Bwaai aika Riai ni Karekeaki ibukin te Nakoanibonga
Ti tauraoi n tataro, n aki mamatam, ni kamatebwai, n ukeuke, n taromauri, ao ni beku n aroia mwaane mairoun te Atua bwa ti aonga ni kona ni karekea te aekaki ni mwaaka anne?
Onoua te namwakaina n nako n te maungatabu ni kabuta n Okitobwa 2015, I taetae nakoia aine n te Ekaretia ibukin mwiokoaia ae mai karawa n aroia mairoun te Atua. Ngkai I tangiria n taetae nakoimi taari ibukin mwiokoami mai karawa n aroia mwaane mairoun te Atua. Ngkai I mwamwananga n te aonaaba, I kamoamoa korakoraia ma tamaroaia mwaane ae bwanin ao ataeinimwaane n te Ekaretia aei. Bon akea kabotauan ami mwakuri ni kamaiu naano ao ni buokiia n tabekiarake. Kam rabwa!
N au kabanea n taetae n te maungatabu, I kan taekina te namakin ae kanako nano n au mwakuri n ririki aika a nako ngke, te tia korokoro ngai n te buroo, I aki kona ni kamaiuia uoman taari aine aika a uarereke. Man ana kariaia aia karo, N na karakina riki rongorongon te utu anne.
Aorakin te buroo ae riki n te tai ni bungiaki a rootaki iai teniman ataei ake a bungiaki nakoia aika Ruth ao Jimmy Hatfield. Aia moan n nati te mwaane, Jimmy Jr., e mate n akea te kabanea n tutuo iaona. I irekereke ma te kaangaanga aei ngke kaaro a ukoukora buokaia ibukiia natiia aine aika uoman, Laural Ann ao tarina ae uarereke, Gay Lynn. I nanokawaki ngke a mate ataeinnaine imwiin aia korokoro.1 N aia atatai, Ruth ao Jimmy e a mamaara tamneia.
Angiin te tai, I namakinna bwa e reitinako aia riribai nakoiu ao te Ekaretia. Ni kaniia onobwi te ririki, e a riki bwa au kaangaanga aei ao n tia n rawawata ibukin te utu ae Hatfield. I kataia tabeua te tai ni katea au reitaki ma ngaiia, ma akea te nakoraoi.
Ngkanne n te tairiki teuana ni kabanean Meei, I a kautaki irouia uoman taari aine aia uarereke man iteran te roki ae te iterana. E ngae ngke I aki nooria ke n ongo bwanaaia man au namakin n rabwata, I namakina rokoia. N te tamnei, I ongo aia onnon. Aia rongorongo e kimototo ma ni mataata: Te Tari Nelson, akea temanna ae ti kabaeaki nakoina!Ko kona ni buokiira?” N te tai ae waekoa man te tai anne, I a ataia bwa e a tia ni mate tinaia, ma tamaia ao mwaneia ae uarereke a maiu.
Te ninikoria are e reke man aia onnon Laural Ann ao Gay Lynn, I a manga kataia riki n reitaki ma tamaia are I a ataia bwa e maeka ma natina te mwaane Shawn. N te tai aei a tauraoi ni kani kaitibo ma ngai.
N Tuun, I katorobubua raoi imatan Jimmy, ngkai ai 88 ana ririki ni maiu, ao nanou ni koaua ni marooro ma ngaia. I karakina aia bubuti natina aine ao n tuangnga bwa I kakatonga ni karaoa te otenanti ni kabaebae ibukin ana utu. I kamataata naba bwa e na bae ni karaurau te tai ao te konabwai ae bati ao n ana itera Shawn n tauraoina ao n tau n rin n te tembora, ngkai akea mai rouia ae a tia n kabaeaki n te tembora.
Tamnein te Uea e korakora namakinana rinanon te kaitibo anne. Ao ngke Timmy ao Shawn a butimwaea au ibuobuoki, I rang ni kukurei! A taningamarau ni mwakuri ma aia beretitenti n te titeiki, bitiobi, taan reirei n te mweenga, te tia kairiiri n te mition n te uoote, n ai aroia naba mitinare ao mitinare taanga ake a maan. Ao ngkanne, n te tai ae aki maan nako, n te Tembora ae Payson Utah, I karekea au tai ni kabaea Ruth nakon Jimmy ao natiia aika aman nakoia. Ngai ma Wendy ti tang ngke ti ira waakin te kabaebae ae tamaroa anne. A mwaiti naano aika a kamaoaki n te bong anne!
