ko ha talavou ʻoku malimali

11 Sepitema

Te U Maʻa Fēfē Nai mo Toe Fiefia hili Haʻaku Faiangahala?

ʻĪsaia 1–12

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. ʻE tokoni fēfē nai ʻa e tafoki ki he ʻEikí ke tau matatali e ngaahi faingataʻá mo e ngaahi ʻahiʻahí?

• Tokanga kiate kinautolu ʻoku faingataʻaʻiá. Ko hai ʻoku tau ʻiloʻi ʻokú ne fie maʻu ʻetau lotú mo e anga fakakaumeʻá?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi palani ke vahevahe e ongoongoleleí kuo aleaʻi ʻi he ngaahi fakataha alēlea fakauooti ʻa e toʻu tupú? ʻE kau atu fēfē nai ki ai ʻetau kalasí pe kōlomú?

• Fakatahaʻi ʻa e ngaahi fāmilí ke taʻengata. ʻE fakamālohia fēfē nai ʻe he ngāue ki he hisitōlia fakafāmilí ʻa hotau ngaahi vā fetuʻutaki mo e Tamai Hēvaní mo Sīsuú?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Ko e taimi ʻoku tau ongoʻi halaia ai ʻi he hili ha faiangahala, ʻoku ʻi ai haʻatau fili. Neongo e fakamamahi ʻa e ngaahi ongo ko ʻení, ka ʻe lava ke hoko ia ko ha tāpuaki ʻo kapau ʻoku nau ueʻi kitautolu ke tau fakatomala. Ka ʻoku talamai ʻe Sētane kiate kitautolu ʻoku ʻuhinga ʻa e ngaahi ongo ko ʻení ʻoku ʻikai ʻofa ʻa e ʻOtuá ʻiate kitautolu pea ʻokú ne feinga ke tau ongoʻi loto-foʻi mo siva e ʻamanakí. ʻOku malava pē ke ʻi ai ha niʻihi ʻokú ke akoʻi ʻoku nau mafasia ʻi he faʻahinga ongo peheé. Mahalo ʻoku nau fifili pe te nau toe maʻa mo fiefia koā. Te ke tokoniʻi fēfē nai kinautolu ke nau maʻu ʻa e ʻamanaki leleí ʻi he Fakalelei ʻa e Fakamoʻuí?

Naʻe valokiʻi loto-toʻa ʻe he palōfita ko ʻIlaisiaá ʻa e kakaí koeʻuhí ko ʻenau faiangahalá. Ka naʻá ne toe fakamoʻoni foki, ʻe tuʻunga ʻi he Fakamoʻuí, “neongo ʻa e tatau ʻo hoʻomou angahalá mo e kula ʻahoʻahó, ʻe hoko ia ke hinehina ʻo hangē ko e ʻuha hina ekiakí” (ʻĪsaia 1:18). Fakalaulauloto ki heni ʻi hoʻo lau ʻa e ʻĪsaia 1–12 ʻi he uike ní. Ko e hā ha meʻa te ne fakalotoa ʻa e niʻihi ʻokú ke akoʻí ke nau tafoki kia Sīsū Kalaisi ʻi he tui ʻe malava pē ke toʻo atu ʻa e ngaahi mafasia ʻo ʻenau faiangahalá? Te mou lava foki ʻo ako ʻa e fakamoʻoni ʻa Sisitā Sharon Eubank kia Kalaisí ʻi heʻene pōpoakí “Ko Kalaisi ʻa e Maama ʻoku Ulo ʻi he Fakapoʻulí” (Liahona, Mē 2019, 73–76).

kalasi ʻa e kau finemuí

Koeʻuhí ko Sīsū Kalaisi, ʻoku malava pē ke toʻo atu ʻa hotau ngaahi mafasia ʻi he faiangahalá.

Ako Fakataha

Ke teuteu ki ha fealeaʻaki ʻoku fakatefito ʻia ʻĪsaia 1–12, te ke lava ʻo kole ki he toʻu tupu takitaha ke nau ʻomi ha meʻa ʻoku lanu kulokula mo ha meʻa ʻoku lanu hinehina. Te ke lava ʻo fakaʻaliʻali ʻa e ʻū meʻa ko ʻení lolotonga hoʻomou lau fakataha ʻa e ʻĪsaia 1:16–18. ʻE lava leva ke vahevahe ʻe he toʻu tupú ʻi he ngaahi lea pē ʻanautolu ʻa e meʻa ʻoku nau ako mei he ngaahi veesi ko ʻení. (Vakai ki hono aleaʻi ʻe Sisitā Sharon Eubank ʻa e veesi 18 ʻi he “Ko Kalaisi ʻa e Maama ʻoku Ulo ʻi he Fakapoʻulí.”) Ko ha ngaahi ʻekitivitī kehe ʻeni ʻe niʻihi ʻe lava ke ne langaki ʻa e tui ki he mālohi ʻa e Fakamoʻuí ke ngaohi kitautolu ke tau maʻa fakalaumālié.

