¶ 1 BEA koeni, nae tagi kalaga ha fefine koe toko taha i he gaahi unoho oe gaahi foha oe kau balofita, kia Ilaisa, o ne behe, Kuo bekia a hoo tamaioeiki ko hoku unoho; bea oku ke ilo nae manavahe a hoo tamaioeiki kia Jihova: bea kuo ha‘u ae tagata eke totogi ke ne ave moia a eku ogo tama ke na tamaioeiki kiate ia.

2 Bea nae behe e Ilaisa kiate ia, Koeha ha mea teu fai maau? fakaha mai be koeha ha mea oku ke ma‘u i fale? Bea nae behe mai eia, Oku ikai ma‘u e hoo kaunaga ha mea i fale, ka koe hina be taha oe lolo.

3 Bea toki behe eia, Ke ke alu, mo kole mai ha gaahi ibu mei ho kaiga kotoabe, ae gaahi geeji ibu; bea oua naa kole fakajiijii be.

4 Bea oka ke ka toe hu mai, te ke tabuni ae mataba kiate koe, bea mo hoo ogo tama, bea te ke liligi ki he gaahi ibu kotoabe koia, bea te ke tuku kehe aia oku fakafonu.

5 Koia naa ne alu atu meiate ia, mo ne tabuni ae mataba kiate ia mo ene ogo tama, aia nae fetuku mai  ae gaahi ibu kiate ia; ka nae liligi atu eia.

6 Bea nae hoko o behe, i he ene bito ae gaahi ibu, naa ne beheage ki he ene tama, Toe omi mo ha ibu e taha. Bea nae behe atu eia kiate ia, Oku ikai toe ha taha. Bea nae tuku ae tafe oe lolo.

7 Bea naa ne toki ha‘u o fakaha ia ki he tagata oe Otua. Bea nae behe eia, Alu, o fakatau ae lolo, bea atu ae totogi kiate ia oku eke, bea ko hono toe ke ke moui ai koe bea mo hoo fānau.

¶ 8 Bea koe aho e taha nae alu ai a Ilaisa ki Sunemi, aia nae i ai ha fefine koloaia; bea naa ne taofi ia ke ne kai ha mea. Bea nae behe, iloga be a ene alu atu ai naa ne foki atu ke kai ma i ai.

9 Bea nae behe e he fefine ki hono unoho, Vakai mai, oku ou ilo koe tagata maonioni eni oe Otua, aia oku afe mai kiate kitaua mau ai be.

10 Ke ta gaohi ha kihi‘i botu fale, i he fuga a maka; bea ke ta tuku maana ha mohega i ai, mo ha balebale, mo ha nofoa, mo ha tuuga māma: bea e behe, oka ha‘u ia kiate kitaua, te ne nofo ki ai.

11 Bea nae hoko ki he aho e taha, naa ne ha‘u ki ai, bea naa ne afe atu ki he botu fale, mo tokoto ai.

12 Bea naa ne behe ki he ene tamaioeiki ko Kehesi, Ui mai ae fefine Sunemi ni. Bea hili a ene ui ki ai naa ne tuu mai i hono ao.

13 Bea naa ne behe kiate ia, Ke ke fakaha ni kiate ia, Vakai, kuo ke tokaga kiate kimaua i he tokaga lahi ni; ka koeha ha mea e fai maau? te ke loto ke fai ha lea maau ki he tu‘i, be ki he eiki bule oe kau tau? Bea nae beheage eia, Oku ou nofo be i he lotolotoga o hoku kakai ooku.

14 Bea nae behe eia, Ka kuo behe, bea koeha ha mea e fai maana? Bea nae behe atu e Kehesi, Koe mooni oku ikai haane tamajii, bea kuo motua a hono unoho.

15 Bea nae behe eia, Ui atu kiate ia. Bea oji a ene ui ia, naa ne tuu i he huaga mataba.

16 Bea nae behe eia, I he faahita‘u koeni, o fakatatau mo hono kuoga, te ke fāufua ha tama. Ka nae behe eia, Oua, a hoku eiki, koe tagata oe Otua, oua naa ke loi ki hoo kaunaga.

17 Bea nae tuituia ae fefine, bea ne faele‘i ae tama i he kuoga koia nae fakaha kiate ia e Ilaisa, o fakatatau moe kuoga oe feitama.

¶ 18 Bea i he ene tubu ke lahi ae tamajii, nae hoko ki he aho e taha, nae alu ai ia ki he ene tamai moe kau tuuji oe ututa‘u.

19 Bea naa ne behe ki he ene tamai, A hoku ulu, a hoku ulu! Bea nae behe eia ki ha tama talavou, Fua ia o ave ki he ene fa‘e.

20 Bea i he ene ave ia, mo omi ki he ene fa‘e, naa ne nofo ki hono fuga tui o a‘u ki he hoata malie, bea bekia.

21 Bea nae alu hake ia, o ne fakatokoto ia ki he mohega oe tagata oe Otua, mo ne tabuni ae mataba kiate ia, bea alu ia kitua.

22 Bea naa ne ui atu ki hono unoho, o ne behe, Oku ou kole, ke ke fekau mai ha taha oe kau talavou, mo ha asi e taha, koeuhi keu lele ai ki he tagata oe Otua, mo toe ha‘u.

23 Bea nae behe eia, Koeha te ke alu ai kiate ia he aho ni? oku ikai koe mahina foou, be koe aho tabu. Bea nae beheage eia, Fiemalie be.

