E vakabulai luvei Jairo yalewa na Karisito

Daughter, Arise [Goneyalewa, Tucake Mai], mai vei Simon Dewey

12 ni Maji

Ena Vukei Au Vakacava na iVakabula Meu Rawa na Noqu Rere?

Maciu 9–10; Marika 5; Luke 9

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Eda raica vakacava na liga ni Turaga ni cakacaka tiko ena noda bula?

• Vukei ira era gadreva tu na veivuke. E rawa vakacava meda veitokoni vakai keda ena veika eda sotava tiko?

• Sureta na tamata kecega me ra ciqoma na kosipeli. E rawa vakacava meda vakayagataka vakavinaka na tekinolaji me iyaya ni cakacaka ni kena wasei na kosipeli?

• Vakaduavatataki ni matavuvale me tawamudu. Na cava eda sa cakava tiko meda vukea kina na noda matavuvale mera lako mai vei Karisito?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Wase e 5 ena ivola i Marika e volai kina ni tolu na tamata eratou lako vei Jisu ka tiko na vu ni nodratou rere. E dua na tamata ka tiko vua na “yalo velavela” a sotava e dua bula vakatikitikitaki, kina “veiulu ni vanua, kei na veibulubulu, a sa dauqoqolou, ka dau tava na yagona ena veivatu” (Marika 5:2, 5). O Jairo, e dua na turaga ni vale ni lotu, a rerevaka de na vakayalia na luvena yalewa, ka sa “voleka sara ni mate” (Marika 5:23). Kei na dua na marama “turidra-balavu ka yabaki tinikarua” a sega ni bula sa vakayalia kina na “nonai yau kecega” vei “ira na vuniwai era le vuqa” (Marika 5:25–26). Na tamata yadua o vakavulica era duidui ka dui sotava yadua na veika era rerevaka vakai ira. Ia me vaka ga na nona rawa ni vakasevi ira tani na yalo velavela na iVakabula, vakaturi ira cake na mate, ka veivakabulai mai na dua na mate ca, e rawa ni vukei keda o Koya nida rere. Na nona ivakasala vei Jairo e tiko kina na kaukauwa levu kina noda bula nikua: “Kakua ni yalolailai, vakadinata ga” (Marika 5:36).

Mo vakavakarau mo veivakavulici, navuca mo vulica na itukutuku nei Elder Ronald A. Rasband “Dou Kakua ni Rarawa” (Liaona, Nove. 2018, 18–21) kei na itukutuku nei Sisita Lisa L. Harkness “Mo Cegu, Mo Maravu Mai” (Liaona, Nove. 2020, 80–82).

Vulica Vata

Sa rawa mo sureta e dua na lewe ni kalasi se kuoramu me vakalekalekataka na italanoa ena Marika 5 nei Jisu ka a sureti Jairo kina me “kakua ni rere” (raica na tikina e 22–24, 35–43), se rawa nio railesuva vakailawalawa na italanoa. E rawa nio cakava vakakina ena italanoa tale eso ena iwase oqo—na tagane curumi yalo velavela kei na yalewa turidra-balavu. E tautauvata vakacava na veigauna ni rere vakaoqo vei ira eda na rairai sotava ena noda bula? Na cava eda rawa ni vulica mai na vei italanoa oqo me baleta na iVakabula kei na sala meda vakasaqara kina na Nona veivuke? Na veitaviqaravi era e rawa ni vukei ira na itabagone mera vakalevutaka cake na nodra vakabauti Jisu Karisito ka vulica mera muria na Nona ivakasala: “Kakua ni yalolailai, vakadinata ga” (Marika 5:36).

