« ថ្ងៃទី ១២ ខែ មិថុនា ។ តើខ្ញុំឮសំឡេងរបស់ព្រះអម្ចាស់យ៉ាងដូចម្តេច ? នាងរស់; សាំយូអែល ទី១ ១–៣ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២ ( ឆ្នាំ ២០២១ )
« ថ្ងៃទី ១២ ខែ មិថុនា ។ តើខ្ញុំឮសំឡេងរបស់ព្រះអម្ចាស់យ៉ាងដូចម្តេច ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២
ថ្ងៃទី ១២ ខែ មិថុនា
តើខ្ញុំឮសំឡេងរបស់ព្រះអម្ចាស់យ៉ាងដូចម្តេច ?
ប្រឹក្សាជាមួយគ្នា
ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬគណៈប្រធានថ្នាក់ មានរយៈពេល ១០–២០ នាទី
នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ បន្ទាប់មកសូមដឹកនាំការពិភាក្សាមួយអំពីកិច្ចការនៃសេចក្តីសង្រ្គោះ និងភាពតម្កើងឡើង ដោយប្រើសំណួរមួយ ឬច្រើនដូចខាងក្រោម ឬ សំណួររបស់បងប្អូនផ្ទាល់ ( សូមមើល ក្បួនខ្នាតទូទៅ ១០.២, ១១.២, នៅលើគេហទំព័រ ChurchofJesusChrist.org ) ។ ដាក់ផែនការដើម្បីអនុវត្តតាមអ្វីដែលបងប្អូនពិភាក្សា ។
-
រស់នៅតាមដំណឹងល្អ ។ តើបទពិសោធន៍ថ្មីៗអ្វីខ្លះដែលបានពង្រឹងទីបន្ទាល់របស់យើង ?
-
ការមើលថែដល់អ្នកដែលត្រូវការជំនួយ ។ តើមាននរណាម្នាក់ត្រូវការជំនួយ និងការអធិស្ឋានរបស់យើងដែរឬទេ ? តើយើងមានចំណាប់អារម្មណ៍ដើម្បីជួយពួកគេយ៉ាងណា ?
-
ការអញ្ជើញមនុស្សទាំងអស់ឲ្យទទួលយកដំណឹងល្អ ។ តើយើងអាចក្លាយជាពន្លឺបំភ្លឺដល់សមាជិកគ្រួសារ ឬមិត្តភក្តិដែលពុំមានសេចក្តីជំនឿដូចយើងយ៉ាងដូចម្តេច ?
-
រួបរួមក្រុមគ្រួសារសម្រាប់ភាពអស់កល្បភាពអស់កល្បជានិច្ច ។ តើយើងអាចបង្ហាញសេចក្ដីស្រឡាញ់ និងការគាំទ្រកាន់តែច្រើនចំពោះក្រុមគ្រួសាររបស់យើង និងធ្វើឲ្យមានភាពខុសប្លែកដ៏វិជ្ជមាននៅក្នុងផ្ទះយើងយ៉ាងដូចម្តេច ?
នៅចុងបញ្ចប់នៃមេរៀននេះ សូមធ្វើនូវអ្វីដែលត្រឹមត្រូវដូចខាងក្រោមនេះ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬជាយុវវ័យម្នាក់ មានរយៈពេល ២៥–៣៥ នាទី
រៀបចំខ្លួនខាងវិញ្ញាណ
សមាជិកជាច្រើននៅក្នុងថ្នាក់ ឬកូរ៉ុមរបស់បងប្អូនប្រហែលជាអាចប្រៀបធៀបទៅនឹងក្មេងប្រុសសាំយូអែល ។ នៅពេលដែលព្រះអម្ចាស់មានព្រះបន្ទូលមកកាន់គាត់ សាំយូអែលមិនទាន់មានបទពិសោធន៍គ្រប់គ្រាន់ជាមួយនឹងវិវរណៈ ដើម្បីស្គាល់ព្រះសូរសៀងរបស់ព្រះអម្ចាស់នោះទេ ។ អ្នកប្រៀនប្រដៅរបស់សាំយូអែលគឺ អេលី អាចជួយសាំយូអែលឲ្យរៀនស្គាល់ព្រះសូរសៀងនេះ ។ បងប្អូនក៏ដូចជាអេលី ដែរ មានឱកាសថ្លែងទីបន្ទាល់ដល់អ្នកដែលបងប្អូនបង្រៀនថា ព្រះអម្ចាស់ចង់មានព្រះបន្ទូលជាមួយពួកគេ ។ បងប្អូនអាចជួយពួកគេឲ្យរៀនស្គាល់ព្រះសូរសៀងរបស់ព្រះអម្ចាស់ សូម្បីតែបងប្អូនក៏កំពុងរៀនស្តាប់ព្រះសូរសៀងរបស់ទ្រង់ដែរ ។ បងប្អូនអាចសិក្សាជាមួយគ្នានូវអ្វីដែលពួកព្យាការីរបស់ទ្រង់បានបង្រៀនអំពីវិវរណៈផ្ទាល់ខ្លួន ។ ហើយបងប្អូនអាចរៀនទូលទៅកាន់ព្រះអម្ចាស់ដូចជាសាំយូអែល បានធ្វើ « សូមទ្រង់មានបន្ទូលមកចុះ ដ្បិតទូលបង្គំជាអ្នកបម្រើទ្រង់ប្រុងស្ដាប់ហើយ » ( សាំយូអែល ទី១ ៣:១០ ) ។
ជាការបន្ថែមលើការអាន សាំយូអែល ទី១ ៣ នៅសប្តាហ៍នេះ បងប្អូនអាចរៀបចំខ្លួនដើម្បីបង្រៀនតាមរយៈការអានសារលិខិតរបស់ប្រធាន រ័សុល អិម ណិលសុន « ស្តាប់ទ្រង់ » ( Liahona ខែ ឧសភា ឆ្នាំ ២០២០ ទំព័រ ៨៨–៩២ ) ។
ប្រធាន ណិលសុន បានសូមឲ្យយើង « បង្កើនលទ្ធភាពខាងវិញ្ញាណ [ របស់យើង ] ដើម្បីទទួលវិវរណៈ » ។
រៀនជាមួយគ្នា
ដើម្បីរៀបចំអ្នកដែលបងប្អូនបង្រៀនសម្រាប់ការពិភាក្សាថ្ងៃនេះ សូមពិចារណាឲ្យពួកគេមើល សាំយូអែល ទី១ ៣:១–១៤ ។ សូមអញ្ជើញពួកគេឲ្យចែកចាយអ្វីដែលពួកគេរៀនចេញពីដំណើររឿងនេះអំពីការស្តាប់ព្រះសូរសៀងរបស់ព្រះអម្ចាស់ ។ តើមានវិធីបន្ថែមណាខ្លះដែលព្រះអម្ចាស់ទំនាក់ទំនងជាមួយយើង ? សកម្មភាពខាងក្រោមនេះអាចជួយយុវវ័យឲ្យពង្រីកការយល់ដឹងរបស់ពួកគេពីវិវរណៈផ្ទាល់ខ្លួន ។
-
ទាំងនេះគឺជាវិធីមួយដើម្បីជួយអស់អ្នកដែលបងប្អូនបង្រៀន ឲ្យយល់ពីរបៀបទទួលវិររណៈផ្ទាល់ខ្លួន ។ បងប្អូនអាចសរសេរនៅលើក្ដារខៀននូវសេចក្តីយោងបទគម្ពីរនៅក្នុង « ធនធានគាំទ្រ » ( ឬអ្នកដទៃទៀតដែលបងប្អូនស្គាល់ ) ។ សូមអញ្ជើញយុវវ័យឲ្យអានបទគម្ពីរនីមួយៗ ។ បន្ទាប់មក ពួកគេអាចសរសេរនៅលើក្ដារខៀនក្បែរសេចក្តីយោងនីមួយៗនូវអ្វីដែលបទគម្ពីរបង្រៀនអំពីការទទួលវិវរណៈផ្ទាល់ខ្លួន ។ សូមអញ្ជើញពួកគេចែកចាយបទពិសោធន៍ដែលពួកគេមានជាមួយការស្វែងរក និងទទួលវិវរណៈ ។ តាមការសមរម្យ សូមចែកចាយបទពិសោធន៍ផ្ទាល់ខ្លួនរបស់បងប្អូន ។
-
