At the Well (Eo amin’ny fantsakana), nataon’i Crystal Suzanne

12 febroary

Ahoana no hanatsarako ny fitsaohako an’ Andriamanitra?

Jaona 2–4

Miaraha mifanakalo hevitra

Tarihin’ny mpikambana iray ao amin’ny fiadidian’ny kilasy na kôlejy; manodidina ny 10–20 minitra eo

Avereno miaraka any amin’ny fiantombohan’ny fivoriana ny Fanevan’ny Zatovovavy na ny Fanevan’ny kôlejin’ny Fisoronana Aharôna. Avy eo dia mitariha fifanakalozan-kevitra momba ny asa famonjena sy ho an’ny fisandratana amin’ny alalan’ny fampiasana ny iray na ny maromaro amin’ireo fanontaniana etsy ambany na fanontaniana nomaninao manokana (jereo ny Boky torolalan’ny Fiangonana maneran-tany, 10.2, 11.2). Manomàna fomba hanaovana ireo zavatra izay ifanakalozanareo hevitra.

• Fiainana ny filazantsara. Ahoana no nanakaikezantsika kokoa ny Mpamonjy? Ahoana no hiezahantsika hitovy kokoa Aminy?

• Fikarakarana ireo sahirana. Iza no tao an-tsaintsika tato ho ato? Ahoana no ahafahantsika manampy ireny olona tsirairay ireny?

• Fanasana ny rehetra handray ny filazantsara. Ahoana no ahafahantsika mamaly ny fanontanian’ny namantsika momba ny Fiangonana amin’ny fomba izay manamafy orina ny finoan’izy ireo ny Mpamonjy?

• Fampiraisana ny fianakaviana ho mandrakizay. Inona avy ireo fomba vitsivitsy ahafahantsika mifandray tsara kokoa amin’ireo havana, toy ny raibe sy renibe sy ny zanaky ny mpiray tampo amin’ny ray aman-dreny?

Any amin’ny fiafaran’ny lesona dia ataovy araka izay mety izao manaraka izao:

• Mijoroa ho vavolombelona mikasika ireo fitsipika nampianarina.

• Ampahatsiahivo an’ireo mpikambana ao amin’ny kilasy na ny kôlejy ireo drafitra sy fanasana izay natao nandritra ny fivoriana.

Ampianaro ny fotopampianarana

Tarihin’ny olon-dehibe mpitarika iray na zatovo iray; manodidina ny 25–35 minitra eo

Manomàna tena ara-panahy

Mety hoe naka rano matetika teo am-patsakana ilay vehivavy avy ao Samaria izay voalaza ao amin’ny Jaona 4. Saingy zavatra hafa no nitranga tamin’ity indray mitoraka ity. Tafahaona tamina lehilahy Jiosy iray izay nangataka rano taminy izy. Izay zavatra izay fotsiny dia efa tsy nahazatra satria tsy nifanerasera tamin’ny Samaritana ny Jiosy tamin’ny ankapobeny. Fa nisy zavatra hafa tsy nahazatra mahakasika io lehilahy io. Noho ny fahatsapan’ilay vehivavy hoe tena mpaminany angamba Izy dia nametraka fanontaniana taminy momba ny fitsaohana an’ Andriamanitra ilay vehivavy. Azo atao ve ny mitsaoka an’ Andriamanitra any Samaria? Sa ve tsy maintsy mankany Jerosalema, araka ny nolazain’ny Jiosy, ny olona mba hitsaoka? (Jereo ny Jaona 4:19–20). Nanazava ilay lehilahy fa tsy manan-danja noho ny fomba hitsaohantsika ny toerana hitsaohantsika: “Ny tena mpivavaka hivavaka amin’ny Ray amin’ny fanahy sy ny fahamarinana; fa ny Ray koa mitady ny mpivavaka aminy ho tahaka izany” (Jaona 4:23). Avy eo dia nilaza taminy ilay lehilahy hoe iza Izy: Izy no ilay Kristy, ny Mpamonjy izao tontolo izao (jereo ny Jaona 4:25–26).

Azon’ireo zatovo ampianarinao ve ny dikan’izany hoe mitsaoka ny Ray any An-danitra izany? Ankoatra ny fitsaohana any am-piangonana (jereo ny Fotopampianarana sy Fanekempihavanana 59:9–10), dia inona koa ny fahafahana ananan’izy ireo mba hitsaoka Azy, isan’izany ireo izay mety tsy fantatr’izy ireo hoe fitsaohana? Ireto loharanon-kevitra manaraka ireto dia afaka manampy anao hiomana hampianatra azy ireo mikasika ny fomba hanatsarany ny fitsaohany an’ Andriamanitra: Salamo 95:1–7; Matio 4:8–10; Almà 32:4–11; Fotopampianarana sy Fanekempihavanana 20:17–19; 93:19–20, ary ny hafatry ny Eveka Dean M. Davies hoe “Ireo fitahiana entin’ny fitsaohana” (Liahona, nôv. 2016, 93–95).

Miaraha mianatra

Mba hanombohana fifanakalozan-kevitra momba ny fanatsarana ny fitsaohana dia azonao atao ny manasa ireo mpikambana ao amin’ny kilasy na ny kôlejy hamerina hijery tsirairay ny Jaona 4:19–26 ary hanoratra ny valin’ny fanontaniana toy ireto: Inona no antony hitsaohako an’ Andriamanitra? Midika inona amiko izany hoe mitsaoka an’ Andriamanitra izany? Mety hanampy koa ny fiarahana mijery ny famaritana eo ambanin’ny hoe “Fitsaohana” ao amin’ny Torolalana ho an’ny soratra masina (scriptures.ChurchofJesusChrist.org). Rehefa avy nomena fotoana hisaintsainana ireo fanontaniana ireo izy ireo dia asao hizara ny eritreriny. Ireto sahanasa manaraka ireto dia afaka manampy azy ireo handray ny bitsiky ny Fanahy Masina.

