E Butiira te Uea bwa Ti na Buokia ni Karaoa Ana Mwakuri
Iroun Cheryl A. Esplin
Moan Kauntira n te Buraimwari Beretitentii ni Kabuta
Ana mwakuri ni ibuobuoki Kristo bon tabeakinaia aomata ao ni boboto riki iaoia tabeman.
“Kam na itangitangiri; n ai arou ngke I tangiringkami.”1 Taeka aikai, are e aneneaki n te kuaea ae kakateke aei, a taekinaki iroun Iesu te aoa imwaain Ana karea ni kaboomwi—te karea are e taekinna Unimwaane Jeffrey R. Holland bwa te “kabanea ni kakannato ae e a tia ni kaotaki n te tangira ae e itiaki n rongorongon te aonaaba aei.”2
E aki tii reireiniira Iesu bwa ti na tangira, ma E maiuakina naba te bwai are E reiakinna. Rinanon Ana mwakuri, Iesu “are nakonako ni karaoa ae raoiroi”3 ao “ni butiia aomata ni kabane bwa a na iriira Ana katooto.”4 E reirei, “Ba ane e kani kawakina maiuna ao e na boni kabua: ma ane e na kabua maiuna i bukiu ao e na boni kawakinna.”5
Beretitenti Thomas S. Monson, are e ota ao ni maiuakina te kauring n tangira, e taku: “I kakoaua te Tia Kamaiu e tuangiira bwa tii ngkana ti kabuai maiura ni buokiia tabeman, tii teutana te kantaninga ni maiura. Naake a maiu tii ibukin kabwaiaia n te kabane ao a na maiu n tamneia ao … ni kabua tamneia, ngke naake a kabuai maiuia ni buokiia tabeman a rikirake ao ni maiureirei—ao boon mwiina a katanaki maiuia.”6
Anuan Kristo n ibuobuoki ae koaua bon ibukiia aomata ao e boboto iaoia tabeman. Temanna te aine are e tararua buuna ae nimwaoraki e kamataata, “Tai iangoa tabem bwa te karawawata; iangoia bwa te tai n reireinaki bwa tera raoi te tangira.”7
Ngke e taetae n te bootaki n taromauri i Brigham Young Iuniwetiri, e titiraki Titita Sondra D. Heaston: “Tera ngke ti kona n ota n te bwai are a iangoia ao n namakinna tabeman? Ti na ota riki i bon imarenara? N namakina are a namakinna tabeman, n noora are a nooria, ao n ongo n are a ongo, ti na karaoia, ao ni butimwaia, te tai ni beku ibukiia tabeman, ao ti na anganiia n ae kaokoro? Ti na anganiia ma te nanorinano ae bati, ma te akoi ae bati, ao ma te taotaonakinnano ae bati?”
E tibwa te bwai are e rinanona Titita Heaston ngke e ibuobuoki n ana kaembwa te Bootaki n Ataeinaine. E taku:
“Temanna ara … tia taetae n te taromauri … e reireiniira arora n ‘te anua are ti riai ni karekea.’ Teuana ana kibuntaeka … e kangai, ‘Ko na riki bwa temanna are e ibuobuoki n atai ao ni beku ibukiia tabeman— n aki iangoiko ma ni kabanea nanom iaoia tabeman.’
