ulugalii talavou o loo tilotilo atu i le malumalu

27 Fepuari

Aisea e Taua ai le Faaipoipoga e Faavavau?

Kenese 24–27

aikona o le fefautuaai faatasi

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mataupu na talanoaina e le au epikopo i le tatou fonotaga a le aufono a le autalavou a le uarota? O a ni mea e mafai ona tatou faia o se vasega po o le korama e faavae i na talanoaga?

• Tausia o i latou e lē tagolima. E mafai faapefea ona tatou aapa atu i tagata i auala faaKeriso pe a tatou vaaia se manaoga ma ua tatou le iloa le tala e fai atu?

• Valaaulia tagata uma ia talia le talalelei. O a mea ua tatou maua i le talalelei a Iesu Keriso ua aumaia ia i tatou le olioli? E mafai faapefea ona tatou faasoa atu lena olioli i isi?

• Tuufaatasia o aiga mo le faavavau. O a mea o loo tatou faia e saili ai igoa o tatou tuaa o e o loo manaomia sauniga o le malumalu? O le a se mea e mafai ona tatou faia e fesoasoani ai i isi i le sailia o igoa o latou tuaa?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le taimi o le fonotaga.

Aoao Atu le Aoaoga Faavae

Ia taitaia e se taitai matua po o se talavou; 25-35 minute

Saunia Oe Lava Faaleagaga

Ina ua oo i le taimi ua tatau ona faaipoipo ai Isaako, na faatonuina e Aperaamo lana auauna e saili mai se avā mo Isaako. Na mananao Aperaamo ma Isaako e saili se avā mo Isaako o le e mafai ona osia ma tausia feagaiga ma le Alii ma aoao i latou i lana fanau. O Repeka sa o se tamaitai faamaoni na osia le feagaiga o le faaipoipoga ma Isaako. A o faamanino mai e tusitusiga paia o le faaipoipoga e taua tele i le Atua, o aoaoga a le Atua e uiga i le faaipoipoga ua luitauina i o tatou aso. Ae ua folafola mai e Ana perofeta o le faaipoipoga “ua faauuina e le Atua” (“O le Aiga: O se Folafolaga i le Lalolagi, ” ChurchofJesusChrist.org). E taua mo i latou e te aoaoina le malamalama i mea moni e faavavau e uiga i le faaipoipoga. O le faia o lea mea o le a fesoasoani ai e saunia i latou mo ma molimauina lenei vaega taua o le fuafuaga a lo tatou Tama Faalelagi.

O a ni lagona o le autalavou o loo e aoaoina e uiga i le faaipoipoga e faavavau? E mafai faapefea ona e fesoasoani ia i latou e mafaufau i le pogai ua faatotonugalemu ai le faaipoipoga e faavavau i le fuafuaga a le Tama Faalelagi? A o e sauni e aoao atu, e mafai ona e iloilo le savali a Elder D. Todd Christofferson “Aisea e Faaipoipo Ai, Aisea e Fai ai se Aiga” (Liahona, Me 2015, 50–53). E mafai foi ona e suesue i le “O Le Aiga: O se Folafolaga i le Lalolagi” (ChurchofJesusChrist.org).

se aiga o loo savalivali i le togavao

O faaipoipoga e faavavau ma aiga e totonugalemu i le fuafuaga a le Tama Faalelagi.

Aoao Faatasi

O talavou e te aoaoina atonu na mafaufau loloto i le taua o le faaipoipoga ao latou faitauina le Kenese 24-27 i lenei vaiaso. Valaaulia i latou e iloilo le Kenese 24. Fai atu ia i latou e faasoa mai fuaiupu o loo faaalia ai na taua le faaipoipoga i tagata o loo faamatalaina i lenei mataupu. Valaaulia i latou e mafaufau i le pogai e faatotonugalemu ai faaipoipoga e faavavaau i le fuafuaga a le Atua. O gaoioiga o loo i lalo e mafai ona fesoasoani ia i latou ina ia sili atu lo latou malamalama i le taua o le faaipoipoga.

