Mwakoro 63
Kaotioti ae kaotaki rinanon Iotebwa Timiti te Burabeti, i Kirtland, Ohio, n Aokati 30, 1831. Te Burabeti, Sidney Rigdon, ao Oliver Cowdery a tia n roko i Kirtland n Aokati 27 man nakoia nako Missouri. N rongorongon Iotebwa Timiti e kabwarabwaraki te kaotioti aei: “Ni boong aikai ae e boou iai te Ekaretia, e korakora te ingainga ni karekean ana taeka te Uea i aon bwaai nako aika a kaineti ma kamaiuakira; ao ibukina bwa aban Tion e riki ngkai bwa te bwai ae te kabanea ni kakawaki n te maiu n rabwata n aia iango, I bubutia te Uea ibukin rongorongo riki tabeua ni kaineti ma ikotakiia Aomata aika Itiaki, ao kabooan te aba, ao tabeua riki bwaai.”
1–6, E na roko te bong n un i aoia ake a buakaka; 7–12, A roko kanikina man te onimaki; 13–19, Taan wenenibure n te nano a na kakewea te onimaki ao a na karenakoaki nako nanon te nei n ai; 20, Taan kakaonimaki a na karekea abaia ni bwaibwai i aon te aonaba ae e bitaki; 21, Bwaninin rongorongon te bwai ae riki n te Maunga ni Bitaki e tuai moa ni kaotaki; 22–23, Naake a ongeaba a na karekei bwain te abanuea aika raba; 24–31, Aaba ni bwaibwai i Tion a riai ni kabooaki; 32–35, Te Uea e taekini buaka, ao ake a buakaka a tiringiia ake a buakaka; 36–48, A riai Aomata aika Itiaki ni ikotaki i Tion ao ni karekei mwaane ibukin kateana; 49–54, A na bon reke kakabwaia nakoia taan kakaonimaki n te Kauaoki, n te Mangauti, ao n tain te Tenga n Ririki; 55–58, Aio bon te bong ni kauring; 59–66, E bakanrereaki aran te Uea irouia naake a kamanena n akean te kariaia.
1 Ongora, O ngkami aomata, ao kauki nanomi ao anga taningami mai kiraroa; ao kakauongo, ngkami ae kam araningkami bwa ana aomata te Uea, ao kakauongo n ana taeka te Uea ao ana kantaninga ibukimi.
2 Eng, e koaua, ae I taekinna, ongo ana taeka teuare e kauraaki unna nakoia naake a buakaka ao taan kakaitara;
3 Are ana kantaninga e na anaia are e taku bwa e na anaia, ao ni kawakiniia n te maiu aei are e taku bwa e na kawakiniia;
4 Are e kateia n oin ana kantaninga ao kukureina; ao ni kamaunaia n te tai are e taku, ao e kona n tewe nakoia tamnei nako moone.
5 Noria, Ngai, te Uea, I taekinna ni bwanaau, ao a na ongeaba nako iai.
6 Mangaia are, e koaua ae I taekinna, a riai naake a buakaka n tarataraia, ao a riai taan kakaitara ni maaku ao n ruru; ao a riai taan aki kakoaua n taua riaia, bwa bongin te un e na roko i aoia n aron te ukeukennanti, ao a na bane aomata n ataia bwa Ngai te Atua.
7 Ao ane e ukoukori kanikina e na noori kanikina, ma tiaki nakon te kamaiuaki.
8 E koaua, ae I tuangkami, iai mai i buakomi ae a ukoukori kanikina, ao iai aika a kaman man te moan tai;
9 Ma, nooria, e aki roko te onimaki man kanikina, ma kanikina a iriiria naake a kakoaua.
10 Eng, a roko kanikina man te onimaki, tiaki man aia kantaninga aomata, ke n aron ae a kukurei iai, ma man ana kantaninga te Atua.
