Mwaakan Mimitongin te Atua

Iroun Unimwaane Kent F. Richards

Man te Itingaun

Tembora ni kabane bon ana tembora te Atua ae tabu, te auti ae tabu, ao ngaira ni kabane ti kona n reiakinna ao n atai mwaakan te atua inanona.

Tabeua te namwakaina imwain maten te Burabeti Iotebwa Timiti, e kaitibo ma te Tengaun ma Uoman n Abotoro taekin bwaai aika e rangin ni kainnanoi te Ekaretia n te tai ae kanganga anne, E tuangiia, “ Ti kainnanoa te tembora nakon bwaai riki tabeua .”¹ Koauana, n te bong aei n taai ni kataaki aikai, ngaira ao kaain ara utu ti kainnanoa riki te tembora nakon bwaai riki tabeua.

N tain katabuan te tembora ae aki maan n nako, I mimi n aron te taneiai ni kabane. I tangira te kaneweaba n auti, ni butimwaia angiia taan neweaba aika a roko n noora te tembora, te katei ni bukamaru ma ingaingan ma kukureia kairake; n rimwiiaki ma te katabu. Te Tamnei e kakimwareirei. A mwaiti aomata aika a kakabwaiaki. Ao ngkanne n te ingabong are imwiina, ngai ma kainnabau ti rin inanon te nei ni bwabetito ni karaoa te bwabetito ibukiia tabeman ara bakatibu. Ngke I tabeka baiu ni moana te otenanti, I mimi ni mwaakan te Tamnei. I namakinna riki bwa e koaua mwaakan te tembora n taian otenanti.

E a tia te Uea ni kaoka, bwaninin te Nakoanibonga ae te Merekitereka are e kuneaki inanon te tembora ao n ana otenanti, bukina bwa iai inanon te tembora kiingin te nakoanibonga ae katabuaki, bwa ti aonga ni karekea te karineaki ao te mimitong.² Ngaia ae, mwaakan mimitongin te Atua e kaotaki inanon otenanti n te nakoanibonga.³ Te berita aei bon ibukim ao am utu.

Tabera bwa ti na “karekea” are e anga Tamara are i Karawa.⁴ “Ao ana kamwaitakaki bwaai nakoimi, riki te mwaaka”:⁵ te mwaaka ni karekea ni kabane are E kona ao e na anganiira—ngkai ao n aki toki;⁶ te mwaaka n riki bwa natin te Atua mwaane ao aine,⁷ n ata “mwaakan karawa,⁸n taetae n Arana,⁹ ao ni karekea “mwaakan [Tamneina].”¹⁰ A kona mwaaka aikai n reke iroura n tatabemaniira rinanon otenanti ao berita aika tabu n te tembora.

Nibwaai e nora ara bong ni miina ae korakora: “Ngai, ae Nibwaai, I noora korakoran mwaakan Ana Tiibu te Teei te Atua, ae e ruo nako aoia aika a itiaki aika kain ana ekaretia te Tiibu te Teei, ma iaoia ana aomata inanon te berita ae tabu te Uea, ake a maenako nako aon te aonaaba; ao a irianaki ma te raoiroi ao ma mwaakan te Atua ao te mimitong ae korakora .”¹¹

E reke au tai n te tai ae aki maan n nako n tain te kaneweaba n te auti ma Beretitenti Russell M. Nelson ao ana utu ngke e ikoikotiia ni katobibia te bao ni kabaebae ao ni kabwarabwara nakoia bwa bwaai ni kabane aika ti karaoi inanon te Ekaretia—ni kabane bootaki, waaki ni kakukurei, reirei, ao te mwakuri—bon katauraoakira n roko n te tembora ao ni katorobubua iaon te bao ni karea ni karekei ana kakabwaia te Tama ake e a tia ni berita iai n ae akea tokina.¹²

Ngkana ti namakin kakabwaia man te tembora ni maiura, nanora a bitaki nakoia ara utu, ake a maiu ao ake a tia ni mate.

