Te Mweenga Are Maeka iai Tamnein te Atua
E na reke iroum te kimwareirei ae moan te bati n am waaki ni karika mweengam bwa nnen te onimaki inanon te Uea Iesu Kristo ao te tabo are e kaonaki iai n te tangira.
Tariu ao mwaneu, I rangi ni kukurei ni kaoakiu bwa N na taetae nakoimi n te ka 189 ni Maungatabu ni Kabuta n te ririki n Ana Ekaretia Iesu Kristo ibukiia Aika Itiaki ni Boong aika Kaitira. N te tai aei inanon 1830, Iotebwa Timiti e katea te Ekaretia i aan ana kairiri te Uea. E karaoaki ni mweengaia te utu ae Whitmer i Fayette, New York. Iai onoman kaaina ao 50 aomata aika a anaaki nanoia n te bong arei.
E ngae ngke I aki ataa ae taekinna Iotebwa Timiti ke aron taraakina ngke e tei i mataia te kurubu ae uarereke arei, I ataa aia namakin aomata akekei ma aia onimaki i nanon Iesu Kristo. A namakina te Tamnei are Raoiroi, ao a namakinna bwa a mena n te tabo ae tabu. A namakinna ni koaua bwa a botakaki n tii teuana.
Te namakin ae tamaroa anne bon ngaia are ti tangiria ni mwengara. Bon te namakin are roko man te riki, n aron are kabwarabwara Bauro, bwa “te nano ae ana bwai te tamnei.”1
Au kantaninga n te bong aei bwa N na reirei te bwai ae I ataia bwa ti na kanga n tau ibukin te namakin anne n tainako ao n tiku ni maan inanon ara utu. Ao n aron ami tataneiai, e aki bebete karaoan anne. Te itabaraaraa, te kainikatonga, ao te bure a riai n taobaraaki. Ana tangira Kristo ae itiaki e na riai ni mena inanora ngaira ake n te utu.
Atam ao Ewa, Riaai ao Tiera, ao kaaro tabeman ake ti atai man booki aika tabu a kunea ann ebwa te kakaewenako ae matoatoa. Bon iai katotoo aika kaunganano n te kukurei ae reitinako inanon utu ao mweenga ni kakoaua nakoira. Ao katooto akanne ti na noora te kawai are kona n riki nakoira ao ara utu. Kam uringa te rongorongo man te ka 4 Nibwaai:
“Ao e koro bukina bwa bon akea te itabaraaraa n te aba, ibukin tangiran te Atua are e bon maeka inanoia aomata.
“Ao akea te bakantang, waaki ni kauntaba, uruan te mweraoi, waaki ni kabekaau, te kewe, ke te tiriaomata, ke aekan nako te waaki ni kaibwabwaru; ao e koaua bwa bon akea riki te botanaomata n ai aroia ae a kukurei ibuakoia aomata nako ake a karikaki ni bain te Atua.
“Bon akea taan iraa, ke taan tiriaomata, ao akea naba Reimwanaite, ke aekan reeti riki n aomata; ma a katiteuanaki, natin Kristo, ao taan bwaibwai n abanuean te Atua.
“Ao ai kakabwaiakira ngaiia! Bwa e bon kakabwaiaia te Uea n aia waaki nako; eng, a bon kakabwaiaki ma ni kanakoraoaki aroia ni karokoa ae bane tebubua ao tebwina te ririki; ao te moan roro n ana tai Kristo a mate, ao bon akea te itabaraaraa n te aba ni kabuta.”2
N aron ae kam ataia, te tai ae kakukurei anne e aki reitinako. Te rongorongo inanon te ka 4 Nibwaai e kabwarabwarai rikin kanikinaean te mamaara n te tamnei ibuakoia kurubu n aomata aika raoiroi. Bon te baaten ae e a tia n riki inanon ririki n te botanaomata ae bwanin, n taromauri, ao, ae kananokawaki riki, inanon utu. Man kamatebwaian te baaten anne, ti kona n nooria bwa ti na kanga ni kona ni kamanoa ao ni karikirakea namakinan te tangira n ara utu.
Aio bon ana baaten te bwatetenako are kaoti imwiin 200 te ririki inanon te maiu n rau are e uotia te euangkerio:
Kainikatonga e a rikirake teutana imwin teutana.
A toki aomata n tibwatibwai aia bwai imarenaia.
A moanna ni karinaniia imarenaia nakon kaubwaiia bwa iai aika rietata ao aika rinano.
A moanna ni kekerikaaki n aia onimaki inanon Iesu Kristo.
