finemui ʻoku malimali

28 ʻAokosi

ʻE Tokoniʻi Fēfē Nai Au ʻe he Fakamoʻuí Lolotonga Hoku Ngaahi Faingataʻaʻiá?

Ngaahi Saame 102–103; 110; 116–119; 127–128; 135–139; 146–150

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha ngaahi aʻusia kimuí ni kuo nau ʻomi kitautolu ke tau ofi ange ki he Tamai Hēvaní mo Sīsū Kalaisí?

• Tokanga kiate kinautolu ʻoku faingataʻaʻiá. ʻOku ʻi ai nai ha taha ne toki hiki foʻou mai ki hotau uōtí pe toki kau mai ki he Siasí? Te tau tokoniʻi fēfē nai ʻa kinautolu ke nau ongoʻi ʻoku talitali lelei kinautolu?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi ʻekitivitī ʻoku ʻamanaki ke fakahoko ʻe lava ke tau fakaafeʻi hotau ngaahi kaungāmeʻá ke nau omi ki ai?

• Fakatahaʻi ʻa e ngaahi fāmilí ke taʻengata. Ko e hā ha ngaahi ngāue ʻe lava ke tau fakahoko ke lekooti hotau ngaahi hisitōlia fakatāutahá?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻE lava ke hanga ʻe he ngaahi faingataʻa ʻoku tau fehangahangai mo iá ʻo ngaohi kitautolu ke tau ongoʻi ongosia, taʻefiemālie, ʻulungia, mo liʻekina. Naʻe mahino ki he kau tohi ʻo e Ngaahi Sāmé ʻa e ngaahi ongo ko iá pea naʻa nau fakahaaʻi mālohi ia: “Kuo taaʻi hoku lotó, pea kuo mae ʻo hangē ko e mohukú; … ʻoku ou leʻo, peá u tatau mo e kihiʻi manupuna ʻoku toko taha pē ʻi he tuʻahivi ʻo e falé” (Ngaahi Saame 102:4, 7). Ka ʻi he mālohi tatau pē, naʻa nau fakamoʻoni ai ʻe hoko ʻa e tafoki ki he Fakamoʻuí ke maʻu ai ha fiemālie: “Fakafetaʻi ki [he ʻEikí], ʻa hoku laumālié, pea ʻoua naʻa ngalo ʻa ʻene ngaahi meʻaʻofa kotoa pē: ʻa ia ʻokú ne fakamolemole hoʻo ngaahi hia kotoa pē; mo ne fakamoʻui ho ngaahi mahaki kotoa pē; ʻa ia ʻokú ne huhuʻi hoʻo moʻuí mei he fakaʻauhá; ʻo ne tatā ʻaki koe ʻa e manavaʻofa mo e ʻaloʻofa ongongofuá” (Ngaahi Saame 103:2–4).

Fakakaukau ki he ngaahi tāpuaki ʻe maʻu ʻe he kau mēmipa ʻo hoʻo kalasí pe kōlomú ʻi he mahino kakato ange kiate kinautolu ʻa e founga ʻe ala tokoni ai ʻa e Fakamoʻuí kiate kinautolu ʻi honau ngaahi faingataʻaʻiá. Kuo tokoniʻi fēfē nai koe ʻe he Fakamoʻuí? ʻI hoʻo teuteu ke faiakó, te ke lava ʻo toe vakaiʻi ʻa e pōpoaki ʻa Palesiteni Henry B. Eyring “ʻOsi Siviʻi, Fakamoʻoniʻi, pea Fakaleleiʻi” (Liahona, Nōvema 2020, 96–99) mo e “Faingataʻá” ʻi he Ngaahi Tefito ʻo e Ongoongoleleí (topics.ChurchofJesusChrist.org).

konifelenisi ʻa e toʻu tupú

ʻE tokoniʻi mo fakafiemālieʻi kitautolu ʻe he Fakamoʻuí ʻi hotau ngaahi faingataʻá.

Ako Fakataha

Te ke lava ʻo kamata ʻaki haʻo kole ki he kau mēmipa ʻo e kalasí pe kōlomú ke nau toe vakaiʻi ʻa e Ngaahi Saame 102, 103, mo e 116, ʻo fekumi ki he founga ʻoku tokoniʻi ai ʻe he Fakamoʻuí kitautolu ʻi heʻetau ngaahi feinga ke ikunaʻi ʻa e faingataʻá. ʻE lava ke nau ngāue fakataautaha pe fakakulupu ke hiki ha ngaahi sētesi fekauʻaki mo e meʻa ne nau maʻú pea vahevahe leva ʻa e meʻa ne nau hikí. Fili ha ʻekitivitī ʻe taha pe lahi ange mei he ngaahi ʻekitivitī ko ʻení ke tokoni ke mahino lelei ange kiate kinautolu ʻa e kaveinga ko ʻení.

• ʻE lava ke fakaafeʻi ʻe he ngaahi himí ʻa e Laumālié mo akoʻi e tokāteliné ʻi ha founga mālohi. Fakakaukau ke toe vakaiʻi ha himi fekauʻaki mo e founga ʻoku tokoniʻi ai ʻe he Fakamoʻuí kitautolu ʻi hotau ngaahi faingataʻá, ʻo hangē ko e “ʻE Kāinga Kuo Langa ha Tuʻunga” (Ngaahi Himí, fika 37). Ko e hā e meʻa ʻoku akoʻi mai ʻe he himí fekauʻaki mo e tokoni ʻoku fakahoko mai ʻe he Fakamoʻuí? Hili iá ʻe lava leva ke vakaiʻi ʻe he toʻu tupú ʻa e ngaahi potufolofola ʻi he “Ngaahi Maʻuʻanga Tokoni Poupoú.” ʻE ala ʻaonga ke nau lekooti ha kupuʻi lea mei he himí pe ko ha taha ʻo e ngaahi folofola ʻokú ne fakamanatu kiate kinautolu ke nau fekumi ki he Fakamoʻuí lolotonga ʻenau faingataʻaʻiá.

