Nobōm̧ba 13

Ewi Wāween Aō Bōk Lutōkleplep eo an Jetōb eo an Irooj?

Hoseia 1–6; 10–14; Joel

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; 10–20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ Ro ak Unin Tōl eo an Doulul eo an Priesthood eo an Aron. Innem tōl juon iien ekōnono kōn jerbal in lo̧mo̧o̧r eo im mour eo ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an jerbali ta eo kom̧ kar kōnono kake.

• Mour kōn gospel eo. Ta en̄jake ko kiiō rekar kōkajoorļo̧k naan in kam̧ool ko ad?

• Kea kōn ro rej pād ilo aikuj. Wōn eo ej aikuji jipan̄ eo ad im jar ko ad? Ta eo jej im̧we n̄an kōm̧m̧ane n̄an jipan̄ er?

• Karuwaineneik aolep n̄an bōk gospel eo. Ewi wāwen jemaron̄ erom̧ juon meram n̄an ro uwaan baam̧le eo ak ro m̧ōttad tōmak ko aer rejjab āinwōt ko ad?

• Kobaik baam̧le ko n̄an indeeo. Ewi wāween ad kwaļo̧k eļap iakwe im rie n̄an baam̧le ko ad im kōm̧m̧an juon oktak em̧m̧an ilo m̧ōko im̧ōd?

Ilo jem̧ļo̧kin katak in, n̄e ekkar, kōm̧m̧an laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–-35 minit ko

Kōpooj Eok Make ilo Jetōb

Ejjeļo̧k kajjitōk bwe jej mour ilo juon tōre eo men ko rejjab alikkar im jej mijak. Rikanaan Joel ilo kallim̧ur m̧okta ekar kōmeļeļeik tōre kein ad—ej “raan in Irooj”—āinwōt “juon raan in marok im jerata” im “eļap im kanooj kaamijak” (Joel 2:1–2, 11). Ak ejjab meļeļein bwe raan kein ad ejjeļo̧k kōjatdikdik ie. Ļōmņak kōn kallim̧ur in jān Elder Dieter F. Uchtdorf: “Men̄e ilo iien ko jemaron̄ en̄jake libobo kōn mālijjon̄ ko an mour ak jepooļ jān en̄jake in marok, iakwe eo an Anij im kōjeraam̧m̧an ko an gospel eo kōjepļaaktok an Jisōs Kraist naaj bōktok juon men jab kōtmene kake n̄an an waļo̧k” (“Anij Enaaj Kōm̧m̧ane Juon Men Jej Jab Kōtmene,” Liaona, Nob. 2020, 52).

Kōn menin n̄e kwoj kile marok im jerata ilo raan kein, keememej bwe Irooj ekar bar kallim̧uri kōj kōn kōjeraam̧an ko reļļap—im—jejjab kōtmeni: “Inaaj lutōkļo̧k Aō Jetōb ioon kanniōk otemjej, im ro nejimi m̧aan im kōrā renaaj rūkaanij” (Joel 2:28; bar lale Josep Smith—Bwebwenato 1:41). No̧o̧te jet iaan kōjeraam̧m̧an ko ralikkar me Jetōb eo an Anij enaaj lutōkleplep ioon likao im jiron̄ ro. Etke kwoj en̄jake ke eaorōk n̄an ro kwoj katakin er meļeļe menin? Kejōkļo̧kjeņ kōn kajjitōk in ilo am̧ riiti Joel 2 im ennaan eo an Elder Uchtdorf ilo am̧ kōppopo n̄an katakin.

Irooj ekar kallim̧ur bwe ilo raan ko āliktata, Enaaj luktōkļo̧k jetōb eo An, im “ro nejimi m̧aan im kōrā renaaj rūkaanij” (Joel 2:28).

Ekkatak Ippān Doon

N̄an jipan̄ ro kwoj katakin er bwe en em̧m̧an aer meļeļe Joel 2:28–29, kwomaron̄ likūt juon men ilo juon bo̧o̧ļ im leļo̧k n̄an juon bwe en lutōk aiboj ioon. Ewi wāween an menin jipan̄ kōj meļeļe ta meļeļein n̄an Irooj n̄an “lutōkļo̧k jetōb eo [An] ioon kanniōk otemjej”? Ewi wāween an kannaan ko ilo Joel 2:28–29 kūrm̧ool? Erkein rej jet iaan ļōmņak ko me remaron̄ jipan̄ jodikdik ro bwe en em̧m̧an ļo̧k aer meļeļe wāween an Irooj lutōkleplep jetōb eo An rainin.

