Ike a Bootaki iai Uoman ke Teniman
Ngkana ko kakauongo ma te Tamnei, ko na kona ni kunea maraun nanom, am onimaki e na kakorakoraaki, ao am konabwai e na karikirakea tangiran te Uea.
Tariu ao mwaaneu, I butimwaai ngkami nakon te ka 186 ni Maungatabu ni Kabuta n te Ririki n ana Ekaretia Iesu Kristo ibukiia aika Itiaki ni Boong aika Kaitira. I kimwareirei n raoni ngkami, ao ni butimwaai ngkami.
I kukurei ngkai kam roko nakon te maungatabu n namakina ana kairi te Tamnei mairoun te Atua ao n namakina kaaniara ma Tamara are i Karawa ao nakon te Uea ae Iesu Kristo.
N ikotakira n te bootaki aei, are e kabuta te aonaaba, bon mirion ibuakoia ana reirei Iesu Kristo ake a berita n ururingnga n taainako ao ni beku Ibukina. Ibukin te kakai n rabakau aika boou, kaokoron te tai ao te raroa ae moan te bubura e mauna nako. Ti namakinna bwa ti iira te bootaki aei ni kabane n ti teuana te tai.
Ma ae e kakawaki riki nakon bootakira ni kabane bwa antai aran te aomata ae ti bootaki iai. E berita te Uea bwa e ngae ngke e korakora mwaitiia Ana reirei iaon te aba n te bong aei, E na kaan ma ngaira n tatabemaniira nako. E taku nakoia Ana reirei ake tabeman n te 1829, “E koaua, e koaua, ae I tuangkami, … bwa ike a bootaki iai uoman ke teniman n arau, … nooria, N na mena ibuakoia—riki ngkai I bon mena naba ibuakomi” (D&C 6:32).
Ngkai e raka riki nakon temanna ke uoman, ana reirei ake a bootaki n te maungatabu aei, ao n aron ae e a tia ni beritanaki, te Uea e mena ibuakora. Ibukina bwa te aomata ae e a tia n uti ao ni mimitong, E aki mena rabwatana n taabo nako ike a bootaki iai Aomata aika Itiaki. Ma, ni mwaakan te Tamnei, ti kona n namakinna bwa E mena irarikira ikai n te bong aei.
Te tabo ra ao ngke ti namakina kaanian te Tia Kamaiu ni katan iaora n tatabemaniira nako. E anga te kaetieti aei:
“Ao riki, e koaua E taku nakoimi, aika raoraou, ti na iangoi ana taeka inanora, ao E anga te tua nakoimi bwa kam na wetea Arana ngkai E kaan—
“E taku bwa ti riai ni kaania bwa E na kaania naba ma ngaira; ti na botumwaaka ni ukoukoria ao ti na kunea; ti na bubuti, ao ti na karekea; ti na karebwerebwe, ao e na kaukaki nakoira” (D&C 88:62–63).
I kinaia uoman aomata ake a kakauongo n te bong aei ake a kainnanoa te kakabwaia anne ma nanoia ni kabane. A kekeiaki mwaaka ni kataia ni kaaniia ma te Uea n tain te maungatabu aei. N aia reta a koroboki nakoiu—a roko aia reta n au aobiti n te wiiki naba anne—ni bubuti te aekaki ni buoka anne.
Ngaiia ni kauoman bon taan rairaki nakon te Ekaretia ao a tia ni karekei aia kakoaua ae mataata n ana tangira te Atua te Tama ao Natina, Iesu Kristo, te Tia Kamaiua te aonaaba. A ataia bwa te Burabeti ae Iotebwa Timiti e katea te Ekaretia man kaotioti aika kairaki mairoun te Atua ao bwa kiingin te nakoanibonga ae tabu a kaokaki. Ngaiia n tatabemaniia nako a kakoaua bwa iai kiing inanon te Ekaretia n te bong aei. A kaota aia kakoaua nakoiu inanon aia reta.