24 Bea naa ne toki ai ae hekaaga ki he asi, mo ne behe ki he ene tamaioeiki, Fai vave, mo alu atu be, oua naa ke fakatuotuai ae alu  ae manu. ka i he eku fekau be aaku.

25 Koia naa ne alu mo ne hoko atu ki he tagata oe Otua i he mouga ko Kameli. Bea nae hoko o behe, i he ene mamata kei mamao ae tagata oe Otua kiate ia, naa ne behe kia Kehesi ko ene tamaioeiki, Vakai, koena ae fefine Sunemi:

26 Lele leva, bea fakafetaulaki kiate ia, mo ke behe ki ai, Oku ke lelei be koe? Oku lelei be a ho unoho? oku lelei be mo hoo tamajii? bea nae tali eia  o behe, Oku lelei be.

27 Bea i he ene hoko mai ki he tagata oe Otua ki he mouga, naa ne buke ia i hono va‘e: ka nae fakaofi mai a Kehesi ke ne teketeke‘i atu ia. Bea nae behe e he tagata oe Otua, Tuku ai be ia; he kuo mamahi a hono loto iate ia: bea kuo fakafufu ia meiate au e Jihova o ne taefakaha ia kiate au.

28 Bea toki behe e he fefine, He naaku holi ki ha tama mei hoku eiki? Ikai naaku behe, Ke oua naa kākā‘i au?

29 Bea nae toki behe eia kia Kehesi, Ai ho nootagavala, bea too a hoku tokotoko i ho nima, bea alu i ho hala; kabau te mo fetaulaki mo ha tagata, oua naa fetaba moia; bea kabau e fetaba mai ha toko taha kiate koe, oua naa ke toe leaage ki ai: bea ke ai a hoku tokotoko ki he mata oe tamajii.

30 Bea nae behe e he fa‘e ae tamajii, Oku moui a Jihova, bea i he moui mo ho laumalie, e ikai teu liaki koe. Bea naa ne tuu hake o muimui iate ia.

31 Bea nae muomua atu a Kehesi i ho na ao, mo ne hilifaki ae tokotoko ki he mata oe tamajii; ka nae ikai ke lea, be ogo‘i. Koia naa ne toe alu ke fetaulaki kiate ia, mo ne fakaha ki ai, o behe, Oku ikai ke fakaa ae tamajii.

32 Bea i he ene hoko mai a Ilaisa ki he fale, vakai, nae mate ae tamajii, bea nae fakatokoto i hono mohega.

33 Koia naa ne hu ai ki loto  fale, mo ne tabuni ae mataba ke na toko ua be, bea naa ne lotu kia Jihova.

34 Bea naa ne alu hake, mo ne tokoto hifo ki he tamajii, o ne ai a hono gutu oona ki hono gutu, mo hono mata ki hono mata, mo hono nima ki hono nima; bea naa ne fakatokoto ia ki he tamajii; bea nae fakaaau ke mafana ae jino oe tamajii.

35 Bea naa ne toe ha‘u, mo ne eveeva fealuaki be i he fale; bea ne alu hake, mo ne fakatokoto ia kiate ia: bea nae mafatua ae tamajii o liuga fitu, bea nae fakaava e he tamajii a hono mata.

36 Bea naa ne ui kia Kehesi, o ne behe, Ui mai ae  fefine Sunemi. Bea naa ne ui ki ai. Bea i he ene hu mai kiate ia, naa ne behe eia, Too hake a hoo tama.

37 Bea naa ne toki huage, mo to hifo ki hono va‘e, mo ne bunou hifo ki he kelekele, mo ne too hake a ene tama, o alu atu kitua.

¶ 38 Bea nae toe ha‘u a Ilaisa ki Kilikali: bea nae ai ae hoge i he fonua; bea nae nofo i hono ao ae gaahi foha oe kau balofita: bea naa ne behe ki he ene tamaioeiki, Fokotuu ae kulo lahi, bea haka ha meakai ma ae gaahi foha oe kau balofita.

39 Bea nae alu ha toko taha ki he goue ke tanaki ae louakau, bea naa ne ilo ai ae vaine tubu vao, bea naa ne tanaki mei ai ae gaahi fua ke bito ai hono kofu, bea naa ne omi o hifi ia ki he kulo oe hakalu: he nae ikai te nau ilo hono aga.

40 Koia naa nau liligi atu koeuhi ke kai e he kau tagata. Bea iloage, lolotoga e nau kai ae lu, naa nau ui atu, o behe, E tagata oe Otua oku i he kulo ae mate. Bea nae ikai te nau faa kai mei ai.

41 Ka nae behe eia, Omi ha mahoaa. Bea naa ne ai ia ki he kulo; bea naa ne behe, Liligi atu ma ae kakai, koeuhi ke nau kai. Bea ta nae ikai ha mea kovi i he kulo.

¶ 42 Bea nae ha‘u ha tagata mei Bealisalisa, o ne omi ki he tagata oe Otua ae ma oe uluaki fua, koe foi ma baale e uofulu, moe gaahi fuhiga koane mo hono kafukafu. Bea naa ne behe, Atu ia ki he kakai ke nau kai ia.

43 Bea nae behe e he ene tamaioeiki, Koeha, teu ai atu eni koa i he ao o ha kau tagata e toko teau? Bea nae toe behe eia, Atu ki he kakai, ke nau kai ai: he oku behe e Jihova, Te nau kai ai bea e toe be.

44 Bea behe, naa ne tuku ia ki ho nau ao, bea naa nau kai, bea nae toe be, o fakatatau ki he folofola a Jihova.