“Nakomai, Irirai”
E kaoira Iesu Kristo bwa ti na toua kawain te berita n okira mweengaia ara Karo ake i Karawa ao ni mena irarikiia naake ti tangiriia.
Tariu ao mwaaneu aika a tangiraki, Ngai ma buu ae Wendy ti kukurei ibukina ti raoni ngkami n Ingabongin te Tabati aei. A mwaiti bwaai aika tia n riki man kabanean ara maungatabu ni kabuta n ae nako. A tia ni katabuaki tembora aika a boou i Concepción, Chile; Barranquilla, Colombia; ao Rome, Italy. Ti namakina korakoran te Tamnei ni bootaki aika a tabu aikai.
I katekeraoi ngkami ni mwaitimi aine (ao mwaane) ake a tia ni wareka ana Boki Moomon ao ni kunea te kimwareirei ao kaubwai aika a karabaaki inanon ana Boki Moomon. I kaungaaki man taian ribooti n taekan taian kakai ake a reke.
I kukurei irouia ataeimwaane aika 11 aia ririki ake, a riki ngkai bwa riikan, ake a tau ni kabuta te toa ni katoa Tabati. A nako n te tembora ma ara ataeinaine aika 11 aia ririki, ake a ingainga n reirei ao ni beku ngkai kaain te Biiaiwe. A uaia ataeinimwaane ma ataeinaine n taetaekin koaua n te euangkerio ma te mataata ao te koaua ae matoa.
I kukurei ma ataei ao kairake ake a ibuobuoki n reireia te euangkerio inanon mweengaia ngkai a mwakuri ma aia karo n ira te karikiram are e boboto inanon te mweenga, ae boutokaia te Ekaretia.
Ti karekea tamnein Blake ae aua ana ririki, are, ni karangainan te Kaonobong, e anaa bokin te Ekaretia ao n takarua, “I kainnanoa kamwarakean tamneiu!”
Blake, ti kakatonga iroum ao tabeman ake a rineia bwa a na kamwarakei tamneia ni kakukureia iaon koauan ana euangkerio Iesu Kristo. Ao ti kukurei n ataakina bwa angiina a karekea mwaakan te Atua inanon maiuia ngkai a taromauri ao ni beku inanon te tembora.
Ngkai angiina mai iroumi a ataa, te bwai are a rinanona ara utu n namakina te karaureaki teniua te namwakaina n nako ma natira te aine ae Wendy man te maiu ae mamate aei. Ni kabanean ana bong n ikakorakora ma te kaentia, I kakabwaiaaki n reken kabanen te tai ni marooro imarenan te karo ao te nati te aine.
I taui baina ao n tuangnga mwaitin tangirana Irou ao ni kakaitau ngkai I riki bwa tamana. I taku: “Ko a tia ni mare n te tembora ao ni kakaonimaki ni kawakin am berita. Ngkoe ma buum kam kukurei n karekeia itiman natimii ao ni kaikawaiarake n riki bwa ana reirei Iesu Kristo, membwa n te Ekaretia aika a raoiroi, ao kaain te aba aika a angaanga nanoia. Ao a tia n rineiia buuia man te aeka n anua anne. Tamam e bon rangi, ni kakatonga iroum. Ko a tia ni uota te kimwareirei ae mwaiti nakoiu!”
E kaeka ma te rau, “Ko rabwa, Tamau.”
Bon te namakin ae ti rootaki iai, ma tain ranimata n tang ibukira. Ngke 67 ana ririki, ti bane ni mwakuri, ti bane n anene, ao n angiin te tai ti bane n nako n tikii. Ma n te tairiki anne, ti marooroakin baika a kakawaki riki, n aron berita aika tabu, otenanti, ongotaeka, onimaki, utu, kakaonimaki, te tangira, ao te maiu ae akea tokina.
