talavou o loo matamata i le konafesi aoao i luga o le telefoni

10 Iulai

Aisea e Taua ai le Mulimuli i Perofeta Soifua a le Atua?

2 Tupu 2–7

aikona o le fefautuaai faatasi

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni au lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na talanoaina e le au epikopo i le fono a le aufono a le autalavou a le uarota? O a faatinoga e mafai ona tatou faia e faatatau i lena talanoaga?

• Tausia o i latou e lē tagolima. E faapefea ona tatou aapa atu i tagata i auala faaKeriso pe a tatou vaaia se manaoga ma ua tatou le iloa le tala e fai atu?

• Valaaulia tagata uma ia talia le talalelei. O le a se mea ua tatou maua i le talalelei a Iesu Keriso ua aumaia ia i tatou le olioli? E faapefea ona tatou faasoa atu lena olioli i isi?

• Tuufaatasia o aiga mo le faavavau. O a nisi auala e mafai ona tatou faaleleia atili ai a tatou sootaga ma tagata o le aiga lautele, e pei o matua o matua ma tausoga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe LavaFaaleagaga

Atonu e i ai sina vaega o Naamanu le lepela iā i tatou uma (tagai i le 2 Tupu 5:1-15). E pei o Naamanu, o lē na oso lona ita ina ua fai atu le perofeta o Elisaia ia te ia e na o le taele lava i le vaitafe ina ia faamaloloina ai, atonu tatou te le malamalama i taimi uma i mafuaaga o fautuaga a o tatou perofeta. Atonu tatou te mafaufau o nisi o a latou fautuaga e le talafeagai ia i tatou ma e le faatatau ia i tatou. Ae ua folafola mai e le Atua faamanuiaga silisili pe a tatou lotomaualalo e mulimuli i le perofeta (tagai Mataupu Faavae ma Feagaiga 21:4-7). E faapefea ona fesoasoani le mulimuli i le perofeta ia te oe e te latalata atili ai i le Alii? O nisi faataitaiga mai le 2 Tupu 4-6 ua faaalia ai le ala e faamanuiaina ai i tatou pe a tatou mulimuli i perofeta soifua?

Ao e sauni e aoao atu e uiga i faamanuiaga e maua mai i le mulimuli i le perofeta soifua, mafaufau e uiga i luitau o feagai ma le autalavou. E faapefea e le mulimuli i le perofeta ona fesoasoani ia i latou i nei luitau? E mafai foi ona e faitaua le savali a Elder Neil L. Andersen “O le Perofeta a le Atua” (Liahona, Me 2018, 24-27) po o le savali a Elder L. Whitney Clayton “Soo Se Mea Lava E Fai Mai Ai O Ia Ia Te Outou, Ia Outou Faia” (Liahona, Me 2017, 97-99).

vasega o alii talavou

O le mulimuli i le perofeta e mafai ona fesoasoani i tagata talavou i luitau o loo latou feagai.

Aoao Faatasi

Ina ia amata se talanoaga, e mafai ona e fai atu i tagata o le vasega po o le korama (po o ni vaega toalaiti) e iloilo se tasi o tala nei: 2 Tupu 4:1-7; 5:6-14; 6:8, 13-17. Fai atu ia i latou e vaavaai mo se mea e uunaia ai i latou e faitau ma mulimuli i aoaoga a perofeta ma aposetolo o aso nei. A uma ona faasoa mai e vaega taitasi se mea na latou mauaina, e mafai ona e fai atu i ni nai talavou e faauma le fuaiupu lenei: “Pe a ou mulimuli i perofeta ma aposetolo soifua, ou te …” Ina ia faaauau se talanoaga e uiga i le mulimuli i perofeta, filifili se tasi pe sili atu o manatu nei.

• Ona e na’o le Ekalesia toefuataiina a le Alii e maua ai perofeta soifua, atonu e maua e tagata o lau vasega po o le korama ni avanoa e tali ai fesili a isi e uiga i perofeta soifua. Atonu e te tusia i luga o le laupapa fesili nei e ono i ai i tagata e uiga i perofeta soifua: Aisea e i ai ai sa outou perofeta? E faapefea ona filifilia se perofeta? E faapefea ona e iloa o le perofeta e saunoa moni lava mo le Atua? E mafai e le autalavou ona suesue mo tali i nei fesili i punaoa i lalo o “Punaoa Lagolago.” E mafai ona latou faataitaia le taliina o nei fesili ma isi fesili o loo ia i latou e faaaoga ai upumoni na latou mauaina ma o latou lava manatu ma poto masani.

• E faapefea ona fesoasoani upu a lo tatou perofeta soifua ia i tatou pe a tatou feagai ma luitau faaletagata lava ia? Ina ia fesoasoani i talavou e tali lenei fesili, e mafai ona e valaaulia i latou e lisi i luga o le laupapa nisi o fautuaga ma valaaulia na tuuina mai e le perofeta i le konafesi aoao talu ai nei. O le a se mea ua tatou faia e faatino ai i lana fautuaga ma valaaulia? O a suiga ua tatou vaaia i o tatou olaga ona o nei taumafaiga? Atonu e te valaaulia se tasi e faasoa mai se aafiaga patino lea na fesoasoani ai fautuaga a le perofeta ia te ia i se luitau faaletagata lava ia.

• E faapefea ona e fesoasoani ia i latou o loo e aoaoina ia malamalama o le mulimuli i le perofeta o le a fesoasoani ia i latou e latalata atili atu ai i le Faaola? O se tasi o auala o le tuuina atu lea ia i latou taitoatasi o se kata laitiiti ma valaaulia i latou e faitau vaega o le savali a Elder Neil L. Andersen “O le Perofeta a le Atua.” E mafai ona latou tusia i le isi itu o le kata se mea na latou aoaoina e uiga i le ala e mafai ona fesoasoani ai le perofeta ia i latou ia latalata atili atu ia Keriso. I le isi itu o le kata, e mafai ona latou tusia ai se mea ua musuia i latou e fai e mulimuli ai i le perofeta. Valaaulia i latou e faasoa mai mea na latou tusia.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou maua.

Punaoa Lagolago

• Amosa 3:7; Mataupu Faavae ma Feagaiga 1:4, 37-38; Mose 6:26-27, 32-36; Autu o le Talalelei, “Perofeta,” topics.ChurchofJesusChrist.org; “Why Do We Have Prophets?” (vitio), ChurchofJesusChrist.org (O le pogai e i ai a tatou perofeta)

• Gary E. Stevenson, “O Le Loto o se Perofeta,” Liahona, Me 2018, 17–20 (O le ala e filifili ai se perofeta)

Aoao Atu i le Ala a le Faaola

“O le liua moni e aofia ai le tele o mea nai lo le na o le lagonaina o le Agaga o faamautu upumoni i o tatou agaga; e tatau foi ona tatou faatino i luga o na upumoni. I le faaopoopo atu i le fesoasoani i tagata aoao ia lagona ma iloa le Agaga, fesoasoani ia i latou e faatino i luga o musumusuga latou te maua” (Aoao Atu i le Ala a le Faaola, 10).