12 Sune

Te U Fanongo Fēfē Nai ki he Leʻo ʻo e ʻEikí?

Lute; 1 Samuela 1–3

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha ngaahi aʻusia kimuí ni kuo nau fakamālohia ʻetau fakamoʻoní?

• Tokanga kiate kinautolu ʻoku faingataʻaʻiá. Ko hai ʻokú ne fie maʻu ʻetau tokoní mo e ngaahi lotú? Ko e hā e meʻa ʻoku tau ongoʻi ke fakahoko ke tokoniʻi kinautolú?

• Fakaafeʻi ʻa e tokotaha kotoa pē ke nau maʻu e ongoongoleleí. Te u hoko fēfē nai ko ha maama ki he ngaahi fāmili pe kaungāmeʻa ʻoku ʻikai ke tau tui tataú?

• Fakatahaʻi ʻa e ngaahi fāmilí ke taʻengata. ʻE lava fēfē nai ke tau fakahaaʻi ha ʻofa mo e poupou lahi ange ki hotau fāmilí mo fakahoko ha liliu ʻoku leleí ʻi hotau ngaahi ʻapí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Mahalo ʻe tokolahi ha kau mēmipa ʻi hoʻo kalasí pe kōlomú te nau lava ʻo fakafelāveʻi ki he tamasiʻi ko Samuelá. ʻI he taimi naʻe folofola ai ʻa e ʻEikí kia Samuelá, naʻe teʻeki ke ne maʻu ha taukei he taimi ko iá ʻi he maʻu fakahaá ke ne fakatokangaʻi ʻa e leʻo ʻo e ʻEikí. Naʻe lava ʻe he faiako ʻa Samuela ko ʻĪlaí ʻo tokoniʻi ʻa Samuela ke ne ako ke fakatokangaʻi ʻa e leʻo ko ʻení. ʻOkú ke maʻu ʻa e faingamālie, hangē ko ʻĪlaí, ke fakamoʻoni ki he niʻihi ʻokú ke akoʻí ʻoku finangalo ʻa e ʻEikí ke folofola mai kiate kinautolu. Te ke lava ʻo tokoniʻi kinautolu ke nau ako ke fakatokangaʻi ʻa e leʻo ʻo e ʻEikí, neongo ʻokú ke ako foki mo koe ke ke fakafanongo kiate Ia. Te mou lava ʻo ako fakataha ʻa e meʻa kuo akoʻi ʻe he kau palōfitá fekauʻaki mo e fakahā fakatāutahá. Pea te mou lava ʻo ako ke tali ki he ʻEikí, ʻo hangē ko ia ne fakahoko ʻe Samuelá, “Ke ke folofola mai; he ʻoku ongoʻi ʻe hoʻo tamaioʻeikí” (1 Samuela 3:10).

ʻOku ʻikai ke ngata pē ʻi hono lau ʻa e 1 Samuela 3 he uike ní, ka te ke lava ʻo teuteu ke faiako ʻaki hano lau ʻa e lea ʻa Palesiteni Russell M. Nelson ko e “Fanongo kiate Ia” (Liahona, Mē 2020, 88–92).

Kuo kole mai ʻe Palesiteni Russell M. Nelson ke “fakalahi [hotau] ivi fakalaumālié ke maʻu ai e fakahā fakatāutahá.”

Ako Fakataha

Ke teuteuʻi ʻa e niʻihi ʻokú ke akoʻí ki he fealeaʻaki ʻo e ʻaho ní, fakakaukau ke kole ange ke nau lau ʻa e 1 Samuela 3:1–14. Fakaafeʻi ke nau vahevahe ʻa e meʻa ne nau ako mei he talanoa ko ʻení fekauʻaki mo e fakafanongo ki he leʻo ʻo e ʻEikí. Ko e hā ha ngaahi founga kehe ʻoku fetuʻutaki ai ʻa e ʻEikí mo kitautolú? ʻE ala tokoni ʻa e ngaahi ʻekitivitī ko ʻení ke fakaloloto e mahino ʻa e toʻu tupú ki he fakahā fakatāutahá.