N te tai ae tibwa nako, I kakoaua te teniua n roro n utu ae a ibuobuoki n te bwabetito ni kabane ibukiia aia bakatibu. Te unnaine e karaoa naba te mwakuri—e ngae ngke iai ana kangaanga n tebo iaan te ran. Ngke e otirake man te ran ao n rabwata kainabana, e tang ma te kukurei. Te tibu te Unimwaane ao te tama a manga bwabetitoia bon irouia ao tibuia aika mwaiti. Te kukurei tera are a karekea te utu? Iai aia tai ae kakawaki utu ni baireia ni karekea aia tai n te tabo ni bwabetito.

Teutana imwain matena, Beretitenti Joseph F. Smith e karekea te kaotioti ni kamaiuakiia mate. E taekinna bwa naake n te aonaaba n tamnei a onimakiniira n otenanti ake ti karekei ibukiia. E taekinaki ni booki aika tabu, “Te mate are e rairananona e na kamaiuaki, rinanon te ongotaeka nakon otenanti n ana auti te Atua.”¹³ Ti karekei otenanti ibukiia, ma a karaoi ao a bukin taeka ni berita aika a irekereke ma otenanti n tatabeua. Ni koauana, ti kona n namakiniia naake n te aba n Tamnei ao ngaia a ata te mwakuri n te otenanti ae karaoaki ibukiia n te tembora.

Tera ngkanne tabera n te mwakuri aei, bwa te baituron ao n riki bwa taan mwakuri? Te Burabeti Iotebwa Timiti e reireiniia aika Itiaki n te 1840 ae “e riai ni karaoaki te mwakuri ae korakora, ao bwaai ana kainnanoaki—ao ngkai te mwakuri [ni katea te tembora] e riai ni kawaekoaaki inanon te raoiroi, e katabeia Aika Itiaki ni katinea kakawakin bwaai aikai, n aia iangoa, … ao ni karaoi ngkanne kawai aika riai ni waakin; ao n otanganiia n te korakora, ni katia ae a kona ni karaoia, ao n namakinna inanoia te nano ae korakora ni kani katia te mwakuri n ae kanga bon tabeia.”¹⁴

Ti warekia n te boki ae te Kaotioti:

“Antai aikai aika kunnikaia n ninira aika mainaina? ao a nako mai ia?

“… Bon aika a nako mai buakon te rawawata ae korakora, ao a teboki niniraia, ao a kamainainai n raraan te Tibutetei.

“Ma ngaia ae a memena inanoaan ana kaintokanuea te Atua, ao a toro i Irouna ni ngaina ao ni bong ni maneabana: ao Teuae tekateka i aon te kaintokanuea E na taakina umwana i aoia.”¹⁵

Ko aki nooria n am iango naake a mwakuri n te tembora n te bong aei?

E raka iaon 120,000 taan mwakuri n te otenanti n tembora aika mwakuri ngkai ni katobibia te aonaaba. E ngae n anne e rawata te tai ibukiia ae raka riki ni karekei atatai aika kakukurei aikai. Ngke e katanoata kakawakin tembora aika mwaiti aika uarereke Beretitenti Gordon B. Hinckley ni kabuta te aonaaba, e iangoia bwa “a riai taani mwakuri n te otenanti ni bon kaain te tabo aika ana beku ni mwakuri tabeua n aia uoote ao titeiki.”¹⁶ N tainako, a weteaki tani mwakuri bwa ana beku ibukin uoua ke teniua te ririki, ma te kantaninga bwa e na kona ni kabwabwakaki riki. E aki kantaningaki bwa n te tai are ko weteaki iai, ko na tiku nakon te tai are ko kona. Taani mwakuri aika a rangin ni maan a uota aia tangira ibukin te tembora ma ngaia ngkana a kamotirawaaki ao ni karekea aia tai tabeman, tani mwakuri aika boou ni mwakuri.