• Atonu e maua e tagata o lau vasega po o le korama ni avanoa e faamatala ai le pogai e taua ai le faaipoipoga ia i latou. Valaaulia i latou e vaai faalemafaufau e i ai sa latou uo e talitonu o le faaipoipoga ua le toe aoga ma e le tatau ai. E mafai foi ona latou tusi atu i lenei uo e faamatala ai le taua o le faaipoipoga i le fuafuaga a le Tama Faalelagi. Uunaia i latou e faaaofia upumoni latou te maua i le “O Le Aiga: O Se Folafolaga i le Lalolagi.” E mafai foi ona latou faaaoga mau o loo maua i le “Punaoa Lagolago” po o i le “Faaipoipoga, Faaipoipo” i le Taiala i Tusitusiga Paia (scriptures.ChurchofJesusChrist.org). Valaaulia i latou e faasoa mai i le vasega mea na latou tusia.

• Ina ia amata se talanoaga e uiga i le taua o le faaipoipoga, tusi upu nei i luga o le laupapa: Aisea e taua ai le faaipoipoga e faavavau? Tuu atu ni nai minute i le autalavou e tusi ai tali i le fesili. Ona valaaulia lea o i latou e faasoa mai a latou tali. E mafai foi ona latou vaavaai mo ni tali faaopoopo i le savali a D. Todd Christofferson “Aisea e Faaipoipo Ai, Aisea e Fai ai se Aiga” (Liahona, Me 2015, 50–53). E mafai foi ona latou matamata i le vitio “Why Is Marriage Sacred to Heavenly Father?” mai le “Face to Face with Elder and Sister Renlund” (ChurchofJesusChrist.org). Valaaulia i latou e faasoa mai a latou molimau i le pogai e taua ai le faaipoipoga.

• Tatou te maua le tele o faamanuiaga ao tatou taliaina aoaoga a le Atua e uiga i le faaipoipoga ma taumafai e ola ai. Ae o nisi tagata—e aofia ai i latou o loo faia le mea sili latou te mafaia e ola ai i le talalelei—o loo feagai ma luitau i le fausiaina o ni faaipoipoga fiafia ma faavavau. Atonu e te fesili atu i le autalavou e talanoa e uiga i nisi o na luitau. O le a se mea e mafai ona tatou faia nei ia saunia ai mo na luitau? Atonu e te valaaulia foi i latou e faitau vaega mulimuli e lua o le savali a Elder Neil L. Andersen “O le Mata o le Faatuatua” (Liahona, Me 2019, 34-38). E mafai ona talanoaina e tagata o lau vasega po o le korama ni faataitaiga na latou vaaia i o latou olaga po o i talafaasolopito a o latou aiga i tagata o taulimaina ma le faamaoni luitau e pei na ta’ua e Elder Andersen. E mafai faapefea ona fesoasoani le Faaola ia i latou uma o loo feagai ma luitau ao latou sailia faamanuiaga o se faaipoipoga e faavavau?

Faatino i le Faatuatua

Ia uunaia le vasega po o le korama e manatunatu ma tusia le mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataupu Faavae ma Feagaiga 49:16–17 (O le faaipoipoga e fesoasoani e faataunuu ai le faamoemoega o le Foafoaga)

• Mataupu Faavae ma Feagaiga 131:1–4; 132:15–21 (O le faaipoipoga e faavavau e manaomia mo le faaeaga)

• “Renaissance of Marriage,” “How Did Elder and Sister Bednar Meet?” mai le “Face to Face with Elder and Sister Bednar” (vitio), ChurchofJesusChrist.org

Aoao Atu i le Ala a le Faaola

Na valaaulia e le Faaola Ona soo ina ia faatino le faatuatua ma ola i mea moni na Ia aoaoina atu. E mafai faapefea ona e valaaulia i latou o loo e aoaoina ia ola i upumoni o loo latou aoaoina?