Aokati 28

E na Kanga te Tia Kamaiu ni Kona ni Buokai n Au Tai ni Kataaki?

Taian Areru 102–103; 110; 116–119; 127–128; 135–139; 146–150

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Tera taneiai aika tibwa riki ae a tia ni uotiira ni kaniira riki nakon Tamara are i Karawa ao Iesu Kristo?

• Tararuakiia naake iai kainnanoia. Iai temanna ae a tibwa mwaing nakon ara uoote ke ni kaina te Ekaretia? Ti na kangaa ni buokiia n namakinna ae a butimwaeaki?

• Kaoia ni kabane bwa ana karekea te euangkerio. Tera waaki ni kakukurei aika iaon kawaia ake ti kona iai ni kaoia raoraora bwa a na iria?

• Katiteuanakiia utu ibukin te maiu ae akea tokina. Tera kekeiaki aika ti kona ni karaoi ni korei iai rongorongora?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Kakaewenako aika ti kona ni kaitarai a kona n anganiira namakinan te kua, te aki kukurei, te konaki, ao te maroa. Taan koroboki n Taian Areru atai namakin aikanne ao a kamatatai n ae korakora: “E oreaki nanou, n ai aron te uteute; … I kariaria, ao I riki n ai aron te tibaaro ae mena n tingaia i aon akun te auti” (Taian Areru 102:4, 7). Ma te mwaaka ae tau, a kakoaua ae te rairaki nakon te Tia Kamaiu e na karekea te kamaiuaki: “Karaoiroa Iehova, tamneiu, Ao tai manuoki ana akoi ni kabane: ae kabwarai am bure ni kabane; ae kaboa maium man te mate; ae bauniko n te atataiaomata ma te nanoanga” (Taian Areru 103:2–4).

Iangoi taekan kakabwaia aika a na roko nakoia kaain am kiraati ke te kooram ngkana a ata raoi aron te Tia Kamaiu ni buokiia inanon aia tai ni kataki. E kanga te Tia Kamaiu n tia ni buokiko? Ngkana ko katauraoi n angareirei, ko na rinanon ana rongorongo Beretitenti Henry B. Eyring “Kataaki, Kakoauaaki, ao Kanakoraoaki” (Riaona, Nobembwa. 2020, 96–99) ao “Adversity” in Gospel Topics (topics.ChurchofJesusChrist.org).

Te Tia Kamaiu e na buokiira ao ni kabebeteira man katakira.

Te Uaia n Reirei

Ko na bae ni moanna man tuangakiia kaain te kiraati ke te kooram bwa a na rinanon Taian Areru 102, 103, ao 116, ni kakaea bwa e kanga te Tia Kamaiu ni buokira n ara kekeiaki n tokanikai iaon katakira. A kona ni mwakuri bon irouia ke inanon te kurubu ni koroi tabeua tiententi iaon te bwai ae a kunei ao n tibwaua te bwai ae a koroia. Rinea teuana ke e raka riki man waaki ni kakukurei aikai ni buokiia ni kaotaia raoi riki n atuun te reirei aei.

• Anene a kona ni kaoa te Tamnei ao n anga reirei iaon te reirei n te anga ae kai uringaki. Iangoia n rinanon te anene iaon ana ibuobuoki te Tia Kamaiu ni katakira, n aron “Ai Matoara Nanoia” (Boki n Anene, nambwa 85). Tera ae reirei te anene n ana ibuobuoki te Tia Kamaiu ae kona n anganiira? A kona ngkanne kairake n rinanon kibu n taeka man booki aika tabu inanon “Reitan Bwaai n Mwakuri.” A kona n uringnga man rawean taekana man te boki n anene ke teuana man booki aika tabu are e kauringiia n ukoukora te Tia Kamaiu n aia tai ni kataaki.

• Ana rongorongo Beretitenti Henry B. Eyring “Kataaki, Kakoauaaki, ao Kanakoraoaki” e kona ni buokiia naake ko reireiniia n atai titiraki n aron aikai: Tera kantaninga tabeua ibukin katakira n te maiu ae mamate? E na kanga te Tia Kamaiu ni buokiira ma ara kakaewenako? Tera ae ti kona ni karaoia ae ti na tekeraoi iai man a na ibuobuoki ao mwakan te Tia Kamaiu? Iangoia ni koroi titiraki aikai iaon te burakibooti. A kona kaain te kiraati ke te kooram ni kakaei kaeka inanon ana rongorongo Beretitenti Eyring. Te katooto, tera ae ti reiakinna man ana karaki tinan Beretitenti Eyring ni moan ao ni banen te rongorongo? Ko na bae n tuangiia aomata n tatabemaniia bwa a na iangoia bwa a na kanga ni karaoi bwaai aika a reiakin ni karaoi n aia tai ni kataki. Tabeman kairake iai nanoia ni kan tibwauai aia iango.

• Titita Lisa L. Harkness e kabotaua ana rongorongo te Tia Kamaiu ni katoka te angibuaka n reirei ae E kona ni katoka te ang buaka inanon maiura (taraa Mareko 4:35–41; “Raoi, Bwaaka,” Liahona, Nobembwa 2020, 80–82). Ko na bae ni kaoia kaain te kiraati ke te kooram bwa a na roko n tibwaua te bwai ae e a tia neienne ke teuanne n reiakinna ibukin te Tia Kamaiu man rongorongon booki aika tabu. E kona naba te aomata aei ni kaota te tamnei (taraa Gospel Art Book, nambwa 40). A kona ngkanne kairake n rinanon te bwai ae reirei Titita Harkness bwa e kanga te Tia Kamaiu “ni mena inanon ara booti” ngkana ti kaitara ma kakaewenako. Ko na bae n intawiu ma ngaia n tatabemaniia nako n tibwauaia bwa e kanga te Tia Kamaiu n tia ni buokiia ni katakiia, n raonaki ma E kanga n tia ni buokiia rinanoia aomata tabeman. Kaungaia kairake bwa a na tibwaua aia taneiai ma temanna ae a ataia ae kainnanoa ana karaunano te Tia Kamaiu.

Karaoia ma te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Itaia 53:3–5; Ebera 2:17–18; Aramwa 7:11–13; 36:3; Ita 12:27 (E na buokira te Tia Kamaiu ni katakira)

• Dieter F. Uchtdorf, “Te Atua E na Karaoa te Bwai Teuana ae Kangaanga Iangoana,” Riaona, Nobembwa 2020, 51–54

• Cristina B. Franco, “Mwaakan Iesu Kristo ni Kamaiu,” Riaona, Nobembwa. 2020, 60–62

• “Mountains to Climb” (witeo), ChurchofJesusChrist.org

Reirei n ana Kawai te Tia Kamaiu

“Kanakoan te titiraki are e kaungaia taan reiakinaki ni kaota aia koaua n te reirei ake a reiakinaki e kona n riki bwa te kawai ae mwaakaroiroi ni kaoa te Tamnei. … Aia koaua—ao aia kakoaua ake tabeman n te kiraati—e na rikirake ngkai te Tamnei e kaota koauan te koaua” (Reirei n Ana Kawai te Tia Kamaiu,32).