Aokati 14

N na Kanga ni Kunea te Kimwareirei man Irakin te Tia Kamaiu?

Taian Areru 1–2; 8; 19–33; 40; 46

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Ti na kanga ni kunea te kimwareirei n irakin Iesu Kristo?

• Tararuakiia naake iai kainnanoia. Antai n ara uoote ke n te komiuniti aika a kainnanoa ara ibuobuoki? Ti na kanga ni buokiia?

• Kaoia ni kabane bwa ana karekea te euangkerio. Ti na kanga n ibuobuoki imarenara ni katauraoi ibukin te mwakuri ni mitinare?

• Katiteuanakiia utu ibukin te maiu ae akea tokina. Ti na kanga n anga ara ibuobuoki nakon ana mwakuri ara uoote ni karaoate kateiriki n rongorongon te utu ao te mwakuri n tembora?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Tera ae e uota te kimwareirei nakoim? A kona aomata n taekinna bwa a kunea te kimwareirei ma raoraoia ao aia utu, te katei ae a tatangiria, ke ti tebongina n akea te kataaki. E reirei Beretitenti Nelson: “Te kimwareirei are ti namakinna e aki irekereke ma te bwai are ti rinanona ni maiura ma ti man bwaai ni kabane ake ti kabotoi maiura iaona. “Ngkana e boboto maiura iaon ana babaire ni kamaiu te Atua … ao Iesu Kristo ao Ana euangkerio, ti kona n namakina te kimwareirei n aki tabe ma bwaai aika a riki—ke ake aki riki—inanon maiura. E roko te kimwareirei mai irouna ao Ibukina” (“Joy and Spiritual Survival,” Liahona, Nob. 2016, 82). A mwaiti n Taian Areru ae a taekina te aeka n rongorongo aei: “Ane ko na kaota nako iu te kawai ni kamaiu: bon iai te kimwareirei ae bati i matau” (Taian Areru 16:11).

Iangoi tabeua kakaewenako ake a tia ni kaitara mangaai kaain am kiraati ke te kooram. Ko na kanga ni buokiia ni kaotaia bwa e roko te kimwareirei ni koaua man kamwakuran te onimaki iroun te Tia Kamaiu—riki n taai ni kangaanga? Iangoa te titiraki aei ngkana ko katauraoi n anga reirei. Kakaei kibu n taeka aika ko kona n tibwauai ma am kiraati ke te kooram n Taian Areru ke n ana rongorongo Beretitenti Nelson “Joy and Spiritual Survival.”

Te kimwareirei ni koaua e roko man kamwakuran te onimaki iroun te Tia Kamaiu, riki n taai ni kangaanga.

Te Uaia n Reirei

Iangoia ni kaoia kaain am kiraati ke te kooram n rinanoi tabeua man bwaai aikai: Taian Areru 1; 8; 19; 23; 27. Tera ae ti reiakinna man Taian Areru bwa tera ae uota nakoira te kimwareirei? A kona ni kabongana teuana ke e raka riki waaki ni kakukurei aikai ni buokiia naake ko reireiniia n ataia ae e roko te kimwareirei ni koaua man irakin Iesu Kristo.

• Ti bane n tangiria ni karekea te kimwareirei, ma ti kainnanoia n ataia bwa tera ae uota te kimwareirei ni koaua ao tera te bwai ae na kairiiri nakon te nanokawaki. Tuangiia kairake bwa a na tibwauai tabeua bwaai aika e uoti nakoia te kimwareirei ao bukin tera a reke ni bwaai ikai. Koreia iaon te boote “ao a riki aomata bwa aonga ni karekea te kimwareirei.” (2 Nibwaai 2:25). Ngkanne kaoia kairake, n tatabemaniia ke ni kurubu aika uarereke, n rinanon teuana ke e raka riki booki aika tabu inanon “Reitan Bwaai n Mwakuri” ao korea te bwai ae a kunea are e kairiia nakon te kimwareirei. Ko kona naba ni kaota te witeo “We Can Find Happiness” (ChurchofJesusChrist.org). Tera tabeua kawai ae a kataia aomata ni kakaea te kimwareirei are e na kairiko nakon te nanokawaki? E kanga te Tia Kamaiu ni uota te kimwareirei nakoira?

• Ti bane n ataia aomata aika a kaitara ma kakaewenako e ngae ngke a tia ni kataa aia kabanea ni kona ni maiuakina te euangkerio. Ko na kanga ni buokia aomata ake ko reireiniia n ataia ae ti kona ni karekea te kimwarerirei e ngae ngke a rangi ni kangaanga aron maiura? Ko kona n tuangiia bwa a na rinanon ana rongorongo Beretitenti Russell M. Nelson “Joy and Spiritual Survival” ke ana rongorongo Beretitenti Steven J. Lund “Finding Joy in Christ (Kunean te Kimwareirei iroun Kristo)” (Liahona, Nov. 2020, 35–37). Tera banna ni katooto aika ti kunei irouia aomata aika a kunea te kimwareirei iroun Kristo n aki tabe ma aia kakaewenako? Tera ae ti reiakinna man taian taneiai aikai? Tera bwaai aika ti rinanona inanon maiura ae ti na kona iai n tibwauaia?

• Ngaira ni kabane ti kai rotaki n te raraoma ao te nanokawaki ngkai ti tabe ma kakaewenako n te maiu aei. Ibukiia tabeman, ana kaitara ma namakin aikai n te tai ae maan. A na kona ni buokaki kaain am kiraati ke am kooram man te marooro iaon kakaewenako aikai ao aron te Tia Kamaiu ni kona ni buokiia naake a rotaki n te raraoma ao n te nanokawaki. Ni moana te marooro aei, ko na tuangiia kairake bwa a na rinanon ana marooro Unimwaane Jeffrey R. Holland “Like a Broken Vessel (N ai Aron te Booti ae Uruaki),” iaon riki kabanean mwakoro ake aua (Liahona, Nob. 2013, 40–42), ke ana rongorongo Titita Reyna I. Aburto “Rinanon te Nang ao Otantaai te Uea Tiiku Irou!” (Riaona, Nob. 2019, 57–59). Kaoia kaain te kiraati bwa a na kakaei koaua aika a uaana nakoia ao n tibwaua te bwai ae a kunea. Kaungaia kairake bwa a na taetae ma te karo ke te tia kairiiri ae onimakinaki ke nakon mentalhealth.ChurchofJesusChrist.org ngkana a namakinna bwa a kainnanoa te ibuobuoki.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Mataio 5:1–12; 1 Betero 4:12–13; 2 Nibwaai 2:25–27; Motiaea 2:41; 3:3–7; 4:2–3; Aramwa 36:16–22; 4 Nibwaai 1:15–16 (Ko na kanga ni karekea te kimwareirei)

• D. Todd Christofferson, “The Joy of the Saints,” Liahona, Nov. 2019, 15–18

• “Suicide Prevention and Ministering,” ChurchofJesusChrist.org

Reirei n ana Kawai te Tia Kamaiu

Te Tia Kamaiu e ataia naake E reireiniia—ao antai ae a na riki nako iai. Ngkana iai aia kangaanga, E teimatoa n tangiriia. Ko na kanga ni kaotia ae ko tangiriia ao ko boutokaia naake ko reireiniia?