toʻu tupu ʻoku tangutu ʻi ha hala fakakavakava

26 Sune

Ko e Hā ʻOku Mahuʻinga Ai ʻa e Angamaʻá ʻi he Palani ʻa e ʻOtuá?

2 Samuela 5–7; 11–12; 1 Ngaahi Tuʻi 3; 8; 11

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha founga kuo tau ofi ange ai ki he Fakamoʻuí? Ko e hā ha founga ʻoku tau feinga ai ke tau tatau ange mo Iá?

• Tokanga kiate kinautolu ʻoku faingataʻaʻiá. Ko hai ha tokotaha naʻa tau fakakaukau ki ai kimuí ni? Ko e hā ha founga ʻe lava ke tau tokoniʻi ai ʻa e niʻihi fakafoʻituitui ko ʻení?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha founga ʻe lava ke tau tali ai ʻa e ngaahi fehuʻi ʻa hotau kaungāmeʻá fekauʻaki mo e Siasí ʻi ha founga ʻe fakamālohia ai ʻenau tui ki he Fakamoʻuí?

• Fakatahaʻi ʻa e ngaahi fāmilí ke taʻengata. Ko e hā ha ngaahi founga ʻe lava ke tau fehokotaki lelei ange ai mo e kāingá, hangē ko e ngaahi kuí mo e ngaahi tokoua ʻakí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Naʻe foaki mai ʻe heʻetau Tamai Hēvaní, ʻa Ia ʻokú Ne finangalo ke tau fiefiá, ʻa e fono ʻo e angamaʻá. Pea ʻoku akoʻi mai leva ʻe Sētane, ʻa ē ʻokú ne loto ke tau mamahí, ʻoku ʻikai mahuʻinga ʻa e fono ko ʻení. ʻOkú ne fakahoko ʻa e meʻa kotoa pē ʻokú ne malavá ke ʻahiʻahiʻi kitautolu ke tau faiangahala fakasekisuale. ʻOku malava ke tākiekina ʻa e kakai kei talavoú ʻe he ngaahi ʻīmisi mo e pōpoaki ʻoku fehangahangai mo e meʻa ʻoku akoʻi ʻe he ʻOtuá fekauʻaki mo e tuʻunga fakasekisualé. ʻOku fie maʻu ke tau takitaha tokanga ki he faʻahinga ʻahiʻahi pehení pea feinga ke tauhi ʻetau ngaahi fakakaukaú, leá mo e ngāué ke maʻa ʻi he toenga ʻo ʻetau moʻuí. ʻOku tau ako ʻa e lēsoni ko ʻení mei he aʻusia fakamamahi ʻa e Tuʻi ko Tēvitá. Naʻá ne hoko ko ha faʻifaʻitakiʻanga ʻo e tui faivelenga maʻongoʻongá. Ka naʻá ne tukulolo ki he ʻahiʻahí ʻo maumauʻi ʻa e fono ʻo e angamaʻá (vakai, 2 Samuela 11:1–5).

Te ke lava ʻo teuteu ke faiako ʻaki haʻo lau ʻa e 2 Samuela 11, pōpoaki ʻa ʻEletā David A. Bednar “ʻOku Mau Tui ki he Angamaʻá” (Liahona, Mē 2013, 41–44), mo e ngaahi maʻuʻanga tokoni kehe fekauʻaki mo e angamaʻá. Ko e hā ha meʻa te ne ala fakalotoa ʻa e kau mēmipa ʻo e kalasí pe kōlomú ke nau vakai ki he angamaʻá ʻi he founga ʻoku ʻafio ki ai ʻa e ʻOtuá? Ko e hā ha meʻa ʻe ala tokoni ke nau fakasītuʻaʻi ʻa e founga ʻoku vakai ki ai ʻa Sētané?

kalasi ʻa e kau talavoú

ʻOku totonu ke tau feinga he ʻaho kotoa pē ke tauhi ʻetau fakakaukaú, leá, mo e ngāué ke maʻa ke tau tauhi faivelenga ai e fono ʻo e angamaʻa ʻa e ʻOtuá.

Ako Fakataha

Ko ha founga ʻeni ʻe taha ke fakafeʻiloaki ai ʻa e tefito ʻo e angamaʻá lolotonga ʻa hono tokoniʻi e niʻihi ʻokú ke akoʻí ke nau toe vakaiʻi ʻa e meʻa kuo nau lau ʻi he folofolá. Hiki ʻi he palakipoé ʻa e ongo foʻi lea ko e Tēvita mo e Siosefa. Hili iá pea mou toe vakaiʻi fakataha ʻa e 2 Samuela 11:1–5 mo e Sēnesi 39:7–12. Naʻe fēfē ʻa e fakafōtunga ʻa Tēvita mo Siosefa ki he ʻahiʻahi ke fakahoko ʻa e angahala fakasekisualé? Ko e hā e meʻa ʻoku tau ako mei heʻena tā sīpingá? Fakaʻaongaʻi ʻa e ʻekitivitī ko ʻení pe ko haʻo ʻekitivitī pē ʻaʻau ke fakatupu ha fealeaʻaki lahi ange fekauʻaki mo e ʻuhinga ʻoku mahuʻinga ai ʻa e angamaʻá ʻi he palani ʻa e ʻOtuá.

