Kanuaingkami n ana Taeka Kristo
Kanuaingkami iaon ana taeka Kristo e kona n riki n teuana te tai ao n taai tabetai, ngkana ti katauraoi nanora.
Tamara are i Karawa e tangiriira. E tia ni katauraoa te baire ibukira ni kakukureira n Ana kakabwaia. Inanon te maiu aei, ti bane ni kaoaki nakon Kristo ao ni karekea ana euangkerio Iesu Kristo are e kaokaki rinanon te bwabetito, karekean ana bwaintaingira te Tamnei ae Raoiroi, ao ni kakaonimaki ni maiuakina te euangkerio. Nibwaai e kabwarabwara ara motinnano n te bwabetito kanga ai aron te rin n te “kawai ae eti ao wariki,” ao e kauringiira n reitinako ni “waaki nako man teimatoa i nanon Kristo, … kanuaingkami n ana taeka Kristo, ao n teimatoa ni karokoa te toki,” n te aro bwa ti aonga ni karekei ana kakabwaia ni kabane Tamara are i Karawa are kawakin ibukira (2 Nibwaai 31:19–20).
Nibwaai e kauringiira riki bwa ngkana ti na “kanuaira n ana taeka Kristo,” a “na tua[ngiira] bwaai ni kabane aika [ti] riai ni karaoi” (2 Nibwaai 32:3ao ti na aki kona naba n rootaki n ana “kanoa ni katebe aika ura teuare e buakaka” (1 Nibwaai 15:24).
Tera Kanuaingkami?
Ngke I kairake, I taku n au iango bwa kanuaingkami bon taekan karekean te amwarake ae bubura ma te raiti, tutii, ao tioio tioti. I ataia ngkai bwa kanuaingkami ni koaua e bon riaon riki kakukurein te amwarake. Bon rinanoan te kimwareirei, tabeakinaki, bukamaru, tibwatibwa, kaotan te tangira nakoia utu ao ake tangiraki, kaotakin ara kakaitau nakon Tamara are i Karawa, ao katean te iraorao ngkai ti kakukureiira ni mwaitin, kangkangin amwarake. I kakoaua ngkana ti kanuaiira n ana taeka Kristo, ti na riai ni iangoia bwa ai aron te taneiai ae ti te arona. Ni kanuaira ni koroboki aika tabu bon tiaki tii warekakiia. E riai n anganiira te kimwareirei ni koaua ao ni katea ara iraoraora ma te Tia Kamaiu.
Aio e kamatataaki reiakinana inanon ana Boki Moomon. I angoa miin Riaai ngke e noora te kai “ae kangkang uaana [ae] na kakukureia te aomata.” Te uaanikai e tei ibukin ana tangira te Atua, ao n aron Riaai ngkai e katoonga uaana, “e bon … karewerewe, e riaon karewen bwaai nako are [e] tia ni katoong mai i mwaaina.” E “kaona tam[neiu] ma te kimwareirei ae moan te bati” ao mangaia e tangiriia kaain ana utu bwa a na katoonga (1 Nibwaai 8:10–12).
Ngkana ti kanuaira, ai aron ae ti na karekea naba mwaitin amwarake ke aekan amwarake ake iai iroura a na riki n rangi ni kakawaki ngkana nanora a kaonaki ma te kakaitau. Ana utu Riaai a kang irikon maan aika a aki kamwaaki n te rereua, ma Riaai e kabwarabwara mwanangaia ae kaangaanga aei, n taku, “E korakora ana kakabwaia te Uea” are “ara aine … a korakora” ao a uotiia natiia “n akea te ngurengure” (1 Nibwaai 17:1–2).
Kanuaira n tabetai e irekereke ma te kakatai ao katoongana. Aramwa e taekina taekatn te koraa ae raoiroi are e unikaki inanora. N aron ae ti kataaki iaona, ti na ataia bwa te koraa e moanna “n riki ni kangkang” (taraa Aramwa 32:28–33).
Kanuaingkami n ana Taeka Kristo
Te kakabwaia ni kanuaingkami n ana taeka Kristo a mwaakaroiroi ao a bita te maiu. Iai tenua kakabwaia n taekana are I tangiria ni kaoiko bwa ko na kataia inanon maium.
