14 Aokuso

E Faapefea Ona Ou Maua le Olioli i le Mulimuli ai i le Faaola?

Salamo 1–2; 8; 19–33; 40;46

Fefautuaai Faatasi

E taitai e se uso o le au peresitene o le korama po o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni au lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O faapefea ona tatou maua le olioli i le mulimuli ai ia Iesu Keriso?

• Tausia o i latou e lē tagolima. O ai o la tatou uarota po o le nuu o manaomia la tatou fesoasoani? E mafai faapefea ona tatou fesoasoani ia i latou?

• Valaaulia tagata uma ia talia le talalelei. E mafai faapefea ona tatou fesoasoani i le tasi ma le isi ia saunia mo le galuega faafaifeautalai?

• Tuufaatasia o aiga mo le faavavau. E faapefea ona tatou fesoasoani i taumafaiga a le tatou uarota e faia talafaasolopito o aiga ma galuega o le malumalu?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

O le a se mea e aumaia ai le olioli ia te oe? Atonu e fai mai tagata latou te maua le fiafia i taimi ma uo ma aiga, o se mea e fiafia i ai, pe na o se aso e aunoa ma tofotofoga. Na aoao mai Peresitene Russell M. Nelson, “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga. Afai o le taulaiga o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia” (Olioli ma le Ola ai Faaleagaga,”,” Liahona Nov. 2016, 82). O le tele o Salamo o loo atagia mai ai foi lenei lava feau: “E te faailoa mai ia te au le ala o le ola: o i ou luma le fiafia e malie ai” (Salamo 16:11).

Mafaufau i ni luitau atonu o loo feagai ma tagata o lau vasega po o le korama. O le a faapefea ona e fesoasoani ia i latou ia malamalama o le olioli moni e oo mai i le ola ai i le faatuatua i le Faaola—e oo lava i taimi faigata? Manatunatu i lenei fesili a o e sauni e aoao atu. Vaavaai mo ni fuaitau fesootai e mafai ona e faasoa atu i lau vasega po o le korama i Salamo po o i le savali a Peresitene Nelson “Olioli ma le Ola ai Faaleagaga.”

O le olioli moni e oo mai i le ola ai i le faatuatua i le Faaola, e oo lava i taimi faigata.

Aoao Faatasi

Mafaufau e valaaulia lau vasega po o le korama e iloilo nisi o mau nei Salamo 1; 8; 19; 23; 27. O a ni mea ua tatou aoao mai i nei Salamo e uiga i mea e aumaia le olioli ia i tatou? Ona mafai lea ona e faaaoga le tasi pe sili atu o gaoioiga nei e fesoasoani ia i latou o loo e aoaoina ia malamalama atili o le olioli moni e sau mai le mulimuli ia Iesu Keriso.

• Tatou te mananao uma lava e maua le olioli, ae e tatau ona tatou malamalama i le mea e oo mai ai le olioli moni ma le mea e taitai moni atu ai i le faanoanoa. Fai atu i le autalavou e faasoa mai nisi o mea e aumaia ia i latou le olioli ma le pogai e mafai ai nei mea. Tusi i le laupapa “Ua i ai tagata, ina ia latou maua le olioli” (2 Nifae 2:25). Ona valaaulia lea o le autalavou, taitoatasi pe i ni vaega laiti, e suesue se tasi pe sili atu o mau i “Punaoa Lagolago” ma lisi mea latou te mauaina e taitai atu ai i le olioli. E mafai foi ona e faaali atu le vitio “We Can Find Happiness” (ChurchofJesusChrist.org). O a nisi auala o taumafai tagata ia maua ai le olioli lea e taitai moni atu ai i le faanoanoa? O faapefea ona aumaia e le Faaola ia i tatou le olioli?

• Ua tatou iloa uma tagata o loo feagai ma luitau e ui o loo latou taumafai i le mea sili latou te mafaia e ola ai i le talalelei. E mafai faapefea ona e fesoasoani ia i latou o e aoaoina ia malamalama e mafai ona tatou maua le olioli e tusa lava pe o luitauina o tatou olaga? E mafai ona e fai atu ia i latou e suesue le savali a Peresitene Russell M. Nelson “Olioli ma le Ola ai Faaleagaga” po o le savali a Peresitene Steven J. Lund “Mauaina o le Olioli ia Keriso” (Liahona, Nov. 2020, 35-37). O a faataitaiga tatou te maua o ni tagata na maua le olioli ia Keriso e ui lava i o latou luitau? O le a se mea ua tatou aoao mai i nei aafiaga? O a aafiaga e mafai ona tatou faasoaina atu?

• O i tatou uma lava e aafia gofie i lagona popole ma le le fiafia a o tatou feagai ai ma luitau o le olaga. Mo nisi, o nei lagona o se taua i le olaga atoa. Atonu e manuia lau vasega po o le korama mai le talanoaina o nei luitau ma le ala e mafai ai ona fesoasoani le Faaola ia i latou o loo tauivi ma le popole ma le faanoanoa. Ina ia amataina lenei talanoaga, atonu e te fai atu i le autalavou e suesue le savali a Elder Jeffrey R. Holland “Peiseai o se Ipu ua Nutililii,” ae maise lava i parakalafa mulimuli e fa (Liahona, Nov. 2013, 40-42), po o le savali a Sister Reyna I. Aburto “I Mala i Manū, Iesu, Afio Mai!” (Liahona, Nov. 2019, 57–59). Valaaulia tagata o le vasega po o le korama e vaavaai mo upumoni e aoga ia i latou ma faasoa mai mea na latou mauaina. Ia uunaia le autalavou e talanoa ma se matua po o se taitai faatuatuaina pe asiasi i le mentalhealth.ChurchofJesusChrist.org pe a latou manaomia se fesoasoani.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataio 5:1–12; 1 Peteru 4:12–13; 2 Nifae 2:25–27; Mosaea 2:41; 3:3–7; 4:2–3; Alema 36:16–22; 4 Nifae 1:15–16 (O le auala e maua ai le olioli)

• D. Todd Christofferson, “O Le Olioli o le Au Paia,” Liahona, Nov. 2019, 15-18

• “Suicide Prevention and Ministering,” ChurchofJesusChrist.org

Aoao Atu i le Ala a le Faaola

Na silafia lelei e le Faaola i latou na Ia aoaoina—ma ituaiga tagata e mafai ona avea ai i latou. A o latou tauivi, sa faaauau pea ona Ia alofa ia i latou. E faapefea ona e faaali atu lou alofa ma lau lagolago ia i latou e te aoaoina?