Kamarurungan Mwatiretin Tamneira
N aron warekan ao reiakinan taekan mwatireti e aki bati n tau ni kamarurunga te mwatireti, warekan ao reiakinan taekan te onimaki n akean te mwakuri e bon aki tau ni kamarurunga te onimaki.
I kakaitau ibukin te kakabwaia ni karekean rabwatau, te bwaintangira ae kamiimi mairoun Tamara are i Karawa. Iai n rabwatara mwatireti ae raka iaon 600 mwaitina.1 A mwaiti mwatireti aika kainnanoa te kamarurung bwa ai aonga n nakoraoini karaoi ara waaki ni kakukuei ni katoabong. Ti kona ni kabonganai mwaitin marurungira ni warekii taekan ara mwatireti, ma ngkana ti taku bwa aio ae na kakorakoraia, ti na bon rangin n aki kukukrei. A na rikirake ara mwatireti ngkana ti kabonganaia.
I a tia n ataia bwa bwaintangira n tamnei a mwakuri n te kawai naba anne. Aio e tangira naba te kataneiai bwa e na rikirake. Ana bwaintangira te tamnei n te onimaki, n te katooto, tiaki ti te namakin ke te anua; bon te reirei n te mwakuri ae aki kakaoti inanon koroboki aika tabu n toma nakon te weabe kamwakura.2 N aron warekan ao reiakinan taekan mwatireti aki tau ni kamarurung te mwatireti, warekan ao reiakinan te onimaki n akea te mwakuri irarikina e aki tau ni kamarurunga te onimaki.
Ngke 16 au ririki, tariu ae te karimoa, Ivan, are 22 n te tai anne, e okira te mweenga n te bong teuana ao e tibwauai tabeua rongorongo ma te utu. E a tia ni baireia bwa e na bwabetitoaki n Ana Ekaretia Iesu Kristo Ibukiia Aika Itiaki ni Boong Aika Kaitira. Ara karo a taraia ma te nanououa, ao n aki ota raoi bwa tera te bwai ae riki. Teuana te ririki ke e nako riki imwiina, e anganiira rongorongo aika kamiimi: e a tia ni baireia bwa e na riki bwa te mitinare n te ekaretia, are nanona bwa ti nang aki nonooria inanon uoua te ririki. Aki kukurei au karo ma te rongorongo aei; e ngae n anne, I kunea irouna te iangoan ana baire ae mataata are e kakorakoraa nanou ibukina ao te babaire are e a tia ni karaoia.
Namwakaina ake imwiina, ngke e nako ni karaoa ana mition, e reke au tai ni bairea te motirawa ma tabeman raoraou n reirei. Ti tangiria ni bukamarua banen ara ririki n te reirei ae rietaata ao ni kabanea tabeua te bong iaon te bike.
I korea au reta nakon tariu ae te mitinare n taekin au babaire n au motirawa n te tiamwa. E kabooa au reta n taekinna bwa te kaawa are e mwakuri iai iaon kawaina n toki iai. I iangoia bwa bon te iango ae tamaroa n tei iai ao ni kawaria. I kunea imwiina bwa aki riai ni kawaraki mitinare irouia aia utu.
I karaoi babaire ni kabane. I uringnga ngke I tekateka iaon te bwati iangoi bwaai aika kakukurei areIvan ao ngai ti na karaoi ni ikotaki n te bong ae tikiraoi ma n riringa aei. Ti na kaingabong, taetae, takakaro n te bike, taawaira iaan te riringa—ti nang karekea ara tai ae kaukureira aei!
Ngke e roko te bwati n te marae ni wanikiba, I noora Ivan n tei irarikin te ataeinimwaane temanna, ao a uaia ni bwainiia n te kabaraaki te mainaina ao a neketainiia. I ruo man te bwati, ti inga imarenara, ao e kabwarabwara tooana. N aki kabanetai, I tuanga tariu au babaire ibukin te bong anne, ma I aki ataa te bwai ae a tia ni baireia Ivan. E taraai, e matangare, ao e taku, “Ko koaua! E ngae n anne, ti riai ni karaoa moa ara bobwai. Ko kona n raoniira?” I kariaia, ma au iango are ti na karekea ara tai ae tau ni kukurei imwiina iaon te bike.
N te bong anne, n te maan ae raka iaon 10 te aoa, I nakonako inanon te kaawa anne ma tariu ao toana. I matangare nakoia aomata n te bong arei. I kamauriia aomata aika I tuai man kaitibo ma ngaia ni maiu. Ti taetae nakoia aomata ni kabane, karebwerebwe iaon aia mataroa aika tiaki kinaia, ao ni kawariia aomata ake a reirei mangaia tariu ao toana.
N tain teuana te kakawari anne, tariu ao toana a reirei taekan Iesu Kristo ao te babaire ni kamaiu. N te tai ae waekoa, e toki Ivan ao e taraai. I miimi, ngke e titirakinai bwa n na tibwaua au iango iaon te bwai ae a tia n anga reirei iaona. E moanna n akea te karongoa inanon te ruu, ao a bane te koraki n taraai. Ma tabeua kaangaanga, ao n tokina I kunei taeka ao n tibwauai au namakin ibukin te Tia Kamaiu. I aki ataia ngakana te bwai are I tibwauaia e eti ke e bure. E aki kona ni kaetai tariu, ni kairuau, e karabwaai ibukin tibwauaan au iango ao au namakin.
