10 Siulai

Ko e Hā ʻOku Mahuʻinga ai ke Muimui ki he Kau Palōfita Moʻui ʻa e ʻOtuá?

2 Ngaahi Tuʻi 2–7

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā e meʻa naʻe aleaʻi ʻe he kau pīsopelikí ʻi heʻetau fakataha alēlea fakauooti ʻa e toʻu tupú? Ko e hā ha ngaahi ngāue ʻe lava ke tau fakahoko ʻo makatuʻunga ʻi he fealeaʻaki ko iá?

• Tokanga kiate kinautolu ʻoku faingataʻaʻiá. Te tau tokoniʻi fēfē nai ʻa e kakaí ʻi ha ngaahi founga faka-Kalaisi ʻi he taimi ʻoku tau vakai ai ki ha fiemaʻu ka ʻoku ʻikai ke tau ʻilo ʻa e meʻa ke lea ʻakí?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha meʻa ʻoku tau maʻu ʻi he ongoongolelei ʻo Sīsū Kalaisí ʻokú ne ʻomi ʻa e fiefiá? Te tau lava fēfē nai ke vahevahe ʻa e fiefia ko iá mo e niʻihi kehé?

• Fakatahaʻi ʻa e ngaahi fāmilí ke taʻengata. Ko e hā ha ngaahi founga ʻe lava ke tau fehokotaki lelei ange ai mo e kāingá, hangē ko e ngaahi kuí mo e ngaahi tokoua ʻakí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Mahalo pē ʻoku ʻi ai haʻatau kiʻi faitatau mo e kilia ko Neamaní (vakai, 2 Ngaahi Tuʻi 5:1–15). Mahalo he ʻikai mahino maʻu pē kiate kitautolu ʻa e ngaahi ʻuhinga ki he faleʻi ʻa ʻetau kau palōfitá, ʻo hangē ko Neamaní, ʻa ia naʻá ne ʻita ʻi he taimi ne talaange ai ʻe he palōfita ko ʻIlaisá ke ne kaukau pē ʻi ha vaitafe ke fakamoʻui iá. Mahalo te tau fakakaukau ʻoku ʻikai ʻuhinga lelei ha niʻihi ʻo ʻenau faleʻí kiate kitautolu pea ʻoku ʻikai leva ke ʻaonga ia kiate kitautolu. Ka ʻoku talaʻofa mai ʻe he ʻOtuá ha ngaahi tāpuaki maʻongoʻonga ʻo kapau ʻoku tau loto-fakatōkilalo feʻunga ke muimui ki he palōfitá (vakai, Tokāteline mo e Ngaahi Fuakava 21:4–7). Kuo tokoniʻi fēfē nai koe ʻe he muimui ki he palōfitá ke ke ofi ange ai ki he ʻEikí? Ko e hā mo ha toe ngaahi sīpinga mei he 2 Ngaahi Tuʻi 4–6 ʻoku nau fakahaaʻi e founga ʻoku tāpuekina ai kitautolu ʻi heʻetau muimui ki he kau palōfita moʻuí?

ʻI hoʻo teuteu ke faiako fekauʻaki mo e ngaahi tāpuaki ʻoku maʻu mei he muimui ki he palōfita moʻuí, fakakaukau ki he ngaahi faingataʻa ʻoku fehangahangai mo e toʻu tupú. ʻE tokoni fēfē nai ʻa ʻenau muimui ki he palōfitá ke nau matatali e ngaahi faingataʻa ko ʻení? Te ke lava foki ʻo lau e pōpoaki ʻa ʻEletā Neil L. Andersen “Ko e Palōfita ʻa e ʻOtuá” (Liahona, Mē 2018, 24–27) pe ko e pōpoaki ʻa ʻEletā L. Whitney Clayton “Ko e Meʻa Kotoa Pē Te Ne Fekau Kiate Kimoutolú, Fai Ia” (Liahona, Mē 2017, 97–99).

ʻE ala tokoni ʻa e muimui ki he palōfitá ke fehangahangai ʻa e toʻu tupú mo honau ngaahi faingataʻá.

Ako Fakataha

Ke kamataʻi ha fealeaʻaki, te ke lava ʻo kole ki he mēmipa takitaha ʻo e kalasí pe kōlomú (pe ngaahi kulupu iiki) ke nau toe vakaiʻi ha taha ʻo e ngaahi talanoa ko ʻení: 2 Ngaahi Tuʻi 4:1–7; 5:6–14; 6:8, 13–17. Kole ange ke nau fekumi ki ha meʻa ʻokú ne fakalotoa kinautolu ke nau lau mo muimui ki he ngaahi akonaki ʻo e kau palōfita mo e kau ʻaposetolo ʻo e ʻaho ní. Hili hano vahevahe ʻe he kulupu takitaha ʻa e meʻa ne nau maʻú, te ke lava ʻo kole ki ha toʻu tupu ʻe niʻihi ke nau fakaʻosi ʻa e sētesi ko ʻení: “ʻI he taimi ʻoku ou muimui ai ki he kau palōfita mo e kau ʻaposetolo moʻuí, ʻoku ou …” Ke hoko atu ha fealeaʻaki fekauʻaki mo e muimui ki he kau palōfitá, fili ha foʻi fakakaukau ʻe taha pe lahi ange mei heni.

