26 Fēpueli

ʻOku Tokoniʻi Fēfē Au ʻe he Ngaahi Akonaki ʻa e Fakamoʻuí ke u Fakahoko ha Ngaahi Fakamaau Māʻoniʻoní?

Mātiu 6–7

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha ngaahi kaveinga kuo aleaʻi ʻe he kau pīsopelikí ʻi heʻetau fakataha alēlea fakauooti ʻa e toʻu tupú? Ko e hā ha meʻa ʻe lava ke tau fakahoko fakakalasi pe fakakōlomu ʻo makatuʻunga ʻi he ngaahi fealeaʻaki ko iá?

• Tokanga kiate kinautolu ʻoku faingataʻaʻiá. Te tau tokoniʻi fēfē nai ʻa e kakaí ʻi ha ngaahi founga faka-Kalaisi ʻi he taimi ʻoku tau vakai ai ki ha fiemaʻu ka ʻoku ʻikai ke tau ʻilo ʻa e meʻa ke lea ʻakí?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha meʻa kuo tau maʻu ʻi he ongoongolelei ʻo Sīsū Kalaisí ʻokú ne ʻomi ʻa e fiefiá? Te tau lava fēfē nai ke vahevahe ʻa e fiefia ko iá mo e niʻihi kehé?

• Fakatahaʻi ʻa e ngaahi fāmilí ke taʻengata. Ko e hā ha meʻa ʻoku tau fakahoko ke fekumi ai ki he ngaahi hingoa ʻo ʻetau ngaahi kui ʻoku nau fie maʻu ʻa e ngaahi ouau fakatemipalé? Ko e hā ha meʻa ʻe lava ke tau fakahoko ke tokoni ai ki he niʻihi kehé ke nau fekumi ki he ngaahi hingoa ʻo ʻenau ngaahi kuí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻOku ʻi ai ha fakahehema ʻiate kitautolu takitaha—ko e ola ʻo hotau natula hingá—ke fakamaauʻi e niʻihi kehé, ʻo ʻikai totonu pe fie māʻoniʻoni he taimi ʻe niʻihi. Ka naʻe akoʻi ʻe he Fakamoʻuí, “ʻOua ʻe fakamaau taʻe-māʻoniʻoni, koeʻuhi ke ʻoua naʻa fakamaaua ʻa kimoutolu, kae fakamaau ʻi he fakamaau ʻoku māʻoniʻoní” (Liliu ʻa Siosefa Sāmitá, Mātiu 7:1 ). Fakalaulauloto ki he founga ʻe lava ke tāpuekina ai koe mo kinautolu ʻokú ke akoʻí ʻi hoʻo muimui ki he faleʻi ko ʻení. Naʻe fakahaaʻi ʻe he Fakamoʻuí ʻi he tā sīpingá ʻa ʻEne ʻuhinga ki he “fakamaau māʻoniʻoní.” Hangē ko ʻení, fakakaukau ki he founga naʻá Ne fakafeangai ai ki he fefine naʻe feʻauakí. Naʻe ʻikai ke Ne fakahalaiaʻi ia, ka naʻe ʻikai foki ke Ne fakaoleoleʻi ʻene angahalá. Naʻá Ne fakaafeʻi ia ke “ʻalu pea ʻoua ʻe toe faiangahala” (Sione 8:11). Ko e hā kuó ke ako fekauʻaki mo e fakamaau māʻoniʻoní mei he Fakamoʻuí?

ʻI hoʻo fakalaulauloto ki he founga te ke tokoni ai ke mahino ki he toʻu tupú ʻa e fakamaau māʻoniʻoní, ʻe lava ke ke ako ʻa e Mātiu 7:1–2 mo e pōpoaki ʻa ʻEletā Lini G. Lōpini “Ko e Fakamaau Māʻoniʻoní” (Liahona, Nōvema 2016, 96–98).