E korakora ururingakin natira te aine. E ngae n anne, ibukin ana euangkerio Iesu Kristo ae kaokaki, akea raraomara irouna. Ngkai ti reitinako ni karinei ara berita ma te Atua, ti maeka ma te kantaninga ae ti na manga kaitiboaki riki ma ngaia. N te tai anne, ti beku ibukin te Uea ikai ao e beku Ibukina ikekei—n te bwaretaiti.1
N te koaua, Ngai ma kainnabau ti kawara Paradise ni moan te ririki aei—Paradise, California, bon anne. Ngkai e riki, ara tai ni mwananga n nako ikekei e kee iaan 40 te aoa imwiin maten natira te aine. Ngaira, n ikotaki ma Unimwaane Kevin W. Pearson ma buuna, June, ti anganaki te kakorakoraaki irouia Aika Itiaki mai Chico California Titeiki. Ti reiakinaki man korakoran aia onimaki, aia ibuobuoki, ao taian kakai ake a riki inanon buan mauiia aomata man te urubwai n te urarake are e riki n rongorongon California.
Ni menara ikekei, ti taetae n anaa abwakin te tai ma te aobitia ni bureitiman ae kairake, temanna ae ninikoria ae moan weteaki n ibuobuoki inanon kabuanibwai aika a karina. E uringa korakoran te rootongitong are e taona aon Paradise n Nobembwa 8, 2018, ngke taakaro n ai ao nikira ni bwaai aika urarake ake a waekoa n roota te taaun, ni kabuokii bwaai ma aia bwai aomata kanga bon te kananoanga ao akea bwaai aika a tiku ma tii te bwariko ni mannang ao burikin taian kaini bubu.
Ibukin 15 te aoa, e buti John rinanon te rootongitong ae kaangaanga tukana are e kaonaki ma mwakoron bwaai aika a buee ngke e buoka temanna ma temanna, te utu teuana ma teuana ni kabirinakoia ni kamanoia—e karaoi bwaai ni kabane e ngae ngke e anga oin maiuna nako iai. Ma n te tai n ikakorakora n te kakatai aei, te bwai are e rangi ni maakua John bon te titiraki ae rang katabeaianga: “A mena iaa au utu?” Inanon ananaun, kakakamaakun aoa, ao ni karawawata, n te kabanea e ataia bwa birinakoia bon ibukin kamanoaia.
Rongorongon tabeaiangan John ibukiia ana utu e kairai bwa N na taetae ngkai ma ngkami ake kam na titiraki ngkana kam nang roko n tokin maiumi ae mamate, “A mena iaa au utu?” N te bong ane e nang roko anne ngkana ko tia ni kabwanina kataakim n te maiu ae mamate ao n rin n te aonaaba n tamnei, ko na kaitara ma namakinan te titiraki ae kaangaanga anne: “A mena iaa au utu?”
Iesu Kristo e reireia te kawai n oki nakon mweengara ae akea tokina. E atatai riki n ana babaire Tamara are i Karawa ibukin te rikirake ae akea tokina nakoira. Ni bwaai ni kabane, bon Ngaia kiingin ana babaire Tamara are i Karawa. Bon Ngaia te Tia Kabooi maiura, Te Tia Kamarurungiira, ao ara Tia Kamaiu.
Ma n te tai are a kanakoaki iai Atam ma Ewa man te Onaroka are Eten, e kanakoa mwaakan baina ae korakora ni buokiia ni kabane ake a rineia bwa a na Iriria. N ae okioki, e taekinaki ni booki aika tabu bwa n aki tabe ma aekan nako buure mairouia aekan nako aomata aika kakaokoro, bon Baina aika aroraki.2
Te tamnei ae inanora n tatabemaniira ni mateakinan tangiran ara utu bon akea tokina. Anene n tangira a reitanako te iango ae kaairua bwa bon tii te tangira ae ko kainnanoia ngkana ko tangiria ni kan ikotaki n aki toki. Ao tabeman a kakoaua n ae e kairua bwa Mangautin Iesu Kristo e karekea te berita bwa aomata ni kabane a na manga ikotaki ma aika a tangiraki irouia imwiin te mate.
N te koaua, Iroun te Tia Kamaiu e a tia ni kamataata bwa ni Maungatina e kakoauaaki bwa aomata nako ake a maiu a na mangauti ao ni maiu n akea tokina,3 e mwaiti riki ae kainnanoaki ngkana ti tangiria ni karekea ara tai ibukin te karietataaki. Te kamaiuaki bon ana bwai te aomata n tatabemaniia, ma te karietataaki bon ana bwai te utu.
