ko ha talavou ʻoku luelue ʻi he matātahí

22 Mē

Te U Fakahaaʻi Fēfē Nai ki he ʻOtuá ʻEku Loto-Houngaʻiá?

Teutalōnome 6–8; 15; 18; 29–30; 34

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e meʻa naʻa tau aleaʻi ʻi he kalasi kuo ʻosí, pea ko e hā ʻa e ngaahi fakaafe pe ngāue naʻe fakahokó? Ko e hā kuo tau fakahoko ke ngāue ai ki he ngaahi fakaafe pe ngāue ko ia ne vahe maí?

• Tokanga kiate kinautolu ʻoku faingataʻaʻiá. Ko e hā ha meʻa ʻe lava ke tau fakahoko pe lea ʻaki ke tokoni ki he niʻihi ʻoku ongoʻi tuenoa pe mamaʻo mei he Tamai Hēvaní?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi founga ʻe niʻihi ʻe lava ke tau tokoni ai ki he niʻihi kehé ke nau ongoʻi ʻa e ʻofa ʻa Sīsū Kalaisí?

• Fakatahaʻi ʻa e ngaahi fāmilí ke taʻengata. Ko e hā ha ngaahi fakakaukau te tau lava ʻo fevahevaheʻaki ke tokoni ke fakamālohia hotau fāmilí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻOku tokangaekina mo tāpuekina maʻu pē kitautolu ʻe he ʻOtuá. Ka ʻoku hoko ʻa e ngaahi fakahohaʻa mo e ʻahiʻahi ʻoku tau fehangahangai mo iá ke faingofua ai ʻetau fakangaloʻi Iá. Naʻe tā tuʻo lahi e hoko ʻeni ki he kakai ʻIsilelí, ʻo kau ai ʻa e ngaahi taimi faingataʻa naʻa nau hē holo ai ʻi he maomaonganoá. Ka naʻe ʻaloʻofa ʻa e ʻEikí ʻo tataki kinautolu ki he fonua ʻo e talaʻofá—ko ha feituʻu ʻo e fiemālie lahi ange mo e ʻahiʻahi lahi, ʻa ia naʻe lava ke ʻahiʻahiʻi ai kinautolu ke nau toe fakangaloʻi Ia. Naʻe fakataumuʻa ʻa e ngaahi fakahinohino ʻa e ʻEikí ʻi he Teutalōnome 6 ke tokoni ki he kakai ʻIsilelí ke nau manatu maʻu pē kiate Ia mo ʻEne folofolá (vakai, veesi 6–9).

Te ke tauhi fēfē nai ki he ʻEikí mo ʻEne folofolá ʻi ho lotó—“telia naʻá ke fakangaloʻi ʻa [e ʻEikí]”? (Teutalōnome 6:12). ʻOku tokoni fēfē nai ʻa hono manatua ʻo e ʻEikí ke tau ongoʻi houngaʻia ʻi he ngaahi tūkunga kotoa pē ʻo ʻetau moʻuí? ʻI hoʻo teuteu ke faiakó, fakakaukau ke toe lau ʻa e Teutalōnome 12:6–9, 12 mo e Luke 17:11–19. Te ke lava ʻo lau ʻa e pōpoaki ʻa Palesiteni Dieter F. Uchtdorf ko e “Loto Fakafetaʻi ʻi ha Faʻahinga Tūkunga Pē” (Liahona, Mē 2014, 70–77).

finemui ʻoku ako

ʻE ala tokoni ʻa hono manatua ʻo e ʻEikí ke tau ongoʻi houngaʻia ʻi he ngaahi tūkunga kotoa pē ʻo e moʻuí.

Ako Fakataha

Ke kamata ha fealeaʻaki fekauʻaki mo hono manatua ʻo e ʻEikí, te ke lava ʻo fakaafeʻi ʻa e toʻu tupú ke nau vahevahe ha ngaahi aʻusia ki ha taimi ne ngalo ai ʻiate kinautolu ha meʻa mahuʻinga. Ko e hā leva hono olá? Ko e hā e meʻa ʻoku hoko ʻi he taimi ʻoku ngalo ai ʻiate kitautolu ʻa e ngaahi meʻa maʻongoʻonga kuo fakahoko ʻe he ʻEikí maʻatautolú? Fakaafeʻi hoʻo kalasí pe kōlomú ke nau toe lau ʻa e Teutalōnome 6:4–9, 20–25. Ko e hā e meʻa ʻoku akoʻi mai ʻe he ngaahi veesi ko ʻení fekauʻaki mo hono manatua ʻo e lelei ʻa e ʻOtuá ʻi heʻetau moʻuí? Fili ha ʻekitivitī ʻe taha pe lahi ange mei he ngaahi ʻekitivitī ko ʻení ke tokoni ki he niʻihi ʻokú ke akoʻí ke nau ako ʻa e founga ke ongoʻi houngaʻia lahi ange ai ʻi he lelei ʻa e ʻOtuá mo fakahaaʻi ʻenau loto-houngaʻia kiate Iá.

