24 Iulai

O a Faamanuiaga e Oo Mai i le Mauaina o Sauniga o le Malumalu?

Esera 1; 3–7; Neemia 2; 4–6; 8

Fefautuaai Faatasi

E taitai e se uso o le au peresitene o le korama po o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu a Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O faapefea ona tatou vaaia le aao o le Alii i o tatou olaga?

• Tausia i latou e lē tagolima. E faapefea ona tatou lagolagoina le tasi ma le isi i mea o loo tatou feagai?

• Valaaulia tagata uma ia talia le talalelei. E faapefea ona tatou faaaogaina tekinolosi o se meafaigaluega e faasoa atu ai le talalelei?

• Tuufaatasia o aiga mo le faavavau. O a tatou mea o loo fai e fesoasoani ai i o tatou aiga ia o mai ia Keriso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitaia e se taitai matua po o se talavou; 25-35 minute

Saunia Oe Lava Faaleagaga

Ina ua toe foi tagata Iutaia mai le tafeaga i Papelonia, na latou maua Ierusalema ma lona malumalu ua faatafunaina (tagai 2 Tupu 25:1–10; 2 Nofoaiga a Tupu 36:17–19). Na moomoo tagata ia toe fausia le malumalu. Ma, i totonu o se taimi puupuu, na latou amataina se faagasologa o le toe fausia ma na olioli ina ua mae’a le malumalu (tagai Esera 3:8-13; 6:16-22). O aso nei, i le avea ai o ni tagata o le feagaiga a le Atua, tatou te fausia foi ni malumalu ma fiafia pe a mae’a fausia se malumalu fou. Aisea? Ona o sauniga o le malumalu e taitai atu i faamanuiaga silisili a le Tama Faalelagi. Latou te aumaia le malosi faaleagaga. Latou te aumaia ia i tatou taiala. Ma e latou te fesoasoani ia i tatou ia avea e faapei o le Atua ma maua mea uma ua ia te Ia. (Tagai i le Mataupu Faavae ma Feagaiga 84:19–22; 109:22–26.)

O le a faapefea ona e fesoasoani i le autalavou ia moomoo mo le malumalu e pei ona sa faia e le fanauga a Isaraelu? O le a faapefea ona e fesoasoani ia i latou ia naunau ma o latou loto atoa e osia feagaiga ma le Atua i Lona maota paia? Ao e sauni e aoao atu, mafaufau e suesue le savali a Peresitene Thomas S. Monson “Faamanuiaga o le Malumalu” (Liahona, Me 2015, 91-93) ma le tusiga “Why Ordinances and Covenants Matter” i le temples.ChurchofJesusChrist.org.

E fesoasoani sauniga o le malumalu ia i tatou ia avea faapei o le Atua ma maua mea uma o loo ia te Ia.

Aoao Faatasi

Ina ia fesoasoani i tagata o le vasega po o le korama e tulimatai atu i faamanuiaga e mafai ona latou maua mai sauniga o le malumalu, e mafai ona e valaaulia i latou e iloilo le Esera 3:10-13; 6:16, 21–22. Fai atu ia i latou e faasoa mai upu po o fuaitau e faaalia ai lagona o tagata Iutaia e uiga i le toe fausia o le latou malumalu. Aisea e avea ai le fauga o se malumalu o se mea e patipatia? E faapefea e le i ai o a tatou malumalu i aso nei ma le galuega tatou te faia ai iina ona fesoasoani ia i tatou e latalata atili atu ai i le Faaola? O nisi nei manatu e fesoasoani i talavou ia malamalama i faamanuiaga e mafai ona latou maua i le malumalu.

• Ina ua faapaia e Iosefa Samita le Malumalu o Katelani, na ia tuuina atu le tatalo o le faapaiaga lea o loo maua i le Mataupu Faavae ma Feagaiga 109. O lenei tatalo o loo faamatala ai le tele o faamanuiaga e mafai ona tatou maua e ala i sauniga o le malumalu. E mafai ona suesue e tagata o le vasega po o le korama vaega o lenei tatalo, ae maise lava fuaiupu 12-26, vaavaai mo faamanuiaga na tatalo ai Iosefa. E mafai ona latou lisi nei faamanuiaga i le laupapa. Atonu e te fai atu i le autalavou e talanoa e uiga i auala e mafai ai e nei faamanuiaga ona faamalosia i latou i le taimi nei ma le lumanai. Faasoa atu lau molimau e uiga i faamanuiaga ua e mauaina e ala i sauniga o le malumalu.

• Ina ia fesoasoani i tagata o le vasega po o le korama e faasoa mai o latou lagona e uiga i le malumalu, fai atu ia i latou e faauma le fuaiupu lenei: “Pe a ou mafaufau i le malumalu, ou te lagona …” Atonu e te valaaulia i latou e faitau parakalafa muamua e lima o le savali a Elder Kent F. Richard “O Le Mana o le FaaleAtua” (Liahona, Me 2016, 118-20). Aisea e sili atu ai ona tatou manaomia le malumalu nai lo se isi lava mea? O a ni mea na tatou aoaoina e uiga i le mana ua tuuina mai e le Atua ia i tatou e ala i sauniga o le malumalu? Ona mafai lea e le autalavou ona suesue le vaega o totoe o le savali a Elder Richard, vaavaai mo faamanuiaga e oo mai ia i tatou ao tatou auai i sauniga o le malumalu. Pe mafai foi ona latou vaavaai mo nei faamanuiaga i le savali a Peresitene Thomas S. Monson “Faamanuiaga o le Malumalu.”

• Ina ia fesoasoani i tagata o le vaega po o le korama ia manatunatu i osigataulaga na naunau nisi e faia ina ia maua ai faamanuiaga o le malumalu, e mafai ona e faaali atu le vitio “Temples Are a Beacon” (ChurchofJesusChrist.org). Aisea na naunau ai le aiga o Mou Tham ia faia nei osigataulaga maoae e o atu ai i le malumalu? (Tagai foi Thomas S. Monson, “O Le Malumalu Paia—O Se Sulu Ta’iala i le Lalolagi,” Liahona, Me 2011, 90-94.) O a ni osigataulaga e manaomia ona tatou faia e maua ai faamanuiaga o le malumalu? Atonu e mafai ona auai atu i le fonotaga/sauniga se tasi na malaga talu ai nei i le malumalu e faasoa lona aafiaga. Atonu e te valaaulia le autalavou e suesue le savali a Elder Ronald A. Rasband “Fautuaina Atu i le Alii” (Liahona, Nov. 2020, 22-25) ma faasoa atu faamanuiaga o le i ai o se pepa faataga o le malumalu. E mafai foi ona outou iloiloina faatasi fesili o le pepa faataga o le malumalu (tagai Russell M. Nelson, “Malelega Faaiu,” Liahona, Nov. 2019, 120-22).

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou maua.

Punaoa Lagolago

• Quentin L. Cook, “Vaai ia Oe Lava ia i totonu o le Malumalu,,” Liahona Me 2016, 97–100

Aoao Atu i le Ala a le Faaola

“Ao e aoao atu, nai loo le nao le tuuina atu o faamatalaga, fesoasoani i le autalavou e saili upumoni o le talalelei mo i latou lava i tusitusiga paia ma upu a perofeta” (Aoao Atu i le Ala a le Faaola,28).