Ngke I tabe n iangoa te baere riki anne, I miimi iroun Jimmy ao Shawn ao n te bwai are a tauraoi ni karaoia. A tia n riki bwa aomata ake I kaungaaki irouia. Ngke arona bwa I kona ni karekea te bwai are I tangira, e na bon bae n ae mwaane ao ataeinimwaane n tatabemaniia nako n te Ekaretia aei a na kaota te ninikoria, korakora, ao te nanorinano n aron te tama ao natina te mwaane. A na tauraoi ni kabwarabure ao ni kanakoa te maraki are ngkoa ao taian katei. Ana tauraoi ni kan kairaki mai i rouia taan kairiiri n te nakoanibonga bwa e aonga ana Mwakuri ni Kamaiu Iesu Kristo ni kaitiakiia ao ni kakorakoraia. Ngaia ni kabane ti na riki bwa mwaane aika a tau n uouota te nakoanibonga “imwiin bairean te nakoanibonga ae tabu.”2
N niboutokaia nanona ni boutoka rawawatan te bwai are e uotaki. Bon te onimakinaki ae tabu ni uota te nakoanibonga, are bon mwaakan ma ana kariaia te Atua ae korakora. Iangoa aei: te nakoanibonga e katokaaki iaora bon te mwaaka naba anneao te kariaiakaki are mai iai ao e karaoa aei te Atua ao aonaaba aika a aki kona ni warekaki mwaitiia, e tautaekana karawa ao aon te aba, ao ni karietataia natina aika ongotaeka.”3
N te tai ae aki maan n nako, Ngai ma Wendy ti mena n te boowi ike e tekateka iai te tia aokan ao n tauraoi ni katanga te kuna ni kaukuuki. Matana a toka iaon te anene, ao tabonibaina iaon te taibi. E a moanna n taotaoni bwai n taibi ma akea te bwanaa. I wirikiriki nakon Wendy, “Akea mwaakana.” I kakoaua bwa iai te bwai ae katoka waakin butin te bwaawa nakon te aokan anne.
Taari, n aron ae I maaku bwa iai mwaane aika mwaiti ake a tia n anganaki te kariaiakaki n te nakoanibonga ma akea mwaakan aia nakoanibonga ibukin waakin butin te bwaawa anne e tukaki man te bure n aron te taningaroti, te aki kokoaua, kainikatonga, te aki itiaki, ke te katabetabeaki ni bwain te aonaaba.
I maaku bwa a mwaiti kaain te nakoanibonga are ti teutana ae a karaoia ke akea te bwai ae a karikirakea aia konabwai iai ni kangaraoiia n rin ma mwaakan karawa. I raraoma ibukiia akea a aki itiaki n aia iango, namakin, ke aia mwakuri ke a bwainikiriniia buuia ke natiia, ngaia are e a tuuka aia konabwai ni karekea mwaakan te nakoanibonga.
I maaku bwa a mwaiti ake a nanokawaki n taenikai n aia rinerine nakon teuare buakaka ao n taku bwa n aron aia mwakuri, “I tabe riki ma kakukureian nanou nakon are N na karaoia n uouota mwaakan te Tia Kamaiu ni kakabwaiaia iai tabeman.”
I I maaku, taari, bwa tabeman ibuakora n te bong teuana a na uti ao n ataia bwa tera raoi te mwaaka are n te nakoanibonga ao a na rinanon te uringaaba ae korakora bwa a tia ni kabanea aia tai n ukoukora riki te mwaaka iaoia tabeman ke te mwaaka n te mwakuri nakon reiakinan kamwakuran mwaakan te Atua.4Beretitenti George Albert Smith e reirei bwa “ti aki mena ikai bwa ti na kabanea ara tai n te maiu aei ao ngkanne ti waaki nakon te karietataaki; ma ti mena ikai bwa ti na tau ni katoa bong ibukin nakoa ake ti na kanoai ake e kantaningaira iai Tamara imwiin te maiu ae mamate.”5
Bukin tera temanna te mwaane e na kataonabai ana bong ao ni maeka ibukin taonaban ana amwarake Etau6 ngke e a tia n onimakinaki ma te konaa ni karekei kakabwaia ni kabane mairoun Aberaam?7
I bubuti ngkami ni kabane ma te kawaekoa ni maiu n ae tau n riki bwa taan uouota te nakoanibonga. N te bong are e na roko, ti mwaane akanne ake a taua raoi ma nanoia n aia nakoanibonga, ntaningamarau n ukoukora te kan reireinaki iroun te Uea n ti Ngaia, a na kona ni kakabwaia, ni kairiiri, ni katana, ni kamanoa, ao ni kakorakorai, ao ni kamarurungakiia tabeman. Tii te mwaane are e a tia ni karaoa ae tamaroa e tau ni uouota mwaakan te nakoanibonga e na kona ni uoti kakai nakoia naake e tangiriia ao ni kawakina ana mare ao ni kamanoia ana utu, ngkai ao n aki toki.
Tera te bwai ae kainnanoaki ni karikirakea mwaakan te nakoanibonga anne? Ana Tinia n Abotoro te Tia Kamaiu, Betero—Betero naba anne ma Iakobo ao Ioane a katoka te Nakoanibonga ae te Merekitereka iaon Iotebwa Timiti ao Oliver Cowdery8— ni kaoti anua ake ti riai ni ukoukori n “riki bwa taan katoong aroaro aika tabu.”9
E aranna bwa te onimaki, te raoiroi, atatai, taubaang, taotaona n nano, aro n Atua, akoi ni kiritian, tangira ae kororaoi, ao te taningamarau.10 Ao tai mwaninga te nanorinano!!11 Ngaia are I bubuti, a na kanga kaain ara utu, raoraora, ao raora ni mwakuri n taku bwa ngkami ao Ngai tera ae ti na karaoia ni karikirakei bwaai aikai ao bwaintangira n tamnei ake tabeua?12 Ngkana a karikirakeaki riki anua akanne, e na korakora riki mwaakan ara nakoanibonga.
