Disiembre 11

Ipangpangrunak Kadi dagiti Banag ti Dios nga Umuna iti Biagko?

Haggeo; Zacarias 1–3; 7–14

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania ti napaglilinnawagan ti bishopric kadagiti miting iti youth council? Ania dagiti maaramidtayo a tignay maibatay iti dayta a panaglilinnawag?

• Aywanan dagiti agkasapulan. Kasano a makatulongtayo kadagiti tao iti wagas a kas ken ni Cristo no makitatayo ti maysa a panagkasapulan ket ditayo ammo ti sawentayo?

• Awisen ti amin nga umawat iti ebanghelio. Ania ti maysa a banag a nasarakantayo iti ebanghelio ni Jesucristo a mangisangbay kadatayo iti rag-o? Kasano a maibinglaytayo dayta a rag-o kadagiti dadduma?

• Pagkaykaysaen dagiti pamilia para iti kinaagnanayon. Ania ti ar-aramidentayo a mangsapul iti nagnagan dagiti kapuonantayo nga agkasapulan kadagiti ordinansa ti templo? Ania ti maaramidtayo a makatulong kadagiti dadduma a mangsapul iti nagnagan dagiti kapuonanda?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Napno ti biag iti napapateg a bambanag tapno aramiden. No saantayo a naannad, ti kinakumikom ti biag ti makaigapu tapno malipatantayo ti panggep ti biag. Ammotayo a nasken a ti Mangisalakan ken ti ebangheliona ti agbalin a kangatuan a prayoridadtayo, ngem nalaka a makasinga kadatayo dagiti dadduma pay a banag. Nalabit a ti gapu no apay a balakadannatayo dagiti nasantuan a kasuratan a “palanasem ti pagnaan dagita saksakam” (Dagiti Proverbio 4:26), “utobem dagiti daldalanmo” (Haggeo 1:5), ket “sukimatenyo dagiti bagbagiyo met laeng, addakayo man iti pammati” (2 Taga Corinto 13:5).

Kinasapulan dagiti Israelita nga agbibiag iti panawen ni propeta Haggeo daytoy a kita ti awis. Kadagiti napapateg a panagkagumaanda a mangbangon manen iti Jerusalem, nasken nga isardengda ti panangbangon manen iti balay ti Apo. Ibilangmo no kasano a mayaplikar dagiti ballaag ti Apo iti Haggeo 1 kadatayo iti agdama. Kasano a paregtaemto dagiti sursuruam a mangamiris iti panagkumitda iti panangipangpangruna kadagiti banag ti Dios nga umuna iti biagda? Mabalinmo nga irebyu ti mensahe ni Elder Dale G. Renlund a “Unwavering Commitment to Jesus Christ” (Liahona, Nob. 2019, 22–25) wenno dagiti pannursuro ni Presidente Ezra Taft Benson iti “The Great Commandment—Love the Lord” (iti Teachings of Presidents of the Church: Ezra Taft Benson [2014], 37–45).

Mabalintayo nga aramiden dagiti banag ti Dios a kangatuan a prayoridadtayo.

Aggigiddan a Masursuruan

Mabalinmo a rugian ti panaglilinnawag babaen ti panangisurat kadagiti ragup ti balikas manipud iti Haggeo 1:6 iti pisarra. Ania ti masursurotayo manipud kadagitoy a kapanunotan—panagmula iti bukbukel ngem awan pulos ti maap-apit, pannangan ngem awan pulos pannakapnek, wenno panangullo iti kuarta ngem panangipisok daytoy iti supot nga adda buttawna—maipapan iti panangbubos iti panawen kadagiti banag imbes iti kayat ti Apo nga aramidentayo? Idinto a saan nga idawdawat ti Apo nga ipamaysatayo ti panangbangon iti maysa a templo, ania ti dawdawatenna kadatayo nga ipamaysatayo? Kasano a maaramidtayo dagita a banag a nangato a prayoridad iti biagtayo? Dagiti sumaganad nga aktibidad ti makatulong kadagiti agtutubo a mangamiris iti panagkumitda a panangipangpangruna kadagiti banag ti Dios nga umuna iti biagda.

• Ti pannakiranud iti sakramento ti maysa a napintas a gundaway iti linawas tapno mangamiris iti panagkumittayo ken ni Jesucristo. Kasano a mausartayo ti sakramento a mangibilang no agbalbalintayo met laeng nga ad-adda a kas iti Mangisalakan? Nalabit a mabalin nga ibinglay dagiti agtutubo no kasano nga aramidenda daytoy. Mabalinda pay nga ilista dagiti saludsod a mabalinda a damagen iti bagbagida kabayatan ti sakramento. Awisem ida a mangutob iti maysa wenno ad-adu pay a nasantuan a kasuratan, mensahe, wenno dadduma pay a resources iti baba ti “Dagiti Pangsuporta a Resources” bayat ti panagilistada.

• Ni Presidente Dieter F. Uchtdorf iti mensahena nga “Of Things That Matter Most” (Liahona, Nob. 2010, 19–22), imbinglayna ti balakad a makatulong kadagiti agtutubo nga “utoben[da] dagiti daldalan[da]” (Haggeo 1:5). Mabalinmo nga awisen ti tunggal tao wenno babassit a grupo a mangbasa iti maudi a tallo a benneg ti mensahe (manipud iti benneg a “The Power of Basics”), a mangsapsapul no ania ti kayat a sawen ti mangipamaysa iti biagtayo iti Mangisalakan. Mabalinda nga ibinglay ti maysa a banag a mariknada a makaparegta nga aramiden a mangpapigsa iti panagkumitda ken ni Jesucristo.

• Adu kadatayo ti makumikom nga agar-aramid kadagiti nasayaat a banag. Ngem saan a kanayon nga isuda dagiti kasayaatan a banag. Ibilangmo ti panangibinglay iti palawag manipud iti umuna a benneg ti mensahe ni Presidente Dallin H. Oaks a “Good, Better, Best” (Liahona, Nob. 2007, 104–8) a makatulong kadagiti agtutubo a makaawat iti daytoy a pagbatayan. Mabalinmo pay nga awisen ida a saggaysa nga agaramid iti listaan dagiti inaldaw nga aktibidadda. Idawatmo kadakuada a personal a mangamiris no ti tunggal aktibidad ket “nasayaat,” “nasaysayaat,” wenno “kasayaatan.” Ania iti mangaramid iti maysa nga aktibidad a “kasayaatan”? Allukoyem dagiti agtutubo a mangibinglay iti tunggal maysa no ania ti masursuroda manipud iti daytoy a panangamiris-iti-bagi.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Josue 24:14–15; Mateo 6:19–34; 22:36–40; Marcos 10:17–22; 1 Taga Corinto 11:23–28; 2 Taga Corinto 13:5; Taga Colosas 3:1–2 (Nasken nga ipangrunatayo dagiti banag ti Dios nga umuna iti biagtayo)

• Scott D. Whiting, “Becoming like Him,” Liahona, Nob. 2020, 12–15

• “As Now We Take the Sacrament,” Hymns, no. 169

Panangisuro iti Wagas ti Mangisalakan

“Saan a nasken nga isurom ti amin a banag iti maysa a panagklase tapno masagidmo ti puso ti maysa a tao—masansan nga umdasen ti maysa wenno dua a kangrunaan a punto” (Panangisuro iti Wagas ti Mangisalakan,7}.