Ongoraa n ana taeka ake e taekin te Uea Iesu Kristo nakoia Ana burabeti: “Ni kabane berita aika tabu, boraraoi, reitaki, tabera, tuea, berita, mwakuri aika karaoaki, irekerekera, bobotaki, ke baika a kaantaningaaki, ake a aki karaoaki ao n rinanona ao ni kabaeaki iroun te Tamnei ae Tabu n te berita … bon akea manenana, tamaroana, ke korakorana n te mangauti man te mate ke i mwina; bwa boraraoi ni kabane are a aki karaoaki n aron aio a bon toki ngkana a mate aomata.”4
Ngaia are, tera te bwai are e kantaningaaki ibukin te utu bwa e na karietataaki n aki toki? Ti tau ibukin te tai anne man karaoan berita ma te Atua, kawakinan berita akanne, ao karekean otenanti aika a kakawaki.
E a kaman koaua aei man moan waakin te tai. Atam ao Nei Ewa, Noaa ma buuna, Aberaam ao Taara, Riaai ao Tiera, ao ni kabane ana reirei Iesu Kristo aika a kakaonimaki—mangke e karikaki aonaaba—a karaoi berita aika ti te arona ma te Atua. A tia ni karekei otenanti aika ti te arona bwa ngkai ngaira membwa n ana Ekaretia te Uea ae kaokaki a tia ni karaoi: berita akanne ake ti karekei n te bwabetito ao inanon te tembora.
Te Tia Kamaiu e kaoiia ni kabane bwa a na Iria nakon te ran ni bwabetito ao, n te tai, ni karaoi rakan berita ma te Atua inanon te tembora ao ni karekei ao ni kakaonimaki nakon otenanti aika a kakawaki akanne. A bane ni kainnanoaki baikai ni kabane ngkana ti tangiria ni karietataaki ma ara utu ao ma te Atua n akea tokina.
Ma rawawatan nanou bwa angiina aomata ake I tangiriia, ake I bwakannanoiia, ao ake I karineiia a aki butimwaea Ana kakao. A aki mutiakina ana bubuti Iesu Kristo ngke E anoano, “Nakomai, irirai.”5
I oota bwa bukin tera e tang te Atua.6 I tang naba ibukiia raoraou ao au au koraki. Bon mwaane ao aine aika a kakateke, a kakaonimaki nakoia aia utu ao tabeia n aia komunite. A anga aia tai, korakoraia, ao kaubwaia ma te nano n tituaraoi. Ao e nakoraoi te aonaaba man aia kekeiaki. Ma a tuai n rineia ae a na karaoa aia berita ma te Atua. A tuai karekei otenanti ake a na karietataaki iai ma aia utu ao ni kabaeaki ni kabane n akea tokina.7
Ai bia tera ngke I kona ni kawariia ao ni kaoiia bwa a na iangoia raoi ae a tau ibukin ana tua te Uea. I miimi bwa tera ae I kona n taekinna bwa a aonga n namakina mwaitin tangiraia iroun te Tia Kamaiu n ataia bwa mwaitira tangiraia irou, ao ni karekea ataakina ae aine ao mwaane aika a kawakin aia berita a kona ni karekea “bwaninin te kimwareirei.”8
A kainnanoa ae a na ataia bwa ngkai iai te tabo ibukiia n te tai are e na roko—ma mwaane ao aine aika a tamaroa ake a tuai rineia bwa a na karaoi berita ma te Atua—bon tiaki te tabo are a na ikotaki iai ma aia utu ao n anganaki aia tai ni maiu ao n rikirake n akea tokina. Bon tiaki te abanuea are a na rinanon iai bwaninin te kimwareirei—te rikirake ae akea tokina ao te kukurei.9 Kakabwaia akanne akana kabanea n rietaata a tii kona n roko ni maiu n te tiretio ae te karietataaki n abanuean te Atua, Tamara ae akea Tokina, Iesu Kristo, ao ara utu aika a tamaroa, tau, ao kaain te utu aika kororaoi.
I namakina kairau bwa N na taekinna nakoia raoraou aika a rarawa:
“N te maiu aei, ko tuai butimwaea te bwai ae karako tangirana ma e uaana n te maiu ae mamate. Ma, ngkana ko tuuka n aki mwanea raoi ana euangkerio Iesu Kristo ae kaokaki, ko rineia n aki tiku iaon te bwai ae karako tangirana ma e uaana.
