Eberi 10

N na Kanga Ni Kakorakora Au Onimaki Iroun Iesu Kristo ni Katoa Bong?

Te Otinako 14–17

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke aia Botoniango te Kooram n Nakoanibonga ae te Aaron. Ngkane, irarikin are kam na marooro imarenami iaon te kainano ae e onoti n te kiraati ke te kooram, ko na tangiria n taekin namakin ao boto ni iango man te maungatabu ni kabuta. Titiraki aika imwina a kona n ibuobuoki.

• Tera botoniango ke rongorongo aika a kakaawaki nakoira? Tera ae kakorakora ara onimaki iroun Iesu Kristo?

• Tera ae kakorakora ara koaua irouia burabeti aika maiu? Tera ae ti namakinna bwa ti na karaoia ibukin baike ti reiakin ke n namakini?

• Tera ae ti kainnanoia ni karaoia n te kiraati ke n te kooram n uring ao ni karaoi nanon reirei ake ti ongo n te maungatabu ni kabuta?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

N te aro bwa ti na kamaiuaki man te rereua, tibun Iteraera a kainnanoia n reirei aroia n onimakina te Uea. A onimaki Irouna ibukin kakai n te mwakuri ni kamaiu, n aron katabwenaan Taari ae Uraura, ao kakai naba n te maiu ae teimatoa, n aron te berena mai i karawa. Ti tebo naba ma naake ko reireiniia. Ngkana a na kamaiuaki man mwanangaia n tamnei n rereuan te maiu ae mamate, a riai ni kamwakura te onimaki iroun Iesu Kristo. Ao a riai ni kamwakura aia onimaki ni katoa bong, tiaki n ti tabetai. Tabeman mai ibuakoia ake ko reireiniia a kona n aki namakinna ae e bure aia onimaki. Ko kona ni buokiia n ataia ae e rikirake te onimaki teutana imwiin teutana, ni katoa bong. E rikirake rinanon bwaai aika uarereke man bebete aika ti teimatoa ni karaoi. Iangoi bwaai aikai ngkana ko kamatebwaia Te otinako 14–17 n te wiiki aei. Ko na bae ni kamatebwaia naba a na rongorongo Beretitenti Dallin H. Oaks “Bwaai Aika a Uarereke man Beebete” (Riaona, Meei 2018, 89–92).

Ti kona ni kakorakora ara onimaki ni katoa bong ni kawai aika uarereke ao ni bebete.

Te Uaia n Reirei

Ni moana te marooro, ko kona n tuangiia kairake bwa a na tibwauai tabeua kateia ni katoa bong aika a na buokiia ni karaoi bwaai aika raoiroi. A kona bwaai aikai n aron kateimatoaan te maiu ae raoroi ke ni kakorakora aia onimaki. Tera ae e kona n riki ngkana tiaki kateimatoai katei aikai? A na kanga ara mwakuri ni katoa bong ni karaoi bwaai aika raoiroi ni kabotauaki nakon kaetieti ae e anga te Uea nakoia tibun Iteraera ni boboti berena? (taraa Te Otinako 16:16–21). Ko kona ni buoka te kiraati ke te kooram ni kabotau aia taneiai tibun Iteraera ma ara kekeiaki ni kakora ara onimaki iroun Iesu Kristo ni katoa bong. Te katooto, tera ae e anganira te Uea are ti tebo ma te berena ni katoa bong are E anganiia tibun Iteraera? Tera ae ti kona ni karaoia ae titebo ma bobotakin te berena? N reitanako am marooro, kabongna teuana ke e mwaiti riki waaki ni kakukurei aika oti inano ke teuana ae bon am kario.

• Ikotaki ni wareka Aramwa 37:6–7. N te kiraati ke te kooram, koroi iaon te boote tabeua bwaai aika “a korakora ao bwaai aika a uarereke” are e a tia te Uea ni kaoira bwa ti na karaoi ni katoa bong bwa ti na roko Nakoina. A kona ngkanne nake ko reireiniia bwa a na rinanon ana rongorongo Beretitenti Dallin H. Oaks “Bwaai Aika Uarereke man Beebete” ni kakaai bwaai aika uarereke aika a kona n iai mwiia aika korakora ni maiura. Tera mwiin bwaai aikai aika kona n riki? Tera ae ti kaungaaki bwa ti na karaoi bwa aonga n riki bwaai aikai bwa mwakoron maiura ae teimatoa ni katoa bong?

• Bukin tera te onimaki iroun Iesu Kristo e kainnanoaki bwa e na kateimatoaaki ni katoa bong? Ni buokiia membwa ni kamatataia riki n te bwai aei, ko kona ni kaota teuana ke e raka riki te witeo aika koreaki iaan “Reitan Bwaai n Mwakuri.” Inanon witeo aikai, Unimwaane D. Todd Christofferson e reirei taekan kainnanoan te kekeiaki ni katoa bong ni kamatoa ara onimaki. Kaoia nake ko reireiniia bwa a na tibwauai bwaai aika a reiakin ake a kaungaia ni karikirakea aia onimaki iroun Iesu Kristo ni katoa bong.

• Te kekeiaki ae teimatoa ni katoa bong bon kawai aika moan te raoiroi ni kakorakorai ara onimaki iroun Kristo. Ni maroroakina te iango aei, bane wareka ana kateniua n iango Unimwaane David A. Bednar n ana rongorongo “More Diligent and Concerned at Home (Rikirake riki ni Wanawana ao Raraoma n te Mweenga)” (Riaona, Nobembwa 2009, 17–20). Tera reirei aika ti kona n reiakin man a na kabwarabwara n te korotamnei inanon ana aobiti? A kanga reirei aikai ni kaeineti nakon ara kekeiaki ni karikirakea ara onimaki iroun Iesu Kristo? Warekan Aramwa 32:21, 26–43 ni botaki e kona ni karinaki nakon am marooro. Tera atatai aika nano aika ti kunei n aron kakorakoraan ara onimaki iroun Iesu Kristo?

• Ti kona ni karikirakea ara onimaki man rineakin te reirei man taneiai are e kataia. Ko kona ni kaota te witeo “Spiritual Whirlwinds” (ChurchofJesusChrist.org). Baane maroroakinna bwa tera ae ti kona ni karaoia n tain te kataaki ni kakorakorai ara onimaki. (Taraa naba Neil L. Andersen, “Spiritual Whirlwinds,” Riaona, Meei 2014, 18–21.) Ko kona n titirakiniia kaain te kiraati ke kaain te kooram n tibwauai taai ngke a namakinna bwa aia onimaki iroun Kristo e kataaki ao tera ae a karaoia ni kakorakora aia onimaki n te tai anne. Taekinna bwa Te Otinako 14–17 anne e kabwarabwara ngurengureia ae teimatoa, ke aia tangitang, tibun Iteraera ngke a rinanon kataaki. A kanga winnanti n taai ni kataaki a kamemerea ara onimaki? Tera te kaokoro imarenan te winnanti ao kaotan tabeaiangara nakon Tamara are i Karawa n taai ni kangaanga?

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• “Daily Bread: Pattern,” “Daily Bread: Change,” “Daily Bread: Experience” (videos), ChurchofJesusChrist.org

Reirei n Ana Kawai te Tia Kamaiu

Buokiia kaain te kiraati bwa a na ataia bwa a na kanga ni kaoa te Tamnei bwa e na raoniia n aia tai ni marooro. A kona ni karaoa aei rinanon “katei … , aron tabeakinaia bon irouia, ao aron namakinan te euangkerio irouia” (Reirei n Ana Kawai te Tia Kamaiu, 15).