E kaania te 100 te ririki n nako, e reirei Abotoro John A. Widtsoe: “Ti kainnanoia riki tani mwakuri ni kakoroa nanon te mwakuri ae kakawaki [aei] … Ti kainnanoia riki aika rairaki nakon te mwakuri n te tembora, n anaki man roro ni kabane. … E a roko te tai … n te mwakuri n te tembora ae boou aei, ni uoti mwakuri n ibuobuoki nakoia aomata ni kabane, n roro ni kabane. … Te mwakuri n te tembora bon … ti tebo kakabwaia aika a na reke nakoia naba kairake ao aika kakaonimaki, n aroia naba kaara, aika a tia ni katikui rawawatan aika mwaiti. A kainnanoa aia tabo ataeinimwaane inanon te tembora ae mwaiti riki nakon tamana ao tibuna te unimwaane, aika a kamatoaki man te taneiai; ao te ataeinnaine ae a ikawai, e kainnanoa te tamnei, te kairooro ao te kaetieti are e roko man irakin otenanti inanon te tembora.” ¹⁷

Inanon tembora aika mwaiti, beretitenti n te tembora a butimwaaia mitinare aika tibwa weteaki ao aika a entaau, ataeinimwaane ao ataeinnaine, ni beku ibukin te tai ae uarereke bwa taan mwakuri n otenanti imwain ae a nako nakon te MTC. Aki ti kakabwaiakaki kairake aikai ni beku, ma “a karakaa te tikiraoi ao te tamnei ibukiia aika beku inanon te tembora.” ¹⁸

I titirakiniia tabeman ataeinimwaane ao ataeinnaine aika a tia ni beku bwa taan mwakuri n te otenanti imwain ao imwiin aia mition n tibwauai aia namakin. A kabonganai taeka n aron aikai ni kabwarabwara aia atatai n te tembora:

Ngke I ibuobuoki n te tembora

• I namakina “te rang ni kaan nakon te Tama ao te Tia Kamaiu”;

• I namakina “bwaninin te rau ao te kukurei”;

• Iai namakinan “menau n te mweenga”;

• I karekea “mimitong, mwaaka, ao korakora”;

• I namakina “kakawakin au berita ae tabu”;

• “Te tembora e riki bwa mwakoron rabwatau”;

• “Koraki ake ti ibuobuoki ibukiia a rang kaan inanon te otenanti”;

• “E anganai te kakorakoraaki n tokanikai nakon te kaririaki”; ao

• “Te tembora e a tia ni bita maiu n aki toki.”¹⁹

Te mwakuri n te tembora bon te taneiai ae kakawaki ao ni korakora ibukiia aomata n roroia ni kabane. Riki tabeman taanga aika tibwa mareaki a uaia ni mwakuri. E a tia n reirei Beretitenti Nelson, “Te mwakuri inanon te tembora … bon te waaki ae kakukurei ibukin te utu.”{ ²⁰ Ngkai taan ni mwakuri n otenanti, irarikin are karekean otenanti ibukiia am bakatibu, ko kona naba ni karaoi otenanti ibukiia.

N aron are e taekinna Beretitenti Wilford Woodruff

“Tera te wewete ae korakora riki ae kona te mwaane [ke te aine] ni karekea n oin bain teuanne [ke neienne] te mwaaka ke te kariaiakaki ni waaki nako ao n tararua n te otenanti n te kaotioti? …

Ko riki bwa te bwai ni mwakuri ni bain te Atua ni kamaiuan te tamnei anne. Akea te bwai ae anganaki natiia aomata ae aekakina.” ²¹

E wakinako:

“Ana wirikiriki te Tamnei ae Raoiroi ae tamaroa ko na [anganaki] ao kaubwain Karawa aika kakawaki, ikotakiia anera, e na karinaki n te tai teuana ma teuana.” ²²

“E kakawaki aei nakoimi ni kabane ke I kona n anga nano [inanon] tabeua te ririki are ti na kabanea ikai ni maiura n iriko.”²³

E a tibwa tia ni kauringiira Beretitenti Thomas S. Monson bwa “kakabwaia n te tembora bon akea booia.”²⁴ “Akea te mwakuri n ibuobuoki ae korakora riki.” ²⁵

Nakomai nakon te tembora. Nakomai n taainako. Nakomai ibukiia am utu. Nakomai, ao buokiia tabeman bwa ana roko naba.