Ako Fakataha

Te ke lava ʻo kamataʻi ha fealēleaʻaki fekauʻaki mo e fakamaau ʻi he māʻoniʻoní ʻaki haʻo kole ki he kau mēmipa ʻo e kalasí pe kōlomú ke nau fakakaukau ki ha taimi ne nau ongoʻi ai ha fakamaau taʻetotonu ʻa e niʻihi kehé. Naʻá ke ongoʻi fēfē? Ko e hā ʻoku tau ako fekauʻaki mo e fakamāú mei he ngaahi akonaki ʻa e Fakamoʻuí ʻi he Mātiu 7:1–5?. Ko e hā nai ʻe ʻuhinga ʻo e kupuʻi lea “fakamaau māʻoniʻoní”? Te mou lava ʻo aleaʻi e ngaahi veesi ko ʻení ʻaki hano fakaafeʻi e kau mēmipa ʻo e kalasí pe kōlomú ke nau toe fakalea e veesi takitaha ʻi he lea pē ʻanautolu. ʻE lava foki ke tokoni e ngaahi ʻekitivitī hangē ko ʻení kiate kinautolu ʻokú ke akoʻí ke nau fakamaau māʻoniʻoni.

• ʻE lava ke tokoniʻi kitautolu ʻe he ngaahi akonaki ʻa e Fakamoʻuí ʻi he Mātiu 6–7 ke tau “fakamaau ʻi he fakamaau māʻoniʻoní.” Ke tokoni ke ʻiloʻi ʻe he kau mēmipa ʻo e kalasí pe kōlomú ʻa e ngaahi akonaki ko ʻení, te ke lava ʻo ʻoange kiate kinautolu takitaha ha taha ʻo e ngaahi potufolofola ko ʻení ke nau fakalaulauloto ki ai: Mātiu 6:14–15; 7:3–5; 7:12; 7:15–20. Ko e hā ʻoku fokotuʻu mai ʻe he folofola ʻa e Fakamoʻuí ʻi he ngaahi veesi ko ʻení fekauʻaki mo e ʻuhinga ʻo e fakamaau māʻoniʻoní? Ko e hā te tau lava ʻo ako mei he sīpinga ʻa e Fakamoʻuí ʻi he Sione 8:1–11 mo e Mātiu 9:10–13? Ko e hā ha ngaahi faikehekehe ʻoku tau fakatokangaʻi ʻi he founga hono fakamaauʻi kitautolu ʻe he Fakamoʻuí mo e founga ʻoku tau faʻa fefakamaauʻaki aí?

• Koeʻuhí ʻoku tau maʻu kotoa ʻa e tauʻatāina ke filí, kuo pau ai ke tau fai maʻu pē ha fakamaau ʻi he meʻa ʻoku tau loto pe ʻikai loto ke faí. Ka ʻi heʻetau hoko ko e kau muimui ʻo e Fakamoʻuí, ʻoku tau fāifeinga ke ʻoua naʻa tau fakamaauʻi pe fakaangaʻi e kakai kehé. Ke tokoni ke mahino ki he toʻu tupú ʻa e faikehekehé, vahevahe mo kinautolu e lea ʻa Palesiteni Tāleni H. ʻOakesi ʻi he “Ngaahi Maʻuʻanga Tokoni Poupoú.” Ngāue fakataha ko ha kalasi pe kōlomu ke fakakaukauʻi ha ngaahi sīpinga ʻo hono fakamāuʻi ha tūkunga—hangē ko ha ʻekitivitī, meʻa ʻoku hoko, pe ko ha fepōtalanoaʻaki—kae ʻikai fakamāuʻi ha taha ʻoku kau ki ai. Ko e hā ʻoku lelei ange ai ke fakamāuʻi ha tūkunga kae ʻikai ko ha tokotaha? ʻE lava ke maʻu ʻe he toʻu tupú ha ngaahi fehuʻi kehe fekauʻaki mo e fakamaau māʻoniʻoní (vakai ki he ngaahi sīpinga ʻi he “Ngaahi Maʻuʻanga Tokoni Poupoú”). Aleaʻi fakataha ʻenau ngaahi fehuʻí ʻo fakaʻaongaʻi ʻa e fakamatala ʻi he “Ngaahi Maʻuʻanga Tokoni Poupoú” ke maʻu e ngaahi talí. Fakaafeʻi e toʻu tupú ke vahevahe ʻa e meʻa ʻoku nau ongoʻi ʻoku ueʻi kinautolu ke fai koeʻuhí ko e meʻa ʻoku nau akó.

