Agaga e Taitai Mai,” Liahona, Me 2017, 93-96

• Na aoao mai Peresitene Russell M. Nelson, “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia. O’u uso e ma tuafafine pele, ou te aioi atu ia te outou ia faateleina lo outou gafatia faaleagaga e maua ai faaaliga” (“Faaaliga mo le Ekalesia, Faaaliga mo o Tatou Olaga,” Liahona Me 2018, 96).