• ʻE ala tokoni ʻa hono toe vakaiʻi ʻo e ngaahi sīpinga mei he folofolá ki he fakatomalá ke langaki e tui ʻa kinautolu ʻokú ke akoʻí ʻe malava ʻe Sīsū Kalaisi ʻo ngaohi kinautolu ke nau maʻa fakalaumālie. Te ke lava ʻo hiki ʻi he palakipoé ʻa e ngaahi hingoa hangē ko e Saula (ne ui kimui ko Paulá), ʻAlamā ko e Siʻi, Sisolome, pea mo e kau ʻAnitai-Nīfai-Līhaí. Te ke lava foki ʻo hiki ha ongo kulupu fakamoʻoni fakafolofola ʻe ua: Ngāue 8:3; Mōsaia 27:8–10; ʻAlamā 11:21–23; ʻAlamā 17:12–15 (ko e kakai ʻeni ʻi honau tuʻunga faiangahalá) mo e Ngāue 9:13–20; ʻAlamā 36:17–24; ʻAlamā 15:5–12; ʻAlamā 23:6–12 (hili e tafoki ʻa e kakai ko ʻení ki he Fakamoʻuí mo fakatomalá). ʻE lava ke fakahoa ʻe he toʻu tupú ʻa e hingoa takitaha mo e ngaahi potufolofola ʻoku nau fakamatalaʻi ʻa e tokotaha ko iá. Ko e hā e meʻa naʻe fakahoko ʻe he kakai ko ʻení ke nau fakatomalá? Ko e hā e meʻa ʻoku akoʻi mai ʻe he ngaahi talanoa ko ʻení fekauʻaki mo e finangalo lelei ʻa e Fakamoʻuí ke fakamolemoleʻí? ʻOku tau sio nai ki ha sīpinga ʻe lava ke tau muimui ki ai?

• Ke tokoni ke mahino lelei ange kiate kinautolu ʻokú ke akoʻí ʻa e fakamolemoleʻi ʻo e angahalá, te ke lava ʻo ʻoange ki he tokotaha kotoa pē ha talanoa fakatātā ke nau ako. ʻE lava ke kau heni ʻa e foha maumau koloá (vakai, Luke 15:11–24); ko e Fakamoʻuí ko hotau Tauhisipí (palakalafi 5–8 ʻo e lea ʻa ʻEletā Dale G. Renlund “Ko Hotau Tauhisipi Leleí” [Liahona, Mē 2017, 29–32]); pea mo ha piano maumau (kamataʻanga ʻo e pōpoaki ʻa Sisitā Cristina B. Franco “Ko e Mālohi Faifakamoʻui ʻo Sīsū Kalaisí” [Liahona, Nōvema 2020, 60–62]). ʻE lava ke fakamatalaʻi fakanounou ʻe he toʻu tupú ʻa e talanoa fakatātā takitaha pea aleaʻi ʻa e meʻa ʻokú ne akoʻi fekauʻaki mo e ʻofá pea mo e mālohi faifakalelei ʻa e Fakamoʻuí.

• ʻOku tokoni ʻa e ongoʻi halaiá koeʻuhí kuo tau faiangahala pea ʻoku tataki ai kitautolu ki he fakatomalá. ʻOku ʻikai ʻaonga ʻa e ongoʻi loto-siʻí pe ongoʻi ʻoku ʻikai hato ʻaongá koeʻuhí ko ʻetau ngaahi angahalá pea ʻoku lava ke ne taʻofi ai kitautolu mei he fakatomalá. ʻE lava ke lau fakataha ʻe hoʻomou kalasí pe kōlomú ʻa e konga ʻoku ui ko e “Mamahi ʻoku Taau mo e ʻOtuá” ʻi he lea ʻa Palesiteni Dieter F. Uchtdorf ko e “Te Ke Lava ʻo Fai Ia he Taimí Ni!” (Liahona, Nōvema 2013, 55–57). Ko e hā e faikehekehe ʻo e mamahi koeʻuhí ko e angahalá ʻa ia ʻoku tataki ki he fakatomalá mei he mamahi ʻoku tataki ki he siva e ʻamanakí? (vakai foki, 2 Kolinitō 7:9–10; Molomona 2:12–14). Kapau ʻoku ongoʻi ʻe ha taha ʻoku lōmekina ia ʻe he ngaahi ongoʻi halaia mo e siva e ʻamanakí koeʻuhí ko ha faiangahala, ko e hā nai ha meʻa te tau lea ʻaki ke tokoniʻi ia ke ne tafoki ki he Fakamoʻuí? Fakaafeʻi e toʻu tupú ke nau vahevahe ʻenau fakamoʻoni ki he Fakamoʻuí mo ʻEne ʻaloʻofá.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Dallin H. Oaks, “Maʻa he Fakatomalá,” Liahona, Mē 2019, 91–94

Ko e Faiako ʻi he Founga ʻa e Fakamoʻuí

“Naʻe hanga ʻe he fakamoʻoni fakataautaha ʻa e Fakamoʻuí ʻo fakamahinoʻi mo fakapapauʻi ʻEne folofolá. … ʻI hoʻo [fakahoko] hoʻo fakamoʻoni ki he tokāteline moʻoní, ʻe fakapapauʻi atu ʻe he Laumālié ʻa hono moʻoni ʻo e tokāteliné ʻi he loto ʻo kinautolu ʻokú ke akoʻí” (Ko e Faiako ʻi he Founga ʻa e Fakamoʻuí, 21).