Ti na kanga ni karikirakea mwaakan ara nakoanibonga? Ti riai n tataro mai nanora. Te taetae n ae riai ibukin waaki ni kakukurei ake ngkoa ao aika a nang roko, tokin tabeua bubuti ibukin kakabwaia, a aki kona ni katea te aekaki n taetae n tataro ma te Atua are e na uota te mwaaka ae reitinako. Ko tauraoi n tataro n ataia bwa ko na kanga n tataro ibukin riki te mwaaka? E na reireiniko te Uea.
Ko tauraoi ni ukoukori booki aika a tabu ao ni kakukureiko n ana taeka Kristo 13—ni kamatebwai n ae korakora bwa e aonga n reke riki te mwaaka? Ngkana ko tangiria bwa buum e na kakatonga iroum, kariaia bwa e na noriko iaon te Intanete ni kamatebwai ana taua Kristo 14 ke ni wareki am boki aika tabu!
Ko tauraoi n nebonebo n te tembora n katoa tai? Te Uea e tangiria ni karaoa oin Ana anga reirei n Ana auti ae tabu. Iangoia bwa a na kukureira Ngaia ngkana ko butiia bwa e na reireiniko taekan kiingin te nakoanibonga, te kariaiakaki, ao te mwaaka ngkai ko rinanon otenanti n te Nakoanibonga ae te Merekitereka inanon te tembora ae tabu.15 Iangoa rikiraken mwaakan te nakoanibonga are e na riki bwa am bwai.
Ko tauraoi n iriira ana katooto Beretitenti Thomas S. Monson ni beku ibukiia tabeman? Ibukin bubua n ririki e a tia ni karaoi bwaai ake e aki bairei, n iriira ana kairi te Tamnei n roko n ana mataroa temanna ao ngkanne n ongo taeka n aron, “Ko kanga n ataia bwa kanuringan maten natira te aine? Ke “Ko kanga n ataia bwa au koro n ririki?” Ao, ngkana ko bon tangira raoi riki mwaakan te nakoanibonga, ko na kukurei ao n tabeakina buum, ni mwaneiaao ana reirei.
Ngkai, ngkana aei arona ni kabane ae e na taraa n rawawata, taiaoka iangoia bwa e na tera aron kaokorora n ara reitaki ma buura, natira, ao ara reitaki n te mwakuri n aron tabeiaiangara ni karekean mwaakan te nakoanibonga ngkai ti rikirake n te mwakuri ke ni karikirakea mwaitin te mwane n ara akaunti n te bangke. Ngkana ti na nanorinano ni kaotiira imatan te Uea ao ni butia bwa e na reireiniira, E na kaotia nakoira bwa ti na kanga ni karikirakeaarora n rin nakon Mwaakana.
Ni boong aika kaitira, ti ataia bwa a na iai mwaeiei n taabo aika kakaokoro.16 Tao teuana mai ibuakon taabo akana kakaokoro akanne tao bon inanon mweengara, ike namakin, kataumwane, ke “kaangaanga” n tamnei a na kaoti. Mwaakan te nakoanibonga e kona ni karaoa taari bwa e na raoi ao ni kamaoi mwaoto n rii ake iaon te aba. Mwaakan te nakoanibonga e kona naba ni karaui naano ao ni kamaoi ikoaki inanoia naake ti tangiriia.
Ti tauraoi n tataro, n aki mamatam, ni kamatebwai, n ukeuke, n taromauri, ao ni beku n aroia mwaane mairoun te Atua bwa ti aonga ni kona ni karekea te aekaki ni mwaaka anne? Ibukiia uoman ataeinnaine aika a uarereke ake a ingainga ni kan kabaeaki nakoia aia utu, aia karo ao tariia a tauraoi ni karaoa are a riai ni karaoia ni uouota te Nakoanibonga ae te Merekitereka ae tabu.
Tariu aika tangiraki, ti a tia n anganaki te onimakinaki ae tabu—ana kariaia te Atua ni kakabwaiaiia tabeman. E bia teirake ngaira n tatabemaniira nako n aroia mwaane mairoun te Atua are a tia ni katabuaki mai imwaaina n—tauraoi ni uouota ana nakoanibonga te Atua ma te ninikoria. Ma te mwaakaanne , ti kona ni buoka ni katauraoa te aonaaba ibukin Kauaokin ara Tia Kamaiu, Iesu Kristo, Aio Ana Ekaretia, e kairaki n te bong aei iroun Ana burabeti, Beretitenti Thomas S. Monson, are I rangin tangiria ao ni boutokaia. I kakoaua n aran Iesu Kristo, amen.