Meei 8

N na Kanga n Ataia Bwa te Atua E a Tia ni Kabwarai au Bure?

Te Otinako 35–40; Nakoaia Ibonga 1; 16; 19

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, ikotaki kaokioka n atonga Ana Botoniango te Bootaki n Ataeinnaine ke ana Botoniango Te Nakoanibonga ae te Aaron. Ngkanne kaira te marooro iaon te mwakuri ni kamaiu ao karietataaki kabongana teuana ke raka man taian titiraki inano ke oin am titiraki (taraa Aeniboki ni Kabuta, 10.2, 11.2, ChurchofJesusChrist.org). Babaire ao mwakuria te bwai ae maroroakinaki.

• Maiuakina te euangkerio. E kanga te tanrikaaki nakon te Uea ni buokiira bwa ti na tokanikai iaon ara kangaanga?

• Tararuakiia naake iai kainnanoia. Antai ae ti ataia are e kainanoa ara tataro ao ara iraorao?

• Kaoaiia ni kabane ni karekea te euangkerio. Tera babaire n tibwaua te euangkerio n tia ni marooroakinaki inanon bowiin te kauntira n te uoote ibukiia kairake? E na kanga ara kiraati ke kooram ni kairaki n tibwauan te euangkerio?

• Katiteuanakiia utu in akea tokina. E kanga mwakurian rongorongon te utu ni kakorakora ara reitaki maTamara are i Karawa ao Iesu Kristo?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Aomata n tabetai a miimi ngkana a tia ni “karaoa ae tau” ni kabwaraakin aia bure. E ngae ngke e anaa te kekeiaki n raira nanom, koauana e aki kabwaraaki ara bure ibukina ti katiai rinanin mwakuri aika onoti ke ni karaoai mwakuri ae a kantaningaki. E kabwaraaki ara buure ngkai ti kariaia te nanoanga are karaoaki iroun Iesu Kristo. Bon inanon te kawai aei are arora n aomata e kona ni bitaki.

N taai ake ngkoa, te mwakuri n nebo ao angakarea man ana tua Mote e kainetiia tibun Iteraera nakon Ana Mwakuri ni Kamaiu te Tia Kamaiu. Ngkai te Uea e kabwarabwara ianon Nakoaia Ibonga 16:30, “Ba e na karaoaki kabaran ami bure n te bong naba aei, kaitiakingkami, kam na itiaki imatan te Uea.” E koaua, te mwakuri n nebo n ti ngaia e aki kona n anganiira kabwaraan ara bure. Te kabwarabure a roko mai iroun Iesu Kristo. Inanon ara bong, otenanti n aron te bwabetito ao te toa a kaineta ara iango ao nanora nakon te Tia Kamaiu. A buokiira n oota bwa Ngaia n taanako e kabwarai ara bure ngkana ti rairi nanora.

E kanga Tamara are i Karawa ni buokiiiko n ataia ae e a kabwaraaki am bure? Ko na riai ni kamatebwaia Motiaea 4:1–3 ao ana marooro BeretitentiTad R. Callister “Ana Mwakuri ni Kamaiu Iesu Kristo” (Riaona, Meei 2019, 85–87). Te rongorongo aei e kona ni buokiia koraki ake ko reireiniia n oota bwa Tamara are i Karawa e kabwarai ara bure ngkana ti rairi nanora.

E kabwaraaki ara buure ngkai ti kariaia te nanoanga are karaoaki iroun Iesu Kristo.

Te Uaia n Reirei

Ko kona ni moanna man kaotakin tamnein te Tia Kamaiu i Ketetemane ao iaon te kaibangaki (taraa Gospel Art Book, nambwa. 56-57). Kaoa te kairake ni kakaea Nakoani Ibonga 1:1–9; 16:15–16, 30. Tuangiia n tibwauai kibuntaeka are e kauringiia ana Mwakuri ni Kamaiu te Tia Kamaiu. E kanga te angakarea ni kabwarabwaraki inanon kiibu aikai ni buokiia tibun Iteraera ni kaineti aia taratara nakon te Tia Kamaiu? Tera ae e buokiira ni uringa ana Mwakuri ni Kamaiu te Tia Kamaiu? Tera ae buokiira n namakina ana tangira te Tia Kamaiu ao kabwarabure? Waaki ni kakukurei aika inano a kona ni buokiia kairake oota raoi wa te Atua e na kabwarai ara bure.

