I Kakoaua?
Ngkana a koaua bwaai aikai, ngkanne iai iroura te kabanea ni korakora n rongorongo n te kantaninga ao n ibuobuoki are e ataaki n te aonaaba.
Ni Maati 30, bon teuana te ririki n nako, Ethan Carnesecca ae uoua ana ririki, kaain Amerika Fork, Utah, e karinaki n te onaoraki n aorakina ae te niumonia ao te ran i mamaana. Uoua te bong imwiina, e a rikirake ni korakora aorakina n te aro are e a kakibaaki n te erekabuta nakon aia Onaoraki Ataei i Salt Lake City. Tinana Michele e a rang n raraoma, e kariaiakaki bwa e na toka imoa n te kaintekateka n raona natina. E anganaki te bwai ni kakauongo bwa e aonga n reitaki ma tabeman inanon te erekabuta. E kona n ongo te tia bwai n aoraki are e kuakuaa natina are uarereke, ao ngkai bon te neeti irouia ataei ngaia, Michele e ataia bwa Ethan e a bon rangi ni korakora aorakina.
N te tai ni kanganga aio, Michele e nooria bwa a kiba riaon te Draper Utah Tembora. Man te eea, e a tara naano are e kona naba n noora te Karaangan Tembora i Jordan, te Tembora ni Maungan Oquirrh, ao bon te Salt Lake Tembora n tei n raroa. E roko te iango n ana iango: “Ko Kakoaua ke ko aki?”
E taekina te atatai aio:
“I a tia n reiakina taekan taian kakabwaia n te tembora [are] ‘utu a kona n ikotaki n aki toki’ n te Moanrinan ao Ataeinnaine. I reiakina taekan te rongorongo ibukiia utu nakoia aomata aika raraoi mai Mexico n au mition. I kabaeaki ma raou ibukin te tai ae akea tokina inanon te tembora. I reirei taekaia utu ngke te tia kairiiri irouia Ataeinnaine, ao I karakin taekaia utu aika akea tokiia ma natiu ni bootakin te utu n te tairiki. I ATAIA, ma I KAKOAUA? Au kaeka e waekoa n roko ngke e kaoti te titiraki inanon au iango: te Tamnei e kamatoa inanou ao n au iango te kaeka are I kaman atai—I BON Kakoaua!
“N te tai anne I bunra nanou n tataro nakon Tamara are i Karawa, ni karabwaa ibukin te atatai ao te koaua are I karekea bwa utu ngaira aika akea tokiia. I karabwaa ibukin Natina, Iesu Kristo, are e kariki. I karabwa ibukin natina, ao I tuanga Tamau are I Karawa bwa e na ataia ngkana E na uota natiu Ethan nakon mweengana I karawa, ao e Nakoraoi. I onimakina Tamau are i Karawa ma nanou ni kabane, ao I ataia bwa N na manga noora Ethan. I rang kukurei bwa inanon taai n nakobuaka iai te atatai AO te koaua bwa e koaua te euangkerio. E reke irou te rau.”1
Ethan e kabanea te wiiki ae mwaiti n te onaoraki, ni karekei tararua mai irouia ake a mwaatai. Taian tataro, aki mamatam, ao onimaki mai irouia ake ti tangiriia, n ikotaki ma aia tararua, are e a kona n reke otinakona man te onaoraki ao n okira mweengana n ikotaki ma ana utu. E a marurung n te bong aei.
Te tai ae moan te kakawaki ibukin Michele e kamatoa nakoina bwa te bwai are e a tia reireinaki ni kabane inanon maiuna e raka riki nakon tii te taeka; e bon koaua.
Taneiaira ngaira n tabetai nakon kakabwaia ake ti karekei ngkai kain te aro ngaira n ana Ekaretia Iesu Kristo Ibukiia Aika Itiaki ni Boong aika Kaitira ake ti aki oota raoi ni bwaninin kakai ao karinean ana reirei ni koaua te Uea n ana Ekaretia ae koaua? Ti namakina te bure ibukin bwaintangira aika korakora ake ti kona n anganaki n te maiu aei? Te Tia Kamaiu e reirei bwa Ngkana ti kawakin ana tua ao n teimatoa ni ua te toki ti na karekea te maiu are akea tokina, are te kabanea ni korakora ni bwaintangira man ana bwaintangira ni kabane te Atua.”2
Ti Kakoaua bwa te Ekaretia aei e raka riki nakon tii te tabo ae raoiroi ae e na kaeaki ni katoa Tabati ao n reirei n riki bwa te aomata ae raoiroi. E raka riki nakon te kirabu ni Kiritian ae kakateke are ti kona n reitaki iai ma aomata aika raoiroi. Bon tiaki tii bwariko n iango aika Tamaroa are kaaro a kona n reireiniia natiia ni mweengaia bwa a na riki bwa a na katabuaki, aomata aika Tamaroa. Ana Ekaretia Iesu Kristo ibukiia Aika Itiaki ni Boong aika Kaitira bon akea tokina nakon riki bwaai aikai ni kabane.