Irarikina a kaai n namakina te rawawata bwa aia namakin n tangiran te Uea ao Ana tangira ibukiia a keerikaaki. A kaai n tangiria, ma nanoia ae bwanin, ibukiu bwa N na buokiia ni manga karekea kimwareireia ao n namakina te tangiraki ngkai a kaaina abanuean te Atua. A kaai ni kaota maakuia bwa ngkana aki kona ni manga karekei aekakin tangira akanne n ae bwanin ibukin te Tia Kamaiu ao Ana Ekaretia, kakatai ma kataaki ake a na kaitara ma ngaai a na kona ni kamamaara aia onimaki.
A aki maroaa inanon raraomaia, ke inanon katakiia teuana ae boou. N Ana mwakuri te Tia Kamaiu ae anganiira te taetae ni kaikonaki ibukin te koraa ao te tia ununiki. Te koraa bon ana taeka te Atua. Te tia ununiki bon te Uea. Maiun te koraa ao rikirakena e katan iaon te tano. Kam uring Ana taeka:
“Ao ngke e kamae, ao a b’aka tabeua i rarikin te kawai, ao a roko man ao a kang:
“Ao a b’aka tabeua i aon te ririba, ike e aki bati tanona: ao a kai riki, ba e mmani te tano:
“Ao ngke e oti tai ao a bue; ao a rai, ba akea wakaia.
“Ao a b’aka tabeua i buakon akanta; ao a riki rake akanta, ao a karib’a:
“Ao a b’aka tabeua i aon te tano ae raoiroi, ao a ua, tabekai tatabe bubua, ao tabekai kaka onobwi, ao tabekai kaka tenibwi.
“Ane iai taningana n ongo, ao ke e ongo” (Mataio 13:4–9).
I taetae riki, te koraa bon ana taeka te Atua. Te tano bon nanon te aomata are e karekea te koraa.
Ngaira ni kabane titebo arora ma aomata aika kakateke ake a koroboki nakoiu ibukin buokaia ao te kakoaua. Iai iroura ni kabane taian koraa, ke ana taeka te Atua, n unikaki inanora n taai tabetai. Ibukiia tabeman, inanon ataeira ngke ara karo a kaoira bwa ti na bwabetitoaki ao ni kamatoaki irouia naake a anganaki te kariaiakaki. Tabeman ibuakora a reiakinaki irouia ana toro te Atua aika weteaki. N tatabemaniira nako ti namakinna bwa e raoiroi te koraa ao n namakinna bwa e bwebwerake inanora.
Ngaira ni kabane a kataaki ara onimaki ni kakabwaia aika onoti aika taonaki man, aia kaikoaki koraki ake a tangiria ni uruani ara onimaki, kairiiri nakon te bure, ao nanom n tii tabeakiniko are a kauarerekei ara konabwai ni mwanei ao ni katauraoi ara namakin n tamnei ao ni kai anga nanora.
Naake a nanokawaki man buan te kimwareirei are a tia ngkoa ni karekea bon naake a kakabwaiaki. Tabeman aki noora meemeeren aia onimaki i bon inanoia. E wanawana Tatan. E tuangiia naake e tangiria bwa e na aki karauia bwa namakinan te kimwareirei are a karekea ngkoa bon kekeweaia.
Au rongorongo n te bong aei nakoira ni kabane bwa e na iai tabebong te bong aika a na roko n rineia bwa a na marau nanora ao ni karekea ao ni kamwarakea te koraa. Te koraa bon ana taeka te Atua, ao e na bwaro nako aoia ni kabane ake a kakauongo, ake a mataku, ao ake a wareki waaki inanon te maungatabu aei. Te katangitang, taian taetae, ao taian koaua a tia ni katauraoaki irouia ana toro te Atua ake a tia ni botumwaaka n ukoukora te Tamnei ae Raoiroi ni kairiia inanon aia katauraoi. A tia n tataro n te tai ae maan ao n nanorinano riki ngkai e a kaoti bongin te maungatabu.
