ako folofola fakafāmilí

23 ʻOkatopa

ʻOku Fokotuʻu Maʻu Nai ʻa e Ongoongoleleí ʻi Heʻeku Moʻuí?

Tohi ʻa e Palōfita ko Selemaia 30–33; 36; Ngaahi Tangilaulau ʻa Selemaia 1; 3

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e meʻa naʻa tau aleaʻi ʻi he kalasi kuo ʻosí, pea ko e hā ʻa e ngaahi fakaafe pe ngāue naʻe fakahokó? Ko e hā kuo tau fakahoko ke ngāue ai ki he ngaahi fakaafe pe ngāue ko ia ne vahe maí?

• Tokanga kiate kinautolu ʻoku faingataʻaʻiá. Ko e hā ha meʻa ʻe lava ke tau fakahoko pe lea ʻaki ke tokoni kiate kinautolu ʻoku ongoʻi tuenoa pe mamaʻo mei he Tamai Hēvaní?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi founga ʻe niʻihi ʻe lava ke tau tokoni ai ki he niʻihi kehé ke nau ongoʻi ʻa e ʻofa ʻa Sīsū Kalaisí?

• Fakatahaʻi ʻa e ngaahi fāmilí ke taʻengata. Ko e hā ha ngaahi fakakaukau te tau lava ʻo fevahevaheʻaki ke tokoni ke fakamālohia hotau fāmilí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Naʻe folofola ʻa e ʻEikí ki he palōfita ko Selemaiá te Ne tānaki ʻa ʻIsileli, ʻi he ngaahi ʻaho ʻi he kahaʻú, pea fakahoko ha “fuakava foʻou” mo Hono kakaí. Naʻá Ne folofola ʻo pehē, “Te u ʻai ʻeku fonó ki honau lotó, pea te u tohi ia ʻi honau laumālié; pea te u hoko ko honau ʻOtua, pea ʻe hoko ʻa kinautolu ko hoku kakai” (vakai, Tohi ʻa e Palōfita ko Selemaia 31:31–34). Ko e ngaahi ʻaho ko iá ko e ʻahó ni ia, pea ko e kakai kitautolu ʻa e ʻOtuá. ʻE lava ke ueʻi koe—pea mo kinautolu ʻokú ke akoʻí—ʻe he ngaahi akonaki ko ʻení ke ke fehuʻi, ʻOku ʻuhinga nai ki he hā ke tohi ʻa e ongoongoleleí ʻi hoku laumālié? ʻOku tohi nai ʻa e ongoongoleleí ʻi hoku laumālié? Kapau ʻoku ʻikai, ko e hā ha meʻa te u lava ʻo fakahoko ki aí?

Fakakaukau ki he founga te ke tokoniʻi ai e kau mēmipa ʻo hoʻo kalasí pe kōlomú ke nau fakalaulauloto ki he ngaahi fehuʻi ko ʻení. Ke teuteu ke faiakó, te ke lava ʻo maʻu ha ngaahi pōpoaki ke vahevahe mei he Tohi ʻa e Palōfita ko Selemaia 30–33; 36; mei he pōpoaki ʻa Palesiteni Russel M. Nelson “Tuku ke Lāngilangiʻia ʻa e ʻOtuá” (Liahona, Nōvema 2020, 92–95); pea mo e pōpoaki ʻa ʻEletā D. Todd Christofferson “When Thou Art Converted” (Liahona, May 2004, 11–13).

kau finemui ʻoku nau ako folofola

ʻI heʻetau ʻofa ʻi he ʻEikí pea fekumi ke ako ʻiate Iá, ʻe tohi ʻa e ongoongoleleí ʻi hotau laumālié.

Ako Fakataha

Poupouʻi ʻa e toʻu tupú ke nau aleaʻi ʻa e Tohi ʻa e Palōfita ko Selemaia 31:31–34. Ke fakahoko ʻení, te ke lava ʻo ʻoange ha ʻū laʻipepa kuo kosikosi ki he foʻi haati, pea hiki ai ha ngaahi fehuʻi fekauʻaki mo e ʻuhinga ke tohi ʻa e ongoongoleleí ʻi hotau laumālié, hangē ko ia ʻoku hā ʻi he “Teuteuʻi Fakalaumālie Koé.” ʻI he ngāue fakataautaha, ngāue mo ha hoa, pe fakakulupu iiki ʻa e toʻu tupú, ʻe lava ke nau lau ʻa e ngaahi veesi ko ʻeni mei he tohi ʻa e Palōfita ko Selemaiá pea fakalaulauloto ki he founga ʻe lava ke nau tali ai ʻa e ngaahi fehuʻí. Tuku ke nau vahevahe ʻenau ngaahi fehuʻí mo e ngaahi tali ne nau fakakaukau ki aí. ʻOku hā atu ʻi lalo ha ngaahi fakakaukau lahi ange ʻe ala tokoni ke ke akoʻi ki he toʻu tupú fekauʻaki mo e founga ʻe lava ke tohi ai ʻa e ongoongoleleí ʻi honau laumālié.

