¶ 1 NAE hogofulu ma ua ae ta‘u o Manase i he ene kamata bule, bea nae bule ia i he ta‘u e nimagofulu ma nima i Jelusalema. Bea koe higoa o ene fa‘e ko Hefisiba.

2 Bea nae fai eia ae kovi i he ao o Jihova, o fakatatau moe gaahi mea kovi ae hiteni, aia nae kabuji e Jihova mei he ao oe fānau a Isileli.

3 He naa ne toe laga hake ae gaahi botu maoluga aia nae fakaauha e he ene tamai ko Hesekaia: bea naa ne fokotuu hake ae gaahi feilaulauaga kia Beali, o ne gaohi ae vaotabu, o hage koia nae fai e Ehabi koe tu‘i o Isileli, bea nae lotu ia ki he gaahi mea oe lagi, mo ne tauhi akinautolu.

4 Bea nae gaohi eia ae gaahi feilaulauaga i he fale o Jihova, aia nae folofola ki ai a Jihova, Teu ai hoku huafa i Jelusalema.

5 Bea nae gaohi eia ae gaahi feilaulauaga ki he gaahi mea oe lagi i he lotoa e ua oe fale o Jihova.

6 Bea naa ne tuku hono foha ke alu i he lotolotoga oe afi, bea nae tokaga ia ki he gaahi kuoga, bea naa ne fai ae tuki  fakatevolo bea nae kau ia moe kau laumalie kovi moe kau kikite loi: nae fai eia ae gaahi agakovi lahi i he ao o Jihova, ke fakatubu hono houhau.

7 Bea nae fokotuu eia ae tamabua i he vao tabu naa ne gaohi i he fale o Jihova, aia nae folofola ai e Jihova kia Tevita, bea kia Solomone ko hono foha, Teu ai hoku higoa o taegata ki he fale ni, bea i Jelusalema, aia kuou fili mei he gaahi faahiga kotoabe o Isileli.

8 Bea e ikai teu toe hiki ae va‘e o Isileli mei he fonua aia neu foaki ki he e nau gaahi tamai; o kabau be te nau tokaga ke fai o hage koia kotoabe naaku fekau kiate kinautolu, bea fakatatau ki he fono kotoabe aia nae fekau e he eku tamaioeiki ko Mosese kiate kinautolu.

9 Ka nae ikai te nau tokaga: bea nae fakahe‘i akinautolu e Manase ke nau fai kovi lahi hake i he gaahi buleaga aia nae fakaauha e Jihova mei he ao oe fānau a Isileli.

¶ 10 Bea nae folofola a Jihova i he ene kau tamaioeiki koe kau balofita, o behe,

11 Koe mea i he fai e Manase koe tu‘i o Juta ae gaahi agakovi lahi ni, bea kuo ne fai agakovi lahi hake aubito i he mea nae fai e he kakai Amoni aia nae i mua iate ia, bea kuo ne fakaagahala‘i a Juta aki a ene gaahi otua loi:

12 Koia oku behe ai e Jihova koe Otua o Isileli, Vakai, Oku ou omi ha kovi behe ki Jelusalema mo Juta, koia fulibe e fanogo ki ai e vavana hono teliga fakatouoji be.

13 Bea teu falo atu i oluga ki Jelusalema ae afo o Samelia, moe afo fakafuofua oe fale o Ehabi: bea teu holoholo a Jelusalema o hage koe holoholo ae ibu kai e tagata, o holoholo ia, bea fakafoohifo ki lalo.

14 Bea teu liaki hono toe o hoku tofia, bea tukuage akinautolu ki he nima o ho nau fili: bea te nau hoko koe mea ke vete mo maumau e ho nau gaahi fili kotoabe;

15 Koe mea i he e nau fai kovi i hoku ao, mo fakatubu eku houhau, talu ae aho nae ha‘u ai e nau gaahi tamai mei Ijibite, io o a‘u ki he aho ni.

16 Ka koeni, nae ligi e Manase ae toto maonioni o lahi aubito, mo ne fakafonu aki ia a Jelusalema mei he botu e taha ki he botu e taha; kae umaa foki a ene agahala aia naa ne fakaagahala ai a Juta, i he fai aia nae kovi i he ao o Jihova.

¶ 17 Bea ko hono toe oe gaahi gaue a Manase, mo ia kotoabe naa ne fai, mo ene agahala aia naa ne fai, ikai kuo tohi i he tohi fakamatala ki he gaahi tu‘i o Juta?

18 Bea nae mohe a Manase mo ene gaahi tamai, bea nae tanu ia i he goue o hono fale oona, i he goue o Usa: bea nae fetogi ia i he bule e Amoni ko hono foha.

¶ 19 Nae uofulu ma ua ae ta‘u ae motua o Amoni i he ene kamata ene bule, bea nae bule ia i he ta‘u e ua i Jelusalema. Bea koe higoa o ene fa‘e ko Mesulemeti, koe ofefine o Halusi oe kakai Jotiba.

20 Bea nae fai eia ae kovi i he ao o Jihova, o hage ko ene tamai ko Manase.

21 Bea nae alu ia i he hala kotoabe nae alu ai ene tamai, mo ne tauhi ae gaahi otua loi nae tauhi e he ene tamai, o ne lotu kiate kinautolu:

22 Bea naa ne liaki eia a Jihova koe Otua o ene gaahi tamai, bea nae ikai alu ia i he hala o Jihova.

¶ 23 Bea nae teu ae laba e he kau tamaioeiki a Amoni kiate ia, o nau tamate‘i ae tu‘i i hono fale oona.

24 Bea nae tamate‘i e he kakai oe fonua akinautolu kotoabe nae kau ki he tu‘i ko Amoni: bea nae fakanofo e he kakai oe fonua a Josaia ko hono foha ke tu‘i ia ko hono fetogi.

25 Bea ko hono toe oe gaahi gaue nae fai e Amoni, ikai kuo tohi ia i he tohi fakamatala ki he gaahi tu‘i o Juta?

26 Bea nae tanu ia i he fonua loto i he goue o Usa; bea nae fetogi ia i he bule e hono foha ko Josaia.