Katikui Ara Onimaki n Tamneina Are E Na Kairiira ni Karaoa ae Raoiroi
Iroun Beretitenti Henry B. Eyring
Te Moan Kauntira n te Moan Beretitentii
Ti kaaniaki riki nakon te Tia Kamaiu ngkana ara, tangira ae itiaki, ti beku ibukiia tabeman Ibukina.
I kakaitau ni mena ibuakomi n te taromauri n te tairiki aei, n iangoia, ni kabanei nanora nako iai. Ti a tia ni uaia n tataro. E a tia Tamara are i Karawa n ongo ara tataro. Ti a tia n uringa ara Tia Kamaiu, te Uea Iesu Kristo, ngkai ti a tia ni karietataaki n anene n nebonebo Nakoina. Ti a tia ni kairaki mai ieta ni karaoa riki ae bati ni buoka ara Mwatita n Ana mwakuri ni buokiia natin Tamara are i Karawa.
Nanora ni buokiia tabeman e kakorakoraaki man ara kakaitau ibukin te bwai are e karaoia te Tia Kamaiu ibukira. Anne bukina ngkai e onrake nanora ngke ti ongo taekana n aneneaki “Bukina bwa I a tia n anganaki ae bati, ngai naba N na anga.”1 Te Uea Beniamina, n ana taetae ae korakora ae koreaki n Ana Boki Moomon, e beritana te namakin ni kakaitau anne bwa e na roko (taraa Motiaea 2:17–19).
Ngkana ara onimaki iroun Iesu Kristo e karikiira bwa ti na karaoi bwaai aika ti na tau iai ni karekea kimwareirein Ana kakabwarabure, ti namakina te nano ni buokiia tabeman Ibukina. E reirei te Uea Beniamina bwa e aki kona n reke te kakabwarabure n te mwakuri n te tai naba anne.
E taekinna n te kawai aei: “Ao ngkai, ibukin bwaai ake I a tia n taekin nakoimi—are, ibukin kateimatoan kamaunaan ami bure man te bong teuana nakon te bong teuana—I tangiri ngkami bwa kam na anganako ami bwai nakoia aika kainnano, aomata ni kabane n aron are iai irouia, n aron kamwarakeaia aika a baki, kakunnikaiakiia aika akea karabaia, kawaraia aoraki ao buokakiia ni kainnanoia, n tamnei ao n rabwata, n aron are a tangiria” (Motiaea 4:26).
Toan Aramwa Amureka ae tikiraoi, e reirei naba te koaua are ti riai n reitia n ara mwakuri nako Ina ni kateimatoa te kakabwarabure: “Ao ngkanne nooria, tariu aika kam tangiraki, I taku nakoimi, tai taku bwa ti aei; bwa imwiin ae kam a tia ni karaoi aikai ni kabane, ngkana kam tannako ma irouia ake a kainnano, ao ake aki karabaniia, ma n aki karawawataaki, ma n aki anga bwai, ngkana iai, nakoia ake a kainnano—I taku nakoimi, ngkana akea ae ko karaoia ma ibuakon bwaai aikai, nooria, bon akea bongan am tataro, ao e aki manena nakoim, ao ko riki n aekaia bwaritaio ake a kakea te onimaki” (Aramwa 34:28).
I a tia n iangoia aine n te tairiki aei inanon maiu. Iai 31 aine ao ataeinnaine inanon ara utu, ni moanaki ma kainnabau ao n reitia ni kairiia teniman aika boou uoman naati aine natin natina te aine ao temanna te nati aine ae natin natina te mwaane. Tabeman bon raora n te tairiki aei. Niman a mena aia ririki iaan 12. E kona n ae aio aia moan n tai ni bootaki n te Tienta ni Maungatabu ma tariia n ana Ekaretia te Tia Kamaiu. Ngaiia n tatabemaniia nako bon iai irouia aia ururing ao ni karaoi oin katabeaia man te taneiai aei n te tairiki aei.
Iai teniua ururing ao teniua motinnano are I tataroakinna bwa a na ururingnga inanon maiuia ao tao iaona riki. Te ururing bon iaon taian namakin. Ao motinnano bon bwaai aika a na karaoaki.
Te kabanea ni kakawaki n ururing bon te tangira. Ko a tia n namakina aia tangira taan kairiiri ake a tia n taetae. Ao ko a tia n namakina mairoun te Tamnei are a tangiriko n aki kinako ibukina bwa a namakina ana tangira te Tama are i Karawa ao te Tia Kamaiu ibukim. Anne bukina ngkai a tangira ae bati ni kani buokiko ao n tangiria bwa ko na karekei kakabwaia ae tangiria te Atua ibukim.
