Ana Mwakuri ni Kamaiu Iesu Kristo

Iroun Tad R. Callister

Beretitenti ni Kabuta n te Reirei n Tabati ae Tibwa Kamotirawaaki

Ana Mwakuri ni Kamaiu te tia Kamaiu ti aki ti ibukin bwaai ake akea tokiia ma e rotiia aomata n tatabemaniia.

Inanon te motirawa ibukin te Itita n te ririki e onoti aron kimwareireira ma ni iangoan aron Ana Mwkuri ni Kamaiu te tia Kamaiu. Bon te reirei ae moan te rietata, e karababa te kantaninga, kakorakora te nano ae e ataaki n te aonaaba aei. Bon te reirei ae anga te unga n nano ao te kantaninga nakon maiura.

Tera ngkanne Ana Mwakuri ni Kamaiu Iesu Kristo? Teuana nanona, bon rinanin bwaai aika a riki aika moan te mimitong ake e moan karaoaki n te Onaroka are i Ketetemane, n reitinako iaon te kai, ao ni motikaki ni Mangautin te tia Kamaiu man te rua ni mate. E bon moan karaoaki man te tangira ae akea kabotauana ibukira nikabane. E kainnanoa te aomata ae akea ana bure, ae iai mwakana ae akea tokina iaon bwaai nako—ao iaon te mate; ae iai te kona ni korakai n ae akea tiana ni katoka iaona te rekenikai ibukin ara bure ao aorakira, ao e a tia raoi n rinanon bwaai aikai ni kabane.¹ Aio ana mition Iesu Kristo—te Mwakuri ni Kamaiu.

Ao tera ngkanne bukina? Bukina bwa ti na kona n oki nako matan te Atua, n riki n ai Arona, ao ni karekea te kimwareirei ae bwanin. E karaoaki aio man te tokanikai iaon aua bwaai aika a tutukiira:

Te Mate n rabwata
Te Mate n tamnei e riki mai iroun Atam ao man ara bure
Karawawatakira ao mamaarara
Mamaarara ao aki kororaoira

Ma e na kanga te tia Kamaiu ni kakoroa nanon aio n aki ekanako tuan te motiraoi?

Ti a taraia ni kangai bwa tao temanna te mwaane ae iangoa kakukurein te kibanako ni bwaka mai karawa n aki iango ao n akea te katauraoi e a kibanako man te wanikiba ae uarereke. Imwiin kibanakoa, e a waekoa n ataia bwa bon te nanobaba te mwakuri are e karaoia. E tangiria bwa e na aki ikoaki ngkana e roko inano, ma iai te totoko—tuan ana katikitiki te aba. E a kakamwakuri baina n rangi ni kabaitiia, ni iangoia bwa e na kiba, ma e bon aki kona. E kataia ni karika rabwatana bwa e na beti ke ni buti ni karauraua butina rikaaki, ma tuan ana katikitiki te aba e aki kona ni katokaki ao e aki tatangira. E kataia ni karekea ae raoiroi ma tuan te otabwanin aei: “Bon te kairua ae e karaoia. N na bon manga aki oki ni karaoia.” Ma bon akea ae e ongo n ana bubuti. Tuan te katikitiki n te aba bon akea ana nanoanga; e aki kariaiaka te kakaokoro. Ma e raoiroi, bwa, te mwaane anne e namakina te bwai ae e mena i nukana. Raoraona are n te wanikiba, e ataa ana mwakuri n nanobaba, e a tia ni katoka te baroum iaona imwain kibanakona. E kunea korana ao e a katikia naba. E oki nanona, bwa e a beibeti rikaaki nako aontano n aki kabuanibwai. Ti na bae n titiraki, “E uruakaki tuan ana katikitiki te aba, ke te baroum e karaoa ana mwakuri n rinanon te tua anne ni katauraoa maurina?”

