Nobiembre 27

Kasano a Maibinglayko ti Ebanghelio?

Jonas; Mikias

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna mangidaulo iti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga ad-adda nga immasidegtayo iti Mangisalakan? Kasano a padpadasentayo ti agbalin nga ad-adda a kas Kenkuana?

• Aywanan dagiti agkasapulan. Asino ti adda iti panunottayo itay laeng? Kasano a matulongantayo dagitoy a tao?

• Awisen iti amin nga umawat iti ebanghelio. Kasano a masungbatantayo dagiti saludsod dagiti gagayyemtayo maipapan iti Simbaan?

• Pagkaykaysaen dagiti pamilia para iti kinaagnanayon. Ania dagiti sumagmamano a wagas a nasaysayaat maikonektatayo dagiti miembro a kabagyan ti pamilia, a kas kadagiti lelang ken lelong ken kasinsin?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Mabalin nga adda dagiti miembro ti klasem wenno korummo a kanayon a mangsapul kadagiti wagas a mangibinglay iti ebanghelio. Nalabit a mabalinmo met nga aramiden daytoy! Para iti adu a tao, nupay kasta, narigat ken nakabutbuteng ti panangibinglay iti ebanghelio. Pagsayaatanna, makapagbalintayo amin a nalalaing iti panangibinglay iti pammatitayo ken ni Jesucristo. Mabalin a saanmo a pisikal a mangngegan ti timek ti Apo a mangbilbilin kenka nga agaramid iti maysa a banag a kas iti “inka idiay Nineve, daydiay ili a dakkel, ket yawagmo ti maikaniwas kenkuana,” kas iti inaramid ni Jonas (Jonas 1:2). Ngem mabalinnaka a pariknaan ti naulimek a timek ti Espiritu Santo nga “inka” kadagiti masinunuo a miembro ti pamilia ken gagayyem a nakasaganan a dumngeg iti pammaneknekmo. Agbalinka a silulukat ti no ania ti masursurom manipud iti padas ni Jonas bayat ti panagadalmo iti daytoy a lawas, ken isaganam ti bagim a mangibinglay no ania ti masursurom kadagiti sursuruam. Mabalinmo pay a basaen ti mensahe ni Elder D. Todd Christofferson a D. Todd Christofferson’s message “Sharing the Message of the Restoration and the Resurrection” bayat ti panagsaganam a mangisuro (Liahona, Mayo 2020, 110–13).

Mabalin nga iparikna ti Espiritu Santo kadatayo a mangibinglay iti ebanghelio kadagiti nakasaganan a dumngeg kadagiti pammaneknektayo.

Aggigiddan a Masursuruan

Tapno matulongan dagiti sursuruam a mangibinglay kadagiti impresion manipud iti panagadalda iti Jonas iti daytoy a lawas, mabalinmo nga ipakita ti ladawan ni Jonas (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Awisem ida a mangilawlawag no ania ti nasursuroda maipapan iti panangibinglay iti ebanghelio manipud kadagiti padas ni Jonas. Mabalinmo nga awisen ida nga ipangruna nga irebyu ti Jonas 1 ken 3 ket agsaludsod: Ania ti masursurotayo maipapan iti panangibinglay iti ebanghelio kadagiti mabalin a kasla di pay nakasagana nga agbalbaliw? Ania ti masursurotayo maipapan iti kinatallugod ti Dios a mangpakawan kadagiti agbabawi? Tapno maparegta dagiti miembro ti klasem wenno korummo a mangibinglay iti ebanghelio, usarem ti maysa wenno ad-adu pay kadagiti sumaganad nga aktibidad wenno mangaramidka iti maysa a bukodmo.

• Tapno magun-od ti kapanunotan maipapan iti no kasano ti mangibinglay iti ebanghelio ti Mangisalakan kadagiti dadduma, mabalin nga irebyu ti klasem wenno korummo dagiti sumaganad a pakaammuan iti nasantuan a kasuratan: Juan 4:3–26; Dagiti Aramid 16:25–33; Alma 19:14–18, 28–31. Kalpasanna mabalinyo a sangkamaysa a paglilinnawagan dagiti saludsod kas kadagitoy: Kasano a nagsagana dagiti tao kadagitoy a pakaammuan tapno dumngeg iti mensahe ti ebanghelio? Ania ti madlawmo maipapan iti no kasano a naibinglay ti mensahe? Apay iti panagkunam a kayat ti Nailangitan nga Ama ken ni Jesucristo nga ibinglaytayo ti ebanghelio? Kalpasanna mabalinyo a paglilinnawagan kas maysa a klase wenno korum no ania ti isuro kadatayo dagitoy a pakaammuan maipapan iti no kasano a makaibinglaytayo iti ebanghelio iti agdama.

• Ti panagbasa kadagiti makaparegta a pagwadan dagiti dadduma iti panangibinglay iti ebanghelio ket makaallukoy kadagiti agtutubo a sursuruam a mangaramid met iti kastoy. Imbinglay ni Elder D. Todd Christofferson ti sumagmamano a pagarigan iti mensahena a “Sharing the Message of the Restoration and the Resurrection.” Iti daytoy a mensahe, insuro ni Elder Christofferson a tallo a banag a kasapulan tapno maaramid a napinget dagiti awistayo nga umawat iti ebanghelio: ti ayattayo, ti pagwadantayo, ken ti panangusartayo iti Libro ni Mormon. Paglilinnawagan dagiti pagwadan ti panangibinglay iti ebanghelio iti daytoy a mensahe, ket awisem dagiti sursuruam a mangibinglay iti dadduma pay a pagarigan, agraman dagiti bukodda a padas. Kasano nga ipakita dagitoy a padas dagiti tallo a banag nga insuro ni Elder Christofferson?

• Kasano a matulongam dagiti sursuruam a makaawat a ti panangibinglay iti ebanghelio ket mabalin a gagangay ken saan a nasken a pannakasinga daytoy? Mabalinmo nga ipabuya dagiti video iti baba ti “Dagiti Pangsuporta a Resources” ket idawat kadagiti agtutubo a mangpanunot maipapan no kasano a mabalin nga ibinglay ti ebanghelio iti maysa a tao nga am-ammoda. Ania ti maaramidtayo a mangawis kadakuada nga umay ken mangkita? Ania dagiti gundaway nga adda kadakuada tapno umay ken tumulong? Kasano a matulongantayo ida makarikna iti tarigagay nga umay ken agbati? Kasano a mapagbalintayo ti panangibinglay iti ebanghelio a paset ti inaldaw a panagbiagtayo?

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Carlos A. Godoy, “I Believe in Angels,” Liahona, Nob. 2020, 86–88

• “Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (videos), ChurchofJesusChrist.org; masarakam ti dadduma pay a reosurces iti baba ti “Sharing the Gospel,” Gospel Library

Panangisuro iti Wagas ti Mangisalakan

“Nalabit nga ad-adda a makaaramid dagiti tao iti napapateg a panagbalbaliw iti biagda no aggapu dagita a panagbalbaliw manipud iti bukodda a panangaramat iti karbenganda nga agpili. No itedmo dagiti awis nga agtignay, penken a dayawem ti karbengan a panagpili dagiti sursuruam” (Panangisuro iti Wagas ti Mangisalakan, 35).