Sīsū Kalaisi

9 ʻOkatopa

Ko e hā ʻOku Totonu ke Mahuʻinga Taha ai ʻa Sīsū Kalaisi ʻi Heʻeku Moʻuí?

ʻĪsaia 58–66

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, makehe mei he fealeaʻaki fekauʻaki mo e ngaahi fiemaʻu pau ʻa e kalasí pe kōlomú, ʻe lava ke mou aleaʻi ha ngaahi ongo fakalaumālie mo ha ngaahi kaveinga mei he konifelenisi lahí. ʻE lava ke tokoni atu e ngaahi fehuʻi ko ʻení.

• Ko e hā ha ngaahi kaveinga pe pōpoaki ne makehe kiate kitautolu? Ko e hā e meʻa naʻá ne fakamālohia ʻetau tui kia Sīsū Kalaisí?

• Ko e hā e meʻa naʻá ne fakamālohia ʻetau fakamoʻoni ki he kau palōfita moʻuí? Ko e hā ne tau ongoʻi ne ueʻi kitautolu ke tau fakahoko koeʻuhí ko e meʻa ne tau ako pe ongoʻí?

• Ko e hā ʻoku fie maʻu ke tau fakahoko ko ha kalasi pe kōlomu ke tau ngāueʻi ai e faleʻi ne tau fanongoa ʻi he konifelenisi lahí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

teach the doctrine icon

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Naʻe pehē ʻe ʻĪsaia, “Te u fiefia lahi ʻi [he ʻEikí], ʻe nekeneka hoku laumālié ʻi hoku ʻOtuá: he kuó ne fakakofu ʻaki au ʻa e kofu ʻo e fakamoʻuí, kuó ne ʻufiʻufi ʻaki au ʻa e kofu tōtōlofa ʻo e māʻoniʻoní” (ʻĪsaia 61:10). Ko e hā e ʻuhinga ʻokú ke “fiefia lahi ʻi he ʻEikí”? Hangē ko ʻĪsaiá, ko e taimi ʻoku tau ʻiloʻi ai ʻa e meʻa kuo fakahoko ʻe he ʻEikí maʻatautolú, ʻoku tau fiefia pea ʻoku tau faʻa lea ʻaki ʻa e “ngaahi ʻaloʻofa ʻa [e ʻEikí], mo e ngaahi fakamālō ʻa [e ʻEikí]” (ʻĪsaia 63:7).

Ko e hā e ongo ʻoku maʻu ʻe kinautolu ʻokú ke akoʻí fekauʻaki mo e Fakamoʻuí? Ko e hā ha meʻa ʻe ala tokoni kiate kinautolu ke nau ongoʻi ha ʻofa mo e ʻapasia lahi ange kiate Iá? Ko e hā ha meʻa ʻe ala tokoni kiate kinautolu ke nau ongoʻi ʻa ʻEne ʻofá? ʻI hoʻo fakalaulauloto ki he ngaahi fehuʻi ko ʻení mo lau ʻa e ʻĪsaia 58–66, te ke lava foki ʻo lau mo e pōpoaki ʻa Eletā Matthew S. Holland “Ko e Meʻafoaki Fakaʻofoʻofa ʻo e ʻAló” (Liahona, Nōvema 2020, 45–47) mo e pōpoaki ʻa Sisitā Cristina B. Franco “Ko e Mālohi Fai Fakamoʻui ʻo Sīsū Kalaisí” (Liahona, Nōvema 2020, 60–62).

finemui ʻokú ne ako e folofolá

ʻI heʻetau ako lahi ange kau ki he Fakamoʻuí, ʻoku ueʻi kitautolu ke tau fokotuʻu Ia ke hoko ko e uho ʻo ʻetau moʻuí.

Ako Fakataha

Ako mo e kau mēmipa ʻo e kalasí pe kōlomú fekauʻaki mo e misiona ne fekauʻi mai ʻa Sīsū Kalaisi ke Ne fakahokó, ʻe fakalotoa lahi ange ai kinautolu ke nau fokotuʻu ʻa e Fakamoʻuí ko e uho ʻo ʻenau moʻuí. Mahalo ʻe lava ke nau fekumi ʻi he ʻĪsaia 61:1–3 pea hiki ha lisi ʻi he palakipoé ʻo e meʻa naʻe pani ʻa e Fakamoʻuí ke Ne fakahokó (vakai foki, Luke 4:16–20). Naʻe fakahoko fēfē nai ʻe he Fakamoʻuí ʻa e ngaahi konga ko ʻeni ʻo Hono misioná? ʻOkú Ne fakahoko fēfē nai kinautolu ʻi heʻetau moʻuí ʻi he taimi ní? ʻE ala tokoni ʻa e ngaahi fakakaukau ko ʻení ki he kau mēmipa ʻo hoʻo kalasí pe kōlomú ke nau hoko atu ha fealeaʻaki fekauʻaki mo e ʻuhinga ʻoku totonu ke hoko ai ʻa Sīsū Kalaisi ko e uho ʻo ʻetau moʻuí.