Te moan, ana taeka Kristo e kona ni buokiira ni “karikirakea konabwain tam[neira] ni karekei kaotioti” (Russell M. Nelson, “Revelation for the Church, Revelation for Our Lives,” Riaona, Meei 2018, 96) ao ni kawakiniira raoi rinanon maiura. Moomon e reirei bwa ana taeka Kristo iai “korakorana ni kairiia aomata bwa a na karaoa ae e [bon] eti,” ao are a bon korakora riki nakon te bwai teuana “te kabaang” ae konaa ni katiaaki (Aramwa 31:5). Ngke I tia n ukora wanawanan te Atua ni mwakuria oin au kaangaanga, n taainako, n aron are I a tia ni kataa “tamaroan ana taeka te Atua” (Aramwa 31:5), I namakina te kairaki ao ni konaa ni karaoi babaire aika wanawana, n tokanikai ni kariiri, ao kakabwaiaakin maiu ma rikiraken onimakinan Kristo ao tangiraia ake a mena irarikiu. Ara burabeti, Russell M. Nelson, e a tia n reireiniira are “a na roko boong, e na bon aki kona ni kamaiuaki tamnei n akean te kawakinaki, kairaki, karaunano, ao reitinakon ana kakairi te Tamnei ae Raoiroi” (“Revelation for the Church, Revelation for Our Lives,” 96). E riai te kaotioti n roko n aron ae ti kata “raoiroin te taeka,” ao te taeka anne e na korakora riki nakon te bwai teuana irarikina ti na konaa ni kataia ke ni iangoia ni kabootaua.
Te kauoua, ngkana ti ikakorakora ni kan ataia bwa antai ngaira ao akean karinean rabwatara, te “kakukurein ana taeka te Atua” (Iakobwa 2:8) inanon koroboki aika tabu e na buokiira n ataira bwa antai ngaira raoi ao n anganiira te korakora n riaon are iroura. Kinakiu bwa antai ngai ngkai natin te Atua bon teuana te tai ae moan te tamaroa are I a tia n rinanona. Inanon au tai ngke tebwitabun te ririki, I aki ata te bwai teuana n taekan ana reirei te Tia Kamaiu. Ngke I moan wareka te Nu Tetamenti, ana taeka Kristo e bon kamaoa ikoakin tamneiu. I ataia bwa I aki tiku n tii ngai ao bon Ngai natin te Atua. Ngke I kinaai bwa antai ngai ni koaua imatan te Atua, I a ata au konabwai ae akea tokina rinanon Ana Mwakuri ni Kamaiu Kristo.
Ai aron Enoti n tibwaua ana taneiai ibon irouna ni kaotaakina bwa e roko man iangoan ana taeka Kristo. Ngke Enoti e karekei ana reirei tamana n taetaekina te “maiu ae akea tokina, ao kimwareireia aomata ake a itiaki, [rin i [nanon],” “ao e baki tamnei[na]; ao [e] katorobubua inano imatan [ana] Tia Karikia … inanon te tataro ae korakora” (Enoti 1:3–4). Inanon te tataro anne e karekea kinaakin te Tia Kamaiu ao n reiakinna bwa e korakora kakawakira, ti tangiraki ao a kona ni kabwaraaki ara bure, ao boni ngaira natin ni koaua te Atua.
Te kateniua, ti konaa ni kanakoraoa maiuiia tabeman rinanon ana taeka Kristo. Inanon te kawai are ti te arona are e karekea Enoti n oin ana tai ao te tabo are e riingaki iai nanona n ana taeka Kristo, te Uea e na karaoa ae bon riai ni karaoia n riingi nanoia te koraki ake ti tangiria n tibwa te euangkerio ma ngaiia. A mwaiti ngaira ake ti karekea namakinan te bwarannano ngkana ti kataia ni kaoa temanna n ongora te euangkerio ibukina bwa te bwai are ti tangiria bwa e na iai mwiina ae e na riki bon akea te bae e riki. N aki tabe ma mwiina ae e na riki, te Uea e kaoiira bwa ti na kauki wiira ao n tibwaua te euangkerio ma tabeman.
