14 ʻAokosi

Te U Maʻu Fēfē Nai ʻa e Fiefiá ʻi he Muimui ki he Fakamoʻuí?

Saame 1–2; 8; 19–33; 40; 46

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e founga ʻoku tau maʻu ai ʻa e fiefiá ʻi he muimui kia Sīsū Kalaisí?

• Tokanga kiate kinautolu ʻoku faingataʻaʻiá. Ko hai ʻi hotau uōtí pe tukui koló ʻokú ne fie maʻu ʻetau tokoní? Te tau lava fēfē nai ʻo tokoniʻi kinautolu?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau fetokoniʻaki fēfē nai ke mateuteu ki he ngāue fakafaifekaú?

• Fakatahaʻi ʻa e ngaahi fāmilí ke taʻengata. Te tau tokoni fēfē nai ki he ngaahi ngāue ʻa hotau uōtí ke fakahoko ʻa e hisitōlia fakafāmilí mo e ngāue fakatemipalé?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Ko e hā e meʻa ʻokú ne ʻomi kiate koe ʻa e fiefiá? ʻE lava ke pehē ʻe ha kakai ʻe niʻihi ko e meʻa ʻoku nau fiefia aí ko e feohi mo e ngaahi kaungāmeʻá mo e fāmilí, ko ha meʻa ʻoku nau manako ai, pe ko ha foʻi ʻaho pē ʻe taha he ʻikai ke ʻahiʻahiʻi ai kinautolu. Naʻe akonaki ʻa Palesiteni Russell M. Nelson: “ʻOku siʻi ha kaunga e fiefia ʻoku tau maʻú, ki he tūkunga ʻetau moʻuí mo e meʻa ʻoku tukutaha ai ʻetau tokangá. ʻI hono tukutaha ʻetau tokangá ʻi he palani ʻa e ʻOtuá ki he fakamoʻuí, pea mo Sīsū Kalaisi mo ʻEne ongoongoleleí … te tau lava ʻo ongoʻi fiefia ʻo tatau ai pē pe ko e hā e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu e fiefiá meiate Ia” (“Fiefiá mo e Moʻui Fakalaumālié,” Liahona, Nōvema 2016, 82). ʻOku toutou fakaongo mai ʻe he Ngaahi Sāmé ʻa e pōpoaki tatau ko ʻení: “Te ke fakahā kiate au ʻa e hala ʻo e moʻuí: ʻoku fonu ʻa e fiefiá ʻi ho ʻaó” (Ngaahi Saame 16:11).

Fakakaukau ki ha niʻihi ʻo e ngaahi pole ʻoku fehangahangai mo e kau mēmipa ʻo hoʻo kalasí pe kōlomú. Te ke tokoni fēfē nai ke mahino kiate kinautolu ʻoku maʻu ʻa e fiefia moʻoní mei hono fakamālohia ʻa e tui ki he Fakamoʻuí—ʻo aʻu pē ki he lolotonga e ngaahi taimi faingataʻá? Fakalaulauloto ki he fehuʻi ko ʻení ʻi hoʻo teuteu ke faiakó. Fekumi ki ha ngaahi potufolofola ʻoku felāveʻi mo ia ʻi he tohi Ngaahi Sāmé pe ʻi he pōpoaki ʻa Palesiteni Nalesoni ko e “Fiefiá mo e Moʻui Fakalaumālié,” ʻa ia te ke lava ʻo vahevahe mo hoʻo kalasí pe kōlomú.

ʻOku maʻu ʻa e fiefia moʻoní mei hono fakamālohia e tui ki he Fakamoʻuí, ʻo aʻu pē ki he lolotonga e ngaahi taimi faingataʻá.

Ako Fakataha

Fakakaukau ke fakaafeʻi e kau mēmipa ʻo hoʻo kalasí pe kōlomú ke nau toe vakaiʻi ha niʻihi ʻo e ngaahi folofolá ni: Ngaahi Saame 1; 8; 19; 23; 27. Ko e hā ʻoku tau ako mei he Ngaahi Saame ko ʻení fekauʻaki mo e meʻa ʻokú ne ʻomi ʻa e fiefiá? Hili iá, te ke lava leva ʻo fakaʻaongaʻi ha foʻi ʻekitivitī ʻe taha pe lahi ange mei he ngaahi ʻekitivitī ko ʻení ke tokoni ke mahino lelei ange ki he niʻihi ʻokú ke akoʻí ʻoku maʻu ʻa e fiefia moʻoní mei he muimui kia Sīsū Kalaisí.

