finemui ʻoku kata

8 Mē

Te U ʻIlo Fēfē Nai Kuo Fakamolemoleʻi Au ʻe he ʻEikí?

ʻEkesōtosi 35–40; Levitiko 1; 16; 19

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. ʻE tokoni fēfē nai ʻa e tafoki ki he ʻEikí ke tau matatali hotau ngaahi faingataʻá mo e ʻahiʻahí?

• Tokanga kiate kinautolu ʻoku faingataʻaʻiá. Ko hai ʻoku tau ʻiloʻi ʻokú ne fie maʻu ʻetau lotú mo e anga fakakaumeʻá?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi palani ke vahevahe ʻa e ongoongoleleí kuo aleaʻi ʻi he ngaahi fakataha alēlea fakauooti ʻa e toʻu tupú? ʻE kau atu fēfē nai ki ai ʻetau kalasí pe kōlomú?

• Fakatahaʻi ʻa e ngaahi fāmilí ke taʻengata. ʻE fakamālohia fēfē nai ʻe hono fakahoko ʻa e hisitōlia fakafāmilí ʻa hotau ngaahi vā fetuʻutaki mo e Tamai Hēvaní mo Sīsū Kalaisí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Ko e taimi ʻe niʻihi ʻoku fifili e kakaí pe ʻoku “feʻunga” nai ʻa e meʻa kuo nau fakahokó ke fakamolemoleʻi ai ʻenau ngaahi angahalá. Neongo ʻoku fie maʻu ke fakahoko ha ngāue kae lava ʻa e fakatomalá, ka ko hono moʻoní ʻoku ʻikai fakamolemoleʻi kitautolu koeʻuhí ʻoku tau fakakakato ha lisi ngāue pe fakahoko ha ngāue pau. ʻOku fakamolemoleʻi kitautolú ʻi heʻetau tali ʻa e ʻaloʻofa ʻoku ʻomi ʻe Sīsū Kalaisí. ʻOku makatuʻunga ʻi he founga ko ʻení ʻa e malava ke liliu hotau natulá.

ʻI he kuonga muʻá, naʻe tataki ʻe he ngaahi ouau mo e feilaulau ʻo e fono ʻa Mōsesé ʻa e kakai ʻIsilelí ki he Fakalelei ʻa e Fakamoʻuí. Hangē ko ia ne folofola ʻe he ʻEikí ʻi he Levitiko 16:30, “ʻE fai ʻe he taulaʻeikí ke fakalelei maʻamoutolu, ke fakamaʻa ʻa kimoutolu, koeʻuhi ke mou maʻa mei hoʻomou ngaahi angahalá ʻi he ʻao ʻo [e ʻEikí].” Ko hono moʻoní, he ʻikai lava ʻe hono fakahoko pē ha ouaú ke fakamolemoleʻi ai ʻetau angahalá. ʻOku maʻu ʻa e fakamolemolé meia Sīsū Kalaisi. ʻI hotau kuongá, ʻoku hoko ʻa e ngaahi ouau hangē ko e papitaisó mo e sākalamēnití ke tataki ai ʻetau fakakaukaú mo e lotó ki he Fakamoʻuí. ʻOku tokoni ia ke mahino kiate kitautolu te Ne fakamolemoleʻi maʻu pē kitautolu ʻi heʻetau fakatomalá.

Kuo tokoniʻi fēfē nai koe ʻe he Tamai Hēvaní ke ke ʻiloʻi kuo fakamolemoleʻi koe? Te ke lava ʻo ako ʻa e Mōsaia 4:1–3 mo e pōpoaki ʻa Palesiteni Tad R. Callister “Ko e Fakalelei ʻa Sīsū Kalaisí” (Liahona, Mē 2019, 85–87). ʻE ala tokoni ʻa e pōpoaki ko ʻení ke mahino ki he niʻihi ʻokú ke akoʻí ʻoku fakamolemole ʻe he Tamai Hēvaní kitautolu ʻi he taimi ʻoku tau fakatomala aí.

tokotaha kei siʻi ʻoku lotu

ʻOku fakamolemoleʻi kitautolú ʻi heʻetau tali ʻa e ʻaloʻofa ʻoku ʻomi ʻe Sīsū Kalaisí.

Ako Fakataha

Te ke lava ʻo kamata ʻaki hano fakaʻaliʻali ʻa e ongo fakatātā ʻo e Fakamoʻuí ʻi Ketisemaní mo e funga kolosí (vakai, Tohi Fakatātā ʻo e Ongoongoleleí, fika 56–57). Fakaafeʻi e toʻu tupú ke nau fekumi ʻi he Levitiko 1:1–9; 16:15–16, 30. Kole ange ke nau vahevahe ha ngaahi kupuʻi lea ʻoku fakamanatu ange kiate kinautolu e Fakalelei ʻa e Fakamoʻuí. Naʻe tokoni fēfē nai ʻa e ngaahi feilaulau naʻe fakamatalaʻi ʻi he ngaahi veesi ko ʻení ki he kakai ʻIsilelí ke nau hanganaki atu ki he Fakalelei ʻa e Fakamoʻuí? Ko e hā e meʻa ʻoku tokoni kiate kitautolu ke manatuʻi e Fakalelei ʻa e Fakamoʻuí? Ko e hā e meʻa ʻokú ne tokoniʻi kitautolu ke tau ongoʻi e ʻofa mo e fakamolemole ʻa e Fakamoʻuí? ʻE ala tokoni ʻa e ngaahi ʻekitivitī ko ʻení ke mahino lelei ange ki he toʻu tupú ʻe fakamolemoleʻi kitautolu ʻe he ʻOtuá.