Uoua te ririki n nako, te Uea e riinga nanon tinau ae tangiraki, are e buokiia n ana babaire ibukin karekean te otenanti ni bwabwetito. I a kaman tataninga ibukin ana bwabetito bwa e na riki inanon 35 te ririki. Inanon karaoan ana baire ibon irouna, a mwaiti membwa n te Ekaretia ae a karaoa aia mwakuri ni ibuobuoki ni koaua nakoina n aron are e karaoia Kristo. Teuana te Tabati, e namakinna bwa e riai n nako n taromauri. E mwakuri nakon te kairi. Ngke e tekateka imoa ao n tataningaa waakin te toa, te teinimwaane ae aua ana ririki e tei imoana ao e taraia. E moa ngare ma te butimwaai nakoina. E waekoa ni kitanna te teinimwaane n okira oin ana kaitekateka, n te itera are teuana n te karinan are e tekateka iai tinau. Te teinimwaane aei e anaa te bwai teuana man ana kaintekateka ao n okirikaaki ao e angan tinau te boki n anene n taromauri ao n oki nakon ana kaintekateka. Tinau e ataia bwa booki n anene a katukaki iaon kaintekateka ni kabane n te umwantabu. E na taraa ni bebete riki anaakina man te kaintekateka are irarikina. E ngae n anne, e rangi ni kukurei ma ana mwakuri ae itiaki n akoi te teinimwaane, are e tia n reiakinna man mweengana ao n te taromauri. E bon tamaroa te tai anne ibukina. E karekea te namakin ae korakora bwa te Atua e kaoia bwa e na nakomai ao n ira te Tia Kamaiu. E namakinna bwa e riai ni bwabetitoaki. Te teinimwaane aei e aki ukora kan kinaakina n te bwai are e karaoia, ma e karaoa ana kabanea n tamaroa ni maiuakinan ana taeka te Atua ao n tangiriia kaain rarikina. Ana akoi e karekea te bitaki n nano ae kakawaki iroun tinau.
Ana taeka Kristo e nano n roota te namakin ao ni karikirakea te atatai nakoia koraki ake a tuai n Nooria. Iaon te kawai nako Emauti, uoman reirei a nakonako ma Iesu. A nanokawaki ao aki atatai bwa te Tia Kamaiu e a tia n tokanikai iaon te mate. Inanon nanokawakiia, a aki kinaa bwa te Kristo ae maiu e bon nakonako ma ngaiia. Ngke Iesu e “kaotia nakoiia bwaai ni kabane inanon koroboki aika tabu are e kaeineti nakoina,” a bon aki naba Kinaa ngkai e a uti te Tia Kamaiu ni karokoa a tekateka ao ni bwenaua te berena ma Ngaia. Ngkanne a kaukaki “mataia”. Ngkai ngaira—ke raoraora, raora ni mwakuri, ao kaain rarikira—ti kanuaira ao n tabeuta te berena ma Ngaia, matara n atatai a kaureaki. Ngke taian reirei i Emauti a ururinga aia tai ma te Tia Kamaiu are e a manga uti, a taku bwa a bue nanoia inanoia ngke E kauki koroboki aika tabu ibukiia (noora Ruka 24:27–32). Aio e koaua ibukira ni kabane.
Kabaneana
Ni kabaneana, I kaota au koaua bwa kanuaingkami n ana taeka Kristo e kona n riki n teuana te tai ao n taai tabetai ngkana ti katauraoi nanora ni butimwaiia. Kanuaingkami iaon ana taeka Kristo e na uota te kaotioti ae maiu, ni manga ataira ni koaua ao ni bongana imatan te Atua n aron Natina, ao ni kairiia raoraora nakon Kristo ao te maiu ae akea tokina. I tangiria ni kaina au taetae ni kaoka te kakao mairoun Nibwaai ngke e taku: “Ngaia ae kam waaki nako man teimatoa inanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane. Ma ngaia ae kam na waaki nako, ni kaawakin ana taeka Kristo, ao n teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina” (2 Nibwaai 31:20). N aran Iesu Kristo, amen.