Iango inanon tabeua te miniti ibukin bwaai ake ti karekei inanon te Ekaretia aei. Ti Kakoaua bwa te Ekaretia e bon kateia Iesu Kristo ngke e mena iaon te aba e a tia ni manga kaokaki iroun te burabeti are e weteaki iroun te Atua n ara tai ao ara mataniwi e reke irouia te mwaaka are ti tebo ao te kariaiakaki ni mwakuri n aran te Atua are iai ngkoa irouia Abotoro ake ngkoa. E aranaki bwa ana Nakoanibonga te Atua. Ti karekei akanne rinanon te kariaiakaki are e kaokaki aei, ti kona ni karekei otenanti ni kamaiu, n aron te bwabetito, ao ni kakukureiaki ni kaitiakaki n ana bwaintangira te Tamnei ae Raoiroi ae Itiaki bwa e na raoniira n tainako. Iai Abotoro ao burabeti ake a kairiira ao ni kaira te Ekaretia aei rinanon kiingin te Nakoanibonga, ao ti Kakoaua bwa te Atua e taetae nakoia Natina rinanoia burabeti aikai.
Ti Kakoaua naba bwa te mwaaka n te Nakoanibonga aei e kona ni karaoi berita aika a tabu ao ni karekei otenanti n te tembora aika tabu are n te bong teuana ti na kona n oki nakon te Atua ao ni maeka ma Ngaia n aki toki. Ti kona naba ni karekea, rinanon te mwaaka aei, te utu ae kabaeaki ibukin te tai ae akea tokina ngkana taanga a karaoa te berita ae tabu n te mare ae boou ae akea tokina n ana kateitei ae tabu are ti Kakoaua bwa bon ana auti te Atua. Ti Kakoaua bwa ti kona ni karekei otenanti ni kamaiu tiaki ti ibukira ma ibukiia naba ara bakatibu ake a maiu iaon te aba n aki reke aia tai n rinanon otenanti ni kamaiu aika a kakawaki aikai. Ti kakoaua bwa ti kona ni karaoi otenanti ibukiia ara bakatibu n tei ibukiia inanon naba tembora aika tabu aikai.
Ti Kakoaua bwa, rinanon te burabeti ao mwaakan te Atua, ti a tia ni karekei riki rakan booki aika a tabu, n reitia nakon te kakoaua are n te Baibara are Iesu Kristo bon te Tia Kamaiua te aonaaba.
Ti taekinna bwa Ana Ekaretia Iesu Kristo Ibukiia Aika Itiaki ni Boong Aika Kaitira bon abanuean te Atua ao ti ngaia te Ekaretia ae koaua iaon te aba. E aranaki bwa ana Ekaretia Iesu Kristo ibukina bwa E tei bwa atuun Ana Ekaretia, ao bwaai ni kabane aikai a kona ibukin Ana anga karea ni kamaiu.
Ti kakoaua bwa bwaai aika onoti aikai riki te tabo ae e kona n reke iai ke Bootaki iaon te aonaaba. E ngae ngke aro ake tabeua ao Ekaretia a raoiroi ao a karinerine, ma akea mai ibuakoia ae e a tia ni karekea te kariaiakaki ni karekei otenanti ni kamaiu ake a reke n ana Ekaretia Iesu Kristo ibukiia Aika Itiaki ni Boong Aika Kaitira.
Iai ara atatai ni bwaai aikai, ma ti kakoauai? Ngkana a koaua bwaai aikai, ngkanne iai iroura te kabanea ni korakora n rongorongo n te kantaninga ao n ibuobuoki are e ataaki n te aonaaba. Kakoauakiia bon te bwai ae raoiroi ae akea tokina ibukira ao ibukiia ake ti tangiriia.