• Jeje ko rekwojarjar rekoote elōn̄ waanjon̄ak ko kōn iien ko Irooj ekar lutōklep Jetōb eo An ioon armej ro An. Etale jet iaan men kein remaron̄ jipan̄ jodikdik ro bwe en em̧m̧anļo̧k aer meļeļe wāween n̄an bōk lutōkleplep eo an Jetōb eo an Anij ilo mour ko ad. Ļōmņak in jin̄n̄aik juon pijja kileplep ej lutōkļo̧k dān eo ioon bo̧o̧t eo im kajjitōk ippān kajjojo armej im kurup jiddik ko n̄an riiti juon ak elōn̄ eoon ko ilo “Supporting Resources.” Remaron̄ je ioon bo̧o̧t eo turin pijja eo ta eo armej ro ilo eoon ko aer kajjojo rekar kōm̧m̧ani bwe Irooj en maron̄ lutōkleplep jetōb eo An im ta kōjeraam̧m̧an ko. N̄aat eo jekar en̄jake an Jetōb kaeņōm̧m̧an, tōl, ak karreo kōj?

• Kwomaron̄ je naan kein jān Elder Dieter F. Uchtdorf ioon bo̧o̧t eo: “Ewōr juon men jab kōtmene kake ippān Anij n̄an kwe make im n̄an aolepān Kabun̄ eo—juon jerbal ekōppaļpaļ im kabwilōn̄lōn̄.” (“Anij Enaaj Kōm̧m̧ane Juon Men Jej Jab Kōtmene,” 53). Ļōmņak in kajjitōk ippān jodikdik ro n̄an lale ennaan eo an Elder Uchtdorf kōn kōjeraam̧m̧an ko me jejjab kōtmeni me Anij ekar letok n̄an armej ro ilo jeje ko rekwojarjar ālkin iien ko reppen. Ta eo Elder Uchtdorf ekar katakin kōj n̄an kōm̧m̧ane bwe jen maron̄ kōm̧m̧ani kālet ko rem̧m̧an n̄e jej jelm̧ae men ko reppen? Karuwaineneik jodikdik ro n̄an kōm̧m̧ane juon laajrak in men ko “jej jab kōtmeni” me Anij ej ļōmņak n̄an kōj. Karuwaineneik ro kwoj katakin er n̄an kejōkļo̧kjeņ kōn ta eo rej kōņaan kōm̧m̧an n̄an bōk kōjeraam̧m̧an kein.

• Ļōmņak n̄an kwaļo̧k pija in alooj eo “President Nelson: Hear Him—Personal Revelation” (ChurchofJesusChrist.org). Kajjitōk ippān jodikdik n̄an ron̄jake n̄an meļeļe ko rem̧wūlaļļo̧k kōn wāween an Jetōb kōnono n̄an kōj im wāween an kōjeraam̧m̧an mour ko ad. Remaron̄ bar etale ennaan eo an Būreejtōn Russell M. Nelson “Revelesōn n̄an Kabun̄ in, Revelesōn n̄an Mour ko Ad” (Liaona, Māe 2018, 93–96). Kajjitōk ippāer n̄an kappukot uwaak ko n̄an kajjitōk ko āinwōt kein: Ewi wāween an Būreejtōn Nelson kar kappukot im bōk im̧we eo an Jetōb? Ta eo jej ekkatak jān Josep Smith kōn ikdeleel eo an Anij n̄an kōnono n̄an ajri ro Nejin? Ta eo Būreejtōn Nelson ekar kakijorjor kōj n̄an kōm̧m̧ane? Jiron̄ļo̧k jodikdik ro kōn juon iien ke kwar en̄jake an Irooj lutōkļo̧k jetōb eo An. Karuwaineneik er n̄an kwaļo̧k en̄jake ko rekar en̄jaki im, eļan̄n̄e rej en̄jake jokņe, kwaļo̧ki.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Jerbal 2:1–6, 14–21; Jekab 7:1–8; Mosaia 4:1–3, 19–20; 18:7–11; Alma 19:14, 28–36; Hilamōn 6:34–36; Katak im Bujen Ko 19:37–41

Teaching in the Savior’s Way

“Ilo kakobaba n̄an jipan̄ rūkkatak ro en̄jake im kile Jetōb eo, jipan̄ er jerbale im̧we ko rej būki” (Teaching in the Savior’s Way, 10).