Te kiba n tiku iaontano n te baratute n akea te kabuanibwai

Ngkana ti bure, ti riki n aiaron te mwaane are e nanobaba are e kibanako man te wanikiba. E ngae ngke tao teraa ae ti karaoia, ti na bon kana uan ara bure ake ti karaoi. Akea ara kona iaon tuan te motiraoi, are, n ai aron tuan katikitikin te aba, e kairoro ao e aki kakabwara bure. Ti kona ni kamaiuaki ibukina bwa te tia Kamaiu, rinanon Ana Mwakuri ni Kamaiu, e akoira ni katauraoa kanga aekakin te baroum n tamnei. Ngkana iai ara onimaki iroun Iesu Kristo ao ti rairananora (e nanonaki bwa ti karaoa tabera n aron are ti katika koran te baroum), ngkanne mwaakan ana kamanomano te Tia Kamaiu a kabonganaaki ibukira, ao ti na kona n roko n tokira ao e mano tamneira.

E bon riki aio, bwa, ibukin ae te tia Kamaiu e tokanikai iaon aua bwaai ake a totoko ae a na kona n tuuka rikiraken maiun tamneira.

1. Te Mate. E tokanikai iaon te mate rinanon Mangautina ae mimitong. E reirei te Abotoro Bauro: “Ba aroia aomata, ngkai a bane ni mate iroun Atam, ao ai aroia naba ba a na bane ni kamaiuaki iroun Kristo.”²

2. Te Bure. E tokanikai te tia Kamaiu iaon te bure ao namakinan te kairua ibukiia nake a rairi nanoia. E rangi ni korakora ao n rooti bwaai nako mwaakan Ana kaitiaki ngaia are e berita Itaia, “Ngkana tao ai aron kunnikai aika auraura ami bure, ao a na riki ni mainaina n ai aron te tino.”³

N tain te bobotaki, I a tia ni kaitibo ma kaain te aro ae e kangaanga namakinan kabwaraan aia bure ibon irouia, ake aki mataata n te bwai teuana ao a kairua ni kauarerekea tian te mwakuri iaon mwaakan ana kamaiu te tia Kamaiu. N akean aia atatai, a tia ni kaibibita n aia iango te Mwakuri ni Kamaiu ae akea tiana nakon ae iai tiana are kanga n taraana e na aki roota aekakin aia bure ke mamaaraia. Ma bon te Mwakuri ni Kamaiu ae akea tiana ibukina bwa e rooti ao ni uotii buure ao mamaara nako, n ai aekakin naba mwakuri ni kaikuaki ke te maraki ae reke mai irouia tabeman.

Truman Madsen e anga te nonoori ae karaunano:

“Ngkana iai mai buakomi ae e a tia ni keweaki ni kakoaua bwa ko a tia n rangi n raroanako … bwa e a a tia n reke iroum boitinin te bure are e a karika kangaangan manga rikim nakon are ko kantaningaki nako iai—ngkanne tanimai ongora.

“I kaota au koaua bwa ko aki konaa ni bwaka n raroa man te ota, ao man rababan wanawanan Iesu Kristo n rotiko. I kaota au koaua bwa ngkana bon iai teutana te nano ni kan rairannano ao ni keiaki, e mena imwaim. E aki n ae e ti ruo nakon are ko rinanona; e ruo riki nakon are iana bwa e aonga ni mena i nanon bwaai ni kabane ao rinanon bwaai ni kabane, ootan te koaua.’ [Reirei ao Berita aika Tabu 88:6.]”⁴

Teuana bukina ae e rangi ni kakaawaki te mataata ibukin Ana Mwakuri ni Kamaiu te tia Kamaiu ao karaoana ae akea tiana bwa man rikiraken te mataata e na rikirake n te nano ni kan kabwarai bon oin ara bure ao aia bure tabeman.

E ngae ngke ti kakoauaa mwaakan ana kaitiaki Kristo, ti aki toki n titiraki: “N na kanga n ataia ae I a tia ni kaitiakaki man au bure?” Ngkana ko namakina te Tamnei, ngkanne anne ara kakoaua ae e a tia ni kabwaraaki ara bure, ke e a mwakuri. E reirei Beretitenti Henry B. Eyring, “Ngkana ko a tia n namakina te Tamnei ae Raoiroi … , ko kona n taraa anne bwa te kakoaua bwa e a mwakuri te Mwakuri ni Kamaiu i nanon maium.”⁵

Tabeman a titiraki, “Ma ngkai e a kabwaraki au bure, e aera ngkai I bon namakina naba te raraoma?” Tao n Ana akoi te Atua te ururing ibukin te kairua bon te kauring, kanga te “bwai ae kauringira bwa ti na tei ao ni iangoa te bwai ae ti karaoia”, n te tai ae e uarereke, ni kauringira ngkana kariiri tabeua a manga kaitaraira: “Tai karaoi baikane bwa a na manga kairiko ni karaoan ae kairua. Ko ata te maraki ae e na uotia.” N teina aio, ao e riki bwa te bwai ni kamanomano, tiaki te rekenikai.