• ʻOku tau fakaʻamu kotoa pē ke tau fiefia, ka ʻoku fie maʻu ke mahino kiate kitautolu ʻa e meʻa ʻokú ne ʻomi ʻa e fiefia moʻoní mo e meʻa ʻoku iku ki he mamahí. Kole ki he toʻu tupú ke nau vahevahe ha niʻihi ʻo e ngaahi meʻa ʻoku nau fiefia aí pea mo hono ʻuhingá. Tohi ʻi he palakipoé “ʻOku ʻi ai ʻa e faʻahinga ʻo e tangatá koeʻuhí ke nau maʻu ʻa e fiefiá” (2 Nīfai 2:25). Hili iá pea fakaafeʻi leva e toʻu tupú, fakafoʻituitui pe fakakulupu iiki, ke nau toe vakaiʻi ʻa e ngaahi potufolofola ʻi he “Ngaahi Maʻuʻanga Tokoni Poupoú” pea lisi ʻa e meʻa ʻoku nau ʻilo ʻoku maʻu ai ʻa e fiefiá.   Ko e hā ha ngaahi founga ʻoku feinga ai e kakaí ke maʻu e fiefia ʻoku iku ki he mamahí? Ko e hā ha founga kuo ʻomi ai ʻe he Fakamoʻuí ʻa e fiefiá kiate kitautolu?

• ʻOku tau ʻiloʻi kotoa pē ha kakai ʻoku nau fehangahangai mo e ngaahi faingataʻá neongo ʻenau feinga honau lelei tahá ke moʻui ʻaki e ongoongoleleí. Te ke tokoni fefē nai ke mahino ki he niʻihi ʻokú ke akoʻí te tau lava ʻo maʻu ʻa e fiefiá ʻo aʻu pē ki he taimi ʻoku faingataʻaʻia ai ʻetau moʻuí? Te ke lava ʻo kole ange ke nau toe lau e pōpoaki ʻa Palesiteni Russell M. Nelson ko e “Fiefiá mo e Moʻui Fakalaumālié” pe ko e pōpoaki ʻa Palesiteni Steven J. Lund “Ko Hono Maʻu ʻo e Fiefiá ʻia Kalaisí” (Liahona, Nōvema 2020, 35–37). Ko e hā ha ngaahi sīpinga ʻoku tau ʻilo fekauʻaki mo e kakai ʻoku nau maʻu e fiefiá ʻia Kalaisí neongo e ngaahi faingataʻá? Ko e hā ha meʻa ʻoku tau ako mei he ngaahi aʻusia ko ʻení? Ko e hā ha ngaahi aʻusia te tau lava ʻo vahevahe?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ongo fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mātiu 5:1–12; 1 Pita 4:12–13; 2 Nīfai 2:25–27; Mōsaia 2:41; 3:3–7; 4:2–3; ʻAlamā 36:16–22; 4 Nīfai 1:15–16 (Founga ke maʻu ai e fiefiá)

• D. Todd Christofferson, “Ko e Fiefia ʻa e Kau Māʻoniʻoní,” Liahona, Nōvema 2019, 15–18

• “Ko e Maluʻi mei he Taonakitá mo e Ngāue Fakaetauhí,” ChurchofJesusChrist.org

Ko e Faiako ʻi he Founga ʻa e Fakamoʻuí

Naʻe ʻafioʻi tonu ʻe he Fakamoʻuí ʻa kinautolu naʻá Ne akoʻí—pea mo e tuʻunga te nau aʻusiá. ʻI heʻenau faingataʻaʻiá, naʻá Ne kei ʻofa pē ʻiate kinautolu. Te ke fakahaaʻi fēfē nai hoʻo ʻofa mo e poupou kiate kinautolu ʻokú ke akoʻí?