soqoni ni matabose ni tabanalevu

26 ni Maji

Era na Cakacakavata Vakacava na Goneyalewa kei na Cauravou me Vukea na Tarai Cake ni Matanitu ni Kalou?

Maciu 13; Luke 8; 13

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Eda sa kunea tiko vakacava na reki ena noda muri Jisu Karisito?

• Vukei ira era gadreva tu na veivuke. O cei ena noda tabanalevu se itikotiko e gadreva na noda veivuke? E rawa vakacava nida vukei ira?

• Sureta na tamata kece mera ciqoma na kosipeli. Eda na veivukei vakacava vakai keda meda vakavakarau kina veiqaravi vakadaukaulotu?

• Vakaduavatataki ni matavuvale me tawamudu. Eda na cau vakacava kina sasaga ni noda tabanalevu meda cakava na tuva kawa kei na cakacaka ni valetabu?

Ena itini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ena vuqa na italanoa vakaibalebale e kune ena Maciu 13, e vakatavulica na iVakabula na dina bibi me baleta na matanitu ni Kalou kei na kena tubu vakasakiti ena noda gauna oqo. Erua na vosa vakatautauvata oqo, e dua na ka lailai ka rawarawa ka yaco me dua na ka cecere. Na nona ivalavala e dua na luvena tagane se yalewa na Kalou a vukea me yaco na cakamana. A tubu cake e dua na sore ni musita lailai o koya “sa kauta e dua na tamata, [ka] tea ena nona were” ki na dua na vunikau levu mera “ro ena veitabana” na manumanu vuka (Maciu 13:31–32). Kei na dua na ikumuni lailai ni leveni a vakavuna me tubu e dua na iwiliwili levu ni valawa bali ni “sa taura e dua na yalewa, ka vuni[taka] e loma ni madrai droka e tolu na ivakarau” (Maciu 13:33). Sa tubu ka vakatetei na matanitu ni Kalou ena gauna oqo baleta nio ira na Nona Yalododonu—oka kina o ira na goneyalewa kei na cauravou—era cakacaka vata kei Koya me taraicake.

Me ikuri ni wiliwili ena Maciu 13 kei na Luke 8; 13 ena macawa oqo, vakasamataka mo wilika na itukutuku nei Peresitedi M. Russell Ballard “Tagane kei na Yalewa ena Cakacaka ni Turaga” (Liaona, Epe. 2014, 2–5) kei na itukutuku nei Peresitedi Jean B. Bingham “Duavata ena Vakayacori ni Cakacaka ni Kalou” (Liaona, Me 2020, 60–63).

Vulica Vata

Me vukei ira na itabagone o vakavulica mera raitayaloyalotaka na italanoa vakaibalebale ena Maciu 13, vakasamataka mo vakaraitaka na iyaloyalo ni dua na sore ni musita, leveni (me vaka na isi), na mataniciva, kei na lawa ni qoli. E rawa nira railesuva na itabagone na Maciu 13:31–33, 45–48 ka wasea na veika era vakavulica vei ira na vei vosa vakatautauvata oqo me baleta na matanitu vakalomalagi. Eda na vakayagataka vakacava na itukutuku ni vosa vakatautauvata oqo ena noda bula? Na cava eda sa cakava tiko me vukea na Turaga me taracake na Nona matanitu? Oqo e vica na itaviqaravi e rawa ni veivuke ena veivosaki.

• Ni bera na soqoni, sureta na lewe ni kalasi se kuoramu mera vulica na veika baleti ira na marama kei na turaga era ivakaraitaki vinaka nikua se na gauna sa oti ena vukei ni kena taraicake na matanitu ni Kalou. E rawa nio ira mai na ivolanikalou (raica na “iVurevure Veitokoni”), mai na itukutuku makawa ni Lotu, se mai na nodra bula vakai ira. Kerei ira na itabagone mera wasea na veika era sa vulica. Ena sala cava era sa vukea kina na Turaga o ira na tamata oqo me tara cake na Nona matanitu? Eda na muria vakacava na nodra ivakaraitaki?

• Kevaka o vakavulici ira na cauravou, sureti ira me ra railesuva na itukutuku nei Peresitedi Bonnie L. Oscarson “Era Cakacaka na Goneyalewa” (Liaona, Me 2018, 36–38) ka vakasaqara ka wasea na sala eso era cau kina na goneyalewa kina cakacaka ni veivakabulai kei na bula vakacerecerei ni Kalou. E rawa nira cakava tale ga na goneyalewa mera vakasaqaqara vata na itukutuku nei Brother Douglas D. Holmes “Mera Kila na Matabete i Eroni Yadua” (Liaona, Me 2018, 50–53). E tautauvata vakacava na nodra itavi na goneyalewa kei na cauravou? E rawa vakacava nida cakacaka vata vakavinaka cake ni da cakava na cakacaka ni Kalou?

• Me vukei ira na itabagone mera kila na sala era cakacaka vata kina na marama kei na turaga me tarai cake na matanitu ni Kalou, e rawa nio vola na taro ena vava me vakaoqo: Na cava na vuna e gadreva kina na Kalou mera cakacaka vata na marama kei na turaga me vukea na tarai cake ni Nona matanitu? Era na cakacakavata vakavinaka vakacava na mataveiliutaki ni kalasi kei na kuoramu? E rawa nira railesuva na itabagone eso na tiki ni itukutuku nei Peresitedi M. Russell Ballard “Tagane kei na Yalewa ena Cakacaka ni Turaga” se na itukutuku nei Peresitedi Jean B. Bingham “Duavata ena Vakayacori ni Cakacaka ni Kalou,” vakabibi na tikina e tekivu ena “Na cava na kena ibalebale vei iko kei au?” E rawa nira wasea na itabagone na isaunitaro era kunea.

• Mera vukei na itabagone na nodra kila na gaunisala mera taracake kina na matanitu ni Kalou, vakaraitaka e dua se sivia vei ira na vidio oqo “We Are Strong Together,” “A Promise for the Lord’s Battalion,” kei na“Youth Responsibility in the Work of Salvation” (ChurchofJesusChrist.org). Na cava eda sa cakava tiko ena noda itikotiko, noda tabanalevu, kei na noda itikotiko raraba me veivuke ena cakacaka ni Kalou? Kerea na peresitedi ni kalasi se kuoramu me vakarautaka na veika e veivosakitaki ena bose ni matabose ni itabagone ni tabanalevu e veiganiti me wasei. Sureti ira na lewe ni kalasi se kuoramu mera wasea na veivakararamataki me baleta na sala e rawa nira veivuke kina ena veika a veivosakitaki.

e kelikeli tiko e dua na goneyalewa

E gadreva na Kalou na marama kei na turaga me cakacakavata ena taraicake ni Nona matanitu.

Cakacaka ena Vakabauta

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito e na nodra cakacakataka na nodra veivakauqeti.

iVurevure Veitokoni

• Luke 2:21–38 (Simioni kei Ana); Cakacaka 9:36–41 (Tapaica, se Tokasa); Mosaia 18:1–17 (Alama); Mosaia 28:1–3 (luvei Mosaia); Alama 8:18–27 (Amuleki); Alama 19:15–17 (Apisi); Vunau kei na Veiyalayalati 25:5–8 (Ema Simici); Mosese 5:10–12 (Atama kei Ivi)

Veivakavulici ena iVakarau ni iVakabula

Nio solia na veisureti me bulataki e dua na ivakavuvuli, vukei ira na vuli mera na kunea na veivakalougatataki e yalataka na Kalou vei ira era bulataka nai vakavuvuli oya.