E kona ngkanne, ae ti bon uringi ara bure ao ti kainaomataki n aki namakina te raraoma?

Aramwa e uringi ana bure, e ngae ngke e a tia n rairananona ririki nako. Ma ngke e tang nakon Iesu ibukin akoana, e taku, “I aki manga uring marakiu; eng, I a aki manga karawawataki n uringakin au bure.”⁶

E kanga n uring ana bure ma akea te maraki ke namakinan te kairua? Ibukina bwa ngkana ti rairannano, ti bon “bungiaki iroun te Atua”⁷ Ti riki, n aron are e taekinaki ni koroboki aika tabu, “aomata aika a boou”⁸ inanon Kristo. Ma te koaua ae e itiaki ti kona ni kangai, “Ngai bon tiaki te mwaane ke te aine ae e karaoi bure akanne mai mwaina. Ai ngai ngkai te aomata ae boou man bitaki.”

3. Karawawataki ao Mamaara. Aramwa e taetae ni burabeti bwa Kristo “e na waaki, n rinanon te kainnano ni maraki ma te karawawataki ao te kaririaki n aekaia nako.” Bukin tera? “Bwa e na on nanona n te nanoanga, … bwa e na ataia ni kaineti ma te maiu n iriko bwa e na kanga ni buokiia ana aomata ni kaineti ma mamaaraia.”⁹

E kanga ni kakoroa nanon aio? N tabetai E kanakoa te karawawataki, tabetai E kakorakoraira bwa ti na keiaki, ao tabetai E anganiira te taratara ae akea tokina bwa ti na mataata ni kataakira n aroia ngkai. Imwiin tikun Iotebwa Timiti n te tai ae maan n rangi ni korakai n te karabuti i Liberty inanon ae kaniia uoua namwakaina, e tang, “O Atuau, ko mena ia?”¹⁰ Irarikin ae e na katauraoa te buoka ae waekoa, E kaeka te Atua, “Natiu, e na mena te rau n tamneim; am kaangaanga ao karawawatakim a na riki ma tii n te tai ae uarereke; ao ngkanne, ngkana ko teimatoa n rinanona n te aro ae raoiroi, te Atua e na karietako i eta.”¹¹

E a mataata ngkai Iotebwa bwa te bwai ae aki raoiroi are e rinanona e aki rangi ni kakaawaki n taraan te maiu ae akea tokina. Man rakan mataatana aio, e kororeta nakoia kaain te Aro man te karabuti naba arei, “Tarira aika a tangiraki, ti riai ni kukurei ni karaoi bwaai ni kabane aika a wene ni mwaakara; ao ngkanne ti aonga ni bon tei naba, ma te koaua ae korakora, n noora ana kamaiu te Atua.”¹² Ibukin Ana Mwakuri ni Kamaiu te tia Kamaiu, ti kona ni karekea te taratara ae akea tokinai are e anga nanon katakira ao te kantaninga ibukin kamaiuara.

4. Mamaara ao Aki Kororaoi. Ibukin Ana Mwakuri ni Kamaiu, iai mwaakan te tia Kamaiu ni kakorakora, n tabetai e aranaki bwa Ana akoi,¹³ are e kona ni buokira n tokanikai man mamaarara ao ara aki kororaoi ao anne e buokira inanon mwanangara ni kona n riki n ai Arona.

E reirei Moronaai: “Eng, nakomai nakon Kristo, ma ni kakororaoaki irouna, … ao man ana akoi ao kam kona ni kororaoi iroun Kristo.”¹⁴ E tara n ae iai uoua kawai ke te anga ni kabonganai taian mwaaka ni kakorakora akanne are a kona ni kaitiaki—ao ni kakororaoira.

