Jeptōm̧ba 11

Ewi Wāween Aō Erreo im Bar Mōņōņō Ālkin Aō Jerawiwi?

Aiseia 1–12

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron. Innām tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļep, 10.2, 11.2, ChurchofJesusChrist.org). Karōk wāween ko n̄an jerbali ta eo kom̧ kar kōnono kake.

• Mour kōn gospel eo. Ewi wāween ilo ad lōke Irooj maron̄ jipan̄ kōj ellā jān idajon̄jon̄ ko jej jelm̧aeiki?

• Kea kōn ro rej pād ilo aikuj. Wōn eo jej jeļā ej aikuji jar ko ad im ad m̧ōttāiki?

• Karuwaineneik aolep n̄an bōk gospel eo. Ta karōk ko n̄an kwaļo̧k kōn gospel eo em̧ōj kōnono kake ilo kweilo̧k eo an ward ko̧o̧njeļ eo an jodikdik ro? Ewi wāween an kūlaaj ak doulul eo ad bōk koņaer?

• Kobaik baam̧le ko n̄an indeeo. Ewi wāween ilo ad kōm̧m̧ane jerbal in menmenbwij eo kōkajoorļo̧k jem̧jerā ko ad ippān Jemedwōj Ilan̄ im Jisōs Kraist?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

N̄e jej en̄jake bōd ālkin ad kōm̧m̧an jerawiwi, ewōr ad kāālet. En̄jake kein, ilo an kōmetak, emaron̄ erom̧ juon kōjeraam̧m̧an eļan̄n̄e rej kam̧akūt kōj n̄an ukweļo̧k. Ak Setan ej ba n̄an kōj kōn en̄jake kein ke rej meļeļein bwe Anij ejjab iakwe kōj im ej kajjieon̄ kōm̧m̧an bwe jen ebbweer im ejjeļo̧k ad kōjatdikdik. Emaron̄ wōr armej ro kwoj katakin er me rej eddodo kōn kain en̄jake kein. Remaron̄ kōlmenļo̧kjeņ eļan̄n̄e remaron̄ erreo im bar m̧ōņōņō. Ewi wāween am̧ jipan̄ er lo kōjatdikdik ilo Pinmuur eo an Rilo̧mo̧o̧r?

Rikanaan Aiseia ekar peran ilo an kajim̧we armej ro kōn jerawiwi ko aer. Ak ekar barāinwōt kam̧ool bwe kōn Rilo̧mo̧o̧r, “men̄e bōd ko ami rej āinwōt būrōrō, renaaj mouj āinwōt sno” (Aiseia 1:18). Kejōkļo̧kjeņ kōn menin ilo am̧ riiti Aiseia 1–12 ilo wiik in. Ta eo emaron̄ im̧we ro kwoj katakin er oktakļo̧k n̄an Jisōs Kraist kōn tōmak bwe eddo in jerawiwi ko aer remaron̄ bar jako? Kwomaron̄ bar ekkatak kōn naan in kam̧ool eo an Sister Sharon Eubank kōn Kraist ilo ennaan eo an “Kraist: Meram eo Me ej Romaak ilo Marok” (Liaona, Māe 2019, 73–76).

Kōn Jisōs Kraist, eddo in jerawiwi ko ad remaron̄ bar jako.

Ekkatak Ippān Doon

N̄an kōpooj juon ekōnono me ej kalōk ioon Aiseia 1–12, kwomaron̄ kajjitōk ippān kajjojo jodikdik n̄an bōktok n̄an kweilo̧k eo juon men ekōļar būrōrōr im juon men ekōļar mouj. Kwomaron̄ kwaļo̧k men kein ilo ami riit ippān doon Aiseia 1:16–18. Innem jodikdik ro remaron̄ kwaļo̧k ilo naan ko aer make ta eo rej ekkatak jān eoon kein. (Lale ekōnono eo an Sister Sharon Eubank kōn eoon 18 ilo “Kraist: Meram eo Me ej Romaak ilo Marok.”) Erkein rej jet iaan m̧akūtkūt ko me remaron̄ im̧we tōmak eo ilo kajoor eo an Rilo̧mo̧o̧r eo n̄an kōm̧m̧an bwe jen erreo ilo mour in jetōb.