Te kabanea ni kakawaki n ururing bon te tangira—ibukiia raoraom, raom n reirei, kain rarikim, ao temanna ae ko a tibwa kinaa, te iruwa. Te namakin n te tangira anne bon te bwaintituaraoi mairoun te Atua. E atongaki ni booki aika tabu bwa te “tangira ae kororaoi” ao “bon ana tangira Kristo ae itiaki” (Moronaai 7:47). Ko a tia n namakina te tangira anne n te tairiki aei.
Te kauoua n namakin ae ko a tia ni karekea n te tairiki aei bon ana kairoro te Tamnei ae Raoiroi. A tia Aine ni berita nakoimi n te bong aei ae te Tamnei ae Raoiroi e na kairi ngkami ni kakaea te mwakuri are E na tangiri ngkami bwa kam na anganiia tabeman Ibukina. Ko a tia namakina te Tamnei ae aia berita bon mai iroun te Uea ao e bon koaua.
E taku te Uea, bwa ti riai ni katuka ara onimaki n Tamneina are E kairiira bwa ti na karaoa ae raoiroi, ni karaoa kakoauakina, n nakonako n te nanorinano, ao ni karaoa te moti n te raoiroi, ao aio bon Tamneiu (D&C 11:12).
Ko na bae n tia ni karekea te kakabwaia anne n te tairiki aei. Te katooto, te ara ke ubun temanna ae kainnano e roko n am iango n tain te bootaki aei. E kona n ae ti te iango ae uarereke, ma ibukin te bwai ae ko ongo n te tairiki aei, ko na tataro ibukina, ma te onimaki bwa e na kairiko te Atua ni karaoa te bwai ae raoiroi ae E tangiria ibukiia. Ngkana aekan n tataro aikai a riki bwa katein maiura, ngkoe ao tabeman kam na bitaki nakon ae raoiroi riki.
Te kateniua n namakin ae ko a tia ni karekea n te tairiki aei e kangai bwa ko tangiria ni kaniiko riki ma te Tia Kamaiu. E ngae ngke te kabanea n ataei n aine ikai e a tia n namakina koauan te kakao n te anene: “‘Mai, irirai,’ e taku te Tia Kamaiu. Ngaia ae ti na ira ana katooto.”2
Ngaia, ae man taian namakin aikanne, te moanibwai ae ko na karaoia bwa ko na nako ao ni beku n ataia bwa ko aki karaoia n ti ngkoe. Ngkana ko nako ni karaua nanon ao ni beku ibukin te Tia Kamaiu, E katauraoa te kawai imwaimi. Ngkai, n aron are e na taekinna te mitinare ae e tibwa oki ikai n te tairiki aei, tiaki nanon anne ae ni kabane aomata itinanikun mataroa ni kabane aika a tauraoi ni butimwaiko ke ni kabane aomata aika ko kataia ni buokiia a na karabwako. Ma te Uea e na rimoam ni katauraoa te kawai.
N tainako e a tia Beretitenti Thomas S. Monson n taekinna ae e ataa koauan raoi ana berita te Uea: bwa E na rimoara, bwa e na mena n angataira ao n angamaingira, ao Tamneina e na mena inanora, ao Ana anera a na katobibira, n tabekirarake (D&C 84:88).
Teuana te kawai ae E nako n rimoam bwa e na katauraoi nanoia aomata ae E a tia n tuangko bwa ko na buokia. E na katauraoa nanom naba.
Ko na kunea naba bwa te Uea e katikuia taan ibuobuoki i rarikim—i angataim, i angamaingim, ao ni katobibiko. Ko aki nako n ti ngkoe ni beku ibukiia tabeman Ibukina.
E karaoa anne ibukiu n te tairiki aei. Te Uea e katauraoia taan kakoaua aika mwaiti” (Ebera 12:1), n te taeka ao n te katangitang, n ikota ao ni kamwaita mwaakan te bwai ae E tangiria te Uea bwa N na taekinna. N na ti kakoaua ae I kona ni karina au taetae n te rongorongo ae tangiria n tibwauaki. Au kantaninga ao au tataro bwa ko na namakina te kakaitau ao te kimwareirei ngkai e katikuko te Uea ma naake tabeman bwa kam na beku Ibukina.
Ngkana iai iroum te atatai n tainako, ao ko na, ko na moangare ma te kinaaki, n are I karaoia, n te tabo ae ti anene iai, “Te mwakuri ae e kakukurei.”3
Ko na moangare naba ngkana ko uringa te kibu aei: “Ao ane E na kaekaia te Uea ni kangai, E koaua ae I a tuangngkami ba ngke kam karaoi baikai nakon temanna ae moan te mangori i buakoia tariu aikai, ao kam karaoi naba nako Iu” (Mataio 25:40).