• Koeʻuhí ko e kau palōfita moʻuí ʻoku nau ʻi he Siasi ʻo e ʻEikí kuo fakafoki maí, ʻe lava ke maʻu ʻe he kau mēmipa ʻo hoʻo kalasí pe kōlomú ha ngaahi faingamālie ke tali e ngaahi fehuʻi ʻa e niʻihi kehé fekauʻaki mo e kau palōfita moʻuí. Te ke lava ʻo tohi ʻi he palakipoé ʻa e ngaahi fehuʻi ko ʻeni ʻe lava ke fakahoko ʻe he niʻihi kehé fekauʻaki mo e kau palōfita moʻuí: Ko e hā ʻoku mou maʻu ai ha palōfitá? ʻOku founga fēfē nai hono fili ha palōfita? ʻOkú ke ʻiloʻi fēfē nai ʻoku lea moʻoni ʻa e palōfitá maʻá e ʻOtuá? ʻE lava ke fekumi ʻa e toʻu tupú ki he ngaahi tali ki hení ʻi he ngaahi maʻuʻanga tokoni ʻi he “Maʻuʻanga Tokoni Poupoú.” ʻE lava ke nau akoako ke tali ʻa e ngaahi fehuʻi ko ʻení mo ha ngaahi fehuʻi kehe ʻoku nau maʻu ʻo fakaʻaongaʻi ʻa e ngaahi moʻoni ne nau maʻú mo ʻenau ngaahi fakakaukau mo e aʻusia pē ʻanautolú.

• ʻE tokoni fēfē nai ʻa e ngaahi lea ʻa ʻetau kau palōfita moʻuí kiate kitautolu ʻi he taimi ʻoku tau fehangahangai ai mo e ngaahi faingataʻa fakatāutahá? Ke tokoni ki he toʻu tupú ke nau tali ʻa e fehuʻi ko ʻení, te ke lava ʻo fakaafeʻi ke nau lisi ʻi he palakipoé ha niʻihi ʻo e ngaahi faleʻi mo e fakaafe ne fakahoko ʻe he palōfitá ʻi he konifelenisi lahi fakamuimuitahá. Ko e hā ha meʻa kuo tau fakahoko ke ngāue ai ki heʻene faleʻí mo e ngaahi fakaafe ko ʻení? Ko e hā ha ngaahi liliu kuo tau mātā ʻi heʻetau moʻuí koeʻuhí ko e ngaahi ngāue ko ʻení? ʻE lava ke ke fakaafeʻi ha tokotaha ke ne vahevahe ha aʻusia fakatāutaha ʻa ia ne tokoni ai ʻa e faleʻi ʻa e palōfitá kiate ia ʻi haʻane faingataʻaʻia fakatāutaha.

• Te ke tokoni fēfē nai ke mahino ki he niʻihi ʻokú ke akoʻí ʻe tokoni ʻa e muimui ʻi he palōfitá ke nau ofi ange ai ki he Fakamoʻuí? Ko ha founga ʻe taha ko hono tufa ange ke nau taki taha ha kiʻi kaati pea fakaafeʻi ke nau lau ha ngaahi konga ʻo e pōpoaki ʻa ʻEletā Neil L. Andersen “Ko e Palōfita ʻa e ʻOtuá.” ʻE lava ke nau tohi ʻi he tafaʻaki ʻe taha ʻo e kātí ha meʻa ne nau ako fekauʻaki mo e founga ʻe ala tokoni ai ʻa e palōfitá ke nau ʻunu ke ofi ange kia Kalaisí. ʻI he tafaʻaki leva ʻe tahá, ʻe lava ke nau tohi ai ʻa e meʻa ʻokú ne ueʻi fakalaumālie kinautolu ke nau fakahoko ke muimui ki he palōfitá. Fakaafeʻi ke nau vahevahe e meʻa ne nau tohí.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• ʻĀmosi 3:7; Tokāteline mo e Ngaahi Fuakava 1:4, 37–38; Mōsese 6:26–27, 32–36; Ngaahi Tefito ʻo e Ongoongoleleí, “Kau Palōfitá,” topics.ChurchofJesusChrist.org; “Ko e hā e ʻUhinga ʻOku Tau Maʻu ai ha Kau Palōfitá?” (vitiō), ChurchofJesusChrist.org (ʻUhinga ʻoku tau maʻu ai ha kau palōfitá)

• Gary E. Stevenson, “Ko e Loto ʻo ha Palōfita,” Liahona, Mē 2018, 17–20 (Founga ʻoku fili ai ha palōfita)

Ko e Faiako ʻi he Founga ʻa e Fakamoʻuí

“Ko e ului moʻoní ʻoku mahulu hake ia ʻi he ongoʻi pē hono fakapapauʻi mai ʻe he Laumālié ʻa e moʻoní ki hotau lotó; kuo pau ke tau ngāueʻi e ngaahi moʻoni ko iá. Makehe mei hono tokoniʻi e kau akó ke nau ongoʻi mo ʻiloʻi e Laumālié, tokoni ke nau ngāue ki he ngaahi ueʻi oku nau maʻú” (Ko e Faiako ʻi he Founga ʻa e Fakamoʻuí, 10).