• Etale waanjon̄ak ko ilo bwebwento ko ilo jeje ko rekwojarjar kōn an ukweļo̧k maron̄ jipan̄ ro kwoj katakin er kalōk tōmak eo aer ke Jisōs Kraist emaron̄ kōm̧m̧an bwe ren erreo ilo mour in jetōb. Kwomaron̄ je ioon bo̧o̧t eo et ko āinwōt Saul (tōkālik kar etņake Paul), Alma eo Edik, Zeezrom, im Anti-Nephi-Lehies. Kwomaron̄ bar je ruo kurup ilo eoon kein jān jeje ko rekwojarjar: Jerbal 8:3; Mosaia 27:8–10; Alma 11:21–23; Alma 17:12–15 (armej rein ilo mour in jerawiwi ko aer) im Jerbal 9:13–20; Alma 36:17–24; Alma 15:5–12; Alma 23:6–12 (ālkin an armej rein kar oktak ļo̧k im kar ukweļo̧k). Innem kwomaron̄ māāje kajjojo et ko ilo eoon ko me ej kōmeļeļeik armej eo. Ta eo armej rein rekar kōm̧m̧ane n̄an ukweļo̧k? Ta eo bwebwenato kein rej katakin kōn ikdeleel eo an Rilo̧mo̧o̧r n̄an jeorļo̧k bōd? Jej ke loe jon̄ak ko jemaron̄ ļoori?

• N̄an jipan̄ ro kwoj katakin er bwe en em̧m̧an aer meļeļe kōn jeorļo̧k bōd in jerawiwi, kwomaron̄ leļo̧k n̄an kajjojo armej juon waanjon̄ak ak pārabōļ n̄an ekkatak. Kwomaron̄ kobaiki nejin eo ejerawaan (lale Luk 15:11–24); Rilo̧mo̧o̧r āinwōt ad Seperd Em̧m̧an (pārokūrāāp 5–8 ilo ennaan eo an Elder Dale G. Renlund “Ad Seperd Em̧m̧an” [Liaona, Māe 2017, 29–32]); im juon piano ejorreen (jinion ennaan eo an Sister Cristina B. Franco “Kajoor in Kōmour an Jisōs Kraist” [Liaona, Nob. 2020, 60–62]). Jodikdik ro remaron̄ kōkaduukļo̧k kajjojo waanjon̄ak ak pārabōļ im kōnono kōn ta eo ej katakin kōn iakwe im pinmuur in katok eo an Rilo̧mo̧o̧r.

• En̄jake būrom̧ōj bwe kōnke jekar jerawiwi im tōl n̄an ukweļo̧k. En̄jake pere ak jab aorōk kōn jerawiwi ko ad ejjab lukkuun jipan̄ im emaron̄ dāpij kōj jān ukweļo̧k. Kūlaaj eo am̧ ak doulul eo remaron̄ riit ippān doon jekjeņ in me etan taitōļ in ej “Godly Sorrow” ilo ennaan eo an Būreejtōn Dieter F. Uchtdorf “Komaron̄ Kōm̧m̧ane Kiō!” (Liahona, Nov. 2013, 55–57). Ta oktak eo ikōtaan būrom̧ōj kōn jerawiwi eo me ej tōlļo̧k n̄an ukweļo̧k im būrom̧ōj eo me ej tōlļo̧k n̄an liaajlo̧ļ? (bar lale 2 Korint 7:9–10; Mormon 2:12–14). Eļan̄n̄e juon armej ej obrak kōn en̄jake in ajļo̧k im liaajlo̧ļ kōn jerawiwi, ta eo jemaron̄ ba n̄an jipan̄ e oktakļo̧k n̄an Rilo̧mo̧o̧r? Karuwaineneik jodikdik ro n̄an kwaļo̧k naan in kam̧ool ko aer ilo Rilo̧mo̧o̧r im tūriam̧o eo An.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Dallin H. Oaks, “Erreo kōn Ukweļo̧k,” Liaona, Māe 2019, 91–94

• “Repentance through the Atonement of Jesus Christ,” in jebta 3 ilo Preach My Gospel (2019), 62–63.

• “Repentance: A Joyful Choice” (pija in alooj eo), ChurchofJesusChrist.org

Teaching in the Savior’s Way

“Naan in kam̧ool eo an Rilo̧mo̧o̧r eo make ekar letok mālim n̄an naan ko An. … Ilo am̧ kwaļo̧k naan in kam̧ool eo kōn katak eo em̧ool, Jetōb eo enaaj kapene m̧ool eo an katak eo ilo buruōn ro kwoj katakin er” (Teaching in the Savior’s Way, 21).