• ʻE ala tokoni ʻa hono lau fakataha ʻa e Luke 17:11–19 ke fakakaukau ʻa e toʻu tupú ki he ʻuhinga ʻoku mahuʻinga ai ke tau fakahaaʻi ʻetau loto-houngaʻia ki he ʻOtuá. Fakakaukau ke ʻeke ha ngaahi fehuʻi ʻoku tokoni ke nau fakafelāveʻi ʻa e talanoa ko ʻení ki heʻenau moʻuí. Hangē ko ʻení, ko e hā nai ha ngaahi ʻuhinga naʻe ʻikai ke fakamālō ai ʻa e kau kilia ʻe toko hivá ki he Fakamoʻuí? Ko e hā e ʻuhinga ʻoku tau faʻa tōnounou ai ke fakahaaʻi ha fakamālō ki he ʻOtuá? Kole ki he niʻihi ʻokú ke akoʻí ke nau fakakaukau ki ha ngaahi taimi ne nau ongoʻi houngaʻia ai neongo e faingataʻá. Ko e hā hono lelei kiate kitautolu ʻa hono fakahaaʻi ʻo e loto-houngaʻiá? Ko e hā ʻoku mahuʻinga ai ke fakahaaʻi ʻetau fakamālō ki he ʻOtuá? (Vakai ki he ngaahi fakamoʻoni fakafolofola ʻi he “Ngaahi Maʻuʻanga Tokoni Poupoú” ki ha ngaahi tali.) Ko e hā ha meʻa te tau lava ʻo fakahoko ke fakahaaʻi ʻetau fakamālō ki he ʻOtuá?

• ʻOku lahi e ngaahi himi ki he fakafetaʻí mo e fakamāloó, hangē ko e “ʻE ʻOtua ko e Tapuhā” mo e “Tānaki Ho Ngaahi Tāpuakí” (Ngaahi Himi, fika 38, 148). Te ke lava ʻo kole ki he toʻu tupú ke nau fekumi ʻi he ngaahi fakalea ʻo e himí ki ha ngaahi meʻa ʻoku nau ongoʻi houngaʻia ai. Fakaafeʻi ke nau vahevahe ʻa e ngaahi meʻa ne nau maʻú pea fakamatalaʻi ʻa e ʻuhinga ʻoku nau houngaʻia ai he ʻū meʻa ko iá. Te mou lava ʻo hivaʻi fakataha ha niʻihi ʻo e ngaahi himi ko ʻení.

• ʻOku tokoni ʻa e pōpoaki ʻa Palesiteni Dieter F. Uchtdorf ko e “Loto Fakafetaʻi ʻi ha Faʻahinga Tūkunga Pē” ke mahino kiate kitautolu ʻa e founga ke tau houngaʻia lahi ange aí. Ko ha founga ʻe taha ʻe tokoni ai ki he toʻu tupú ke nau ako mei he pōpoaki ko ʻení ko hano vahevahe fakakulupu iiki kinautolu pea vahe ki he kulupu takitaha ha konga ʻe taha ʻo e pōpoakí. Kole ange ke nau vahevahe ha kupuʻi lea pe sētesi ʻoku nau ongoʻi ʻokú ne fakamatalaʻi fakanounou ʻa e meʻa naʻe akoʻi ʻe Palesiteni ʻUkitofá. Fakaafeʻi ke nau vahevahe ha meʻa ne nau ako fekauʻaki mo e loto-houngaʻiá. ʻE lava foki ke nau mamata ʻi he vitiō “Ko Palesiteni Russel M. Nelson ʻi he Mālohi Faifakamoʻui ʻo e Loto-houngaʻiá” (ChurchofJesusChrist.org). Ko e hā ha meʻa ʻe lava ke tau fakahoko ke tau “loto fakafetaʻi [ai] ʻi ha faʻahinga tūkunga pē” ʻo tatau ai pē pe ko e hā? Ko e hā ha ngaahi sīpinga kuo tau mātā ai ki he loto-houngaʻia ʻa e kakaí neongo honau ngaahi tūkunga faingataʻá?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mōsaia 2:19–24 (ʻOku totonu ke tau fakafetaʻi mo fakamālō ki he ʻOtuá)

• ʻAlamā 34:38; 37:37; Tokāteline mo e Ngaahi Fuakava 46:32; 59:7, 15–21 (ʻOku totonu ke tau fakamālō ʻi he meʻa kotoa pē)

• Saame 107:8–9; Filipai 4:6–7; Tokāteline mo e Ngaahi Fuakava 78:19 (Ngaahi tāpuaki ʻo e loto-houngaʻiá)

• Dale G. Renlund, “Fakakaukau ki he Angalelei mo e Māfimafi ʻo e ʻOtuá,” Liahona Mē 2020, 41–44

• “Loto Houngaʻiá,” ʻi he Ki Hono Fakamālohia ʻo e Toʻu Tupú (kiʻi tohi, 2011), 18

Ko e Faiako ʻi he Founga ʻa e Fakamoʻuí

Naʻe ʻafioʻi ʻe he Fakamoʻuí ʻa Hono kau muimuí mo e tuʻunga te nau lava ʻo aʻusiá. Naʻe tākiekina ʻe he ʻilo ko ʻení ʻa e founga naʻá Ne akoʻi ʻaki kinautolú. Ko e hā ha founga te ke ʻilo ai ʻa e ngaahi manako, ngaahi fiemaʻu, mo e ngaahi pole ʻo e niʻihi ʻokú ke akoʻí koeʻuhí kae lava ke ke akoʻi lelei ange ai kinautolu?