A moanna n riribai.
A moanna ni karaoi aekan buure nako.
Kaaro aika wanawana a na taratara raoi bwa a na atai kanikina akanne ngkana a kaoti ibuakoia kaain aia utu. A na, bon riai, n tabeaianga iai. Ma a na ataia bwa oin rikin kanikina aikai bon a na kariri Tatan are e kataia ni kairia nako aomata aika raraoi nakon kawain te bure n te aro bwa e na bua Ana kairiri te Tamnei are Raoiroi. Ngkanne, kaaro aika wanawana a na nooria bwa e mena tabeia ni kairakiia ataei n tatabeman, ao ngaiia ni butimwaea raoi ana kakao te Uea bwa a na Nakoina.
E na aki nakoraoi ngkana ko tuanga te ataei bwa e na raira nanona, tao, man te kainikatonga. Ko kona ni kataia ni kairoroia ataei n tibwaua aia bwai ma te nano ae akoi. Ko kona n tuangiia bwa a na aki iangoia ae a raoiroi riki nakon temanna i nanon te utu. Ma ngkanne kam a roko nakon te kanikina are I kabwarabwaraaki ma imwaina bwa “A moanna ni mamaara n aia onimaki iroun Iesu Kristo.”
Aio te kiing nakon kairakin ami utu nakon rikiraken aia onimakina iroun Iesu Kristo are ko tangiria ibukiia—ao ngkoe ni mena ma ngaia ikekei. Ngke ko buokiia inanon rikiraken aia onimaki bwa Iesu Kristo bon te Tia Kaboiia ae tangiria, a na namakina te nano ni kan rairannano. Ni karaon anne, te nanorinano e na moana onean mwiin te kainikatonga. Ngke a moana namakinan te bwai ae e a tia te Uea n anganiia, a na kan tibwaa ae mwaiti riki. Te kabotoa ibukin te karietataaki ke te kan kinaaki e na kerikaaki. Riribai a na kanakoaki n te tangira. Ao n tokina, n aekan ae karaoaki ibukiia aomata ake a rairaki iroun te Uea Beniamina, te nano ni kan karaoa ae raoiroi e na kamatoaia ni kaitarai kariri nakon te bure. Ana botanaomata te Uea Beniamina a kaotia bwa ai “akea irouia te nano ni kan karaoa ae buakaka.”3
Ma ngaia are, karikirakean te onimaki inanon Iesu Kristo bon moanakin kaokakin te tamnei are kitanaki inanon am utu ao inanon mweengam. Te onimaki e kona riki n uota te rairanano nakon am kabwarabwara ni kaitarai kanikinan mamaaran te onimaki n tatabeua.
Ae rianako tamaroana bon te kairiri n te katooto. Kaain te utu ao tabeman riki a riai n noriko n rikirake inanon am onimaki inanon Iesu Kristo ao inanon Ana euangkerio. Kam a tibwa tia n anganaki buokami. Kaaro n te Ekaretia a tia ni kakabwaiaki n te karikiram ae katauraoaki ibukiia utu ao aomata n tatabemaniia nako. Ngkai kam kamanena, kam na karikirakea ami onimaki ao aia onimaki natimi inanon te Uea ae Iesu Kristo.
Rikirake inanon te Onimaki
Ami onimaki iroun te Tia Kamaiu e a tia n rikirake man karaoan ana kauring Beretitenti Russel M. Nelson ni manga wareka Ana Boki Moomon. Ko mwakenii taian mwakoro n taeka ao taian taeka ake a kaineti nakon te Tia Kamaiu. Ami onimaki inanon Iesu Kristo e rikirake. Ma, n aekan te aroka ae boou, te onimaki ane iroun Iesu Kristo e na mamaara ngkana ko aki karekea te motinnano ae reitinako n taraia raoi ao n tataro ni karikirakea.
Am katooto n te rikirake n te onimaki tao e na aki iraki irouia ni kabane kaain am utu ngkai. Ma e na karaua nanom te bwai are riki nakon Aramwa te Teei. Inanon marakina ni kainnanoa te rairanano ao kabwarakin te bure, e uringa ana onimaki tamana iroun Iesu Kristo. Natimi a kona ni uringa ami onimaki iroun te Tia Kamaiu n te tai are a rangi ni kainnanoa iai te rairanano. E taku Aramwa n te tai anne:
“Ao e koro bukina bwa ngaia are I a kammarakaki, ngke I a karawawataki n uringakin au bure aika a mwaiti, nooria, I uringnga naba are I ongo ngke tamau e taetae ni burabeti nakoia aomata ibukin rokon Iesu Kristo, are Natin te Atua, bwa e na kamaiu ibukin buren te aonaaba.