• Na veisureti ni Turaga meda kua ni rere, ka cavuti wasoma ena ivolanikalou taucoko, ena vakalougatataki ira na itabagone ena gauna era rere kina. Sureti ira mera wilika na ivolanikalou ena “iVurevure Veitokoni” ka cakava e dua na ivolakabi me vakabi e vale—se dua na ivolakabi vakalivaliva e rawa nira wasea ena initaneti—yavutaki ena ivolanikalou era wilika. Nira veiwaseitaka na veika era sa bulia vakai ira, sureti ira me ra wasea talega na veika era sa vulica ka rawa ni vukei ira ena gauna era rere kina. Na gauna cava sa vukei keda kina na iVakabula ena dua na gauna ni rere?

• Navuca mo vakaraitaka e dua na iyaloyalo ni iVakabula e vakamaravutaka tiko na cava, me vaka na kena e tiko ena ituvatuva vakalivaliva ni itukutuku nei Sister Lisa L. Harkness “Mo Cegu, Mo Maravu Mai” (raica talega na iVola ni iYaloyalo Vakosipeli [2009], naba 40). Mo qai wasea o iko se dua tale o lesia na itukutuku ni iVakabula ni vakamaravutaka tiko na cava mai na Marika 4:35–41 se mai na itukutuku nei Sister Harkness. Eda sa vakataki ira vakacava na tiko e waqa ena so na gauna? Na cava eda vulica mai nai talanoa oqo baleta na sala e rawa ni vukei keda kina na iVakabula ena gauna eda rere kina? Sureti ira na itabagone me ra railesuva na itukutuku nei Sister Harkness, ka vaqara na malanivosa se yatuvosa e vukei ira me vakalevutaki cake nodra vakabauti Jisu Karisito. Sa rawa mera vola ena vava ni volavola na veika oqo. Ena rawa ni vukei keda vakacava na noda vakabauta na iVakabula ena gauna e sega kina ni Nona lewa me vakamaravutaka na cava ena noda bula?

• E vica na serenilotu e vakacaucautaka na iVakabula ena Nona veivakacegui kei na veivakaukauwataki ena gauna ni bolebole kei na veilecayaki, me vaka na “Au Rai Vei Kemuni” se “Ni Tu Ga vei Au!” (Serenilotu,, naba 51, 94). Sa rawa mo ni lagata se wilika vata e vica vei ira oqo, ka vakaraica na sala e rawa ni vukei keda kina na iVakabula.

• E dau yaco na rere kei na nuiqawaqawa nida sotava na bolebole ni bula oqo. Vei ira eso, na veika oqo ena rawa ni veivakaleqai. Na nomu kalasi se kuoramu ena yaga vei ira e dua na veivosaki baleta na sala e rawa ni vukei ira kina na iVakabula o ira era sasaga bula tiko mai na vei ivakatagedegede eso ni nuiqawaqawa. E rawa nira railesuva vata na lewe ni kalasi se kuoramu na itukutuku nei Elder Ronald A. Rasband “Dou Kakua Ni Rarawa” se na itukutuku nei Elder Erich W. Kopischke “Sotavi na Mate ni Vakasama” (Liaona, Nove. 2021, 36–38), ka vaqara na dina e vakaibalebale vei ira ka wasea na veika era sa kunea. Vakauqeti ira na itabagone mera veitalanoa kei dua na iliuliu se itubutubu niutaki se sikova na MentalHealth.ChurchofJesusChrist.org kevaka era gadreva na veivuke.

cauravou e vuli tiko

Sa yalataka tu na iVakabula me vukei keda nida gole Vua ena gauna ni rere kei na veilecayaki.

Cakacaka ena Vakabauta

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Josua 1:9; Same 56:3–4; Aisea 41:10; Joni 14:27; 2 Timoci 1:7; Vunau kei na Veiyalayalati 50:41–44; 68:6

Veivakavulici ena iVakarau ni iVakabula

Nio veivakavulici, e sega nio soli itukutuku tikoga, vukei ira na itabagone mera raica ka kila vakataki ira mai na ivolanikalou kei na nodra vosa na parofita na dina vakosipeli.