• Hahazo hevitra manan-danja mikasika ny dikan’ny hoe mitsaoka an’ Andriamanitra ireo mpikambana ao amin’ny kilasy na ny kôlejy misy anao. Azonao atao ny mangataka azy ireo hizara zavatra niainany rehefa nahatsapa izy ireo fa nitsaoka an’ Andriamanitra. Afaka mampitombo ny fahatakaran’izy ireo ny andinin-tsoratra masina tahaka ireto manaraka ireto ary manome azy ireo hevitra mikasika ny fomba hampanan-danja kokoa ny fitsaohany an’ Andriamanitra: Salamo 95:1–7; Matio 4:8–10; Almà 32:4–11; Fotopampianarana sy Fanekempihavanana 20:17–19; 93:19–20. Azon’izy ireo ifanakalozan-kevitra ihany koa ny teny nambaran’ny Loholona Bruce R. McConkie ao amin’ny “Loharanom-pitaovana enti-manohana.”

• Mba hanampiana ny zatovo hanatsara ny fitsaohany an’ Andriamanitra dia hevero ny hanoratra ireto lohateny ireto eny amin’ny solaitrabe: Iza, Nahoana, Aiza, ary Ahoana. Asao izy ireo handinika ireo soratra masina voatanisa ao amin’ny “Fitsaohana” ao amin’ny Torolalana ho an’ny soratra masina (scriptures.ChurchofJesusChrist.org), dia hitady ireo andinin-tsoratra masina izay manampy azy ireo hahatakatra hoe iza, nahoana, aiza, ary ahoana no tokony hitsaohantsika. Rehefa mahita soratra masina mifandray amin’izany izy ireo dia asao mba hifanakalo hevitra momba izany amin’ny kilasy na ny kôlejy ary hanoratra ilay toko sy andininy eo ambanin’ny lohateny mifanaraka amin’izany. Amporisiho izy ireo hizara ny zavatra niainany rehefa nahatsapa ho akaiky kokoa an’ Andriamanitra tamin’ny alalan’ny fitsaohana.

• Ny hafatry ny Eveka Dean M. Davies hoe “Ireo fitahiana entin’ny fitsaohana” dia mirakitra ohatra ana olona mitsaoka an’ Andriamanitra. Azonareo atao tsara ny miara-mamaky ilay fizarana hoe “Inona no atao hoe fitsaohana?” Avy eo ny olona tsirairay dia afaka mandinika ny iray amin’ireo ohatra ana olona mitsaoka izay hita ao amin’ireo fizarana telo manaraka ao amin’ilay hafatra. Inona no ampianarin’ny ohatra tsirairay antsika momba ny fitsaohana an’ Andriamanitra? Inona no ampianarin’ilay fizarana farany ao amin’ilay hafatra momba ireo fitahiana azo avy amin’ny fitsaohana Azy amim-panoloran-tena? Entanin’ny Fanahy hanao inona isika mba hanatsarana ny fitsaohantsika an’ Andriamanitra?

Tafiditra ao anatin’ny fitsaohana ny fandalinana soratra masina sy ireo fomba fanao hafa izay maneho fanolorantena sy fitiavana an’ Andriamanitra.

Manaova asa amim-pinoana

Amporisiho ireo mpikambana ao amin’ny kilasy na kôlejy mba hisaintsaina sy hirakitra an-tsoratra ny zavatra izay hataon’izy ireo mba handraisana andraikitra amin’ireo fahatsapana izay noraisin’izy ireo androany. Raha tian’izy ireo dia afaka mizara ny heviny izy ireo. Asao izy ireo hieritreritra hoe rehefa mandray andraikitra ka mampihatra ny zavatra tsapany izy ireo dia ahoana no hanamafisan’izany ny fifandraisan’izy ireo amin’ny Ray any An-danitra sy i Jesoa Kristy.

Loharanom-pitaovana enti-manohana

• “Éléments de culte,” Enseignements des présidents de l’Église : David O. McKay (2003), 29–37

• Nampianatra ny Loholona Bruce R. McConkie hoe: “Ny fitsaohana marina sy lavorary dia ny fanarahana ny dian’ilay Zanak’ Andriamanitra; izany dia ny fitandremana ny didy sy ny fankatoavana ny sitrapon’ny Ray araka izay ilaina mba hahafahantsika mandroso amin’ny fahasoavana miampy fahasoavana mandra-pahatonga antsika hasandratra ao amin’i Kristy tahaka Azy ao amin’ny Ray. Mihoatra lavitra noho ny vavaka sy ny toriteny ary ny hira izany. Miaina sy manao ary mankatò izany. Fakana tahaka ny fiainan’ilay Ohatra lehibe izany” (“How to Worship,” Ensign, Dec. 1971, 130; Sora-dehibe nampanarahana toetrandro).

Mampianatra araka ny fomban’ny Mpamonjy

Ny fotopampianarana hita ao amin’ny soratra masina sy ny tenin’ireo mpaminanin’ny andro farany dia manana hery hanovana fo sy hampitomboana finoana. Rehefa “[manandrana] ny herin’ny tenin’ Andriamanitra” ianao sy ireo olona ampianarinao dia hahita fa “manana fironana lehibe hitarika ny olona hanao izay marina” izany (Almà 31:5).