“Ni kaotakin aei, e wetea temanna te ataeinaine ao ni butia te ataeinaine anne bwa e na tei ni kaitara. [E] a kaotinakoa ngkanne te tirotaam ao ni katikua imarenan te ataeinnaine ao ngaia bwa e aonga ngaia, [te tia taetae], n taraa te tirotaam ngke e kataia n taetae ma te ataeinnaine. N ae aki kamiimi, a aki kona ni karekea koauana ke koauan te marooro. Aei te bwai n reirei ae mwaakaroiroi are e kaota kaangaangan te reitaki ao ni beku ibukiia tabeman ngkana ti rangin raraomaeakina arora ao n tii noorira ma kainnanora. [E] kararoa ngkanne te tirotaam, ao ni kaotinakoa rabwatan te winto, ao ni katikua imarenan ubuna ma ubun te ataeinaine. … Ti a kona n nooria bwa e a riki te ataeinnaine bwa boton [ana] reirei ao te mwakuri n ibuobuoki ae koaua anne e riai bwa ti na kabanea nanora iaon kainnanoia ao aia namakin tabeman. Angin te tai ti raraomaeakina arora ao maiura ae tatabetabe—ngkai ti tii kabanea ara tai iaora ngke ti kataia n tarai ara tai ni beku—bwa ti aki rangin kabanea ara tai iaoia naake ti riai ni beku ibukiia.”8
E kauringiira n angin te tai Beretitenti Monson bwa ti “katobibiaki irouia naake a kainnanoa ara ibuobuoki, ara kaunganano, ara boutoka, ara karaunano, ara akoi—bwa kaain ara utu, raoraora, ara ikikina, ke iruwa.” E taku, “Ngaira bain te Uea ni buoka ana mwakuri iaon te aba, ma te tua ni beku ao ni buokiia Natina. E katan iaora n tatabemaniira nako.”9
N te ririki ae nako n Tianuare, te Rao ao te Riaona makaetiin a kaoiia ataei ni kabane ni kabuta te aonaaba n ira ana reirei Beretitenti Monson—n riki bwa bain te Uea ni mwakuri. A kaoaki ataei ni karaoi mwakuri n ibuobuoki—ngkana a bubura ke a uarereke. A kaungaaki bwa a na korea tamnein baia iaon te mwakoro ni beebwa, a na koreia ni kanakoa, ni korea iaona te mwakuri are a karaoia, ao ni kanakoa nakon te maekatiin. Angiina ibuakomi ake kam kakauongo n te tairiki aei e bae ni ngkami tabeman ibuakoia tengaa n ataei ake a karaoa te ibuobuoki n tangira are kam karina te beebwa are iai tamnein baimi iaona.10
Ngke a reiakina ataei aron te tangira ao te beku ibukiia tabeman ngkai a uarereke, a katea te banna n ibuobuoki ni uaa tokin maiuia. Angin te tai ataei a reireiniira angiina ibuakora bwa kaotiotan te tangira ao te ibuobuoki a aki riai ni bubura ao ni kakawaki bwa a na nano ni karaoa te bitaki.
Te tia reirei n te Moanrinan e tibwa te katooto aei. “N te bong aei,” e taku, “ara nimaua ao onoua n ririki n te kiraati a karaoi mwaee n roroa ni kaota ara tangira ibukiia tabeman. Ni kabane ataei a korotamnei iaon mwakorokoro ni beebwa: teuana bon ibukiia, teuana ibukin Iesu Kristo, ao tabeua ibukiia kaain aia utu ao ake a tangiriia. Ti kanim mwakorokoro ni karikii bwa mironron n tomatomai ni karaoia bwa te tiein are a riki bwa mwaee n roroa. Ngke a korotamnei, ataei a karakina rongorongoia aia utu.
“E taku Heather, ‘I taku bwa e aki tangirai tariu ae ikawai. Ti aki toki n unuun. … I bon ribaai naba. E aki raoiroi maiu.’ Ao e taua atuna ni baina.
“I iangoa te kaangaanga n ana utu ao n namakinna bwa tao e koaua ae iai ana kaangaanga inanoni maiuna. Ma imwiin taekinan aei iroun Heather, Anna, inano mai tabon te taibora, e kaeka, ‘Heather, I karina tamneim ni mwaeu imarenau ma Iesu ibukina bwa E tangiriko ao I tangiriko.’
“Ngke e taekina arei Anna, e kawakawa Heather iaan ana taibora ni karoko iroun Anna ao n rabwatia ni koonna.
“N tokin te kiraati, ngke e roko tinana bwa e na anaia, e taku Heather, ‘Keetinna bwa tera, Tibu te Unaine? E tangirai Iesu.’”
Ngkana ti anganiia tabeman ara tangira ao ni ibuobuoki riki ni kawai aika uarereke, a na bitaki nano ao ni kamarauaki ngkai a namakina ana tangira te Uea.
