Ritembwa 11

I Moanibwaia Ana Bwai Te Atua Moa Inanon Maiu?

Akai; Tekaria 1–3; 7–14

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Tera ae a tia te bitiobiriki ni maroroakinna n ara bootaki ni kauntira ibukiia kairake n te uoote? Tera mwakuri aika ti kona ni karaoi aika boboto iaon bwaai aika ti maroroakin?

• Tararuakiia naake iai kainnanoia. Ti na kanga ni karoko nakoia aomata n ana kawai Kristo ngkana ti noora kainnanoana ao n aki ata te bwai ae ko na taekinna?

• Kaoia ni kabane bwa ana karekea te euangkerio. Tera te bwai ae ti a tia ni kunea inanon ana euangkerio Iesu Kristo are e uota te kimwareirei nakoira? Ti na kanga n tibwaua te kimwareirei anne ma tabeman?

• Katiteuanakiia utu ibukin te maiu ae akea tokina. Tera ae ti karaoia ni kakaei araia ara bakatibu aika a kainnanoi otenanti n te tembora? Tera ae ti kona ni karaoia ni buokiia tabeman ni kakaei araia aia bakatibu?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

E onrake te maiu aei ma bwaai aika ti na karaoi. Ngkana ti aki karaurau, e kona tabetaben te maiu ni kamwaningaira ibukin te kantaninga n te maiu. Ti ataia bwa te Tia Kamaiu ao Ana euangkerio a riai n riki bwa ara moanibwai, ma a kona bwaai tabeua ni kamangaoi ara iango. Tao ngaia anne bukina ngkai booki aika tabu a reireiniira bwa ti na “kaeta kawain waem” (Taekan Rabakau 4:26), “kam na iangoi aroaromi” (Akai 1:5), ao “kam na katai ngkami, ba tao kam mena n te onimaki ke kam aki” (2 I-Korinto 13:5).

Tibun Iteraera ake a maeka n ana tai te burabeti Akai a kainnanoa te aeka ni kakao aei. N aia kekeiaki ae uaana ni manga katea Ierutarem, a tia ni katoka katean ana auti te Uea. Iangoia bwa e kanga ana kauring te Uea inanon Akai 1 ni kona ni kaeineti nakoira n te bong aei. Ko na kanga ni kaungaia naake ko reireiniia n rinanon aia motinnano ni karimoai ana bwai te Atua inanon maiuia? Ko kona n rinanon ana rongorongo Unimwaane Dale G. Renlund “Te Motinnano ae Nene nakon Iesu Kristo” (Riaona, Nobembwa 2019, 22–25) ke ana reirei Beretitenti Ezra Taft Benson n “The Great Commandment—Love the Lord (Te Tua ae Korakora—Tangira Atuam)” (in Teachings of Presidents of the Church: Ezra Taft Benson [2014], 37–45).

Ti kona ni kariki ana bwai te Atua bwa moanibwai ni maiura.

Te Uaia n Reirei

Ko kona ni moana te marooro man korean kibu n taeka man Akai 1:6 iaon te boote. Tera ae ti kona n reiakinna man iango aikai—unikan koraa ma aki kona ni uaa, amwarake ma e aki kona n rauaki nanona, ke kareke mwane ma e katikua n te baeki ae bwangabwanga—iaon kabanean te tai ni bwaai irarikin aika e tangiria te Uea bwa ti na karaoi? Ngkai te Uea e aki tuangiriira bwa ti na kabanea riki ara iango iaon katean te tembora, tera ae E tuangira bwa ti kabanea ara iango iaona? Ti na kanga ni karaoi bwaai aikanne bwa bwaai aika a moanibwai ni maiura? A kona waaki ni kakukurei aikai ni buokiia kairake n rinanoi aia motinnano ni karimoai moa ana bwai te Atua ni maiuia.

• Kanakin te toa bon te tai ae moan te tamaroa ni katoa wiiki n rinanon ara motinnano nakon Iesu Kristo. Ti na kanga ni kabongna te toa n iangoia ngkana ti a moanna n riki n aron te Tia Kamaiu? Tao a kona kairake n tibwauaia bwa a kanga ni karaoa aei. A kona naba ni koroi titiraki ae a kona n titirakiniia bon irouia n tain te toa. Kaoia bwa a na iangoa teuana ke e raka riki iaon booki aika tabu, rongorongo, ke bwaai ni mwakuri riki tabeua iaan “Reitan Bwaai n Mwakuri” ngkai a koroi araia.

• Beretitenti Dieter F. Uchtdorf, n ana rongorongo “Ni Kaineti ma Bwaai Aika A Kakawaki Riki” (Riaona, Nobembwa. 2010, 19–22), tibwauai reirei aika a na kona ni buokiia kairake “kam na iangoi [aroaromi] ” (Akai 1:5). Ko kona ni kaoia n tatabemaniia ke kurubu aika uarereke bwa a na wareki kabanean mwakoro ake teniua man te marooro (ni moa man te mwakoro “The Power of Basics”), n tara nanon ae ti na kabanea ara iango iaon maiun te Tia Kamaiu. A kona n tibwaua te bwai ae a namakinna ae kaungaia bwa a na karaoia ni kakorakorai aia motinnano nakon Iesu Kristo.

• A mwaiti mai ibuakora aika a tabetabe ni karaoi bwaai aika raoiroi. Ma tiaki n tainako bwaai aika moan te raoiroi. Iangoia n tibwaua te marooro man te moan mwakoro n ana rongorongo Beretitenti Dallin H. Oaks “Good, Better, Best” (Liahona, Nobembwa. 2007, 104–8) are e na kona ni buokiia kairake n ata te reirei aei. Ko na bae ni kaoia naba bwa a na koroi aia waaki ni kakukurei ni katoabong. Tuangiia bwa a na rinanona bon irouia ngkana waaki ni kakukurei e “raoiroi,” “nakoraoi riki,” ke “te kabanea n nakoraoi.” Tera ae karika te waaki ni kakurei bwa te bwai ae “te kabanea n nakoraoi”? Kaungaia kairake bwa a na tibwauaia bon imarenaia n tatabemaniia te bwai ae a reiakina man rinanoana-bon irouia.

Karaoia inanon te Onimaki

Kaungaiia kaain te kiraati ke te kooram ni iangoi ao ni korea mwiin te bwai are a na karaoia ni karaoi namakin aika a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Iotua 24:14–15; Mataio 6:19–34; 22:36–40; Mareko 10:17–22; 1 I-Korinto 11:23–28; 2 I-Korinto 13:5; I-Korote 3:1–2 (Ti riai ni karimoai ana bwai te Atua inanon maiura)

• Scott D. Whiting, “N Riki n Ai Arona,” Liahona, Nobembwa 2020, 12–15

• “As Now We Take the Sacrament,” Hymns, no. 169

Reirei n ana Kawai te Tia Kamaiu

“E aki riai bwa ti karaoi bwaai ni kabane inanon teuana te kiraati bwa ti aonga n riing nanoia tabeman—n taainako teuana ke uoua iango aika kakawaki a bon tau” (Teaching in the Savior’s Way,7).