• ʻI he pōpoaki konifelenisi lahi “Ko e Fakatupulaki ʻo e Fakaʻutoʻuta Leleí pea ʻIkai Loto Fakamaau ki he Niʻihi Kehé” (Liahona, Mē 2010, 103–5), naʻe fakahoko ai ʻe ʻEletā Kelekōlio A. Siutaisa ha talanoa ʻe ua—ʻo e kaungāmeʻa ʻo Sīsū ko Māʻatá mo ia ʻo ha tangata naʻe tokoniʻi ʻe ʻEletā Siutaisa. Ko e hā ʻoku akoʻi ʻe he ongo talanoa ko ʻení fekauʻaki mo e founga ʻoku totonu ke tau vakai mo fakafeangai ai ki he niʻihi kehé? Ko e hā ha ngaahi tefitoʻi moʻoni te nau lava ʻo tokoniʻi kitautolu ke tau anga faka-Kalaisi ange mo fakamaau māʻoniʻoni ange? ʻE lava ke ʻoatu ʻe he foʻi vitiō Stop It!” (ChurchofJesusChrist.org) ha ngaahi fakakaukau lahi ange.

ʻI heʻetau ako ke anga faka-Kalaisi angé, ʻe lava ke tau fakamaau māʻoniʻoni ange.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Ngaahi sīpinga ʻo e ngaahi fehuʻi fekauʻaki mo hono fakamaauʻi ʻo e niʻihi kehé: “Kuo akoʻi au ke u fili fakalelei hoku ngaahi kaungāmeʻá. Ka te u lava fēfē ʻo fakahoko ia taʻe te u fakamaauʻi e kakaí?” “ʻI he taimi ʻoku ou feinga ai ke moʻui ʻaki e ongoongoleleí, ʻoku tukuakiʻi au ki he loto fakamāú. Te u tuʻu maʻu fēfē ʻi he meʻa ʻoku ou tui ki aí mo fakahaaʻi ʻeku ʻofá kiate kinautolu ʻoku ʻikai tui tataú?”

• 1 Samuela 16:7; Molonai 7:12–19; Tokāteline mo e Ngaahi Fuakava 11:12

• Ngaahi Tefito ʻo e Ongoongoleleí, “Loto-Fakamaau ki he Niʻihi Kehé,” topics.ChurchofJesusChrist.org

• Naʻe akoʻi ʻe Tāleni H. ʻOakesi: “ʻI he ngaahi taimi ʻe lava aí, tau fakaʻehiʻehi mei hono fakamaauʻi ʻo e kakaí kae fakamaauʻi pē ʻa e ngaahi tūkungá. ʻOku mahuʻinga ʻeni ʻi he taimi kotoa pē ʻoku tau feinga ai ke ngāue ʻi ha ngaahi tuʻunga moʻui kehe mei he niʻihi kehe kuo pau ke tau feohi mo ia—ʻi ʻapi, ʻi he ngāué, pe ʻi he koló. Te tau lava ʻo fokotuʻu mo ngāueʻi e ngaahi tuʻunga moʻui ʻoku māʻolungá maʻatautolu pe ko hotau ngaahi ʻapí taʻe te tau fakahalaiaʻi ʻa kinautolu ʻoku kehé” (“‘Judge Not’ and Judging,” Ensign, Aug. 1999, 11).

Ko e Faiako ʻi he Founga ʻa e Fakamoʻuí

ʻOku totonu ke poupou hoʻo ngaahi ngāué ki he ngaahi ngāue ʻa e mātuʻá. Vahevahe mo e mātuʻa ʻa e toʻu tupú ʻa e meʻa ʻokú ke akoʻí. Fealēleaʻaki mo kinautolu ke nau ako fekauʻaki mo e ngaahi fie maʻu ʻa e toʻu tupu ʻi hoʻo kalasí pea mo e founga lelei taha ke feau ʻaki e ngaahi fie maʻu ko iá.