A ti a n tataro ni karekea te mwaaka ni kaungai ngkami ni karaoi rinerine ake a na karika inanom te tano ae maiureirei ibukin rikiraken ma maiureirein ana taeka te Atua. Ngkana ko kakauongo ma te Tamnei, ko na namakina maraun nanom, e na kakorakoraaki am onimaki, ao am kekeiaki n tangira te Uea e na rikirake.
Am rinerine n tataro ma nanom ae bwanin e na biti baike ko rinanona n te tetere ni maungatabu ao inanon boong ao namwakaina aika a na roko.
Angiina ibuakomi a ti a ni waaki. Ni moan waakin te tetere aei, e mwaiti ae ko karaoia nakon ae ko ti ongora nakon te tataro; ko reita am onimaki n te bubuti bwa ti na kimwareirei n ana kakabwaia te Tamnei ae Raoiroi are e a bwaro nako aora. Ngkai ko reita am bubuti ae mabu n aran Iesu Kristo, ko a kaan riki ma Ngaia. Aio Ana maungatabu. Bon tii te Tamnei ae Raoiroi ae kona ni uoti kakabwaia ake e tangiri te Uea ibukira. N Ana tangira ibukira, E berita bwa ti kona n namakinna bwa:
“Baike a na taekinna ana toro ngke a kairaki mairoun te Tamnei ae Raoiroi bon booki aika tabu, bon ana kantaninga te Uea, bon ana iango te Uea, bon ana taeka te Uea, bon bwanaan te Uea, ao mwaakan te Atua nakon te kamaiuaki.
“Nooria, aei ana berita te Uea nakoimi, O ngkami au toro.
“Ma ngaia ae, e riai n iai ara kantaninga, ao n aki maaku, bwa e mena te Uea irarikira, ao e na tei irarikira; ao ti riai ni kaotia bwa, Iesu Kristo bon Natin te Atua ae maiu, bwa bon Ngaia ngkoa, ao bon Ngaia, ao E na bon roko” (D&C 68:4–6).
Ko kona n tataro ao n reita am onimaki ni katoa te tai are e roko iai ana toro te Atua n te tabo n taetae bwa ana berita te Uea n te Doctrine ao Covenants tiekition 50 e na kakoroaki bukina:
“Ni kabwarabwaraan te berita anne, te Uea e titiraki ngkana te aomata ae katabuaki Mairouna ao ni kanakoaki bwa e na taetaekina te koaua mairoun te Tia Ibuobuoki, n Tamnein te koaua, n tataekinna mairoun Tamnein te koaua ke kawai riki tabeua?
“Ao ngkana man kawai riki tabeua bon tiaki mairoun te Atua.
“Ao e titiraki ngkana ane e karekea taekan te koaua anne bon mairoun te Tamnei ke man kawai riki tabeua?
“Ngkana man kawai riki tabeua bon tiaki mairoun te Atua.
“E ngae n anne, e aera bwa ko aki kona n oota ao n ataia, bwa ane e karekea te taeka mairoun Tamnein te koaua e karekea n te kawai are e kabwarabwaraaki man Tamnein te koaua?
“Ma ngaia ae, ane e kabwarabwara ao e karekea, ane e mataata imarenana ma temanna ma temanna, ao a kaai ni boutokaaki ao a na kimwareirei ni kabane” (D&C 50:17–22).
Ko kona n tataro ngkai e nang waaki n anene te kuaea. Te tia kaira te kuaea, te tia aokan, ao kaain te kuaea a tia n tataro ao ni kataneiai ngkai aia iango ma aia namakin a kaineti nakon te Atua ao ma aia onimaki bwa te katangitang ao taekana a na kamarau naano ao ni kakorakora mwaakaia ni karikirakei aia onimaki tabeman. A na mwakuri ibukin te Uea n aron ae ngkoa a mena Imatana, ao a na ataia bwa Tamara are i Karawa e ongo irouia ni koaua ngkai E ongo aia tataro aika onoti. Ni kabane a mwakuri ma te tangira ni kakoroa bukin ana berita te Tia Kamaiu nakon Emma Smith: “Ngke e tuangnga bwa e kimwareirei n anenen te nano; eng, aia anene aika raoiroi bon aia tataro nakoina, ao e na kaekaaki ma te kakabwaia iaon atuuia” (D&C 25:12).
