tamaitai talavou o loo ataata

28 Aokuso

E Mafai Faapefea e le Faaola ona Fesoasoani ia te Au i Taimi o Ou Tofotofoga?

Salamo 102–103; 110; 116–119; 127–128; 135–139; 146–150

aikona o le fefautuaai faatasi

Fefautuaai Faatasi

E taitai e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai nei ua tatou latalata atili atu ai i le Tama Faalelagi ma Iesu Keriso?

• Tausia o i latou e lē tagolima. O i ai se tasi na siitia mai talu ai nei i le tatou uarota pe faatoa auai i le Ekalesia? E faapefea ona tatou fesoasoani ia i latou ia lagona le taliaina?

• Valaaulia tagata uma ia talia le talalelei. O i ai ni gaoioiga o loma nei e mafai ona tatou valaaulia ai a tatou uo e auai ai?

• Tuufaatasia o aiga mo le faavavau. O a ni taumafaiga e mafai ona tatou faia e faamaumau ai a tatou talafaasolopito patino?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

O luitau tatou te feagai e mafai ona tatou lagonaina ai le vaivai, lē fiafia, toilalo, ma le tuuatoatasi. Na malamalama lelei tusitala o le Salamo i na lagona ma faamatalaina ma le mamana e faapea: “Ua sasaina ma ua magumagu lo’u loto pei o le vao iti; … ma ua avea au e pei o le manu itiiti e nofo toatasi i luga i le fale” (Salamo 102:4, 7). Ae faatasi ai ma lea malosi tele, ua latou molimau mai o le liliu atu i le Faaola o le a aumaia ai le mapusaga: “Lo’u agaga e, ia e faamanu atu ia Ieova, aua foi nei galo se mea e tasi o ana mea alofa; o lē faamagaloina au amio leaga uma lava; o lē faamaloloina ou ma’i atoa uma; o lē faaolaina mai lou ola ai le tuugamau; o lē faapaleina oe i le alofa ma le alofa mutimuti vale” (Salamo 103:2-4).

Mafaufau i faamanuiaga o le a oo mai i tagata o lau vasega po o le korama pe a latou malamalama atili i le auala e mafai ona fesoasoani ai le Faaola i o latou tofotofoga. Na faapefea ona fesoasoani le Faaola ia te oe? Ao e sauni e aoao atu, mafaufau e suesue le savali a Peresitene Henry B. Eyring “Faaosoosoina, Tofotofoina, ma Faaiilaina” (Liahona, Me 2020, 96-99) ma le “Faigata” i le Autu o le Talalelei (topics.ChurchofJesusChrist.org).

konafesi a le autalavou

O le a fesoasoani ma faamafanafana le Faaola ia i tatou i o tatou tofotofoga.

Aoao Faatasi

Atonu e te amata i le fai atu i tagata o le vasega po o le korama e suesue le Salamo 102; 103, ma le116, vaavaai mo le auala na fesoasoani ai le Faaola ia i tatou ia tatou taumafaiga e manumalo i tofotofoga. E mafai ona latou galulue taitoatasi pe i ni vaega e tusi ni nai fuaiupu e uiga i mea na latou maua ona faasoa mai lea o mea na latou tusia. Filifili se tasi pe sili atu o gaoioiga nei e fesoasoani ia i latou ia malamalama atili ai i lenei autu.

• O viiga e mafai ona valaaulia ai le Agaga ma aoao atu aoaoga faavae i se ala mamana. Mafaufau e iloilo se viiga e uiga i le Faaola o fesoasoani ia i tatou i o tatou tofotofoga, e pei o le “Le Faavae Malosi” (Viiga, nu. 85). O le a se mea o aoao mai e le pese e uiga i le fesoasoaniga e mafai ona tuuina mai e le Faaola ia i tatou? Ona mafai lea e le autalavou ona suesue fuaitau o mau i “Punaoa Lagolago.” E ono aoga mo i latou le faamauina o se fuaitau mai le viiga po o se tasi o mau o loo faamanatu ai ia i latou e saili le Faaola i o latou puapuaga.

• E mafai ona fesoasoani le savali a Peresitene Henry B. Eyring “Faaosoosoina, Tofotofoina, ma Faaiilaina” ia i latou o loo e aoaoina ia malamalama atili i fesili e pei o nei: O a nisi o faamoemoega o tatou tofotofoga faaletino? O le a faapefea ona fesoasoani le Faaola ia i tatou i o tatou luitau? O le a se mea e mafai ona tatou faia e maua ai le fesoasoani ma le mana o le Faaola? Mafaufau e tusi fesili nei i luga o le laupapa. E mafai e le vasega po o le korama ona vaavaai mo tali i le savali a Peresitene Eyring. Mo se faataitaiga, o le a se mea tatou te aoao mai i tala e uiga i le tina o Peresitene Eyring i le amataga ma le faaiuga o le savali? Atonu e te fai atu i tagata taitasi ia mafaufau i le ala e mafai ona latou faaaoga ai mea ua latou aoaoina i o latou lava tofotofoga. Atonu o le a naunau nisi talavou e faasoa mai o latou manatu.

• Na faamatala e Sister Lisa L. Harkness le tala i le faafilemuina e le Faaola o le afā e aoao atu ai e mafai e Ia ona faatoafilemu matagi i o tatou olaga (tagai Mareko 4:35-41; “Inā Malū Ia,” Liahona, Nov. 2020, 80-82). Atonu e te valaaulia se tagata o le vasega po o le korama e sau saunia e faasoa mai le mea na ia aoaoina e uiga i le Faaola mai le tala faatusipaia. E mafai foi e lenei tagata ona faaali se ata (tagai Tusi Ata o le Talalelei, nu.40). Ona suesue lea e le autalavou o le mea na aoao mai e Sister Harkness e uiga i le auala e “i ai i la tatou vaa” le Faaola ao tatou feagai ai ma luitau. Atonu e te valaaulia tagata taitoatasi e faasoa mai le auala na fesoasoani ai le Faaola ia i latou i o latou tofotofoga, e aofia ai le ala na Ia fesoasoani ai ia i latou e ala atu i isi tagata. Uunai le autalavou e faasoa mai o latou aafiaga i se tasi latou te iloa o le e moomia le filemu o le Faaola.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Isaia 53:3–5; Eperu 2:17–18; Alema 7:11–13; 36:3; Eteru 12:27 (O le a fesoasoani le Faaola ia i tatou i o tatou tofotofoga)

• Dieter F. Uchtdorf, “O Le A Faia e le Atua se Mea E Le’i Mafaufauina,” Liahona, Nov. 2020, 51--54

• Cristina B. Franco, “O Le Mana Faaola o Iesu Keriso,” Liahona, Nov. 2020, 60-62

• “Mountains to Climb” (vitio), ChurchofJesusChrist.org

Aoao Atu i le Ala a le Faaola

“O le faia o fesili e faamalosia ai tagata aoao e molimau atu i mataupu faavae na aoaoina e mafai ona avea o se auala mamana e valaaulia ai le Agaga. … O a latou molimau—ma molimau a isi i le vasega—o le a tuputupu ae ao molimauina e le Agaga le moni” (Aoao Atu i le Ala a le Faaola,32).