Taratara nakon Iesu Kristo
E na buokira ni maiuakin ara berita ao ni kakorakora weteakira bwa unimwanen Iteraera.
Ngke nakonako Iesu n te kawai irarikin Kaberenaum1 e maiti te botanaomata ae korakora ni katobibia, te aine ae ituaki n te aoraki ae korakora inanon tebwi ma uoua te ririki e roko i akuna man riinga buruburun ninirana Kunikaina. E kamaiuaki neiei n tai ae waekoa.2l
Taekan boki aika tabu bwa Iesu, ni karekean “te [mwaaka ae] otinako mai [Irouna],”3 “e rairaki ma te mimi”4 ao n “taratara … n noria bwa e a tia ni karaoa te bwai aei.”5 “Ngke noria te aine bwa e aki raba,”6 e “baaka imatana, ao e tuanga te koaua ni kabanea.”7
Ao e taku Iesu nako ina, “Natiu, e kamaiuko am onimaki, naako ma te rau.”8
Iesu Kristo E kamaiua te aine. E kamaiuaki neiei n rabwatana, ma ngke rairaki Iesu n taraia, e kaota ana onimaki Irouna ao E kamaiua nanona9 E taetae nakoina ma te tangira, e butimwaea neiei ma Nanona, ao ni kakabwaia n Ana rau.10
Taari, aika taan taua te nakoanibonga ae tabu, ti katabeaki n te mwakuri ni kamaiu. Inanon te ririki ae nako ea tia te Uea n anga te mwakuri aei nakoia unimwanen Iteraera.11 Ti karekea te mwakuri mairoun te Uea—ni mwakuri ma mwanera, ti na mwakuri inanon te kawai ae tabu, ni kawaetata ikotakiia Iteraera iaon itera aika uoua n te roki, ni karaoi mwengara bwa taabo ni katantan n te onimaki ao n reiakinan te euangkerio, ao ni katauraoa te aonnaba ibukin Kauaokin Iesu Kristo.12
Ni bwaai ni kabane te Tia Kamaiu e a tia ni kaota nakoira te kawai: are ti na kainanoia n nako n taraia ao ni mwakuri ibukin Iesu Kristo ngkai E taraia ao ni mwakuri ibukin Tamana.13 E taku te Tia Kamaiu aio te kawai nakon te Burabeti Iotebwa:
“Taraai n am iango ni kabane; tai nanououa, taai maaku.
“Noori taian ikoaki aika i rarikiu,ao mwiin naba taian neera i baiu ma waeu kakaonimaki, kawakin au tua, ao kam na abaaba n abanuean karawa.”14
Inanon te aba n tamnei E berita Iesu nakon Tamana bwa E na karaoa nanon Tamana ao n riki bwa ara Tia Kamaiu ao te Tia Kabooira. Ngke titiraki Tamana, “Antai ae N na kanakoa?15 E kaeka Iesu:
Iesu E kaeka, “Aio ngai, kanakoai.”16
“Tamau, e na karaoaki nanom, ao am bwai te karaoiroaki n aki toki.”17
Inanon Maiun Iesu ni kabane n te maiu ae mamate e maiuakina te berita anne. Inanon te nanorinano, te nimamanei, ao te tangira are E reirei aron Ana reirei Tamana ao ni karaoa Ana mwakuri Tamana n te mwaaka ao te kariaia ae anganna Tamana18
E anga Nanona Iesu nakon Tamana. E taku:
“I tangira te Tama.”19
“I karaoi n taainako bwaai ake e kakukureia.”20
“I roko … n aki karaoa nanou, ma nanon [te Tama are] kanakomaiai.”21
Ni Kurakaina i Ketetemwane E tataro, “Tiaki nanou ae na karaoaki,ma e na karaoaki Nanom.”22
Ngke e weteia unimwanen Iteraera te Uea bwa “a na taraai n aia iango nako” ao “noria taian ikoaki” inanon Rabwatana ae ea manga uti, bon te wewete n rairaki nako man te bure ao te aonnaba ao n rairaki Nakoina ao n tangiria man ongeaba Irouna. Bon te wewete n reiakina Ana reirei ao ni karaoa Ana mwakuri n Ana kawai. Boni ngaia, te wewete ae onimakinaki raoi, anga ara motinano ao nanora Nakoina, ao rinanon Mwakana ni kamaiu n riki n Arona.23
Taari, ngkana ti taratara nakon Iesu Kristo E na kakabwaiaira bwa ti na riki bwa Ana unimwane i Iteraera—nanorinano, nimamanei, ongeaba, onrake n Ana tangira.24 Ao ti uota te kukurei ao kakabwaian Ana euangkerio ao Ana Ekaretia nakoia ara utu ao tarira ao mwanera ni iteran te roki aika uoua.
Beretitenti Russell M. Nelson e weteira bwa ti na taratara nakon Iesu Kristo n te kawai aei: “Akea te bwai ae kona ke ae waekoa ke ni korakora riki bwa ana reirei. “Ara taratara e riai ni matoa iaon te Tia Kamaiu ao Ana euangkerio. E tangira mwaakurin te iango ni kakorakora Nakoina n iango ni kabane. Bwa ngkana ti karaoia, ara raraoma ao maakura a bua.”25
Kamatoa bon te taeka ae kakanato. E nanonaki kabaea ni kamatoa, ni kaira ao n taua ni kabanea.26 Ti kamatoa ara taratara iaon Iesu Kristo ao Ana euangkerio man maiuakinan ana berita.
