temipale

24 Siulai

Ko e Hā e Ngaahi Tāpuaki ʻOku Hoko mei hono Maʻu e Ngaahi Ouau Fakatemipalé?

ʻĒsela 1; 3–7; Nehemaia 2; 4–6; 8

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Kuo tau mātā fēfē nai e toʻukupu ʻo e ʻEikí ʻi heʻetau moʻuí?

• Tokanga kiate kinautolu ʻoku faingataʻaʻiá. Te tau lava fēfē nai ʻo fepoupouʻaki ʻi he ngaahi meʻa ʻoku tau fouá?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau fakaʻaongaʻi lelei ange fēfē nai ʻa e tekinolosiá ko ha meʻangāue ke vahevahe ai ʻa e ongoongoleleí?

• Fakatahaʻi ʻa e ngaahi fāmilí ke taʻengata. Ko e hā e meʻa ʻoku tau fakahoko ke tokoni ki hotau ngaahi fāmilí ke nau haʻu kia Kalaisí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻI he taimi naʻe foki ai ʻa e kakai Siú mei hono fakaheeʻi kinautolu ʻi Papiloné, ne nau ʻilo ʻa Selusalema mo hono temipalé kuo fakaʻauha (vakai, 2 Ngaahi Tuʻi 25:1–10; 2 Fakamatala Meʻa Hokohoko 36:17–19). Naʻe fakaʻamu e kakaí ke nau toe langa foʻou ʻa e temipalé. Ko ia ai, ʻi ha kiʻi taimi nounou, ne nau kamata ʻa e ngāue ki hono toe langa foʻoú pea naʻa nau fiefia ʻi he taimi naʻe ʻosi ai ʻa e temipalé (vakai, ʻĒsela 3:8–13; 6:16–22). ʻI he ʻaho ní, ʻi heʻetau hoko ko e kakai ʻo e fuakava ʻa e ʻOtuá, ʻoku tau langa foki mo ha ngaahi temipale pea ʻoku tau fiefia ʻi he taimi ʻoku ʻosi ai ha temipale foʻou. Ko e hā hono ʻuhingá? Koeʻuhí ko e ngaahi ouau fakatemipalé ʻoku maʻu ai e ngaahi tāpuaki maʻongoʻonga taha ʻa e Tamai Hēvaní. ʻOku nau ʻomi ha mālohi fakalaumālie. ʻOku nau ʻomi ha fakahinohino kiate kitautolu. Pea ʻoku nau tokoni ke tau hoko ʻo hangē ko e ʻOtuá pea maʻu ʻa e meʻa kotoa pē ʻokú Ne maʻú. (Vakai, Tokāteline mo e Ngaahi Fuakava 84:19–22; 109:22–26.)

Te ke tokoniʻi fēfē nai ʻa e toʻu tupú ke nau fakaʻānaua ki he temipalé ʻo hangē ko ia ne fakahoko ʻe he kakai ʻIsilelí? Te ke tokoniʻi fēfē nai ke nau holi ʻaki honau lotó kotoa ke fakahoko ha ngaahi fuakava mo e ʻOtuá ʻi Hono fale toputapú? ʻI hoʻo teuteu ke faiakó, fakakaukau ke toe vakaiʻi ʻa e pōpoaki ʻa Palesiteni Thomas S. Monson ko e “Ngaahi Tāpuaki ʻo e Temipalé” (Liahona, Mē 2015, 91–93) pea mo e fakamatala “Why Ordinances and Covenants Matter” ʻi he temples.ChurchofJesusChrist.org.

toʻu tupu ʻi tuʻa ʻi he temipalé

ʻOku tokoni ʻa e ngaahi ouau fakatemipalé ke tau hoko ʻo hangē ko e ʻOtuá pea maʻu ʻa e meʻa kotoa pē ʻokú Ne maʻú.

Ako Fakataha

Ke tokoni ki he kau mēmipa ʻo hoʻo kalasí pe kōlomú ke nau hanganaki atu ki he ngaahi tāpuaki ʻe lava ke nau maʻu mei he ngaahi ouau fakatemipalé, te ke lava ʻo fakaafeʻi ke nau toe lau ʻa e ʻĒsela 3:10–13; 6:16, 21–22. Kole ange ke nau vahevahe ha ngaahi foʻi lea pe kupuʻi lea ʻoku fakahaaʻi ai e ongo ne maʻu ʻe he kakai Siú he kuonga muʻá fekauʻaki mo hono toe langa foʻou ʻo honau temipalé. Ko e hā ʻoku hoko ai e langa ʻo ha temipale ko ha meʻa ke fakafiefiaʻí? ʻOku tokoni fēfē nai ʻa hotau ngaahi temipale he kuonga ní mo e ngāue ʻoku tau fakahoko ʻi aí ke tau ofi ange ai ki he Fakamoʻuí? Ko ha ngaahi fakakaukau ʻeni ʻe niʻihi ke tokoni ke mahino ki he toʻu tupú ʻa e ngaahi tāpuaki ʻe lava ke nau maʻu ʻi he temipalé.