• Tabeman aomata inanon koroboki aika tabu a kabwarabwarai namakin ake irouia ngke Tamara are i Karawa e kabwarai aia bure. Am kiraati ke membwa n te kooram a kona ni wareka tabeua katooto (taraa “Reitan Bwaai ni Mwakuri”). Kaoiia ataei bwa a na korei ni karinanii kibuntaeka man kiibu aikai are e kabwarabwaraki bwa tera aron te namakin n aron kabwaraakin buure. Ko kona n tuangiia ni kabwarabwara n oin aia taeka bwa tera aron namakinan te kabwarabure nakoia. Tera ae ti kona n reiakinna taekan te Atua man namakin aikai? Tao ko kona n tibwai oin am namakin n taekan te kabwarabure.

• Tabetai aomata aki rang koaua bwa e a kabwaraaki aia bure ibukina aki koaua raoi n aia raira nano. Ana marooro Unimwaane Dale G. Renlund “Repentance: A Joyful Choice (Rairannano: Te Rinerine ae Kakukurei)” kabwarabwaraaki bwa e kanga te raira nano ni koaua ao ni karekea ana kabwarabure te Atua (Riaona, Nob. 2016, 121–24). Ko kona ni koreia iaon te burakibooti Real Repentance ao Bwaai Ake a Tutuuki ni Karaoan te Rairannano. Tuangiia koraki ake ko reireiniia ni kakaei angareirei inanon te marooro are a na mena iaan atuu ake a koreaki. Tera ae ti reiakinna iaon te Tia Kamaiu ao Ana kabwarabure man kabanean barakurabe ake teniua man te rongorongo?

• Tabeman aomata a tia n raira nanoia ma aki namakina kabwaraan aia bure. Tao bukina a bon tuai ni kona ni kabwarai aia bure i bon irouia. Te reirei man ana marooro Beretitenti Tad R. Callister “Ana Mwakuri ni Kamaiu Iesu Kristo” kona ni buokiia. Am kiraati ke kooram a kona ni wareka te mwakoro are e moanaki ma “2. Te bure.” Tuangia bwa a na kakae reirei are a kona n tibwaia ma te rao ke kaain te utu ake a bon tiku n namakina te bure riki imwin aia raira nnano. Karekea te tai ibukiia kairake n tibwai aia namakin iaon te Tia Kamaiu, are e kakoroi bukin bwaai ibukira n raira nanora ao ni kabwaraki ara bure.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakinan are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Enoti 1:1–8; Motiae 4:1–3; Aramwa 24:7–10; 36:17–21 (A kanga aia namakin aomata ngkana a kabwaraaki aia bure)

• Itaia 1:18; Motiaea 26:30; Moronaai 6:8; Reirei ao Berita aika Tabu 58:42–43; 64:10 (Te Uea e berita ni kabwarai ara bure)

• Russell M. Nelson, “Ti Kona ni Karaoa ae Tamaroa ao ni Katamaroaki Riki,” Riaona, Meei 2019, 67–69

• Craig A. Cardon, “The Savior Wants to Forgive (Te Tia Kamaiu E Tangiria ni Kabwarai Buure),” Riaona, Meei 2013, 15–18

Reirei n ana Kawai te Tia Kamaiu

Te Tia Kamaiu e reireiniira ni kabonganai koroboki aika tabu ni kakaai kaeka nakon oin aia titiraki. Ko na kanga ni buokiia koraki ake ko reireinia ni ukori kaeka nakon koroboki aika tabu ao aia taeka burabeti ngkai a kakaei kaekaaia?