• ʻE lava ke tokoni ʻa e pōpoaki ʻa Palesiteni Henry B. Eyring ko e “ʻOsi Siviʻi, Fakamoʻoniʻi, pea Fakaleleiʻi” ke mahino lelei ange ki he niʻihi ʻokú ke akoʻí ʻa e ngaahi fehuʻi hangē ko ʻení: Ko e hā ha niʻihi ʻo e ngaahi taumuʻa ʻo ʻetau faingataʻaʻia ʻi he moʻui fakamatelié? ʻE tokoniʻi fēfē nai kitautolu ʻe he Fakamoʻuí ʻi hotau ngaahi faingataʻá? Ko e hā ha meʻa ʻe lava ke tau fakahoko ke ʻaonga ai ʻa e tokoni mo e mālohi ʻo e Fakamoʻuí? Fakakaukau ke hiki ʻa e ngaahi fehuʻi ko ʻení ʻi he palakipoé. ʻE lava ke fekumi ʻa e kau mēmipa ʻo e kalasí pe kōlomú ki ha ngaahi tali ʻi he pōpoaki ʻa Palesiteni ʻAealingí. Hangē ko ʻení, ko e hā ʻa e meʻa ʻoku tau ako mei he ngaahi talanoa fekauʻaki mo e faʻē ʻa Palesiteni ʻAealingí ʻi he kamataʻanga mo e fakaʻosinga ʻo e pōpoakí? Te ke lava ʻo kole ki he tokotaha takitaha ke nau fakalaulauloto ki he founga ʻe lava ke nau fakaʻaongaʻi ai ʻa e meʻa ne nau akó ki honau ngaahi faingataʻá. Mahalo ʻe ʻi ai ha toʻu tupu ʻe niʻihi te nau fie vahevahe ʻenau fakakaukaú.

• Naʻe fakafekauʻaki ʻe Sisitā Lisa L. Harkness ʻa e talanoa ki hono fakanonga ʻe he Fakamoʻuí ʻa e matangí ke akoʻi ʻokú Ne malava ʻo fakanonga ʻa e ngaahi matangi ʻi heʻetau moʻuí (vakai, Maʻake 4:35–41; “Fiemālie, Peá Ke [Nonga],” Liahona, Nōvema 2020, 80–82). Te ke lava ʻo fakaafeʻi ha mēmipa ʻo e kalasí pe kōlomú ke nau haʻu mateuteu ke vahevahe ʻa e meʻa ne nau ako fekauʻaki mo e Fakamoʻuí mei he talanoa ʻi he folofolá. ʻE lava foki ke fakaʻaliʻali ʻe he tokotaha ko ʻení ha fakatātā (vakai, Tohi Fakatātā ʻo e Ongoongoleleí, fika 40). Hili iá ʻe lava leva ke toe vakaiʻi ʻe he toʻu tupú ʻa e meʻa naʻe akoʻi ʻe Sisitā Hakinesi fekauʻaki mo e founga ʻoku “ʻi hotau vaká” ai ʻa e Fakamoʻuí ʻi he taimi ʻoku tau fehangahangai ai mo e ngaahi faingataʻá. Te ke lava ʻo fakaafeʻi ha niʻihi ke nau vahevahe ʻa e founga kuo tokoniʻi ai kinautolu ʻe he Fakamoʻuí ʻi honau ngaahi faingataʻá, ʻo kau ai ʻa e founga kuó Ne tokoniʻi kinautolu ʻo fakafou ʻi he kakai kehé. Poupouʻi ʻa e toʻu tupú ke nau vahevahe ʻenau ngaahi aʻusiá mo ha taha ʻoku nau ʻiloʻi ʻokú ne fie maʻu ʻa e melino ʻa e Fakamoʻuí.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• ʻĪsaia 53:3–5; Hepelū 2:17–18; ʻAlamā 7:11–13; 36:3; ʻEta 12:27 (ʻE tokoniʻi kitautolu ʻe he Fakamoʻuí ʻi hotau ngaahi faingataʻá)

• Dieter F. Uchtdorf, “ʻE Fakahoko ʻe he ʻOtuá ha Meʻa ʻOku ʻIkai Mafakakaukaua,” Liahona, Nōvema 2020, 51–54

• Cristina B. Franco, “Ko e Mālohi Faifakamoʻui ʻo Sīsū Kalaisí,” Liahona, Nōvema 2020, 60–62

• “Ngaahi Faingataʻa ke Ikunaʻí” (vitiō), ChurchofJesusChrist.org

Ko e Faiako ʻi he Founga ʻa e Fakamoʻuí

“ʻE lava ʻe hono ʻeke ha ngaahi fehuʻi ʻoku poupouʻi ai e kau akó ke fakahoko ʻenau fakamoʻoni ki he ngaahi tefitoʻi moʻoni ʻoku akoʻí, ke hoko ia ko ha founga mālohi fau ke fakaafeʻi ʻaki e Laumālié. … ʻE tupulaki ʻenau fakamoʻoní—pea mo e fakamoʻoni ʻa e kalasí—ʻi hono fakamoʻoniʻi ange ʻe he Laumālié ʻa e moʻoní” (Ko e Faiako ʻi he Founga ʻa e Fakamoʻuí, 33).