Taeka ni Kainiin
Ti bia katei ao ni manga katei maiura ni beku ibukin te Atua ao Natina—n iteran te rabuna aika uoua.
Tariu ao mwaneu aika kam tangiraki, ngkai tia roko ni banen te maungatabu ae ururingaki aei, ti karabwa te Uea ibukin Ana kairiiri ao ana kakaawakin. Rongorongo a tia n reireiniira arora ni barongaira raoi n te maiu n tamnei.
Atuun reirei aki anganaki taan taetae. N tatabemaniia nako a bon tia n tataro mwaaka ibukin te kaotioti inanon katauraoan aia maroro. Irou, e bon kamimi aron botoniango akanne bwa a taraa n rangi n nakoraoi i bon imarenaia. Ngkai kam kamatebwaia, ukoukoria bwa tera are e kataia n reireiniko te Uea rinanoia Ana toro.
Te katangitang e rangi ni mimitong. A riingaki nanora n te kakaitau ibukin mwaitiia taan katangitang ake a tia n rengani aia tarena n uota Tamnein te Uea inanon tetere n tatabeua nako. Ao E a tia ni kakabwaiai tataro ao bootaki n taromauri n taian tetere nako. Ni koauana, te maungatabu e a tia ni manga kamwarakei tamneira ngaira ni kabane.
Ara kantaninga ao ara tataro bwa mweengaia membwa n tatabemaniia nako a na riki bwa tabo ni katantan ni koaua n te onimaki, are e maeka iai Tamnein te Uea. N aki tarai itabarara ni kabane ake a katobibiira, mweengan temanna e kona n riki bwa te tabo ae mena i karawa, are te kamatebwai, tataro, ao te onimaki e kona n rababa nako inanon te tangira. Ti kona n riki bwa ana abotoro te Uea ni koaua, n tei ao n taetae ibukIna n tabo nako ake ti mena iai.
Ana botoniango te Atua e riai n riki bwa ara botoniango. E tangiriia Natina bwa a na rineia n oki nakoIna, tauraoi, tau, entaute, kabaeaki, ao ni kakaonimaki nakon berita aika tabu ake a karaoi n ana tembora ae tabu.
N te tai aei ao iai 62 tembora ake a tia ni katabuaki. Ake a kaman kateaki mai imwaina a tei bwa bwaai ni kanuringa nakon te onimaki ao aia nonoori ara bwaeoniia aika a tangiraki. Tembora nako ake a katei a riki man aia anganano ae korakora ao aia kekeiaki. Ni katoai tembora ake a tei a riki bwa katamaroan te baunuea man aia tokanikai bwaeoniia.
Tibwangara ae tabu bwa ti na tararuai. Ngaia are, tembora aikai a na waekoa ni manga kaboouaki ao ni katamaroaki, ao ibukin ake tabeua, bon te onobwai ae korakora. Mwakuri a na karaoaki ibukin kawakinan rongorongoia ae onoti tembora n tatabeua nako n angaraoina, ni kawakinan tamaroan taraakina ao tabonibaia taan kateitei ae onoti man roro nako ake a bwakanako.
Tamnein te Tembora i St. George Utah e a tia ni kaman kaotinakoaki. Iango ibukin onobwaian te Salt Lake Tembora, Tembora Tikuea, ao tabo n nakonako nakon Aobitin te Aro e na katanoataaki n te Kanimabong, Eberi 19, 2019.
Te Manti ao Logan Tembora a na manga onobwaiaki n te ririki ae e na roko. Ngkana a tauraoi tamnei akanne, a na manga katanoataaki naba.
Te mwakuri aei e kantaningaia bwa tembora n tatabeua nako a na kainaki inanon te tai ae maan. Membwa n te Ekaretia a kona n reitinako n taromauri n tembora tabeua ake a uakaan. Ngkana a bane n tia karikirake aikai, a na bane ni manga katabuaki n tatabeua nako.
Tariu ao mwaneu, ti taekina te tembora bwa te kabanea ni kakaawaki ni kateitei n te Ekaretia. Ngkai ti katanoatai babaire ibukin katean te tembora ae boou, e riki bwa mwakoron ara rongorongo ae tabu. Ngkai, kakauongo raoi ao n aki karongoa. Ngkai I katanoata te tembora n te tabo are e onoti nakoim, N na bubuti bwa kona kabaraaka atum ma te tataro ae rau ni kakaitau inanom. Ti aki tangira te bwana n takarua ni kamatauninga te maungatabu ae tabu aei ao ana tembora ae mimitong te Uea.
N te bong aei ti kukurei ni katanoatai babaire ibukin katean riki tembora ake a na kateaki n tabo aikai:
Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.
Kam rabwa, tariu ao mwaneu aika kam tangiraki.
Ngkai ti taekini ara tembora aika maan ao aika a boou, ti a kaota kakaawakina ngaira n tatabemaniia n ara mwakuri are ti a riki bwa ana reirei te Uea Iesu Kristo ni koaua. Ti na kabooui maiura rinanon ara onimaki ao n onimakInna. Ti na karekea mwaakan Ana Mwakuri ni Kamaiu man ara rairannano ni katoabong. Ao ti na katei ao ni manga katei maiura ni beku ibukin te Atua ao Natina—n iteran te rabuna aika uoua.
I angani ngkami au tangira ao au kakabwaia, ni kakoaua nakoimi bwa e reitinako te kaotioti n aei, ana Ekaretia te Uea. E na reitinako ni karokoa “e kakoroaki bukin ana kantaninga te Atua, ao Iehova Tabaota e na kangai e a tia te mwakuri.”1
I kakabwaiai ngkami ma bwaai akanne ao ni kaota au kakoaua bwa e maiu te Atua! Iesu bon te Kristo! Aio Ana Ekaretia. Ngaira bon Ana aomata. N aran Iesu Kristo ae tabu, amen.