Ngkana ko aki tii kakauongo ma ko tataro naba ngkai a anene, ami tataro ao aia tataro a na kaekaaki ma te kakabwaia iaon atuum ao iaon naba atuuia. Kam na namakina te kakabwaia n ana tangira te Tia Kamaiu ao ana kariaia. Naake a iri n te nebonebo anne a na namakina aia tangira ae rikirake Ibukina.
Ko na bae n rineia n tataro ngkai te tia taetae e a taraa n roko n tokin ana rongorongo teuanne ke neienne. Teuanne ke neienne e na tataro ma nanona nakon te Tama bwa te Tamnei ae Raoiroi e na angan teuanne ke neienne taekan te kakoaua are e na tabeki nanoia taan kakauongo, aia kantaninga, ao aia nanomatoa n tainako n ururinga te Tia Kamaiu ao ni kawakin ana tua ake E anganiira.
Te kakoaua e na aki riki bwa kibun te rongorongo anne. E na riki bwa kakoauan tabeua koaua bwa te Tamnei e kona n uoti nako nanoia aomata ake a na tataro ibukin buokaia, ibukin kaetieti mai karawa, ao ti na karekea ana tangira Kristo ae itiaki.
Te kakoaua ae koaua a na anganaki taan taetae. Tao e na tii teutana aia taetae, ma e na uoti nako nanon te tia kakauongo ae nanorinano are e bwarua ana taeka te Atua are e roko n te maungatabu ni kabuta.
I ataia man au taneiai bwa tera ae kona ni karaoaki man aia onimaki aomata aika raoiroi ni uoti taeka mairoun te Tamnei ni kainan te kabwarabwara. Iaon riki ae tii te taina, temanna e taekinna nakoiu imwiin au kakoaua, “Ko kanga n ataa te bwai are I kainnanoia ni kan ongo?” I reiakinna n aki miimi ngkana I aki kona n uringnga n taekina te taeka. I taekina taekan te kakoaua, ma e mena te Uea ikekei, e anganiia nakoiu n te tai anne. Te berita bwa te Uea e na anganiira taeka n te tai raoi are a kaineti ma te kakoaua (taraa D&C 24:6). Kakauongo raoi nakon taian koaua ake a kaotaki n te maungatabu aei—ko na namakina kaaniam ma te Uea.
Ko kona n namakinna bwa I a roko n te tai ngke I a kabanea te rongorongo are I kataia n anga ma kakoauana. Am tataro a na buokai n anga taian koaua ake a na buoka temanna ni kakantaninga kaekaan ana titiraki teuanne ke neienne.
I katuka nakoimi au koaua ae matoatoa bwa Tamara are i Karawa, Elohim ae kakannato, e tangiriira ao ni kinaira, ni kabane. Iaan Ana kaetieti, Natina, Iehova, bon te Tia Karikibwai. I kakoaua bwa Iesu Kristo mai Natareta e bungiaki bwa Natin te Atua. E kamarurungiia aoraki, e karaoia mataki bwa a na nooraba, ao ni kautiia maate. E kabooi aia bure ni kabane natin te Tama are i Karawa are a bungiaki nakon te maiu ae mamate. E urua ana kabaebae te mate ibukiia ni kabane ngkai E uti man te ruanimate n te Moan Itita n te Tabati. E maiu n te bong aei, te Atua—e a tia n uti ao e mimitong.
Tii aio te Ekaretia ae koaua, ao bon Ngaia bouan te maninganinga. Thomas S. Monson bon Ana burabeti nako aonaaba ni kabane. Burabeti ao Abotoro ake ko na ongora irouia n taetae n te maungatabu aei a taetae ibukin te Uea. Bon Ngaiia Ana toro, iai kariaiakaia ni mwakuri Ibukina. E kairiia Ana toro iaon te aonaaba. I ataa aei. Ao I kakoaua n Arana, n aran Iesu Kristo ae tabu, amen.