Ngkana ti maiuakin ara berita, a kairi bwaai aika ti taekin ao ni karaoi. Ti maeka n te maiu ni berita27 akea te kangaanga, mwakurin te onimaki ni katoa bong are ti taraia iaon Iesu Kristo: tataro man te nano inanon Arana, amwarake iaon Ana taeka, rairaki Nakoina ni kabwarai ara bure, kaawakin Ana tua,kanakin te toa kawakin Ana Taabati ae tabu, taromauri inanon Ana tembora ae tabu n taainako n aron are ti kona, ao ni kamwakura Ana nakoanibonga ae tabu ni mwakuri ibukiia Natina.
Mwakuri ni berita n anganano e kauki nanora ao ara iango nakon mwaakan te Tia Kamaiu ni kakamaiu ao ana mwakuri ni kaitiaki te Tamnei are Raoiroi. Teutana imwiin teutana are te Tia Kamaiu e bita arora, ti riki n rangi n rairaki nakoina ao ara berita a maiu inanora.28
Taian berita ake ti karaoi nakon Tamara are i Karawa a riki ni matoan te bwaa nanora ae moan te korakora. Ana berita Tamara are i Karawa nakoira e kaonira n te kakaitau ao te kukurei.29 Ara berita a toki bwa ai tiaki tuua aika ti na irii ao a riki bwa reeirei aika tangiraki a niniira ao ni kairira ao ni kamatoa ara taratara iaon Iesu Kristo.30
Mwakuri n anganano aikai a tauraoi nakoia aika ataei ao kaara. Ngkami aika ataeinimwane aika taua te Nakoanibonga ae te Aaron ae tabu, bwaai ni kabane aika I taekin n te tairiki aio e kaineti nakoimi. I kaitaua te Atua ibukim. Kam karaoi otenanti aika tabu ao taian berita a tauraoi nakoia mirion aika Itiaki ni katoa wiiki. Ngkana ko katauraoa, ko kakabwaia, ke ni kabuta te toa, buobuoki, bwabetito n te tembora, kaoia raom nakon bobotaki; ke kamaiua kain te aro n ami kooram, karaoa te mwakuri ni kamaiu. Kam kona naba n taraa Iesu Kristo ao ni maiuakina am berita ni katoabong. I berita nakoimi bwa ngkana kam karaoia kam na riki bwa ana toro aika kakoauaki te Uea n te bong ae na roko, unimwane aika korakora i Iteraera.
Tariu, I ataia bwa bwaai ni kabane a kona ni kabwara nano n te maaku. Ma taiaoka uring ana taeka te Tia Kamaiu aikai: “Tiaki tii ngai, bukina ba E mena i Rou te Tama .”31 Ma ngaia bon raora. Ma ti aki tii ngaira. Te Uea ae Iesu Kristo ao Tamara are i Karawa a tangirira, ao Raora.32 Bukina bwa Iesu Kristo e taraa Tamana ao ni kabobonga te karea ni kamaiu ti kona n taratara nakon Iesu Kristo ma te kantaninga bwa E na buokira.
Akea mai ibuakora ae kororaoi. Tabetai ti kabwaka n te aro n tamnei. Ti bitaki ke ti bwara n nano. Ti karaoa te kairua. Ma ngkana ti taraa Iesu Kristo ma te nano ae raraoma E na tabekira rake,kaitiakira man te bure, kabwarai ara bure ao ni katoki rawawatan nanora. E tataona nanona ao e akoi; Ana tangira ni kamaiu e aki toki ao e aki bwaka.33 E na buokira ni maiuakin ara berita ao ni kakorakora weteakira bwa unimwanen Iteraera.
Ao te Tama e na kakabwaiaira ni bwaaai ni kabane are tangira kakoroan Ana mwakuri: “bwaai … ni kauatabo i karawa ao iaon te aba, te maiu ao te oota te Tamnei ao te mwaaka, are kanakoaki man nanon te Tama rinanon Iesu Kristo, ae Natina.”34
Ngkana te oota ae mimitong ao te mwaaka a roko ni maiura teniua bwaai aika a na riki:
Moan, ti kona n nooria! Rinanon te kaotioti ti a moanna n noria bwa Iesu e noora te aine: i akuun te bwai nakon te nano.35 Ngkana ti noora are e noria Iesu, E kakabwaiaira bwa ti na tangiria ake ti beku ibukiia n Ana tangira. Man Ana i buobuoki, koraki ake ti buokia a na noora te Tia Kamaiu ao n namakina Ana tangira.36
Kauoua, iai iroura mwaakan te nakoanibonga! Iai iroura te kariaia ao te mwaaka ni mwakuri n Aran Iesu Kristo ni “kakabwaia, ni kaira, ni kamanoa, ao ni kamaiuia tabeman” ao ni uota te kakai nakoia ake ti tangiria ao ni kawakina ara mare ma ara utu.37
Kateniua, Iesu Kristo e nako ma ngaiira! Ike ti nako iai, E nako iai. Ngkana ti reirei, E reirei. Ngkana ti rau, E rau. Ngkana ti kakabwaia, E kakabwaia.38
Tariu, e aki riai bwa ti na kukurei? Ti kukurei! Ti taua ana nakoanibonga te Atua. Ngkana ti tara Iesu Kristo, maiuakin ara berita, ao ni kamatoa ara taratara Irouna, ti na itoman ma mwanera ao ni mwakuri n te kawai ae tabu, ni ikotiia Iteraera aika uamaenako ni iteran te roki aika uoua, ni kakorakora ao ni kabaeia ara utu, ao ni katauraoa te aonnaba ibukin Kauaokin, te Uea ae Iesu Kristo. E na riki. I kakoaua.
I kainna n te tataro mai nanou, bwa ngaira ni kabane, n tatabeman, ti na taratara nakon Iesu Kristo n ana iango ni kabane. Tai raraoma. Tai Maaku. N aran Iesu Kristo, amen.