N tabetai, e ngae n anne, ibukin mwaitiia aomata aika a kainnanoa ara ibuobuoki ao bwa a na kabebeteaki rawawataia, e kona ni kaangaanga katokan te kainnano ae mwaiti aika kataweaki.
Tariu, tabeman ibuakomi aika kakauongo a bae n namakinna bwa ko a tia ni karaoa am kabanea ni kona ni buokiia kaain am utu ake a kainnanoa buokaia. Uringnga, inanon karaoan mwakuri akanne ao n angin te tai ni katabeaki aika okioki, kam “beku iroun Atuami.”11
Tabeman ibuakomi kam bae n namakinna bwa akea te bwai ae e na karaoaki ngkai ko taraia kaain rarikim ke am kawa ibukin am tai n ibuobuoki ni katoka rawawatan temanna.
Ngaira ni kabane ti kona ni karaoi mwakuri n ibuobuoki tabeua ni maiura ni katoa bong. Ti maeka n te aonaaba ae kakauntaeka. Ti anga ara ibuobuoki ngke ti aki titiribure, ngke ti aki wiwinnanti, ngkana ti aki momotikitaeka, ngke ti moangare, ngke ti kangai ko rabwa, ao ngke ti taotaonakinnano ao n akoi.
Tabeua mwakuri n ibuobuoki e maan taina, te babaire ae nanonaki raoi, ao te korakora ae raka riki. Ma iai uaana man ara mwakuri. Tao ti kona ni waaki man titirakiniira titiraki aikai:
-
Antai ae I kina ae I kona ni buokia n te bong aei?
-
Mwaitira au tai ao au bwai aika iai irou?
-
N te aro ra ae I kona ni kamanena iai au taarena ma au konabwai ni kakabwaiaia iai tabeman?
-
Tera ae ti kona ni karaoia n ara utu ni buokiia tabeman?
E reirei Beretitenti Dieter F. Uchtdorf:
“Ko riai ni karaoa … are a tia ni karaoia ana reirei Kristo ni koron boong: ni kaai n reirei, ni kamanenai bwaai n ibuobuoki ake a tauraoi, ukoukora ana kairi te Tamnei ae Raoiroi, butiia te Uea ibukin kamatoakina, ao ngkanne katauraoiko ao nako mwakuri.
“I anganiko te berita,” e taku. “Ngkana ko iriira te banna aei, ko na karekea te kairiiri ae onoti n aron nakon antai, tera, nningai, ao n te tabo raa ni katauraoi n ana kawai te Uea.” 12
N te tai are I iangoia iai bwa tera aron te Tia Kamaiu ngke e manga oki, I iangoa rokona irouia Nibwaite ngke e titiraki:
“Iai ibuakomi ae aoraki? Uotia mai. Iai ibuakomi ae mwauku, ke e mataki, ke e ikoaki, ke e aki konabwai, ke e rebera, ke e rai, ke aika a bonotaninga, ke a karawawataaki n aekaia nako? Kairiaa mai ao N na kaoka aorakiia, bwa iai au nanoanga nakoimi; ao e a onrake nanou n te nanoanga. …
“… [Te Tia Kamaiu] e katoka aorakiia ni kabane.”13
Ma ngkai, E butiira bwa ti na karaoa Ana mwakuri.
I ataia bwa tangiran te Atua ao aomata tabeman are iai nanona ae kakawaki ni maiura. Ti bia iriira ana katooto ara Tia Kamaiu ao Ana kauring ni buokiia tabeman ake ti tangiriia.
I kakoaua ni koauan ana berita Beretitenti Henry B. Eyring “bwa ngkana [ti na] kamanenai [ara] taarena ni buoka temanna, [ti na] namakina ana tangira te Uea ibukin te aomata anne. [Ti na] namakina naba ana tangira ibuki[ra].”14 N aran Iesu Kristo, amen.
Te bwai ae e na ataaki: N Eberi 2, 2016, e a kamotirawaaki Titita Esplin ae te moan kauntira n te beretitentii ni kabuta n te Buraimwari.