“Antai aikai aika kunnikaia n ninira aika mainaina?” Tariu ao mwaneu, {ngkami boni ngaia ngkami aika kam a tia ni karekei otenanti n te tembora, aika kam a tia ni kawakin ami berita aika tabu riki n te anga karekea; ngkami aika kam buokiia ami utu ni kakai kakabwaia n te mwakuri n te tembora ao n tia ni buokiia tabeman inanon te kawai. Kam rabwa n ami ibuobuoki. I kakoaua bwa tembora bon mimitongin te Atua, ae tabu ao inanona ti kona n tatabemaniira n reiakina ao n ata mwaakan mimitongin te Atua, n aran Iesu Kristo, amen.

Bwaai aika a na taraaki

1. Teachings of Presidents of the Church: Iotebwa Timiti (2007), 416; emphasis added.

2. Doctrine ao Covenants 124:34.

3. Doctrine ao Covenants 84:20.

4. Taraa Mareko 4:20, 24–25.

5. Doctrine ao Covenants 71:6.

6. Taraa Doctrine ao Covenants 84:38: “Ao ane e butimwaea Tamau e butimwaeaki n abanuean Tamau; ngaia are ni kabane ana te Tama ana uruakinaki nakoina.” Aikai berita ake a irekereken ma berita ma otenanti n te tembora; taraa naba Doctrine ao Covenants 132:20–24.

7. Taraa Doctrine ao Covenants 39:4; taraa naba Doctrine ao Covenants 45:8; Moses 6:65–68.

8. Doctrine ao Covenants 121:36.

9. Doctrine ao Covenants Taraa 1:20: “Ma ni kabane aomata a na taetae n aran te Atua te Uea, riki ana Tia Kamaiu te aonaaba.”

10. Doctrine ao Covenants 29:30.

11. 1 Nibwaai 14:14; emphasis added.

12. Taraa Russell M. Nelson, “Katauraoam ibukin Kakabwaia man te Tembora,” Riaona, Turai 2001, 37

13. Doctrine ao Covenants 138:58; taraa naba kiibu 53–54.

14. Ana Reirei: Iotebwa Timiti, 415.

15. Kaotioti 7:13–15.

16. Gordon B. Hinckley, “Tabeua Iango iaon te Tembora, Kateimatoaaia taan Rairaki, ao Aia Ibuobuoki Mitinare,” Ensign, Nov. 1997, 49.

17. John A. Widtsoe, “Nebonebo n te Tembora,” Utah Genealogical and Historical Magazine, Eberi. 1921, 51–52.

18. Am itoman n te koroboki mairoun Beretitenti Brent Belliston, Boise Idaho Tembora.

19. Am itoman n te koroboki.

20. Russell M. Nelson, “Tamnein Eria,” Ensign, Nobembwa 1994, 86.

21. “Kabwarabwara mairoun Beretitenti Wilford Woodruff,” Millennial Star, Meei 14, 1896, 307.

22. Ana Reirei te Beretitentits n te Ekaretia: Wilford Woodruff (2004), xxx.

23. Ana Reirei: Wilford Woodruff, 177.

24. Thomas S. Monson, “Kakabwaia man te Tembora,”Riaona, Meei 2015, 93.

25. Thomas S. Monson, “Te Tembora ae Mimitong—te Biikan Nakon te Aonaaba,”Riaona, Meei 2011, 92.