11 Eng, kanikina a roko man te onimaki, nakon mwakuri aika korakora, bwa n akean te onimaki akea te aomata ae e kakukureia te Atua; ao ane e un irouna te Atua e aki kukurei irouna; mangaia are, e aki kaoti nakoia kanikina, tii n te un nakon kabuakakaia.
12 Mangaia are, Ngai, te Uea, I aki kukurei irouia naake i buakomi ake a tia n ukoukori kanikina ao kamiimi ibukin te onimaki, ao tiaki ibukin kabwaiaia aomata nakon mimitongiu.
13 E ngae n anne, I anga tua, ao a mwaiti aika a tannako man au tua ao n aki kawakinii.
14 Iai i buakomi taan wenenibure aika mwaane ao aine; tabeman i buakoia a tia n tannako mai iroumi, ao tabeman a tiku iroumi are a na kaotaki rimwi.
15 Kam riai n tarataraingkami ao waekoa n raira nanomi, mwiina e roko i aomi te motikitaeka n aron te bwai ni kamwane, ao e na kaotaki babaia, ao e na iriiria aia mwakuri i mataia aomata.
16 Ao e koaua ae I tuangkami, n aron ae I a tia n taekinna i mwaaina, ane e tara te aine ma ni kaibwabwaru ibukina, ke ngkana ane e karaoa te wenenibure i nanoia, a na akea te Tamnei irouia, ma a na kaakea te onimaki ao a na maaku.
17 Mangaia are, Ngai, te Uea, I a tia n taekinna bwa akana a mamaaku, ao akana a aki kakoaua, ao taan kewe ni kabane, ao ane e tangira ao ni karaoa te kewe, ao taan wenenibure ma kabekaau, ao taan tabunea, a na reke tibwangaia n te nei are e ura n te ai ao te burimton, are te kauatai ni mate.
18 E koaua ae I taekinna, bwa a na akea nneia n te moan mangauti.
19 Ao ngkai nooria, Ngai, te Uea, I tuangkami bwa kam aki karaoiroaki, ibukina bwa bwaai aikai a mena i buakomi.
20 E ngae n anne, ane e teimatoa n onimaki ao ni karaoa au kantaninga, e na tokanikai, ao e na karekea ana bwaibwai n te aonaba ngkana e roko bongin te bitaki;
21 Ngkana e bitaki te aonaba, ni kaineti ma te banna are e kaotaki nakoia au abotoro i aon te maunga; bwaninin te rongorongo anne kam tuai ni karekea.
22 Ao ngkai, e koaua ae I tuangkami, bwa n aron ae I taekinna bwa N na kaota au kantaninga nakoimi, nooria N na kaotia nakoimi, tiaki n aiaron te tua, bwa a mwaiti aika a aki kawakini au tua.
23 Ma nakon ane e kawakini au tua N na anganna mwakuri aika raba n abanueau, ao irouna e na mena te mwanibwa n ran ae maiu, ae koburake nakon te maiu ae akea tokina.
24 Ao ngkai, nooria, aio ana kantaninga te Uea ae Atuami ni kaineti ma ana aomata aika itiaki, bwa a na ikotiia ni kabane nakon aban Tion, tiaki ni katawe, bwa e aonga n akea te mangaongao, are e uota te aoraki,
25 Nooria, aban Tion—Ngai, te Uea, I taua i nanon oin baiu;
26 E ngae n anne, Ngai, te Uea, I angan Kaitara akana ana bwai Kaitara.
27 Mangaia are, Ngai te Uea I kantaningaia bwa kam na kaboi aba, bwa kam aonga ni iai rakami i aon te aonaba, bwa kam aonga ni iai inaomatami i aon te aonaba, bwa a aonga n aki kiriwe nanoia nakon te un.
28 Bwa Tatan e katukua inanoia bwa a na un ni kaitaraingkami, ao ni kawawaean te raraa.
29 Mangaia are, aban Tion e na aki karekeaki ma tii man te kabooaki ke man te raraa, bwa mwiina e na akea abami ni bwaibwai.