• ʻOku ʻi ai maʻu pē ha ngaahi pōpoaki ʻi he konifelenisi lahí ʻoku fakamoʻoni kia Sīsū Kalaisi. Te ke lava ʻo fakaafeʻi e kau mēmipa ʻo e kalasí pe kōlomú ke nau vahevahe ha meʻa ne nau ako fekauʻaki mo e Fakamoʻuí ʻi he lolotonga e konifelenisi lahí. Poupouʻi ke nau vahevahe ʻa e ongo ʻoku nau maʻu fekauʻaki mo e Fakamoʻuí tuʻunga ʻi he meʻa ne nau akó.

• ʻE ala tokoni ʻa e folofolá ke mahino lelei ange ki he toʻu tupú ʻa e ʻuhinga ʻoku totonu ke hoko ai ʻa e Fakamoʻuí ko e ʻuho ʻo ʻenau moʻuí. Mahalo te ke fie tohi ʻi he palakipoé Ko e hā ʻoku totonu ke mahuʻinga taha ai ʻa Sīsū Kalaisi ʻi heʻeku moʻuí? Kole ki he toʻu tupú ke vahevahe ʻenau fakakaukaú. Te ke lava leva ʻo kole ange kiate kinautolu (fakafoʻituitui pe fakakulupu) ke nau fekumi ʻi he ngaahi folofola ʻi he “Maʻuʻanga Tokoni Poupoú” ke maʻu ha ngaahi tali lahi ange. Fakaafeʻi ʻa e toʻu tupú ke nau vahevahe ʻa e meʻa ne nau akó mo e ʻuhinga ʻoku ʻuhingamālie ai ia kiate kinautolú.

• Fakakaukau ke kole ange ki he niʻihi ʻokú ke akoʻí ke nau fakamatalaʻi ʻa e ʻaho mahuʻinga taha ʻo ʻenau moʻuí. Ko e hā nai ʻa e ʻaho mahuʻinga taha ʻi he hisitōliá? Fakaafeʻi ke nau fekumi ki he meʻa naʻe lea ʻaki ʻe ʻEletā Dieter F. Uchtdorf ko e ʻaho mahuʻinga tahá ʻi haʻanau lau ʻene pōpoakí ko e “Vakai ki he Tangatá!” (Liahona, Mē 2018, 107–10). Poupouʻi e toʻu tupú ke nau kumi e ngaahi tāpuaki ne talaʻofa ʻaki ʻe ʻEletā ʻUkitofa maʻanautolu ʻoku “vakai” kia Sīsū Kalaisí. ʻE lava foki ke nau vahevahe ʻa e meʻa ʻoku nau fakahokó ke fokotuʻu ʻa e Fakamoʻuí ke hoko ko e uho ʻo ʻenau moʻui fakaʻahó. Te ke lava ʻo poupouʻi ke nau fakakaukau ki ha meʻa te nau lava ʻo fakahoko ke ofi ange ai kia Sīsū Kalaisi mo fokotuʻu ha taumuʻa ke fakahoko ia.

• Kapau ʻe fehuʻi mai ʻe ha taha pe ko e hā e ʻuhinga ʻoku tau tui ai kia Sīsū Kalaisí, ko e hā nai haʻatau tali? Poupouʻi e toʻu tupú ke nau vahevahe ʻenau fakakaukaú pea hiki ia ʻi he palakipoé. Te ke lava foki ʻo fakaafeʻi kinautolu ke nau lau ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (ChurchofJesusChrist.org) pe “ʻE Lava ke Fakamaʻa Kitautolu mei he Angahalá ʻo Fakafou ʻia Sīsū Kalaisi” ʻi he vahe 3 ʻo e Malangaʻaki ʻEku Ongoongoleleí ([2004], 68–69). Poupouʻi ke nau fekumi ki ha ngaahi moʻoni mahinongofua te nau fie vahevahe ke fakamatalaʻi ʻa e ʻuhinga ʻoku mahuʻinga ai ʻa e Fakamoʻuí kiate kinautolú. ʻE lava ke nau tānaki ʻa e ngaahi moʻoni ne nau maʻú ki he lisi ʻi he palakipoé pea aleaʻi ʻa e founga ʻe lava ke nau vahevahe ai ʻa e ngaahi moʻoni ko ʻení mo e kakai ʻoku nau ʻiló.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Sione 8:12; 14:6; Loma 8:35–39; 2 Nīfai 2:3–9; 9:5–10; ʻAlamā 36:3, 27; 3 Nīfai 27:14–16, 27; ʻEta 12:27 (ʻUhinga ʻoku totonu ke hoko ai ʻa Sīsū Kalaisi ko e uho ʻo ʻetau moʻuí)

• Becky Craven, “Hokohoko atu ʻa e Liliú” (Liahona, Nōvema 2020, 58–60)

• “ʻOku Ou Tui Kia Kalaisi,” “ʻOku Fakaofo” (Ngaahi Himí, fika 66, 102)

Ko e Faiako ʻi he Founga ʻa e Fakamoʻuí

“Ko e tokotaha fakafoʻituitui kotoa pē ʻi hoʻo kalasí ko ha maʻuʻanga tokoni fungani ia ʻo e fakamoʻoní, ʻiló, mo e taukei ʻi hono moʻui ʻaki e ongoongoleleí. Fakaafeʻi kinautolu ke nau vahevahe atu pea mou felangakihakeʻaki” (Ko e Faiako ʻi he Founga ʻa e Fakamoʻuí, 5).