• Ko ha founga ʻeni ʻe taha ke tokoniʻi ʻa e niʻihi ʻokú ke akoʻí ke mahino lelei ange kiate kinautolu ʻa e founga ke maʻu ai e fakahaá. Te ke lava ʻo hiki ʻi he palakipoé ʻa e ngaahi fakamoʻoni fakafolofola ʻoku fokotuʻu atu ʻi he “Ngaahi Maʻuʻanga Tokoni Poupoú” (pe ko ha maʻuʻanga tokoni kehe ʻokú ke ʻiloʻi). Fakaafeʻi ʻa e toʻu tupú ke nau lau ʻa e folofola takitaha. Te nau lava leva ʻo hiki ʻi he palakipoé ʻo ofi ki he folofola takitaha ʻa e meʻa ʻoku akoʻi ʻe he potufolofola ko iá fekauʻaki mo hono maʻu e fakahā fakatāutahá. Fakaafeʻi ke nau vahevahe ha ngaahi aʻusia kuo nau maʻu ʻi he fekumi ki he fakahaá mo hono maʻu iá. Vahevahe haʻo aʻusia pē ʻaʻau, ʻo ka fie maʻu.

• ʻOku tau maʻu ha ngaahi tāpuaki maʻongoʻonga ʻi he taimi ʻoku tau fakafanongo ai ki he leʻo ʻo e ʻEikí. Te ke lava ʻo kamata ha fealeaʻaki fekauʻaki mo ʻeni ʻi haʻo kole ki he toʻu tupú ke nau vahevahe ha ngaahi ʻuhinga te nau fie maʻu ai ha fakahā. Hili iá pea kole ange leva ke nau fekumi ʻi he pōpoaki ʻa Palesiteni Russell M. Nelson ko e “Fanongo kiate Ia.” Fakaafeʻi ke nau fekumi ki he faleʻi ʻoku tokoni ke mahino kiate kinautolu ʻa e founga ke fakafanongo ai ki he leʻo ʻo e ʻEikí. Te ke lava foki ʻo fakaʻaliʻali ha foʻi vitiō ʻe taha pe lahi ange mei he ngaahi vitiō “Fakafanongo kiate Iá” (ChurchofJesusChrist.org/media). Ko e hā ʻoku fuʻu mahuʻinga ai ke tau ako ke fakafanongo ki he leʻo ʻo e ʻEikí? Poupouʻi e toʻu tupú ke nau lekooti ʻa e meʻa ʻoku nau akó ʻi heʻenau tohinoá pe ʻi ha ʻū laʻipepa ke fakapipiki ʻi honau ʻapí.

• ʻE malava ke fifili ʻa e toʻu tupu ʻokú ke akoʻí pe te nau ʻiloʻi fēfē ʻa e taimi ʻoku folofola ange ai ʻa e Laumālie Māʻoniʻoní kiate kinautolú.      

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• 1 Ngaahi Tuʻi 19:9–12; Hilamani 5:29–31; Tokāteline mo e Ngaahi Fuakava 6:14–16, 21–23; 8:2–3; 11:12–14 (Ngaahi founga ʻoku folofola mai ai ʻa e ʻEikí kiate kitautolú)

• Tokāteline mo e Ngaahi Fuakava 9:7–9 (ʻOku fie maʻu ki he fakahaá ʻa ʻetau fakakaukaú mo e akó)

• Ronald A. Rasband, “Tuku ke Taki ʻa e Laumālie Māʻoniʻoní,” Liahona, Mē 2017, 93–96

• Ne akoʻi ʻe Palesiteni Russell M. Nelson: “ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino, fakafiemālie, mo e ivi tākiekina maʻu pē ʻo e Laumālie Māʻoniʻoní. ʻE hoku kāinga ʻofeina, ʻoku ou kole atu kiate kimoutolu ke fakatupulaki hoʻomou malava fakalaumālie ke maʻu ʻa e fakahaá” (“Fakahā Maʻá e Siasí, Fakahā ki Heʻetau Moʻuí,” Liahona, Mē 2018, 96).