Te kauoua ni bwai ae ko riai ni karaoia bon uringakin te Uea ngkana ko karaoa te mwakuri Ibukina. E aki ti nako te Uea imatara ao e kanakoia anera bwa a na mwakuri ma ngaira, ma E namakina naba te rau aika ti angania tabeman ngkana ti a tia n Anganna.
Ni kabane natin te Atua aine aika a ongo ao a kakoaua te rongorongo n te bootaki aei a na titiraki, “Tera ae tangiria te Uea bwa N na karaoia ni buokia n anga te ibuobuoki nakoia aika a kainnano? ”Aia kangaanga aine n tatabemaniia nako a kakaokoro. Anne e koaua ibukiia au ataeinnaine, ai natiu aine, tibu aine ao tibutoru n tibu aine. Nakoia, ao nakoia natin te Tama are i Karawa aine, I kaoka ana reirei ae wanawana Titita Linda K. Burton.
E a tia n tuangkami bwa kam na tataro ma te onimaki n ataia bwa tera ae tangiria te Uea bwa ko na karaoia n am kaangaanga. Ao ngkanne e taekina te berita n te rau ae tamaroa ae anga te Uea nakon te aine are e ngureakinaki ibukin kabirakin Atuna ma te bwa ae bobuaka ngke e na kona n tia ni kaboaki nako ni buokiia aika kainnano.
“Ao e taku Iesu, Tai nanoia; kam aera ngkai kam tabareia? e karaoa te makuri ae raoiroi nako Iu.
“Ba a bon aki toki ni mena i roumi aomata aika aki kaub’ai, ao ngkana kam kani karaoa ae raoiroi nako ia ao kam kona: ma e bon aki toki menau i roumi.
“E karaoa ae kona neiei: e roko ni kabira rabatau i m’ain taunakiu.
“Ao e koaua ae I a tuangkami, Ba ike e kaotiotaki iai te euangkerio i aonaaba ni bane, ao ane e na taekinaki naba iai te bae e karaoia neiei ba kanuringana” (Mareko 14:6–9).
Te kibu ae uarereke ae tamaroa man raoiroi bon te reirei ae kororaoi ibukiia aine aika tau n abanuean te Uea n te tai ae kakukurei. Ko na tataro nakon te Tam bwa ko na ataia bwa antai ae ko na buokia n te tangira Ibukina ao ibukin Ara Tia Kamaiu. Ao ko na aki kantaninga aia kakaitau aomata n aron te bwai ae ko karaoia, n ira ana katooto te aine n te rongorongo n ana boki Mareko ae tabu, are ana mwakuri ae tabu ni karinea te tia Kamaiu n te aonaaba e ururingaki ma tiaki arana.
Au kantaninga e kangai bwa aine n ara utu a na karaoa aia kabanea n tamaroa ae a kona ni karaoia n aia tangira ibukin te Atua ni buokiia naake a kainnano. Ao te kateniua ni bwai ae ana karaoia bon te aki kamoamoa ni karaoan mwakuri aika tamaroa. E ngae n anne N na tataro bwa a na butimwaea ana reirei te Uea, ngke E kangai—are ngaia ae ti kainnanoia n ongora:
“Kam na tarataraingkami, ba kam na aki karaoi ami raoiroi i mataia aomata ni kan noraki i rouia: ba ngkana aromi anne.”
Ao E taku:
Ma ngkana ko angab’ai, ao ke e tai ata ana makuri ataim maingim:
“Ba e aonga n raba am angab’ai: ao E na anganiko am b’ai Tamam ae nora ae raba” (Mataio 6:1, 3–4).
Au tataro ibukiia aine n te abanuea, n taabo aika a mena iai ke n aia kaangaanga, e kangai bwa aia onimaki iroun te Tia Kamaiu ao aia kakaitau ibukin Ana Mwakuri ni kamaiu e na kairiia ni karaoa ae a kona ni karaoia ibukiia naake e tuangiia te Atua bwa a na buokiia. Ngkai a karaoia, I berita bwa a na waaki ni kawaia n riki bwa aine aika tabu are a na butimwaeaki iai ma te tangira iroun te Tia Kamaiu ao Tamara are i Karawa ae a nora ae raba.
I kakoaua bwa aio ana Ekaretia Iesu Kristo are e tia n uti. E a uti. E a tia ni kabooi mwiin ara bure nako. I ataia bwa Ibukina ti kona ni manga kautaki ao ni maiu n akea tokina. Beretitenti Thomas S. Monson bon Ana burabeti ae maiu. Tamara are i Karawa e ongo ao e kaekai ara tataro. I kakoaua bwa ti rikirake ni kaan riki ma te Tia Kamaiu ngkana ti, nako ma te tangira ae itiaki, ni beku ibukiia tabeman Ibukina. I katuka ma ngkami te kakoaua anne n aran Iesu Kristo, amen.