• Mahalo naʻa ʻaonga ke fakamatalaʻi ki he toʻu tupú ʻa e tuʻunga ʻa e ʻEikí ki he haohaoa fakasekisualé. Fakaafeʻi ke nau toe vakaiʻi ʻa e “Ko e Haohaoa Fakasekisualé” ʻi he Ki Hono Fakamālohia ʻo e Toʻu Tupú ([kiʻi tohi, 2011], 35–37) pe ko e palakalafi hono fā ʻo e “Ko e Fāmilí: Ko ha Fanongonongo ki Māmani” (ChurchofJesusChrist.org). ʻOku kehekehe fēfē nai ʻa e ngaahi akonaki ʻa e ʻEikí fekauʻaki mo e tuʻunga fakasekisualé mei he meʻa ʻoku loto ʻa Sētane ke tau tui ki aí? ʻE lava ke toe vakaiʻi ʻe he toʻu tupú ʻa e “Ko e Fāmilí: Ko ha Fanongonongo ki Māmani,” ʻo fekumi ki ha ngaahi fakamatala ʻoku nau fakamatalaʻi ʻa e ʻuhinga ʻoku mahuʻinga ai ʻa e haohaoa fakasekisualé ki he palani ʻo e fiefia ʻa e Tamai Hēvaní. Ko e hā ʻa e meʻa ʻoku tau ako mei he ngaahi fakamatala ko ʻení ʻokú ne tokoniʻi kitautolu ke tau moʻui māʻoniʻoni ʻi he māmani ʻo e ʻaho ní?

• Ko e taimi ʻe niʻihi ʻoku ʻikai mahino ki he niʻihi kehé ʻa hotau tuʻunga ʻulungaanga ki he moʻui maʻá, tautautefito koeʻuhí ʻoku kehe ʻaupito e ngaahi tuʻunga ʻulungaanga ko ʻení mei he meʻa ʻoku tui ki ai ha kakai tokolahi. Te tau tali fēfē nai ʻenau ngaahi fehuʻí?   ʻE lava ʻe he toʻu tupú ʻo fekumi ʻi he ngaahi folofola ʻi he “Ngaahi Maʻuʻanga Tokoni Poupoú” ki ha ngaahi fakamatala ʻoku nau fakamatalaʻi ʻa e ngaahi tāpuaki ʻo e angamaʻá. Te ke lava ʻo kole ange ke nau vahevahe ʻenau fakakaukau fekauʻaki mo e ʻuhinga ʻoku nau fili ai ke talangofua ki he tuʻunga ʻulungaanga ʻa e ʻEikí ki he maʻa fakasekisualé.

• ʻOku faʻa akoʻi ʻe he ʻulungaanga ʻoku manakoá ʻoku ʻikai hano ʻaonga ʻo e haohaoa fakasekisualé. Kae hili ko iá ʻoku tukunoaʻi ʻe he ʻulungaanga manakoá ʻa e ngaahi moʻoni fekauʻaki mo e ngaahi tāpuaki ʻo e angamaʻá pea mo e ngaahi fakatuʻutāmaki ʻo e angaʻulí. ʻE lava ke ako ʻe he toʻu tupú ʻa e pōpoaki ʻa ʻEletā David A. Bednar ko e “ʻOku Mau Tui ki he Angamaʻá,” ke ako lahi ange ki he ngaahi moʻoni ko ʻení. ʻE lava ke ako ʻe ha niʻihi ʻa e konga “Ko e Taumuʻa ʻa e Filí,” pea ʻe lava ke ako ʻe ha niʻihi ʻa e “Ko e Ngaahi Tāpuaki ʻo e Angamaʻá.” Hili iá ʻe lava leva ke nau fevahevaheʻaki ʻa e meʻa naʻa nau akó. Poupouʻi ke nau hiki ha kupuʻi lea mei he pōpoaki ko ʻení ʻa ia ʻoku nau loto ke manatuʻi ʻi he taimi hoko mai te nau fehangahangai ai mo e ngaahi pōpoaki hala fekauʻaki mo e tuʻunga fakasekisualé. Te ke lava foki ʻo fakahinohino ange ʻa e konga “Ko e Tefitoʻi Moʻoni ʻo e Fakatomalá.” Aleaʻi ʻa e founga ʻe lava ke fakamoʻui ai ʻe he Fakamoʻuí ʻa kinautolu kotoa pē ʻoku loto ke fakatomala mei he angahala fakasekisualé. Fakamanatu ki he niʻihi ʻokú ke akoʻí ʻe lava ke nau talanoa ki heʻenau mātuʻá pe pīsopé kapau ʻoku ʻi ai haʻanau ngaahi fehuʻi pe fiemaʻu ke fakatomala.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• 1 Kolinitō 6:19–20 (Ko hotau sinó ko e ngaahi temipale)

• ʻAlamā 38:12 (Kapau te tau taʻofi ʻetau ngaahi holi fakakakanó, ʻe lava ke fakafonu ʻaki kitautolu ʻa e ʻofá)

• Tokāteline mo e Ngaahi Fuakava 25:2; 121:45–46 (Ko e ngaahi tāpuaki ʻo e angamaʻá)

• “Angamaʻá: Ko e hā Hono Ngaahi Fakangatangatá?” “Loto Falala Moʻoní,” “ʻOku ou Fili Ke U Maʻa” (ngaahi vitiō), ChurchofJesusChrist.org

Ko e Faiako ʻi he Founga ʻa e Fakamoʻuí

Naʻe hoko e Fakamoʻuí ko ha sīpinga mo e faiako, ʻi he tūkunga kotoa pē. Naʻá Ne akoʻi ʻEne kau ākongá ke nau lotu ʻaki ʻEne lotu fakataha mo kinautolu. Naʻá Ne akoʻi ke nau ʻofa mo ngāue ʻi he founga ʻo ʻEne ʻofa mo tokoniʻi kinautolú. Naʻá Ne akoʻi kiate kinautolu e founga ki hono akoʻi ʻEne ongoongoleleí ʻaki e founga ʻo ʻEne akoʻi iá.