30 Ao ngkana man te kabooaki, nooria kam a kakabwaiaki;
31 Ao ngkana man te raraa, ibukina bwa kam tabuaki ni kawanakoa te raraa, taraia, a mena i aomi ami kairiribai, ao kam na bwainikirinaki man te kaawa teuana nakon te kaawa teuana, ao man te auti n nebo teuana nakon te auti n nebo teuana, ao tii tabeman a na tei ni karekea aia bwaibwai.
32 Ngai, te Uea, I un irouia naake a buakaka; I taua Tamneiu mai irouia kaain te aonaba.
33 I a tia ni tuea n uniu, ao n taekini buaka i aon te aonaba, ao naake a buakaka a na tiringiia naake a buakaka, ao te maaku e na roko i aoia aomata ni kabane;
34 Ao aomata naba aika itiaki e na kanganga birinakoia; e ngae n anne, Ngai, te Uea, I memena irouia, ao N na ruo mai karawa mai i matan Tamau ao ni kabuekiia naake a buakaka n te ai ae aki maamate.
35 Ao nooria, a tuai moa riki, ma e a kaan.
36 Mangaia are, n noorakin anne Ngai, te Uea, I a tia ni bairei bwaai ni kabane i aon te aonaba, I kantaningaia bwa au aomata aika itiaki a na ikotaki i aon aban Tion;
37 Ao bwa aomata nako a na anaa te raoiroi ni baia ao te kakaonimaki i aon nukaia, ao n taetae n te bwanaa ni kauring nakoia kaain te aonaba; ao n taekinna man te taeka ao man kitanana bwa e na roko te karawawata i aoia naake a buakaka.
38 Mangaia are, a riai au taan reirei i Kirtland ni bairei tabeaiangaia n te maiu n rabwata, ake a maeka i aon te nne ni man aei.
39 E riai au tia mwakuri ae Titus Billings, are ngaia te tia tararuaia, ni kanakoa te aba, bwa e aonga n tauraoi n rokon te tai are a manga riki aroka ni mwananga nakon aban Tion, ma naake a maeka iai, ma tii naake N na kawakiniia ibukiu, bwa a na aki nako ni karokoa I tuangiia.
40 Ao a riai mwaane ni kabane ake a aki kamanenaaki, e aki akaaka irou bwa e uarereke ke e bubura, ni kanakoaki nakon aban Tion, nakoia ake I a tia n rineia bwa a na karekea.
41 Nooria, Ngai, te Uea, I angan au tia mwakuri ae Iotebwa Timiti te Ataei te mwaaka bwa e aonga ni kona n ataia iroun te Tamnei naake a na nako nakon aban Tion, ao naake au taan reirei ake a na tiku.
42 E riai au tia mwakuri ae Newel K. Whitney n taua ana titooa, ke n taekana tabeua, te titooa, i nanon te tai ae e uarereke.
43 E ngae n anne, e riai n anga te mwane ae e kona n anga, bwa e na kanakoaki nako aban Tion.
44 Nooria, bwaai aikai a mena i nanon baina, e riai ni karaoi ni kaineti nakon te wanawana.
45 E koaua ae I taekinna, e riai ni katabuaki bwa te tia tei nakoia taan reirei ake a na tiku, ao e riai ni katabuaki nakon te mwaaka aei;
46 Ao ngkai waekoa ni kawari mwanga n au ekaretia, ni kabwarabwarai bwai aikai nakoia, ma au tia mwakuri ae Oliver Cowdery. Noria, aio au kantaninga, ni karekei mwaane n aron ae I a tia n tuatua.
47 Ane e kakaonimaki ao n teimatoa e na tokanikai i aon te aonaba.
48 Ane e kanakoi taian kaubwai nakon aban Tion e na karekea ana bwaibwai n te aonaba aei, ao ana mwakuri a na iriiria, ao te kanuanga naba n te aonaba ae e na roko.
