toʻu tupu ʻi tuʻa ʻi he temipalé

25 Sepitema

Ko e Hā Hotau Ngaahi Fatongia ʻi he Ngāue ʻo e Fakamoʻuí mo e Hākeakiʻí?

ʻĪsaia 40–49

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e meʻa naʻa tau aleaʻi ʻi he kalasi kuo ʻosí, pea ko e hā ʻa e ngaahi fakaafe pe ngāue naʻe fakahokó? Ko e hā kuo tau fakahoko ke ngāue ai ki he ngaahi fakaafe pe ngāue ko iá?

• Tokanga kiate kinautolu ʻoku faingataʻaʻiá. Ko e hā ha meʻa ʻe lava ke tau fakahoko pe lea ʻaki ke tokoni kiate kinautolu ʻoku ongoʻi tuenoa pe mamaʻo mei he Tamai Hēvaní?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi founga ʻe niʻihi ʻe lava ke tau tokoni ai ki he niʻihi kehé ke nau ongoʻi ʻa e ʻofa ʻa Sīsū Kalaisí?

• Fakatahaʻi ʻa e ngaahi fāmilí ke taʻengata. Ko e hā ha ngaahi fakakaukau te tau lava ʻo fevahevaheʻaki ke tokoni ke fakamālohia hotau ngaahi fāmilí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻOku mahino mei he ngaahi folofolá ko e tokoni ki he ngāue ʻa e ʻEikí ʻoku ʻikai maʻá e kakai lalahí pē. Naʻe kei tamasiʻi pē ʻa Samuela ʻi he taimi naʻe fuofua folofola ai ʻa e ʻEikí kiate iá. Naʻe hangē naʻe kei finemui pē ʻa Mele ʻi he taimi naʻe ʻaʻahi ai ha ʻāngelo kiate iá, ʻo fakahā te ne hoko ko e faʻē ʻa e Fakamoʻuí. Pea naʻe taʻu 14 pē ʻa Siosefa Sāmita ʻi he taimi naʻe uiuiʻi ai ia ʻe he ʻEikí ke ne fakafoki mai ʻa e ongoongoleleí. Naʻe fakaafeʻi ʻe Palesiteni Russell M. Nelson ʻa e kakai kei talavou kotoa pē ke nau “kau ki he kau tau kei talavou ʻa e ʻEikí ʻi hono tānaki fakataha ʻo ʻIsilelí” (“ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], ChurchofJesusChrist.org). Ko hono moʻoní, ko e taimi naʻe folofola ai ʻa e ʻEikí, “Ko koe, ʻe ʻIsileli, ko ʻeku tamaioʻeikí” (ʻĪsaia 41:8), naʻe kau heni ʻa Hono kakai kotoa pē ʻi he fuakavá, ʻo kau ai ʻa kinautolu ʻi hoʻo kalasí pe kōlomú.

Neongo ʻoku tau fuakava kotoa ʻi he taimi ʻoku tau papitaiso aí ke tauhi ki he ʻOtuá, ka ko e kakai kei talavou kotoa pē ʻoku ʻikai ke nau vakai kiate kinautolu ko ha kau tamaioʻeiki ʻa e ʻEikí. Mahalo ʻoku ʻikai ke nau ʻiloʻi ʻa e ngaahi founga makehe ʻe lava ke nau tokoni ai ki Heʻene ngāué. Fekumi ʻi he ngaahi potufolofola ʻi he ʻĪsaia 41–44 mo e konga 1.2 ʻo e Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa ia ʻe ala tokoni ke mahino ki he toʻu tupú ʻa hono ʻuhinga ke hoko ko e kau tamaioʻeiki/kaunanga ʻa e ʻEikí.

kau finemui ʻi tuʻa ʻi he temipalé

ʻOku malava ʻa e tokotaha kei talavou kotoa pē ke tokoni ki he ngāue ʻo e fakamoʻuí mo e hākeakiʻí.

Ako Fakataha

ʻE lava ke tokoni ʻa e ʻĪsaia 41–44 ke mahino ki he toʻu tupú ʻa e ʻuhinga ke hoko ko ha tamaioʻeiki ʻa e ʻEikí. Te ke lava ʻo hiki e ngaahi potufolofola hangē ko ʻení ʻi he palakipoé ke kamataʻi ha fealeaʻaki: ʻĪsaia 41:8–10; 42:6–7; 43:9–12; 44:21. ʻE lava ke fili ʻe he tokotaha takitaha ha potufolofola, lau ia, pea vahevahe ʻa e meʻa ʻokú ne ako fekauʻaki mo e ʻuhinga ʻo e hoko ko ha tamaioʻeiki ʻa e ʻEikí. Ko e hā ha ngaahi founga ʻoku tau hoko ai ko e kau tamaioʻeiki ʻa e ʻEikí? Ko e hā ha ngaahi tāpuaki ʻoku tau maʻu ʻi heʻetau fakahoko ʻEne ngāué? Ko ha ngaahi founga ʻeni ʻe niʻihi ke tokoniʻi ai ʻa kinautolu ʻokú ke akoʻí ke nau ʻomi e kakaí kia Kalaisi ʻi heʻenau kau fakamātoato ʻi Heʻene ngāué.