“Ao ngkanne, ngke au iango e iangoa raoi te koaua aio, I tang inanou: O Iesu, ngkoe Natin te Atua, nanoangaai, ngkai I mena n te aro ae kananokawaki ae moan te mao, man otabwaniniaki n ana kabaebae te mate ae aki totoki.
Ao ngkai, nooria, ngke I iangoa aio, I aki manga uring marakiu; eng, I a aki manga karawawataki n uringakin au bure.”4
Tataro ma te Tangira
N ikotaki ma am katooto n rikirake inanon te onimaki, ami tataro n te utu bon te mwakoro ae moan te kakaawaki ni karikan te mweenga bwa te tabo ae tabu. Temanna ae ririneaki bwa te tia karaoa te tataro ibukin te utu. Ngkana ti tataro nakon te Atua ibukiia aomata ake a katorobubua ao a kakauongo, e rikirake te onimaki inanoia ni kabane. A kona n namakina kaotan tangiran te Tama are i Karawa ao ibukin te Tia Kamaiu. Ao ngkana te aomata are e tataro e mwaneweia naake a katorobubua inanon kamroronin te utu ake a kainnano, a bane ni kona n namakina te tangira ibukiia ao ma kaain te utu n tatabeman.
E ngae ngke aki maeka kaain te utu n te mweenga, te tataro e kona ni karekea namakinan te tangira. Te tataro n te utu e kona n roota te aonaaba ni kabutaa. E raka riki nakon teuana te tai ae I a tia n reiakinna bwa kaain te utu are raroanako e tataro naba ibukin te bwai are I bubuti naba ngai. Irou, te taeka n rabakau n rimoa ae “Te utu are a uaia n tataro a na teimatoa n ikotaki” e kona riki ni bitaki nakon “Te utu are a uaia n tataro a ikotaki, e ngae ngke a raurenako.”
Reireiakina Moantaain te Rairanano
Bukina bwa akea iroura ae kororaoi ti kai rootaki ibukin aia taeka tabeman, utu a kona n riki bwa taabo ni katantan aika tabu tii ngkana ti waetata n rairii nanora ma te koaua. A kona kaaro ni karaoa te katooto. Taeka ni iowawa ke iango aika aki riai a kona ni waetata ni katokaki ma te koaua. Taeka aika “Kabwara au bure” e kona ni karaua te nano ao ni karekea kabwaraan te bure ao te tangira.
Te Burabeti ae Iotebwa Timiti bon te katooto nakoira ngke e kaitara ma katei ni iowawa ao ni kewe. E kabwarai bure n ae waetata e ngae ngke e ataia bwa te tia iowawa e na manga bon okiria riki. E bubuti ibukin te kabwara bure ao e anga n akea te baenikai.5
Karikirakea Tamnein te Mwakuri ni Mitinare
Natin Motiaea mwaane a motinnanoia bwa a na uota te euangkerio nakoia aomata ni kabane. Te motinnano aio e roko man aia namakin n te rairanano. A aki kona moan te iango are e na iai temanna ae korakai n reken te bure n ai aroia. Ma ngaia are a kaitarai ririki n totokoaki, matoatoan te maiu, ao te kaangaanga n uota ana euangkerio Iesu Kristo nakoia aia kairiribai. Inanon te waaki, a kunea te kukurei irouia aika mwaiti ake a rairii nanoia ao n namakina te kukurei n te kabwarabure rinanon Ana mwakuri ni Kamaiu Iesu Kristo.
Kaain ara utu a na rikirake nanoia ni kan tibwaua te euangkerio ngkana a namakina te kukurei n te kabwarabure. E kona n roko ngkana a kaboui aia berita n tain kanakin te toa. Karikirakean tamnein te mwakuri ni mitinare e na rikirake ni mweengara n te tai are ataei ao kaaro a namakina te kimwareirei ni kabwaraan buure ni bootakin te toa. Man aia katooto n te karinerine, kaaro ao ataei a kona ni ibuobuoki imarenaia n namakina te kukurei. Te kukurei anne e kona ni buobuoki n onei mweengara nakon aia tabo ni kataneiai mitinare. Tiaki ni kabane Roronrikirake a bane n nako ni mitinare, ma ngaiia ni kabane a na namakina te nano ni kan tibwaua te euangkerio, are karika nakoia namakinan te kabwarabure ao te rau. Ao ngkana te ataei e nako ni mitinare ke e aki, a kona ataei ni kabane n namakina te kimwareirei man uotakin te euangkerio nakoia tabeman.