49 Eng, ao a kakabwaiaaki ake a mate i nanon te Uea, man te tai aio, ngkana e roko te Uea, ao bwaai ake ngkoa a na bua, ao bwaai ni kabane a na bitaki nakon ae boou, a na uti man te mate ao a na aki mate i mwina, ao a na karekea aia bwaibwai imatan te Uea, n te kaawa ae tabu.
50 Ao ane e maiu ngkana e roko te Uea, ao n tia ni kawakina te onimaki, e na kakabwaiaaki; e ngae n anne, e baireaki ibukina bwa e na mate n tokin maiuiia aomata.
51 Mangaia are, ataei a na rikirake ni karokoa a kara; aomata aika kara a na mate; ma a na aki matu n te tano, ma a na bitaki n te rube ni mata.
52 Mangaia are, ibukin aio abotoro a tataekina mangautiia maate nakon te aonaba.
53 Bwaai aikai bon bwaai aika kam na riai ni kakaei; ao, ni kaineti nakon aron ana taetae te Uea, a kan roko, ao n te tai ae e na roko, are ni bongin rokon Natin te Aomata.
54 Ao ni karokoa te aoa anne e na iai kibono aika a nanobaba i buakoia aika a wanawana; ao n rokon te aoa anne, a na kamaenakoaki ake a raoiroi ma ake a buakaka; ao n te bong anne N na kanakoia au anera bwa a na anaia ake a buakaka ao ni karenakoia nakon te ai ae aki maamate.
55 Ao ngkai nooria, e koaua ae I tuangkami, Ngai, te Uea, I aki kukurei iroun au tia mwakuri ae Sidney Rigdon; e karietata i nanona, ao e aki butimwaea te reirei, ma ni karawawata te Tamnei;
56 Mangaia are ana koroboki a aki butimwaeaki nakon te Uea, ao e na karaoa teuana; ao ngkana e aki butimwaia te Uea, nooria e na aki manga tei n te nakoa are I a tia n rineia nako iai.
57 Ao e koaua ae I a manga tuangkami, naake a tangiria inanoia, n te nimamannei, ni kauringiia taan bure bwa a na rairannano, a riai ni katabuaki nakon te mwaaka aei.
58 Bwa aio bongin te kauring, ao tiaki te bong ni kabatia te kakaraki. Bwa Ngai, te Uea, N na aki kamamaeaki ni boong aika kaitira.
59 Nooria, Ngai kaain eeta, ao e wene mwaakau inano. Ngai i aoia ni kabane, ao inanoia ni kabane, ao I rinanoia ni kabane, ao I tirobaai bwaai ni kabane, ao e na roko te bong are bwaai ni kabane a na mena i aau.
60 Nooria, Ngai te Arebwa ao te Omeka, ae Iesu Kristo.
61 Mangaia are, a riai aomata ni kabane n tarataraia bwa a na kanga n atonga arau n riaia—
62 Bwa nooria, e koaua ae I taekinna, bwa a mwaiti aika a mena i aan te kabuakaka aei, ake a kamanena aran te Uea, ao ni bakanrereia, n akea te kariaiakaki.
63 Mangaia are, e riai te ekaretia n raira nanona man aia bure, ao, Ngai, te Uea, N na bwainiia; bwa mwiina a na kamaunaaki.
64 Uringnga bwa are e roko mai et e bon tabu, ao n riai n taekinaki ma te karaurau, ao man ana kairoro te Tamnei; ao n aio e na bon akea te kabuakakaaki, ao kam na karekea te Tamnei rinanon te tataro; mangaia are, n akean aio e na tiku te kabuakakaaki.
65 A riai au taan mwakuri aika Iotebwa Timiti te Ataei ao Sidney Rigdon n ukoukora mwengaia, n aron ae a reireinaki rinanon te tataro iroun te Tamnei.
66 Bwaai aikai a tiku bwa a na tokanikai i aoia rinanon te taotaonakinnano, bwa a aonga ni karekea te mimitong ae korakora riki ma n abwabwaki ae akea tokina, ngkana aki, e na korakora riki kabuaakakaia. Amen.