Te moan, te otenanti ni kamaiu. Koroboki aika tabu a tuangiira, “E kaotaki mwaakan te aro n Atua n taian otenanti mai ieta.”¹⁵ N tabetai ti iangoi taian otenanti bwa bwaai aika a na karaoaki ni katiaaki—ibukin te karietataki; ma ni koauana a anga te kariaia nakon te mwaaka mai ieta are e buokiira n riki ni katotoonga Kristo. Te katooto:

Ngkana ti babetitoaki ao ni karekea te bwai n tangira ae te Tamnei ae Raoiroi, ti riki ni itiaki—ngaia are ti a moana n riki n tabu n aron te Atua.
Irarikina, rinanon te Tamnei ae Raoiroi, ana kaotaaki ara iango ao nanora ana kamarauaki bwa ti aonga ni iango ao n namakin n ai Arona.
Ao ngkana ti kabaeaki bwa tanga, ti karekea te kariaia nakon “kaintokaniuea, abanuea, taabo aika a tautaekanaki ao mwaaka”¹⁶ bwa bwaintagira mai iroun te Atua.

Te kauoua ni kawai ni karekean te mwaaka ni kakorakora aikai bon ana bwaintangira te Tamnei. Ibukin Ana Mwakuri ni Kamaiu Kristo, ti katauaki ni karekea ana bwaintangira te Tamnei ae Raoiroi ao ni irianaki ma bwaintangira n tamnei. Bwaintangira aikai bon kanoan te aro n atua, ma ngaia are, ni katoa tai are ti karekea ana bwaintangira te Tamnei, ti riki n ni katotoonga te Atua. Akea te nanououa ngaia anne bukina ae koroboki aika tabu a kauringiira n taai aika bati n ukerii bwaintangira aikai.¹⁷

E reirei Beretitenti George Q. Cannon: “Akea te aomata ae riai n taekina, ‘O, I aki kona ni katoka karaoan aei; bon aron karikau.’ E aki kakoauaki iai, ibukina bwa e a tia te Atua ni berita bwa e na anga te bwaintangira are e na kamaunai raoi [mamaarara]. … Ngkana iai mai ibuakora aika aki kororaoi, bon tabera bwa ti na tataro ibukin te bwaintangira are e na karikira bwa ti na kororaoi.”¹⁸

Ni kakimototoan taekana, Ana Mwakuri ni Kamaiu te tia Kamaiu e anganira te maiu ao tiaki te mate, “te bau ae tamaroa n onea mwin te mannang,”¹⁹ te kamaiuaki man te ikoaki, ao te kororaoi man te mamaara. Bon ana anga karawa ni kaitarai taian totoko ao namakinan bwaai aika karawawata n te aonaaba aei.

N tain ana kabanea ni wiiki te tia Kamaiu n te maiu aei, E taku, “Ami bwai iaon te aba te rawawata: ma kam na kabebetei nanomi; I a tia ni kataea ana kai te aba.”²⁰ Ibukina bwa te tia Kamaiu e a tia ni karaoa Ana Mwakuri ni Kamaiu, akea te korakora mai i tinaniku ke te bwai ae riki ke te aomata—akea te bure ke te mate ke te raure—ae e kona n totokoira man karekean te karietataki, ngkana ti kawakin ana tua te Atua. Man te ataibwai anne, ti kona ni kamatoaira ni mwananga ma te kukurei ao te atatai ni koaua bwa te Atua e na boutokaira n te waaki ae tabu aio.

I kaota au koaua bwa Ana Mwakuri in Kamaiu te Tia Kamaiu tiaki n ae ti akea tokin korakorana ma e uana nakon temanna ma temanna —bwa e aki ti kona ni kaokira nako matan te Atua, ma e anganiira naba te kona n riki n ai Arona—bon boton raoi te kouru n Ana Mwakuri ni Kamaiu Kristo. Man ai kanne I a kaota au kakaitau ao au kakoaua ae aki nanokokoraki, n aran Iesu Kristo, amen.