autalavou o loo nofonofo i luga o le ala laupapa

26 Iuni

Aisea e Taua ai le Legavia i le Fuafuaga a le Atua?

2 Samuelu 5–7; 11–12; 1 Tupu 3; 8;11

aikona o le fefautuaai faatasi

Fefautuaai Faatasi

E taitai e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni au lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. Na faapefea ona tatou faalatalata atili i le Faaola? O faapefea ona tatou taumafai ia avea atili e faapei o Ia?

• Tausia o i latou e lē tagolima. O ai na i ai i o tatou mafaufau talu ai nei? E mafai faapefea ona tatou fesoasoani i nei tagata taitoatasi?

• Valaaulia tagata uma ia talia le talalelei. E faapefea ona tatou tali atu i fesili a tatou uo e uiga i le Ekalesia i se auala e faamalosia ai lo latou faatuatua i le Faaola?

• Tuufaatasia o aiga mo le faavavau. O a nisi o auala e mafai ona tatou faaleleia atili ai a tatou sootaga ma tagata o le aiga lautele, e pei o matua o matua ma tausoga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

O lo tatou Tama Faalelagi, o le e finagalo ia tatou fiafia, na aumaia ia i tatou le tulafono o le legavia. Ma o Satani, o le e manao ia tatou pagatia, ua aoao mai o lenei tulafono e le taua. Na te faia mea uma na te mafaia e faaosooso ai i tatou e faia agasala tau feusuaiga. E mafai ona faatosinaina talavou e ala i ata ma savali ia e feteenai ma aoaoga a le Atua e uiga i feusuaiga. E tatau ia i tatou taitoatasi ona nofouta i nei ituaiga faaosoosoga ma taumafai e tausia o tatou mafaufauga, upu, ma faatinoga ia mamā i o tatou olaga atoa. Tatou te aoaoina lenei lesona mai le mea faanoanoa na tupu i le Tupu o Tavita. Sa avea o ia ma se faataitaiga o le faamaoni tele. Ae na ia lolo atu i faaosoosoga ma solia le tulafono o le legavia (tagai i le 2 Samuelu 11:1-5).

E mafai ona e sauni e aoao atu e ala i le faitauina o le 2 Samuelu 11, le savali a Elder David A. Bednar “Matou Te Talitonu i le Nofomama” (Liahona, Me 2013, 41-44), ma isi punaoa e faatatau i le legavia. O le a se mea e ono musuia ai tagata o le vasega po o le korama e vaai i le legavia i le ala o loo silasila mai ai le Atua? O le a se mea e ono fesoasoani ia i latou ia teena le ala o loo vaai i ai Satani?

o alii talavou i totonu o le vasega

Ina ia tumau faamaoni i le tulafono o le legavia a le Atua, e tatau ona tatou taumafai i aso uma e tausia o tatou mafaufauga, upu, ma faatinoga ia mama.

Aoao Faatasi

O se tasi lenei o auala e faailoa atu ai le autu o le legavia ao taumafai e fesoasoani ia i latou o loo e aoaoina e iloilo mea na latou faitauina i tusitusiga paia. Tusi upu Tavita ma Iosefa i le laupapa. Ona iloilo faatasi lea o le 2 Samuelu 11:1-5 ma le Kenese 39:7-12. Na faapefea ona tali atu Tavita ma Iosefa i faaosoosoga e faia agasala feusuai? O le a se mea ua tatou aoao mai i a laua faataitaiga? Faaaoga gaoioiga nei po o ni a oe lava gaoioiga e faaosofia atili ai talanoaga e uiga i le pogai e taua ai le legavia i le fuafuaga a le Atua.