• ʻI he taimi naʻe fakahoko ai ʻe Mōsese ʻa ʻene ngaahi akonaki fakaʻosi ki he kakai ʻIsilelí, naʻá ne tapou ange ke nau maʻu ʻa e ngaahi folofola ʻa e ʻOtuá ʻi honau lotó. Naʻá ne akoʻi ange foki ha niʻihi ʻo e ngaahi founga ʻe lava ke nau fakahoko ai ʻení, ʻo hangē ko ia ʻoku hā ʻi he Teutalōnome 6:3–9. Lau fakataha mo e kalasí pe kōlomú ʻa e ngaahi veesi ko ʻení pea aleaʻi e ngaahi founga ʻe lava ke tau fakahoko ai ʻa e meʻa ne faleʻi mai ʻe Mōsesé.   ʻE lava foki ke ako ʻe hoʻo kalasí pe kōlomú ʻa e ʻAlamā 5:14, 26–35 ke ʻiloʻi ʻa e meʻa naʻe akoʻi ʻe ʻAlamā fekauʻaki mo e founga ʻe lava ke tau kei tohi ai ʻa e ongoongoleleí ʻi hotau laumālié.

• ʻI he pōpoaki ʻa ʻEletā D. Todd Christofferson ko e “When Thou Art Converted,” naʻá ne fakamatalaʻi ai ʻa e meʻa ʻe lava ke tau fakahoko ke tohi ʻa e ongoongoleleí ʻi hotau laumālié. Ko e hā ʻa e meʻa ʻoku tau ako mei he ʻuluaki palakalafi ʻe faá fekauʻaki mo e ʻuhinga ke tohi ʻa e ongoongoleleí ʻi hotau laumālié? Te ke lava ʻo fakaafeʻi ʻa e toʻu tupu takitaha ke nau lau ha palakalafi ʻe taha pe lahi ange ʻo e toengá ke fekumi ki he meʻa ʻe fie maʻu ke tau fakahoko kae lava ke hoko ʻení. Ko e hā e fatongia ʻoku fakahoko ʻe he Fakamoʻuí? Ko e hā leva hotau fatongia ʻo kitautolú? Poupouʻi e toʻu tupú ke nau vahevahe ʻenau ngaahi talí, fakataha mo ha ngaahi ʻilo kehe ne nau maʻu. Ko e hā ha ngaahi aʻusia kuó ne tokoniʻi kitautolu ke tau tohi ʻa e ongoongoleleí ʻi hotau laumālié? Ko e hā e fatongia ʻoku fakahoko ʻe hono tauhi ʻetau ngaahi fuakavá ʻi he meʻa ko ʻení?

• Naʻe fakamatalaʻi ʻe Palesiteni Russell M. Nelson ʻoku ʻuhinga ʻa e foʻi lea ʻIsileli “ko ha taha ʻoku loto-fiemālie ke tuku ke lāngilangiʻia ʻa e ʻOtuá ʻi heʻene moʻuí” (“Tuku ke Lāngilangiʻia ʻa e ʻOtuá,” 92). Te ke lava ʻo fakaafeʻi ʻa e toʻu tupú ke nau fekumi ʻi he ʻuluaki palakalafi ʻe ono ʻo e pōpoaki ʻa Palesiteni Nalesoní pea mo e konga fakaʻosi ʻo e pōpoakí ʻoku kamata ʻaki ʻa e “Ko e fehuʻi kiate kitautolú kotoa.” Kole ange ke nau fekumi ki ha meʻa ʻoku tokoni ke mahino kiate kinautolu ʻa e ʻuhinga ke “tuku ke lāngilangiʻia ʻa e ʻOtuá” ʻi heʻenau moʻuí. Ko e hā ʻetau ongó pea ʻoku tau fakafōtunga fēfē nai ʻi he taimi ʻoku tau tuku ai ke lāngilangiʻia ʻa e ʻOtuá ʻi heʻetau moʻuí? Ko e hā e meʻa naʻe akoʻi ʻe Palesiteni Nalesoni fekauʻaki mo e founga ʻoku liliu ai ʻe hono tohi ʻa e ongoongoleleí ʻi hotau laumālié ʻi heʻetau ngaahi feinga ke tānaki ʻa ʻIsilelí?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Henry B. Eyring, “Write upon My Heart” (Liahona, Nov. 2000, 85–87)

• Linda K. Burton, “Kuo Tohi Koā ʻi Hotau Lotó ʻa e Tui ki he Fakalelei ʻa Sīsū Kalaisí?” (Liahona, Nōvema 2012, 111–15)

Ko e Faiako ʻi he Founga ʻa e Fakamoʻuí

“ʻOku maʻu ʻe he tokāteline ʻi he folofolá mo e ngaahi lea ʻa e kau palōfita ʻi he ngaahi ʻaho kimui ní, ha mālohi ke liliu e lotó mo fakatupulaki ʻa e tuí. ʻI hoʻo feinga mo kinautolu ʻokú ke akoʻí ke ‘ʻahiʻahiʻi ʻa e ivi ʻo e folofola ʻa e ʻOtuá,’ te mou ʻiloʻi ai ʻokú ne maʻu ha ivi ke ‘takiakiʻi ʻa e kakaí ke [fakahoko] ʻa ia ʻoku totonú’ (ʻAlamā 31:5)” (Ko e Faiako ʻi he Founga ʻa e Fakamoʻuí, 5).