Kawaran te Tembora
Ibukiia kaaro ao ataei, te tembora bon te kabanea n tamaroa n tabo ni karekea ataaakin ao tangiran taabo aika tabu. E bon koaua anne ngkana a uarereke ataei. A bungiaki ataei ma Otan Kristo. Te ataei e kona n namakina naba te tembora bwa e tabu. Ibukina bwa kaaro a tangiriia natiia, te tembora e tei ibukiia n te kantaninga are a kona n teimatoa n tangiriia natiia n aia utu are akea tokina—n aki toki.
Tabeman mai roumi iai tamnein te tembora ni mweengami. Ngkai a kateaki tembora ni katobibia te aonaaba, a kona ngkai kaaro aika mwaiti ni kawara ana tabo te tembora ma aia utu. Utu tabeua a kona n ira kaukan te tembora ngkana a kateaki tembora. Kaaro a kona n titirakiniia natiia aron aia namakin irarikin ao inanon te tembora.
A kona kaaro nako ni kaota aia koaua bwa tera ae nanonaki te tembora nakon teuanne ke neienne. Beretitenti Ezra Taft Benson, are e tatangirii tembora, e aki toki n karakinna bwa e matakuakina tinana ni katirai ana kunnikai nakon te tembora.6 E taekina aron ana ururing ngke te ateinimwane ngaia n taraia ana utu ngke a kitana mweengaia nakon te tembora.
Ngke e a riki bwa te Beretitenti n te Ekaretia, e nanakon te tembora te bong ae okioki ni katoa wiiki. E aki toki ni karaoa te mwakuri n te tembora ibukiia ana bakatibu. Tangiran te tembora e roko ni korakora man aia katooto ana karo.
Au Koaua
E na reke iroum te kimwareirei ae moan te bati n am waaki ni karika mweengam bwa nnen te onimaki inanon te Uea Iesu Kristo ao te tabo are e kaonaki n te tangira. Kaokakin te euangkerio e moanaki man te titiraki ae mangori ae e reke n te mweenga ae mangori, ao e kona ni waaki nako inanon mweengara ngkana ti reita nako katean ao maiuakinan reirein te euangkerio ikekei. Aio au kantaninga ao nanou ae nano ma ngke te ataeinimwane ngai. Kam a tia n noori aekan mweenga aikai. E mwaiti iroumi ae, man ana buobuoki te Uea, ao e reke iroumi.
Tabeman a tia ni kataia ma nanoia ae korakora ibukin te kakabwaia anne, ma e tuai ni kaekaaki. Au berita nakoimi bon te berita are e taekinna nakoiu te membwa n Aia Kooram Abotoro ake Tengaun ma Uoman. I a tia n tuanga bwa, ibukin aia rinerine tabeman kaain ara utu ae bubura ake a tia ni karaoi, I nanououa bwa ti na kona ni ikotaki n te aonaaba ae na roko ke tiaki. E taku,n aron ae I kona ni uringa, “Ko raraomaeakina te kaangaanga ae kairua. Tii maiukina te maiu ae tau n abanuean te tieretio, ao bairean te utu e na rangi n tamaroa riki nakon are ko kona ni iangoia.”
I kakoaua bwa e na anga te kantaninga ae kakukurei nakoira ngaira ake n te maiu ae mamate aio ao a ti a tia ni karaoa ara kabanea n tamaroa bwa ti aonga ngaira ao kaain ara utu n tau ibukin te maiu ae akea tokina. I ataia bwa a na baire Tamara are i Karawa bon bairen te kakukurei. I kakoaua bwa Ana baire e karekea te anga nakoira ngaira n tatabeman ake a tia ni karaoa aia kabanea ni kona bwa ti na kabaeaki inanon te utu n aki toki.
I ataia bwa kingin te nakoanibonga are kaokaki nakon Iotebwa Timiti e kamwaeaki nakoia ni kabane burabeti n taai aikai ao nakon Beretitenti Russel M. Nelson. King aikai e karekea kabaeakiia utu n te bong aei. I ataia bwa Tamara are i Karawa e tangirira, Natina n tamnei, ma te tangira ae kororaoi. I ataia bwa ibukin Ana mwakuri ni Kamaiu Iesu Kristo, ti a kona n rairinanora, ni kaitiakaki, ao n tau ni maiu n ara utu ae ti tangiria n aki toki ma Tamara are i Karawa ma Natina ae tangiraki, Iesu Kristo. I kakoaua n aran Iesu Kristo, amen.