Ni Kakoaua, ti riai ni karekea te euangkerio inanon ara iango ao inanora! Ti kona n tii rinanon aia euangkerio ae maiu ibukina bwa anne ae kantaningaaki ke ibukina bwa te katei are ti a tia n ikawairake inanona ke ibukina bwa e a reke bwa te anua. Tao n tabetai tabeman a tuai n rinanon are a namakinna ana aomata te Uea Beniamina imwiina ngke a ongo ana kabwarabwara ae kaunganano. “A takarua n te bwanaa ae ti teuana ni kangai: Eng, ti kakoauai taeka ni kabane ake ko a tia n taekin nakoira, ao riki ti atai tonutonuia ma koauaia, bukina bwa e a tia Tamnein te Uea ae Moan te mwaaka, ni karika te bitaki ae moan te korakora iroura, ke inanora, n te aro are akea to nano ni kan karaoa ae buakaka, ma n teimatoa ni karaoa ae raoiroi.”3
Ngaira ni kabane ti riai n ukoukora karekean nanora ao bitaki bwa ti aonga n aki karekea nanora n irii kawain te aonaaba ma ni kakukureia te Atua. Te bitaki ni koaua bon te waaki are e riki n te tai ae maan ao irekereke ma te ungannano ni karaoan te onimaki. E roko ngkana ti ukoukori Koroboki aika tabu nakon te intanete. E roko ngkana ti ongotaeka nakon ana tua te Atua. Te rairaki e roko ngkana ti buokiia naake irarikira. E roko man te tataro ae nanonaki, ka kaean te tembora n tainako, ao ni kakaonimaki ni kakoroi nanon tibwangana ake e anganiira te Atua ma te kakaonimaki. E tangira te mwakuri ae reitinako ni katoabong.
N tabetai I titiraki, “Tera te kabanea ni korakora ni kakaewenako ae a kaitara ara roronrikirake n te bong aei?” I kaeka bwa I kakoaua bwa bon te kairiiri are n te “kateitei ae bubura” inanon maiuia.4 Ngkana ana Boki Moomon e koreaki ni kaineti riki nakon ara bong, ngkanne ma te koaua ti aki kona n aki karekei rongorongo ake a kaineti riki nakoira ni kabane ni miin Riaai n te kai ni kamaiu ao rootakiia naake a kotokoto ni baia ao ni kaenaena man te kateitei are korakora ma ni bubura.
Tera ae e rang kananokawaki irou bon kabwarabwarakiia naake a tia ni kaman ininimaki rinanon te rootongitong n te kawai ae irariki man abwabwaki, n taua te kai te biti, a tia n roko n aia kouru, ao a tia ni waaki ni katoonga uaan te kai are kangkang n te kai ni kamaiu. Ngkanne e taekinna Koroboki aika a tabu bwa aomata ake a raneanea raoi kunnikaia n te kateitei are e korakora “a tabe ni kamamaeia ma ni kotokotoia aomata ake a tia n roko n te onaroka ni kana uaana.
“Ao imwiina ngke a tia ni kana te uanikai a namakina te mama, irouia ake a kamamaeia; ao a bwaka nako nanon kawai aika katabuaki ao a bua.”5
Kiibu akanne a kabwarabwaraia naake a kaman tia ni karekea ana euangkerio Iesu Kristo inanon maiuia. Ngkana ti bungiaki inanona ke ti na ininimaki rinanon te rootongitong ni kakaea, ti a tia ni kana uaan te kai aei, “are moan te tangiraki riki uaana nakon uanikai nako”6 ao iai ana kona ni uota te maiu nakoira ae akea tokina “bon ana bwai n tangira te Atua ae moan te korakora riki nakon bwai n tangira nako.” Ti na tii riai ni kamwaita anaakin uaan te kai ao n aki mweuti irouia ake a bwainingarei ara koaua ke naake a kukurei ni karekei nanououa n aia iango aomata ke naake a kabuakakaia ara mataniwi n te Ekaretia ao ana reirei. Ti riai n rinea te onimaki— nakon te nanououa ni katoabong. Unimwaane M. Russell Ballard e a tia ni kaungaira bwa ti na “teimatoa n tiku inanon te booti, ni kabonganai bwai ni kamaiu n Tamnei, ao n taui ni kauai baira.”7
Ngkai ngaira kain ana Ekaretia te Uea ae koaua, ti a kaman toka inanon te booti. Ti aki riai ni kakaenako rinanon ana rabakau te aonaaba ibukin koaua ake a na anganiira te kamanoaki, ibuobuoki, ao te kairi ni kamanoakira rinanon kanganga n te maiu—ti a kaman karekea! N ai aron tinan Ethan are e kona ni kunea ana koaua are e a kaman reke ao n taekinna ma te aki nanououa n tain te kanganga, “I Kakoaua,” ngaira naba ti kona!
I kaota au Kakoaua bwa kaainakin abanuean te Uea bon te bwaintangira ae akea kabotauana. I Kakoaua bwa kakabwaia ao te rau are e karekea te Uea nakoia ake a ongotaeka ao ni kakaonimaki ni bwaai ni kabane e riaon are e kona n iangoia te aomata. I katoka au Kakoaua aei iroumi n aran Iesu Kristo, amen.