“E kangai te Tia Kamaiu, ‘A bati ne ni maeka n ana auti Tamau.’10 E ngae n anne, ngkai ko tuai rineia ni karaoi berita ma te Atua, ko aki butimwaea te bwai ae moan te mangori are te kanuanga ibukin te maiu are akea tokina.”
N na bae ni kairoroia raoraou aika a rarawa n taekinna ni kangai:
“Kabanea nanom n tataro nakon te Atua. Bubuti Nakoina ngkana a koaua bwaai aikai. Karekea am tai ni kamatebwai Ana taeka. Kamatebwai ma nanom ni koaua! Ngkana ko tangira raoi am utu ao ngkana iai nanom ni kan karietataaki ma ngaiia n te maiu ae akea tokina, karaoa ae bon riai ni karaoaki—rinanon te kamatebwai ma te nano ni koaua ao te tataromwaaka—n atai koaua aika akea tokina aikai ao n taui ni maiuakinna.
“Ngkana ko aki nang koaua raoi ae ko kakoaua te Atua, waaki mai ikai. Ataia bwa ngkana akea am atatai ibukin te Atua, e na kona n nanououa temanna iroun te Atua. Ngaia, karekea te tabo ae ko na moana ni karekea iai am atatai Irouna. Kananorinanoko. Tataro ni karekei maata n noora n ana kairi te Atua inanon maium ao n te aonaaba are ko katobibiaki iai. Bubuti Nakoina bwa E na tuangko ngkana E bon mena ikanne—ngkana E ataiko. Bubuti Nakoina tera Ana namakin ibukim. Ao imwiina kakauongo.”
Temanna raoraou ae tangiraki e karako ana atatai ibukin te Atua. E ngainga ni kan kaitibo ma buuna are e a tia ni mate. E bubutiai bwa N na buokia. I kaungaa nanona bwa e na kaitibo ma ara mitinare bwa e aonga n oota n ana reirei Kristo ao n reireiaki berita aika tabu, otenanti, ao kakabwaia n te euangkerio.
E kaaitibo ma ngaiia. Ma e namakina te kawai are e reireiaki iai e kainnanoa ae e na mwaiti riki bitaki aika e na karaoi inanon maiuna. E taku, “Tuua ao berita aikanne a rangi ni kaangaanga ibukiu. Ao riki, I aki kona ni kabwakaa au kabwianibwai, ao e aki reke au tai ni beku n te Ekaretia.” Ngkanne e titirakinai, “Ngkana I mate, taiaoka ko kona ni karaoa te mwakuri n te tembora ni baika a kinnanoaki ibukiu ma buu bwa ti aonga ni bane n ikotaki?”
Ma te kakaitau, tiaki Ngai ana tia motikitaeka te mwaane aei. Ma I bon titiraki te ibuobuoki ibukin te bonomwi n te mwakuri n te tembora ibukin te mwaane are e reke ana tai ni bwabetitoaki n te maiu aei—ni katabuaki nakon te nakoanibonga ao ni karekei kakabwaia n te tembora ngkai e maiun te maiu ae mamate—ma ni karaoa te babaire ngkai e bon ataia n totokoa ana tai akanne.
Tariu ao mwaaneu aika tangiraki, e kaoira Iesu Kristo bwa ti na toua kawain te berita n okira mweengaia ara Karo ake i Karawa ao ni mena irarikiia naake ti tangiriia. E kaoira “Nakomai, Iriirai.”
Ngkai, n taben te Beretitenti n Ana Ekaretia, I bubuti ngkami naake kam raurenako man te Ekaretia ao ma ngkami ake kam tuai ni ukeuke ni kan ataia ae ana Ekaretia te Tia Kamaiu e a tia ni kaokaki. Karaoa te mwakuri n tamnei ni kakae i bon ibukim, ao taiaoka karaoia ngkai. Ai tii teutana te tai n tiku.
I ataia bwa E maiu te Atua! Iesu bon te Kristo. Ana Ekaretia ao bwaninin Ana euangkerio a tia ni kaokaki ni kakabwaiai maiura ma te kimwareirei, ikai ao n are imwiina. I kakoaua n aran Iesu Kristo, amen.