• ʻI he taimi ne fakatapui ai ʻe Siosefa Sāmita ʻa e Temipale Ketilaní, naʻá ne fakahoko ʻa e lotu fakatapui ʻoku hā ʻi he Tokāteline mo e Ngaahi Fuakava 109. ʻOku fakamatalaʻi ʻe he lotu ko ʻení ʻa e ngaahi tāpuaki lahi ʻoku lava ke tau maʻu ʻo fakafou ʻi he ngaahi ouau ʻo e temipalé. ʻE lava ke fekumi ʻe he kau mēmipa ʻo e kalasí pe kōlomú ʻi he ngaahi konga ʻo e lotu ko ʻení, tautautefito ki he veesi 12–26, ʻo kumi e ngaahi tāpuaki ne lotua ʻe Siosefa Sāmitá. ʻE lava ke nau hiki ʻa e ngaahi tāpuaki ko ʻení ʻi he palakipoé. Te ke lava ʻo kole ki he toʻu tupú ke nau aleaʻi ʻa e founga ʻe lava ke fakamālohia ai ʻe he ngaahi tāpuaki ko ʻení ʻa kinautolu he taimí ni mo e kahaʻú. Vahevahe hoʻo fakamoʻoni ki he ngaahi tāpuaki kuó ke maʻú ʻo fakafou ʻi he ngaahi ouau ʻo e temipalé.

• Ke tokoni ki he kau mēmipa ʻo e kalasí pe kōlomú ke nau vahevahe ʻenau ongo fekauʻaki mo e temipalé, kole ange ke nau fakakakato ʻa e sētesi ko ʻení: “Ko e taimi ʻoku ou fakakaukau ai ki he temipalé, ʻoku ou ongoʻi …” Te ke lava ʻo fakaafeʻi ke nau lau ʻa e ʻuluaki palakalafi ʻe nima ʻo e pōpoaki ʻa ʻEletā Kent F. Richards “Ko e Mālohi ʻo e Anga Faka-ʻOtuá” (Liahona, Mē 2016, 118–20). Ko e hā ʻoku tau fie maʻu ai ʻa e temipalé ʻo laka hake ʻi ha toe meʻa kehé? Ko e hā e meʻa ne tau ako fekauʻaki mo e mālohi ʻoku ʻomi ʻe he ʻOtuá ʻo fakafou ʻi he ngaahi ouau fakatemipalé? ʻE lava leva ke fekumi ʻe he toʻu tupú ʻi he toenga ʻo e pōpoaki ʻa ʻEletā Lisiaté ki he ngaahi tāpuaki ʻoku tau maʻu ʻi heʻetau kau ʻi he ngaahi ouau fakatemipalé. Pe ko ʻenau fekumi ki he ngaahi tāpuaki ko ʻení ʻi he pōpoaki ʻa Palesiteni Thomas S. Monson ko e “Ngaahi Tāpuaki ʻo e Temipalé.”

• Ke tokoni ki he kau mēmipa ʻo e kalasí pe kōlomú ke nau fakalaulauloto ki he ngaahi feilaulau kuo vilitaki ha niʻihi ke fakahoko ke maʻu e ngaahi tāpuaki ʻo e temipalé, te ke lava ʻo fakaʻaliʻali ʻa e vitiō “Ko e Temipalé ko ha Maama” (ChurchofJesusChrist.org). Ko e hā naʻe loto-fiemālie ai ʻa e fāmili Mou Temí ke fakahoko ʻa e faʻahinga feilaulau lahi pehē ke ʻalu ki he temipalé? (Vakai foki, Thomas S. Monson, “Ko e Temipale Māʻoniʻoní—ko ha Maama ki he Māmaní,” Liahona, Mē 2011, 90–94.) Ko e hā e ngaahi feilaulau ʻoku fie maʻu ke tau fakahoko ke maʻu ʻa e ngaahi tāpuaki ʻo e temipalé? Mahalo ʻe lava ke kau mai ki he fakatahá ha taha ne toki ʻalu ki he temipalé ke ne vahevahe ʻene aʻusiá. Te ke lava ʻo fakaafeʻi ʻa e toʻu tupú ke nau fekumi ʻi he pōpoaki ʻa ʻEletā Ronald A. Rasband ko e “Taau ki he ʻEikí” (Liahona, Nōvema 2020, 22–25) pea vahevahe ʻa e ngaahi tāpuaki ʻo hono maʻu ha lekomeni temipalé. Te mou lava foki ke lau fakataha ʻa e ngaahi fehuʻi ke maʻu ha lekomeni temipalé (vakai, Russell M. Nelson, “Lea Tukú,” Liahona, Nōvema 2019, 120–22).

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Quentin L. Cook, “Sio Kiate Koe ʻi he Loto Temipalé,” Liahona, Mē 2016, 97–100

Ko e Faiako ʻi he Founga ʻa e Fakamoʻuí

“ʻI hoʻo faiakó, ʻoua te ke tuku atu pē ha fakamatala, ka ke tokoni ke ʻiloʻi ʻe he toʻu tupú ʻiate kinautolu pē ʻa e ngaahi moʻoni ʻo e ongoongoleleí ʻi he folofolá mo e ngaahi lea ʻa e kau palōfitá” (Ko e Faiako ʻi he Founga ʻa e Fakamoʻuí, 29).