• ʻOku mahino nai kiate kinautolu ʻokú ke akoʻí ʻa e “ngāue ʻo e fakamoʻuí mo e hākeakiʻí”? Ke tokoniʻi kinautolú, te ke lava ʻo vahe ange ke nau ako (fakafoʻituitui pe fakakulupu iiki) ha taha ʻo e ngaahi konga ʻe fā ʻo e konga 1.2 ʻo e Tohi Tuʻutuʻuni Fakakātoá. ʻOku fakamatalaʻi ʻe he konga takitaha ha konga ʻo e ngāué. Kole ki he toʻu tupú ke nau fakalaulauloto ki he ngaahi fehuʻi hangē ko ʻení: Ko e hā ha ngaahi meʻa pau ʻe lava ʻe ha taha ʻi hoku toʻú ʻo fakahoko ke kau ai ʻi he konga ko ʻeni ʻo e ngāue ʻo e fakamoʻuí? Ko e hā ha meʻa ʻe lava ʻe heʻetau kalasí pe kōlomú ʻo fakahokó? ʻE lava ke vahevahe ʻe he tokotaha pe kulupu takitaha ʻa e meʻa ne nau akó, fakataha mo ha ngaahi tali ki he ngaahi fehuʻí.

• Mahalo naʻa ʻaonga kiate kinautolu ʻokú ke akoʻí ʻa hono ako lahi ange ʻa e ngaahi konga ʻe fā ʻo e ngāue ʻo e fakamoʻuí mo e hakeakiʻí—ʻa hono moʻui ʻaki e ongoongolelei ʻo Sīsū Kalaisí, tokangaʻi ʻa kinautolu ʻoku faingataʻaʻiá, fakaafeʻi ʻa e tokotaha kotoa pē ke nau maʻu ʻa e ongoongoleleí, pea mo hono fakatahaʻi e ngaahi fāmilí ke taʻengatá. ʻE lava ke nau fili ha konga ʻoku nau mālieʻia ai pea vakaiʻi ha niʻihi ʻo e ngaahi meʻa ʻoku fekauʻaki mo iá ʻi he “Ngaahi Maʻuʻanga Tokoni Poupoú.” Tuku ke vahevahe ʻe he toʻu tupú ʻa e meʻa ne nau maʻu ne ueʻi ai kinautolu ke ului lahi ange ki he ʻEikí pea tokoni ki he niʻihi kehé ke nau fakahoko ʻa e meʻa tatau. ʻE lava leva ke nau palani ke fakahoko ha meʻa ʻoku tokoni ke nau ikunaʻi ʻa e ngāue ko ʻení. ʻE lava ke tataki ʻe he palesiteni fakakalasí pe fakakōlomú ʻa e fealeaʻaki ko ʻení.

• Ke tokoni ki he toʻu tupú ke nau fakalaulauloto ki he founga ʻe lava ke nau fakaʻaongaʻi ai honau talēnití ke ʻomi e ngaahi laumālié kia Kalaisí, te ke lava ʻo kole ange ke nau takitaha ako ha konga ʻo e pōpoaki ʻa ʻEletā John C. Pingree Jr. ko e “ʻOku ʻi ai Haʻaku Ngāue Ke Ke Fai” (Liahona, Nōvema 2017, 32–35). ʻE lava ke nau vahevahe ʻa e founga ʻe ala tokoni ai ʻa e meʻa ne nau akó ki ha taha ʻoku veiveiua pe te ne lava koā ʻo tokoni ki he ngāue ʻa e ʻEikí. Te mou lava foki ʻo toe vakaiʻi fakataha ʻa e konga “ʻIloʻi pea Fakatupulaki e Ngaahi Meʻafoaki Fakalaumālié” ʻi he pōpoaki ʻa ʻEletā Pingilií. ʻOku tokoni fēfē nai ʻa e ʻEikí ke tau ʻiloʻi mo fakatupulaki hotau ngaahi talēnití?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Moʻui ʻaki e ongoongolelei ʻo Sīsū Kalaisí: 2 Nīfai 31:17–21; 3 Nīfai 27:13–21; “Following God” (vitiō), ChurchofJesusChrist.org

• Tokanga kiate kinautolu ʻoku faingataʻaʻiá: Mātiu 25:34–40; Mōsaia 18:8–9; “You Are the Gift” (vitiō), ChurchofJesusChrist.org

• Fakaafeʻi ʻa e tokotaha kotoa pē ke nau maʻu ʻa e ongoongoleleí: Mātiu 5:14–16; 1 Pita 3:15; “Vahevahe Hoʻo Ngaahi Tuí” (vitiō), ChurchofJesusChrist.org.

• Fakatahaʻi ʻa e ngaahi fāmilí ke taʻengata: Tokāteline mo e Ngaahi Fuakava 2; 128:18; “Because of James” (vitiō), ChurchofJesusChrist.org

Ko e Faiako ʻi he Founga ʻa e Fakamoʻuí

Kapau ʻe ongoʻi ʻe he toʻu tupú ʻokú ke falala ange kiate kinautolu, ʻe toe tupulaki ai ʻenau falala ki honau ivi fakalangí” (Ko e Faiako ʻi he Founga ʻa e Fakamoʻuí, 28).