• Naʻe fakamatalaʻi ʻe ha kakai tokolahi ʻi he folofolá ʻa e ongo ne nau maʻu ʻi he taimi ne fakamolemoleʻi ai kinautolu ʻe he Tamai Hēvaní. ʻE lava ke lau ʻe he kau mēmipa hoʻo kalasí pe kōlomú ha ngaahi sīpinga ʻe niʻihi (vakai, “Ngaahi Maʻuʻanga Tokoni Poupoú”). Fakaafeʻi ke nau lisi ha ngaahi kupuʻi lea mei he ngaahi veesi ko ʻení ʻokú ne fakamatalaʻi ʻa e ongo ʻoku maʻu ʻi hono fakamolemoleʻí. Te ke lava ʻo kole ange ke nau fakamatalaʻi ʻi heʻenau lea pē ʻanautolú ʻa ʻenau ongoʻi ki he fakamolemoleʻí. Ko e hā ha meʻa te tau lava ʻo ako fekauʻaki mo e ʻOtuá mei he ngaahi ongo ko ʻení? Mahalo te ke lava ʻo vahevahe hoʻo ngaahi ongo fekauʻaki mo e fakamolemoleʻí.

• Ko e taimi ʻe niʻihi ʻoku ʻikai fakapapauʻi ʻe he kakaí pe kuo fakamolemoleʻi nai kinautolu he ʻoku ʻikai ke nau fakapapauʻi pe kuo nau fakatomala moʻoni nai. ʻOku fakamatalaʻi ʻe he pōpoaki ʻa ʻEletā Dale G. Renlund ko e “Fakatomalá: Ko ha Fili Fakafiefia” ʻa e founga ke fakatomala moʻoni ai pea maʻu e fakamolemole ʻa e ʻOtuá (Liahona, Nōvema 2016, 121–24). Te ke lava ʻo hiki ʻi he palakipoé ʻa e ongo ʻuluʻitohi ko e Fakatomala Moʻoní mo e Ngaahi Meʻa ʻOkú Ne Fakafeʻātungiaʻi e Fakatomalá. Kole ki he niʻihi ʻokú ke akoʻí ke nau fekumi ki he ngaahi akonaki ʻi he pōpoakí ʻoku kaunga ki he ongo ʻuluʻitohí. Ko e hā ʻoku tau ako fekauʻaki mo e Fakamoʻuí mo ʻEne fakamolemolé mei he palakalafi fakaʻosi ʻe tolu ʻo e pōpoaki ko ʻení?

• ʻOku ʻi ai ha kakai ʻe niʻihi kuo nau fakatomala ka ʻoku ʻikai ke nau ongoʻi kuo fakamolemoleʻi kinautolu. ʻE lava ke hoko ʻeni koeʻuhí he ʻoku teʻeki ke nau fakamolemoleʻi kinautolu. ʻE ala tokoni ʻa e faleʻi ʻi he pōpoaki ʻa Palesiteni Tad R. Callister “Ko e Fakalelei ʻa Sīsū Kalaisí” kiate kinautolu. ʻE lava ke lau ʻe hoʻo kalasí pe kōlomú ʻa e konga ʻoku kamata ʻaki ʻa e “2. Angahalá.” Kole ange ke nau fekumi ki ha faleʻi ʻe lava ke nau vahevahe mo ha kaungāmeʻa pe mēmipa ʻo e fāmilí ʻoku kei ongoʻi halaia ʻi he hili ʻa e fakatomalá. Tuku ha taimi maʻá e toʻu tupú ke nau vahevahe ʻenau ngaahi ongo fekauʻaki mo e Fakamoʻuí, ʻa ia naʻá Ne ʻai ke malava ʻa e fakatomalá mo e fakamolemolé maʻatautolú.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• ʻĪnosi 1:1–8; Mōsaia 4:1–3; ʻAlamā 24:7–10; 36:17–21 (Ko e ongo ne maʻu ʻe he kakaí ʻi he taimi ne fakamolemoleʻi ai kinautolú)

• ʻĪsaia 1:18; Mōsaia 26:30; Molonai 6:8; Tokāteline mo e Ngaahi Fuakava 58:42–43; 64:10 (ʻOku palōmesi ʻa e ʻEikí te Ne fakamolemoleʻi kitautolu)

• Russell M. Nelson, “Te Tau Lava ʻo Fai Lelei Ange pea Toe Lelei Ange,” Liahona, Mē 2019, 67–69

• Craig A. Cardon, “ʻOku Finangalo ʻa e Fakamoʻuí ke Fakamolemole,” Liahona, Mē 2013, 15–18

Ko e Faiako ʻi he Founga ʻa e Fakamoʻuí

Kuo akoʻi mai ʻe he Fakamoʻuí ke tau fakaʻaongaʻi e folofolá ke maʻu ai e ngaahi tali ki heʻetau ngaahi fehuʻí. Te ke tokoniʻi fēfē nai ʻa e niʻihi ʻokú ke akoʻí ke nau vakai ki he folofolá mo e ngaahi lea ʻa e kau palōfitá ʻi heʻenau fekumi ki ha ngaahi talí?