Inanon ara tai ni kabane aikanne, tariu ao toana aki kabanea te miniti teuana n anga te reirei n akea ngai, ngaia ae I karekea riki te taneiai nakon au marooro ma ngaia ake imwaina. I kakoaua aron te bitaki ni moaia ngkana a karekea te ota n te tamnei aomata ni maiuia. I nooria bwa a kanga tabeman mai ibuakoia ni kunea te kantaninga n taian rongorongo, ao I reiakinna bwa n na kanga ni buokiia tabeman ao ni mwaninga taekau ao oin nanou. I karaoa te bwai are e reirei te Tia Kamaiu: “Ane kan ri mwiu, ao ke e kaakea n taona nanona.”3
Iangoan taekan te taneiai anne, I namakinna bwa e rikirake au onimaki n te bong anne bukina bwa e anganai tariu au tai ni karaoia. I kamwakura au onimaki ngkana ti wareware man booki aika tabu, kakaia aomata aika ti na reireiniia, kaota am koaua, buokiia tabeman, ao a mwaiti riki. E aki kona n reke ara tai n nako n taawaira iaan te riringa n te bong anne, ma e kaonaki nanou ma te oota mai i karawa. I aki noora riki teuana uaan te mwakeke ae uarereke iaon te bike, ma I namakina au onimaki bwa e rikirake n aron uaan te mwakeke ae uarereke.4 I aki kabanea au tai iaan te riringa bwa te tuariti, ma I karekei taneiai aika tamaroa, ao n akean ataakina, I a riki bwa te mitinare—n tuaii naba riki bwa kaain te Ekaretia!
Taai ni Kakorakorai Mwatiretin Tamneira
Ibukin Kaokan te euangkerio, ti kona n ataia bwa e kanga Tamara are i Karawa ni buokiira ni karikirakei bwaintangira n tamnei. E na taraa n ae E na anganiira ara tai ni karikirakei bwaintangira aikanne nakon are ti anganaki n akea te kekeiaki n tamnei ao n rabwata. Ngkana ti maeka ma Tamneina, ti na kona n reirei aron atakin taai aikanne ao ni karaoi nanoia.
Ngkana ti ukoukora riki te taotaonaki n nano, ti na kona ni kunea bwa ti kainnanoia ni karaoia ngkai ti tataninga ibukin te kaeka. Ngkana ti tangiria ni karekea riki te tangira ibukiia kaain rarikira, ti kona ni karikirakea te tangira man tekatekara irarikin temanna ae tiaki kinaa n te taromauri. Ti tebo ma te onimaki, ngkana e roko te raraoma n ara iango, onimakinan ana berita te Uea ti tangiraki bwa ti na waaki rake. N te kawai aei ti kamwakura mwatiretin tamneira ao ni karikirakei nakon bwaai ni kakorakora inanon maiura.
Kamwakuran mwatireti n tamnei a bon aki kaangaanga n te moan tai, ao e na kona n riki bwa te kaangaanga ae bubura. Ana taeka te Uea, rinanon te burabeti Moronaai, a kaineti nakoira n te bong aei, “Ao ngkana a roko aomata nakoiu N na kaota nakoia mamaraia. I anganiia aomata mamaaraia bwa aonga n nanorinano; ao e tau au akoi nakoia aomata ni kabane ake a kananorinanoia i matau, ma n tia [ke ni kamwakura] te onimakinai irou, ao ngkanne N na kakorakorai mamaaraia nakoia.”5
I kakaitau ibukin tariu ae Ivan, are e aki ti tibwaua te euangkerio ma ngai ma e kaoai bwa n na maiuakinna ao n atai mamaarau. E buokai ni butimwaea ana wewete te Mwatita: “Nakomai, iriirai”6—ni karaoa te aeka ni bwai are e karaoia te Tia Kamaiu, ni ukoukorii aekan bwaai ake e ukoukorii te Tia Kamaiu, ao n tangiriia tabeman n te kawai are e tangiriira iai te Tia Kamaiu. Namwakaina imwiina, imwiin au taneiai n te mwakuri ni mitinare, I baireia bwa n na bwabetitoaki ao ni karaoa oin au mition.
Ti riai ni butimwaea ana kakao Beretitenti Russell M. Nelson ao n nanonna bwa ko na nakon te Tia Kamaiu7 man kinakin mwatireti aikana a kainnanoi waaki ni kakukurei n tamnei ao ni moanna ni kamwakurii. Aio bon te kabobiri n ae abwabwaki, ke kabo birimwaaka n ae uarereke, ngaia tai mwaninga waaki ni kakukurei n tamnei ake a uarereke ake a na reitinako kakorakorai kakawakin mwatireti n tamnei akanne. Ngkana ti tangiria ni karikirakea ara onimaki, ngkanne ti na karaoi bwaai aika a kainnanoa te onimaki.
I kaotia au koaua bwa ngaira bon natin Tamara are i Karawa ae tangira. Natina te Rikitemanna, Iesu Kristo, e tangiriira. E roko nakon te aonaaba aei bwa e na kaota te kawai ao n anga nanona bwa e na anga Maiuna n anganiira te kaantaninga. Te Tia Kamaiu e kaoira bwa ti na ira Ana banna ni katooto ae kororaoi, ni kamwakura ara onimaki Irouna ao Ana mwakuri ni kamaiu, ao ni kabwarabwarai ni kabane bwain tangira n te tamnei ake ti a tia ni kakabwaiaki iai ma ngaai. Bon ngaia te Kawai. Aio au koaua n aran Iesu Kristo, amen.