• Atonu e faamanuiaina le autalavou o loo e aoaoina mai le faauigaina o tulaga faatonuina a le Alii o le mama i feusuaiga. Valaaulia i latou e iloilo le “Mama Atoatoa i Tulaga Feusuai” i le Mo le Malosi o le Auatalavou ([tamaitusi, 2011], 35-37) po o le parakalafa lona fa o le “O le Aiga: O se Folafolaga i le Lalolagi” (ChurchofJesusChrist.org). E faapefea ona ese aoaoga a le Alii e uiga i feusuaiga mai le mea e manao Satani tatou te talitonu i ai? E mafai ona iloilo e le autalavou le “O le Aiga: O se Folafolaga i le Lalolagi,” vaavaai mo fuaitau o loo faamatala ai le pogai e taua ai le mama atoatoa i tulaga feusuai i le fuafuaga o le fiafia a le Tama Faalelagi. O a mea ua tatou aoao mai nei fuaiupu ua fesoasoani ia i tatou e ola amiotonu ai i le lalolagi o aso nei?

• O nisi taimi e le malamalama ai isi i o tatou tulaga faatonuina o le ola mama, aemaise lava ona o nei tulaga faatonuina e matua ese lava mai mea e talitonu i ai le toatele o tagata. E faapefea ona tatou tali atu i a latou fesili? O le a le mea ua tatou aoao mai ia Elder ma Sister Renlund i le vitio “Why Is It Important to Live the Law of Chastity?” mai le “Face to Face with Elder and Sister Renlund” (ChurchofJesusChrist.org). E mafai foi ona suesue le autalavou i mau i “Punaoa Lagolago” mo fuaiupu o faamatala ai faamanuiaga o le ola mama. Atonu e te fai atu ia i latou e faasoa mai o latou manatu e uiga i le pogai ua latou filifili ai e usitaia tulaga faatonuina a le Alii o le mama i tulaga tau feusuaiga.

• O aganuu lauiloa e masani ona aoao mai e le manaomia ona mamā i feusuaiga. Ae e le o amanaʻia e le aganuu mea moni e uiga i faamanuiaga o le legavia ma tulaga matautia o le ola le mama. Ina ia aoao atili e uiga i nei upumoni, e mafai ona suesue le autalavou i le savali a Elder David A. Bednar “Matou Te Talitonu i le Nofomama.” E mafai ona suesue isi i le vaega “O Le Faamoemoega o le Fili,” ma e mafai e isi ona suesue le “O Faamanuiaga o le Ola Mama.” Ona mafai lea ona latou fefaasoaai le tasi ma le isi i mea na latou aoaoina. Uunai i latou e tusi i lalo se fuaitau mai lenei savali lea latou te mananao ia manatua i le isi taimi latou te fetaiai ai ma savali sese e uiga i feusuaiga. E mafai foi ona e faasino atu i latou i le vaega ua faaautuina “O Le Mataupu Faavae o le Salamo.” Talanoa i auala e mafai ona faamalolo ai e le Faaola i latou uma o e mananao e salamo i agasala tau feusuaiga. Faamanatu ia i latou o loo e aoaoina e mafai ona latou talanoa ma o latou matua po o le epikopo pe afai o i ai ni a latou fesili pe moomia foi ona salamo.

Faatino i le Faatuatua

Ia uunaia tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• 1 Korinito 6:19-20 (O o tatou tino o malumalu)

• Alema 38:12 (Afai tatou te pulea o tatou tuinanau, e mafai ona faatumuina i tatou i le alofa)

• Mataupu Faavae ma Feagaiga 25:2; 121:45-46 (O faamanuiaga o le amiomama)

• “Chastity: What Are the Limits?” “True Confidence,” “I Choose to Be Pure” (vitio), ChurchofJesusChrist.org

Aoao Atu i le Ala a le Faaola

I soo se tulaga, o le Faaola o se faataitaiga ma se faiaoga. Sa Ia aoaoina Ona soo i le tatalo e ala i le tatalo faatasi ma i latou. Sa Ia aoaoina i latou e alolofa atu ma auauna atu e ala i le auala sa Ia alofa atu ai ma auauna atu ai ia te i latou. Sa Ia aoaoina i latou i le ala e aoao atu ai Lana talalelei e ala i le auala sa Ia aoao atu ai.