យើងទទួលបានពរជ័យជាច្រើន នៅពេលយើងរៀនស្តាប់ព្រះសូរសៀងរបស់ព្រះអម្ចាស់ ។ បងប្អូនអាចចាប់ផ្តើមការពិភាក្សាមួយអំពីការណ៍នេះតាមរយៈការសូមឲ្យយុវវ័យចែកចាយមូលហេតុនានាដែលពួកគេអាចត្រូវការវិវរណៈ ។ បន្ទាប់មក សូមឲ្យពួកគេស្វែងរកសារលិខិតរបស់ប្រធាន រ័សុល អិម ណិលសុន « ស្តាប់ទ្រង់ » ។ សូមអញ្ជើញពួកគេឲ្យរកមើលដំបូន្មានដែលជួយពួកគេឲ្យយល់ពីរបៀបស្តាប់ព្រះសូរសៀងរបស់ព្រះអម្ចាស់ ។ បងប្អូនក៏អាចបង្ហាញវីដេអូមួយ ឬច្រើនចេញពីវីដេអូ « ស្តាប់ទ្រង់ » ( នៅលើគេហទំព័រChurchofJesusChrist.org/media ) ។ ហេតុអ្វីវាមានសារៈសំខាន់ចំពោះយើងក្នុងការរៀនស្តាប់ព្រះសូរសៀងរបស់ព្រះអម្ចាស់ ? សូមលើកទឹកចិត្តយុវវ័យឲ្យកត់ត្រាអ្វីដែលពួកគេបានរៀននៅក្នុងទិនានុប្បវត្តិរបស់ពួកគេ ឬនៅលើក្រដាសដើម្បីតាំងនៅក្នុងផ្ទះរបស់ពួកគេ ។
-
យុវវ័យដែលបងប្អូនបង្រៀនប្រហែលជាងឿងឆ្ងល់ពីរបៀបដើម្បីដឹងថាតើនៅពេលណាដែលព្រះវិញ្ញាណបរិសុទ្ធកំពុងតែមានព្រះបន្ទូលទៅកាន់ពួកគេ ។ សូមពិចារណាបង្ហាញវីដេអូនេះ « How Can I Tell the Difference between the Holy Ghost and My Emotions? » និង « How Can I Feel the Holy Ghost More Often? » មកពី « Face to Face with President Eyring and Elder Holland » ( នៅលើគេហទំព័រChurchofJesusChrist.org ) ។ តើយើងរៀនអ្វីខ្លះមកពីវីដេអូទាំងនេះ អំពីការដឹងរវាងការបំផុសរបស់ព្រះវិញ្ញាណ និងគំនិតរបស់យើង ? សមាជិកក្នុងថ្នាក់ ឬកូរ៉ុមអាចចែកចាយនូវរបៀបដែលពួកគេនឹងឆ្លើយតបចំពោះមិត្តម្នាក់ដែលមានសំណួរស្រដៀងនឹងសំណួរដែលបានពិភាក្សានៅក្នុងវីដេអូទាំងនេះ ។
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ធនធានគាំទ្រ
-
ពង្សាវតាក្សត្រ ទី ១ ១៩:៩–១២; ហេលេមិន ៥:២៩–៣១; គោលលទ្ធិ និងសេចក្ដីសញ្ញា ៦:១៤–១៦, ២១–២៣; ៨:២–៣; ១១:១២–១៤ ( របៀបដែលព្រះអម្ចាស់មានព្រះបន្ទូលមកកាន់យើង )
-
គោលលទ្ធិ និង សេចក្តីសញ្ញា ៩:៧–៩ ( វិវរណៈតម្រូវឲ្យមានគំនិត ពិចារណា និងការសិក្សារបស់យើងផ្ទាល់ )
-
រ៉ូណល អេ រ៉ាសបាន « Let the Holy Spirit Guide » Liahona ខែ ឧសភា ឆ្នាំ ២០១៧ ទំព័រ ៩៣–៩៦
-
ប្រធាន រ័សុល អិម ណិលសុន បានបង្រៀនថា « នៅគ្រាខាងមុខ វានឹងមិនអាចរស់រានខាងវិញ្ញាណបានឡើយ បើគ្មានការណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ ។ បងប្អូនប្រុសស្រីជាទីស្រឡាញ់របស់ខ្ញុំ ខ្ញុំសូមអង្វរជាមួយបងប្អូនឲ្យបង្កើនសមត្ថភាពខាងវិញ្ញាណរបស់បងប្អូនដើម្បីទទួលវិវរណៈ » ( « Revelation for the Church, Revelation for Our Lives » Liahona ខែ ឧសភា ឆ្នាំ ២០១៨ ទំព័រ ៩៦ ) ។