¶ 1 I HONO ua oe ta‘u o Joasi koe foha o Jihoaasi koe tu‘i o Isileli nae bule a Amasia koe foha o Joasi koe tu‘i o Juta.

2 Nae uofulu ma nima ae ta‘u o ene motua i he ene kamata bule, bea naa ne bule i Jelusalema i he ta‘u e uofulu ma hiva. Bea koe higoa o ene fa‘e koe Jihoatani, o Jelusalema.

3 Bea nae fai eia ae mea nae lelei i he ao o Jihova, ka nae ikai ke ne tatau mo Tevita ko ene tamai: naa ne fai o fakatatau moe mea kotoabe nae fai e Joasi ko ene tamai.

4 Ka ne ogo ia nae ikai ave ae gaahi botu maoluga: nae kei fai e he kakai ae feilaulau moe tutu ae mea namu kakala i he gaahi botu maoluga.

¶ 5 Bea nae hoko o behe, i he ene tuu mau leva ae buleaga ki hono nima, naa ne tamate‘i a ene kau tamaioeiki akinautolu nae fakabogi ae tu‘i ko ene tamai.

6 Ka nae ikai tamate‘i eia ae fānau ae kau fakabo: kae hage koia oku tohi i he tohi oe fono a Mosese, aia nae fekau ai e Jihova, o behe, E ikai tamate‘i ae tamai koeuhi koe fānau, be tamate‘i ae fānau koeuhi koe nau gaahi tamai; ka e tamate‘i ae tagata taki taha koeuhi ko ene agahala aana be.

7 Naa ne tamate‘i ae kakai Itomi e toko taha mano, i he telea oe masima, bea naa ne kaba a Sila i he tau, bea naa ne ui a hono higoa ko Jokitili o a‘u mai ki he aho ni.

¶ 8 Bea nae kouna e Amasia ae kau talafekau kia Jihoasa, koe foha o Jihoaasi koe foha o Jehu, koe tu‘i o Isileli, o behe, Ha‘u, ke ta fejiofaki akitaua koe mata ki he mata.

9 Bea nae fekau e Jihoasa koe tu‘i o Isileli kia Amasia koe tu‘i o Juta, o behe, Nae fekau atu e he talatalaamoa aia nae i Lebanoni ki he sita aia nae i Lebanoni, o ne behe, Foaki mai ho ofefine ki hoku foha ke na unoho: bea nae aluage ha manu fekai nae nofo i Lebanoni, o ne malamalaki hifo ae talatalaamoa.

10 Koe mooni kuo ke teia a Itomi, bea kuo agahiki ai ho loto: ke ke monuia, bea ke nofo ai be i ho fale: he koe umaa a hoo lavea i he kau noabe, mo ke higa ai, io akoe, bea mo Juta fakataha mo koe?

11 Ka nae ikai fie fakaogo a Amasia ki ai. Koia nae alu hake ai a Jihoasa koe tu‘i o Isileli; bea nae fejiofaki ia mo Amasia koe tu‘i o Juta, koe mata ki he mata i Betesemesi aia oku i Juta.

12 Bea nae teia a Juta i he ao o Isileli; bea nae hola ae tagata taki taha ki hono fale fehikitaki.

13 Bea nae ma‘u a Amasia koe tu‘i o Juta, koe foha o Jihoasa koe foha o Ahasia, e Jihoasa koe tu‘i o Isileli, i Bete‐semesi, o ne omi ki Jelusalema, bea ne holoki hifo ae a o Jelusalema mei he mataba o Ifalemi, o a‘u ki he mataba oe tuliki, koe haga e valugeau.

14 Bea naa ne too ae koula kotoabe moe siliva, bea moe gaahi nāunāu nae ilo i he fale o Jihova, bea i he tukuga koloa oe fale oe tu‘i, bea moe kau bobula, bea ne toe alu ai ki Samelia.

¶ 15 Bea koeni ko hono toe oe gaahi gaue a Jihoasa, aia naa ne fai, bea mo ene malohi, bea mo ene tau mo Amasia koe tu‘i o Juta, ikai kuo tohi ia i he tohi fakamatala ki he gaahi tu‘i o Isileli?

16 Bea nae mohe a Jihoasa mo ene gaahi tamai, bea nae fai hono butu ki Samelia fakataha moe gaahi tu‘i o Isileli; bea nae fetogi ia i he bule e Jeloboami ko hono foha.

¶ 17 Bea ko Amasia koe foha o Joasi koe tu‘i o Juta nae moui ia hili ae bekia a Jihoasa koe foha o Jihoaasi koe tu‘i o Isileli, i he ta‘u e hogofulu ma nima.

18 Bea ko hono toe oe gaahi gaue a Amasia, ikai kuo tohi ia i he tohi fakamatala ki he gaahi tu‘i o Juta?

19 Ka koeni, naa nau teuteu ke fai ae laba kiate ia i Jelusalema: bea naa ne hola ki Lakisi; ka naa nau fekau ke tuli ia ki Lakisi, bea naa nau tamate ia i ai.

20 Bea naa nau fakaheka ia mo omi ia i he faga hose: bea nae tanu ia i Jelusalema fakataha mo ene gaahi tamai i he kolo o Tevita.

¶ 21 Bea nae ave a Asalia e he kakai kotoabe i hono hogofulu ma nima o ene ta‘u, mo nau fakanofo ia ke tu‘i koe fetogi o ene tamai ko Amasia.

22 Naa ne laga eia a Elati, mo ne toe age ia ki Juta, i he ene hili ae mohe ae tu‘i ki he ene gaahi tamai.

¶ 23 I hono hogofulu ma nima oe ta‘u a Amasia koe foha o Joasi koe tu‘i o Juta, nae kamata bule i Samelia a Jeloboami koe foha o Joasi koe tu‘i o Isileli, bea naa ne bule i he ta‘u o fagofulu ma taha.

24 Bea naa ne fai eia ae kovi i he ao o Jihova: nae ikai mahui ia mei he gaahi agahala a Jeloboami koe foha o Nibati, aia nae fakaagahala‘i a Isileli.

25 Naa ne toe fokotuu ae gataaga o Isileli mei he huaga o Hemati o a‘u ki he tahi oe botu tokalelei, o hage koe folofola a Jihova koe Otua o Isileli, aia naa ne folofola aki i he ene tamaioeiki ko Jona, koe foha o Amitai, koe balofita, aia nae nofo i Katihefeli.

26 He nae afio‘i e Jihova ae mamahi o Isileli, a ene kovi lahi aubito: he nae ikai kei ai ha niihi nae nofo i lotoa be alu kitua, be ha taha ke tokoni a Isileli.

27 Bea nae ikai behe e Jihova te ne tamate‘i ae higoa o Isileli mei he lalo lagi: ka naa ne fakamoui akinautolu i he nima o Jeloboami koe foha o Joasi.

¶ 28 Bea koeni, ko hono toe oe gaahi gaue a Jeloboami, moe mea kotoabe naa ne fai, bea mo ene malohi, ae aga o ene faa tau, bea moe mea naa ne toe ma‘u ai a Tamasikusi, mo Hemati, aia nae kau ki Juta, ke ia Isileli ia, ikai kuo tohi ia i he tohi fakamatala ki he gaahi tu‘i o Isileli?

29 Bea nae mohe a Jeloboami mo ene gaahi tamai, io ae gaahi tu‘i o Isileli; bea nae fetogi ia i he bule e hono foha ko Sakalia.